“Una Go De Tɛl Tɛnki fɔ Ɔltin”

YU NA pɔsin we de tɛl tɛnki? Wi ɔl nid fɔ tink bɔt dis kwɛstyɔn. Di Baybul bin dɔn tɔk se insay dis wi yon tɛm, bɔku pipul dɛn “nɔ go de tɛl tɛnki.” (2 Tim. 3:​2) I go mɔs bi se yu sabi sɔm pipul dɛn we de fil se ɔda pipul dɛn fɔ du sɔntin fɔ dɛn ɔ gi dɛn wetin dɛn want. Dɛn kin fil lɛk se nid nɔ de fɔ lɛ dɛn tɛl tɛnki fɔ wetin dɛn de gi dɛn. Yu go mɔs gri se yu nɔ go gladi fɔ de nia dɛn kayn pipul dɛn de.

Jiova de ɛnkɔrej in pipul dɛn fɔ “sho se [dɛn] gɛt tɛnki.” Wi nid fɔ de “tɛl tɛnki fɔ ɔltin.” (Kol. 3:​15, NWT; 1 Tɛs. 5:​18, NWT) Infakt, i fayn bak fɔ lɛ wi de tɛl tɛnki. Bɔku rizin dɛn de we mek wi fɔ de du dat.

FƆ GƐT TƐNKI DE ƐP WI FƆ FIL FAYN BƆT WISƐF

Wan impɔtant rizin we mek wi fɔ de tɛl tɛnki ɔltɛm na bikɔs i de ɛp wi fɔ fil fayn bɔt wisɛf. We pɔsin tɛl yu tɛnki fɔ sɔntin i go mɔs fil fayn bɔt insɛf, ɛn di pɔsin we i de tɛl tɛnki kin fil fayn bak. Wetin mek fɔ tɛl tɛnki kin mek wi ɛn ɔda pipul dɛn gladi? Lɛ wi tɔk bɔt dis ɛgzampul fɔ ansa da kwɛstyɔn de: If ɔda pipul dɛn gladi fɔ du sɔntin fɔ yu, na bikɔs dɛn fil se yu fit fɔ lɛ dɛn du am fɔ yu. Dɛn bisin bɔt yu. We yu notis se dɛn bisin bɔt yu, dat go mek yu fil fayn. Wi no se na dat bin apin to Ruth. Boaz bin fri-an to Ruth. Wi nɔ gɛt wan dawt fɔ se Ruth bin rili gladi fɔ no se sɔmbɔdi rili bisin bɔt am.—Ruth 2:​10-13.

I rili impɔtant fɔ lɛ wi tɛl Gɔd tɛnki. I go mɔs bi se wan wantɛm yu go dɔn de tink bɔt di bɔku gift dɛn we Jiova dɔn gi fɔ lɛ wi gɛt tayt padi biznɛs wit am ɛn bɔku ɔda gift dɛn we i de gi ɛn kɔntinyu fɔ gi. (Dit. 8:​17, 18; Akt 14:​17) Bifo wi jɔs tink smɔl bɔt di gud tin dɛn we Gɔd dɔn du fɔ wi, i go fayn fɔ lɛ wi tek tɛm tink bɔt di bɔku we dɛn aw Gɔd dɔn blɛs wi ɛn di wan dɛn we wi lɛk. We wi tink gud gud wan bɔt di kayn we aw di Wan we mek ɔltin fri-an, dat go mek wi tɛl am tɛnki mɔ ɛn mɔ ɛn tink bɔt aw i rili lɛk wi ɛn gladi fɔ wi.—1 Jɔn 4:​9.

Bɔt wi nɔ fɔ jɔs tink bɔt di we aw Jiova fri-an ɛn di blɛs we i de blɛs wi; wi fɔ tɛl am tɛnki fɔ di gud tin dɛn we i de du fɔ wi. (Sam 100:​4, 5) Dɛn kin tɔk se we yu tɛl ɔda pipul dɛn tɛnki, dat de mek pipul dɛn rili gladi.

IF YU DE TƐL TƐNKI, YU PADI BIZNƐS WIT ƆDA PIPUL GO TAYT MƆ ƐN MƆ

Wan ɔda rizin we mek i fayn fɔ tɛl tɛnki na bikɔs i de mek wi gɛt tayt padi biznɛs wit ɔda pipul dɛn. Wi ɔl kin lɛk fɔ no se ɔda pipul dɛn gladi fɔ wi. We yu tɛl ɔda pipul dɛn tɛnki wit ɔl yu at, dat de mek una ɔl tu bi tayt padi. (Rom 16:​3, 4) Dɔn bak, pɔsin we de tɛl tɛnki kin bi pɔsin we de ɛp ɔda pipul dɛn. Dɛn kin notis we ɔda pipul dɛn du gud to dɛn ɛn dat kin mek dɛn du gud to ɔda pipul dɛn. Fɔ tru, we wi ɛp ɔda pipul dɛn dat de mek wi gɛt gladi-at. I jɔs tan lɛk wetin Jizɔs bin tɔk we i se: “Di pɔsin we de gi gɛt blɛsin [“gladi,” NWT] pas di pɔsin we de gɛt.”—Akt 20:​35.

Rɔbɔt Emɔns we na kodayrɛktɔ fɔ wan stɔdi projɛt we dɛn du bɔt tɛnki na di Yunivasiti ɔf Kalifonia bin tɔk se: “Fɔ lɛ wi ebul fɔ tɛl tɛnki, wi nid fɔ ɔndastand se wi nid wisɛf. Sɔntɛnde, wi de gi ɛn sɔntɛnde na ɔda pipul dɛn de gi wi.” So fɔ lɛ wi go kɔntinyu fɔ de alayf ɛn gɛt gladi-at, wi rili nid wisɛf pan plɛnti tin dɛn. Fɔ ɛgzampul, dɛn go gi wi it ɔ ɛp wi di tɛm we wi sik. (1 Kɔr. 12:​21) Pɔsin we de tɛl tɛnki kin rili gladi we ɔda pipul dɛn du sɔntin fɔ am. Frɔm wetin wi dɔn tɔk, yu dɔn mek am abit fɔ de tɛl tɛnki to ɔda pipul dɛn fɔ wetin dɛn de du fɔ yu?

TƐNKI ƐN DI WE AW WI DE TEK TIN NA LAYF

Wan ɔda rizin we mek i fayn fɔ lɛ wi de tɛl tɛnki na bikɔs dat de ɛp wi fɔ pe atɛnshɔn mɔ pan gud tin dɛn pas di bad tin dɛn. Wi go se wi maynd tan lɛk shifta. I de mek wi tink mɔ bɔt gud tin dɛn ɛn nɔ alaw wisɛf fɔ tink bɔt bad tin dɛn. Yu go de si mɔ di gud tin dɛn ɛn nɔ pe atɛnshɔn pan di mistek dɛn. Di mɔ we yu de tɛl tɛnki, na di mɔ yu go de si gud tin dɛn we go mek yu rili gladi. If yu pe atɛnshɔn pan di tin dɛn we go mek yu tɛl tɛnki, dat go ɛp yu fɔ du wetin di apɔsul Pɔl bin tɛl wi fɔ du we i se: “Una gladi ɔltɛm bikɔs ɔf di Masta.”—Fil. 4:​4, NWT.

We yu de tɛl tɛnki, dat go mek yu nɔ de tink bad bɔt pɔsin. I rili nɔ izi fɔ tɛl tɛnki we yu de jɛlɔs, yu at pwɛl ɔ yu vɛks. Pipul dɛn we de tɛl tɛnki nɔ kin want want. Dɛn kin satisfay wit wetin dɛn gɛt ɛn dɛn nɔ de pe atɛnshɔn mɔ pan aw fɔ gɛt bɔku prɔpati.—Fil. 4:​12.

TINK BƆT ƆL DI BLƐSIN DƐN WE YU DƆN GƐT!

As Kristian, yu fɔ no se Setan want mek yu nɔ gladi ɛn fɔ lɛ yu de fil bad bɔt di bad tin dɛn we de apin to yu insay dis las dez. I go gladi if yu de fil bad ɛn de kɔmplen ɔltɛm. If yu na da kayn pɔsin de, dat go mek i nɔ izi fɔ lɛ pipul dɛn lisin to yu we yu de prich di gud nyuz. Fɔ tɛl tɛnki gɛt sɔntin fɔ du wit di kwaliti dɛn we Gɔd in spirit de mek pɔsin gɛt. Fɔ ɛgzampul, wi gladi bikɔs wi de si di gud tin dɛn we Gɔd dɔn gi wi ɛn wi gɛt fet pan di tin dɛn we i dɔn prɔmis wi se i go du tumara bambay.—Gal. 5:​22, 23.

As wan pan Jiova in pipul dɛn, yu go mɔs gri wit wetin wi dɔn tɔk bɔt insay dis atikul bɔt tɛnki. Bɔt stil, yu go kam fɔ no se i nɔ kin izi ɔltɛm fɔ tɛl tɛnki, ɛn fɔ tink di rayt we. Nɔ alaw dat fɔ mek yu at pwɛl. Yu kin lan fɔ tɛl tɛnki ɛn kɔntinyu fɔ du dat. Aw? Tek tɛm tink ɛnide bɔt sɔm tin dɛn na yu layf we yu nid fɔ tɛl tɛnki fɔ. Di mɔ yu du dat, na di mɔ i go izi fɔ yu fɔ de tɛl tɛnki. Dat go mek yu gladi pas di wan dɛn we de pe atɛnshɔn pan di we aw tin tranga na layf. Na fɔ de tink bɔt di gud tin dɛn we Gɔd ɛn ɔda pipul dɛn de du fɔ yu fɔ ɛnkɔrej yu fɔ mek yu gladi. Yu kin ivin stat fɔ rayt di gud tin dɛn we dɛn de du fɔ yu. Yu kin rayt tu ɔ tri tin dɛn we mek yu rili gladi da de de.

Masta sabi bukman dɛn dɔn kam fɔ no se we wi de tɛl tɛnki to ɔda pipul dɛn ɔltɛm, dat de chenj di we aw wi bren de wok so dat i go izi fɔ lɛ wi fil gud bɔt wi layf. Pɔsin we de tɛl tɛnki de gladi ɔltɛm. Tink bɔt ɔl di blɛsin dɛn we yu dɔn gɛt, ɛnjɔy di gud tin dɛn we dɔn apin to yu, ɛn go de tɛl tɛnki ɔltɛm! Nɔ jɔs fɔgɛt bɔt di gud tin dɛn we yu dɔn gɛt, bifo dat na fɔ de “tɛl PAPA GƆD [“Jiova,” NWT] tɛnki, bikɔs i gud.” So na fɔ “de tɛl tɛnki fɔ ɔltin.”—1 Kro. 16:​34; 1 Tɛs. 5:​18, NWT.