Stat Baybul Stɔdi wit—Pipul dɛn We Yu Kin Gi Magazin Ɔltɛm
1. Wetin mek i dɔn te we Jiova in ɔganayzeshɔn de ɛnkɔrej wi fɔ gɛt pipul dɛn we wi go de gi di magazin dɛn ɔltɛm?
1 Bɔku pipul dɛn nɔ kin want fɔ stɔdi di Baybul wit wi, bɔt dɛn kin ɛnjɔy fɔ rid wi magazin dɛn. Na dat mek, i dɔn te we Jiova in ɔganayzeshɔn de ɛnkɔrej wi fɔ gɛt pipul dɛn we wi go de gi di magazin dɛn ɔltɛm. As pipul dɛn de rid wi magazin dɛn ɔltɛm, dɛn go want fɔ yɛri Gɔd in wɔd mɔ. (1 Pit. 2:2) Wande wande, dɛn go rid sɔntin we dɛn lɛk, ɛn dat go mek dɛn gri fɔ stɔdi di Baybul.
2. Wetin wi go du fɔ mek di wan dɛn we wi kin gi magazin ɔltɛm, want fɔ lan mɔ bɔt Gɔd?
2 ‘Wata’ di Sid na di Pɔsin in At: Nɔ jɔs gi di magazin to di pɔsin ɛn kɔmɔt de kwik kwik wan. Tɔk to di pɔsin ɛn tray fɔ mek padi wit am. Dis go ɛp yu fɔ no wetin i lɛk, wetin i biliv, ɛn ɔda tin dɛn bɔt am. Ɔl dis go ɛp yu fɔ no wetin yu go tɛl di pɔsin. (Prɔv. 16:23) Rɛdi yusɛf ɛnitɛm we yu want go de. If i pɔsibul, tek smɔl tɛm fɔ sho am wan pɔynt ɛn wan skripchɔ we de na di magazin. We yu de du dis, i go jɔs tan lɛk se yu de wata di sid we yu bin dɔn plant na in at. (1 Kɔr. 3:6) Ɛnitɛm we yu go to di pɔsin, rayt da de de na buk, rayt di buk ɔ magazin we yu lɛf wit am, di tin dɛn we una tɔk bɔt, ɛn di skripchɔ dɛn we una rid.
3. Aw lɔng i fɔ tek bifo yu go bak to di pɔsin we yu kin gi magazin ɔltɛm?
3 Aw lɔng i fɔ tek bifo yu go bak? Yu fɔ go to di pɔsin wan tɛm insay di mɔnt fɔ go gi am di nyu magazin dɛn. Bɔt if yu gɛt chans ɛn di pɔsin rili want fɔ no mɔ, yu kin go de fast fast. Fɔ ɛgzampul, wan ɔ tu wiks afta yu dɔn gi am di magazin dɛn, yu kin go de bak ɛn tɛl am se, “A jɔs pas fɔ sho yu sɔntin insay di magazin dɛn we a bin gi yu.” Dis go mek i want fɔ rid da patikyula say de na di magazin. If i bin dɔn rid am, yu kin aks am wetin i tink bɔt wetin i dɔn rid ɛn tɔk smɔl bɔt am. Ɔ if di pɔsin kin ɛnjɔy fɔ rid wi buk ɛn magazin dɛn, yu kin go bak ɛn gi am di trakt, ɔ ɛni ɔda tin we wi de yuz fɔ prich da mɔnt de.
4. Wetin wi fɔ de du wan wan tɛm we go ɛp wi fɔ no if di wan dɛn we wi kin gi di magazin dɛn ɔltɛm, want fɔ stɔdi di Baybul?
4 Nɔ wet mek di pɔsin aks yu fɔ stɔdi di Baybul wit am. Yu fɔs aks am. Ilɛk i bin dɔn tɛl yu se i nɔ want fɔ stɔdi di Baybul, we i te smɔl na fɔ sho am di say na Di Wachtawa we se “Di Baybul in Ansa to Sɔm Kwɛstyɔn Dɛn” ɛn si if i go want mek una ɔl tu tɔk smɔl bɔt am. Sɔntɛm, yu kin ivin tinap na in domɔt ɛn stat fɔ stɔdi di Baybul wit am. Bɔt if ivin yu nɔ ebul stɔdi wit am, yu kin stil kɛr di magazin dɛn go fɔ am fɔ mek i kɔntinyu fɔ lan mɔ bɔt Gɔd.