Yu Mɛmba?
Yu tink se yu go ebul ansa dɛn kwɛstyɔn dɛn ya we kɔmɔt frɔm di 2019 Wachtawa dɛn?
Wetin Gɔd in prɔmis min we i se: “Nɔn wɛpɔn we dɛn mek fɔ kil yu, nɔ go wok”? (Ayz. 54:17)
Wi biliv se Gɔd go protɛkt wi frɔm “dɛn wan we de du bad ɛn nɔ luk biɛn.” (Ayz. 25:4, 5) Wi ɛnimi dɛn nɔ go ɛva mek wi sɔfa sote go.—w19.01, pej 6 ɛn pej 7.
Aw di we aw Gɔd bin trit di Kenanayt dɛn ɛn di trangayes Izrɛlayt dɛn sho se i de du tin tret?
Gɔd bin jɔj ɔl di wan we bin de du mami ɛn dadi biznɛs dɔti we ɔ we bin de du bad tin to uman dɛn ɛn pikin dɛn. I bin de blɛs pipul dɛn we de obe am ɛn we bin de du tin tret wit ɔda pipul dɛn.—w19.02, pej 22 ɛn pej 23.
Wetin wi go du if wi de usay pɔsin we nɔ de sav Jiova de pre?
Wi kin sho rɛspɛkt ɛn nɔ tɔk natin. Wi nɔ go jɔyn dɛn fɔ se “emɛn” ɔ ol ɔda pipul dɛn an we dɛn de pre. Wi kin disayd fɔ pre fɔ wisɛf na wi at.—w19.03, pej 31.
Wetin mek na siriɔs kraym fɔ du mami ɛn dadi biznɛs wit pikin?
Fɔ du mami ɛn dadi biznɛs wit pikin na sin agens di pikin, na sin agens di kɔngrigeshɔn, na kraym agens di gɔvmɛnt, ɛn na sin agens Gɔd. If di gɔvmɛnt put lɔ se dɛn fɔ ripɔt ɛnibɔdi we du mami ɛn dadi biznɛs wit pikin di ɛlda dɛn kin obe da lɔ de.—w19.05, pej 9 ɛn pej 10.
Aw yu go chenj di we aw yu de tink?
Sɔm impɔtant tin dɛn na: Pre to Jiova. Tink gud gud wan bɔt di say dɛn we yu nid fɔ chenj. Pik gud padi dɛn.—w19.06, pej 11.
Aw wi go rɛdi wisɛf naw fɔ di tɛm we dɛn go mek wi sɔfa?
Wi nid fɔ gɛt tayt padi biznɛs wit Jiova. Wi fɔ biliv se i lɛk wi ɛn i nɔ go ɛva lɛf wi. Rid di Baybul ɛvride, ɛn pre to am ɔltɛm. Na fɔ biliv tranga wan se Gɔd in Kiŋdɔm go briŋ blɛsin dɛn we go mɔs bi. Na fɔ kram di skripchɔ dɛn we yu lɛk ɛn siŋ dɛn fɔ prez Jiova.—w19.07, pej 2 to pej 4.
Wetin wi go du fɔ ɛp wi fambul dɛn so dat dɛn go sev?
I rili impɔtant fɔ lɛ wi ɔndastand aw dɛn de fil, sɛt gud ɛgzampul, peshɛnt wit dɛn, ɛn tek tɛm tɔk.—w19.08, pej 15 to pej 17.
Aw di prɔmis we Jizɔs mek na Matyu 11:28 go mek wi fil fayn?
Wi gɛt Kristian ovasia dɛn we lɛk wi, wi gɛt di bɛst padi dɛn, ɛn wi gɛt di bɛst wok.—w19.09, pej 23.
Aw Gɔd kin mek wi want fɔ du wetin i want ɛn di trɛnk fɔ du am? (Fil. 2:13)
As wi de rid Gɔd in Wɔd ɛn tink gud gud wan bɔt am, Gɔd go gi wi trɛnk, i go mek wi want fɔ du wetin i want ɛn di trɛnk fɔ du am. In oli spirit de ɛp wi fɔ lɛ wi ebul fɔ du gud gud wan di tin dɛn we wi sabi.—w19.10, pej 21.
Wetin na sɔm pan di impɔtant tin dɛn we wi fɔ du bifo wi disayd fɔ du siriɔs tin?
Di fayv tin dɛn na: Du risach gud gud wan. Pre fɔ sɛns. Tink gud gud wan bɔt wetin mek yu de disayd fɔ du sɔntin. Sɛt patikyula gol dɛn. Tink di rayt we.—w19.11, pej 27 to pej 29.
Fɔ se di lay lay tichin we dɛn de tich tide bɔt di sol we nɔ de day kɔmɔt frɔm wetin Setan bin tɛl Iv?
Nɔ-o. Setan bin tɛl Iv se i nɔ go day, i nɔ bin tɛl am se i go tan lɛk se i go day. Ɛni lay lay wɔship we bin de da tɛm de bin dɔn di tɛm we Gɔd bin mek di Flɔd kam. So di lay lay tichin tide fɔ se mɔtalman sol nɔ de day go dɔn stat bifo Gɔd skata di pipul dɛn we bin de bil di tawa na Babɛl.—w19.12, pej 15.