Nɔ Jɔs Sɛt Mɔt we Yu ɛn Ɔda Pɔsin De Prich
1. Aw wi go falamakata di apɔsul Pɔl we wi de prich wit ɔda pɔblisha na fil savis?
1 Di apɔsul Pɔl bin si di tɛm we i bin de spɛn wit in kɔmpin Kristian dɛn as tɛm fɔ lɛ dɛn ɛnkɔrej dɛnsɛf. (Rom 1:12) We yu de prich wit ɔda pɔblisha na fil savis, yu kin yuz da tɛm de fɔ ɛnkɔrej ɛn ɛp am? Bifo yu jɔs sɛt mɔt we yu ɛn ɔda pɔsin de prich, tɛl am wetin dɔn ɛp yu fɔ sabi prich.
2. Wetin wi go du fɔ mek di pɔsin we wi ɔl tu de prich biliv se i sabi prich? Wetin mek dis rili impɔtant?
2 Mek Lɛ I Biliv Se I Rili Sabi Prich: Sɔm pɔblisha dɛn nɔ biliv se dɛn rili sabi prich. Yu kin no dis bay di we aw dɛn de mek dɛn fes ɛn dɛn vɔys. Wi kin ebul mek dɛn biliv se dɛn sabi prich bay we wi prez dɛn ɛn tɛl dɛn tɛnki. Us ɔda we dɛn wi kin ebul mek ɔda pɔsin biliv se i sabi prich? Wan travlin ovasia bin tɔk se i kin tɛl di pɔsin we dɛn ɔl tu de prich, bɔt sɔm pan di tin dɛn we nɔ kin izi fɔ am fɔ du we i de prich, ɛn aw i kin pre to Jiova ɔltɛm fɔ mek i ɛp am. Wan ɔda brɔda bin tɔk bɔt wetin kin ɛp am we i de prich. I bin se: “A kin smayl fɔs. Sɔntɛnde, pas a pre fɔ mek Jiova ɛp mi so dat a go ebul fɔ smayl.” Yusɛf gɛt ɛnitin we dɔn ɛp yu fɔ mek yu biliv se yu sabi prich? If yu ansa na yɛs, tɛl di pɔsin we una ɔl tu de prich, bɔt wetin dɔn ɛp yu.
3. Wetin yu go tɛl di pɔsin we una ɔl tu de prich we go ɛp am fɔ mek i ebul prich gud gud wan?
3 Sho Am Aw Yu Kin Prich: Yu gɛt ɛni simpul tin we yu kin tɔk, ɔ kwɛstyɔn we yu kin aks bɔt di tin dɛn we kin apin na yu eria we kin mek pipul dɛn lisin to yu gud gud wan we yu de prich? Di Kiŋdɔm Ministri gɛt sɔm ɛgzampul dɛn we de sho wi aw fɔ prich wit di magazin dɛn. Bɔt yu gɛt ɛni we aw yu dɔn mek dɛn ɛgzampul ya we dɔn mek bɔku pipul dɛn kin want fɔ no mɔ bɔt di Baybul? Tɛl di pɔsin we una ɔl tu de prich. (Prɔv. 27:17) We yu ɛn ɔda pɔblisha de go to pɔsin we yu bin dɔn tɔk to, na fɔ tɛl di pɔblisha wetin yu plan fɔ du we yu go to di pɔsin ɛn aw yu go du am. Afta yu dɔn stɔdi di Baybul wit sɔmbɔdi, yu kin ɛksplen to di ɔda pɔblisha wetin mek yu yuz wan patikyula pɔynt, ɔ skripchɔ, ɔ we fɔ ɛp di pɔsin.
4. Wetin mek wi fɔ rili tray fɔ de ɛp wi kɔmpin Kristian dɛn?
4 Di Kristian dɛn we bin de di tɛm we di apɔsul dɛn bin de, nɔ bin jɔs de ɛp ɔda pipul dɛn. Dɛn bin si se i rili impɔtant fɔ de ɛp ɛn ɛnkɔrej dɛn Kristian brɔda dɛn. (Akt 11:23; 15:32) Di apɔsul Pɔl bin tren yɔŋ Timoti ɛn ɛnkɔrej am fɔ tɛl ɔda pipul dɛn bɔt wetin i dɔn lan. (2 Tim. 2:2) Lɛ wi nɔ fɔgɛt fɔ du gud tin dɛn fɔ wi Kristian brɔda ɛn sista dɛn we wi de na fil savis. We wi du dat, wi go mek dɛn gladi mɔ ɛn wi go ivin mek dɛn sabi aw fɔ prich gud gud wan. Bɔt wetin pas ɔl na dat, wi go mek wi Papa we de na ɛvin, in at gladi.—Ibru 13:15, 16.