Wetin Wi Kin Lan Frɔm Prɔfɛt—Neum
1. Wetin wi go lan frɔm di Baybul buk we nem Neum?
1 Di pwɛl we Ninivɛ pwɛl tide de sho klia wan se jɔs lɛk wetin Neum bin tɔk, Jiova kin vɛks pan in ɛnimi dɛn ɛn ivin di wan we bad pas ɔl nɔ ebul tinap bifo am. (Neum 1:2, 6) We wi tek tɛm rid di tin dɛn we Neum bin dɔn tɔk se go apin, wi go lan bɔku tin dɛn we go ɛp wi we wi de prich.
2. Aw wi go kɔntinyu fɔ mek wi mɛsej gi op to pipul dɛn?
2 Gi Kɔrej ɛn Op: We yu rid Neum in buk fɔ di fɔs tɛm, i tan lɛk se na soso trɔbul i tɔk bɔt Ninevɛ we na di kapital siti fɔ Asiria. (Neum 1:1; 3:7) Bɔt Neum in mɛsej na gud nyus fɔ Jiova in pipul dɛn. Neum in nem min “fɔ gi kɔrej.” Dat gi op to di Ju dɛn fɔ se i nɔ go te igen dɛn ɛnimi nɔ go de igen. Neum bin mek di pipul dɛn biliv bak se Jiova “de pul pɔsin kɔmɔt pan trɔbul.” (Neum 1:7) Semweso, wi fɔ tɛl pipul dɛn di gud nyus ɛn gi dɛn kɔrej fɔ go to Jiova fɔ ɛp.—Neum 1:15.
3. Aw wi go falamakata di kayn we aw Neum bin de yuz ɛgzampul ɔ parebul?
3 Yuz Ɛgzampul ɛn Parebul: Jiova bin mek Neum kɔmpia di we aw Ninivɛ bin pwɛl to di we aw dɛn bin pwɛl wan siti na Ijipt we nem Thibis. (Neum 3:8-10) We wi de tɔk to pipul dɛn fɔ se Gɔd de kam pul ɔl di bad bad tin dɛn we de apin na di wɔl, wi fɔ sho dɛn pruv na di Baybul fɔ se ɔl wetin Jiova bin dɔn tɔk, go mɔs bi. Fɔ ɛgzampul, we di pipul dɛn we kɔmɔt Babilɔn ɛn Midya bin kam fɔ fɛt di pipul dɛn na Ninivɛ insay 632 bifo Krays, ɛbi ren bin mek di wata na wan riva we nem Riva Taygris bin bɔku sote wan say na di siti in wɔl bin fɔdɔm. Nɔbɔdi nɔ bin fil se pɔsin go ebul go insay di siti. Lɛk aw Jiova bin dɔn tɔk, i bin izi fɔ mek dɛn kapchɔ Ninivɛ.—Neum 1:8; 2:6.
4. Aw wi go tɔk klia wan ɛn mek pipul dɛn ɔndastand wi we wi de prich?
4 Tɔk Klia Wan ɛn Mek Pipul dɛn Ɔndastand: Di stayl we Neum yuz fɔ rayt na wan we de sho klia wan aw tin apin ɛn i fiba drama. Ɔl wetin i bin rayt bin klia. (Neum 1:14; 3:1) Semweso, wi fɔ tɔk di kayn we we go izi fɔ mek pipul dɛn ɔndastand wi. (1 Kɔr. 14:9) Di fɔs tɛm we yu go prich to pɔsin, ɛksplen klia wan wetin mek yu kam to am. As yu ɛn di pɔsin de stɔdi di Baybul, ɛp am fɔ gɛt fet pan Jiova ɛn in Wɔd, di Baybul. Ɛp am bak fɔ mek i gladi fɔ di tin dɛn we i de lan ɛn aw dɛn de bɛnifit am.—Rom 10:14.
5. Us op wi gɛt frɔm wetin Neum bin dɔn tɔk?
5 Di kayn we aw Neum bin abop pan Jiova fɔ se ɛnitin i tɔk go mɔs bi, bin sho klia wan pan wetin i rayt insay di buk na di Baybul we gɛt in nem. As di tɛm de nia fɔ mek Jiova pul Setan in wɔl kɔmɔt, wi go gɛt kɔrej fɔ no se, ‘Gɔd go dɔn wit wikɛd pipul dɛn kpatakpata; dɛn nɔ go de fɔ plan bad fɔ am tu tɛm.’—Neum 1:9.