Nyu Siŋ dɛn fɔ Wɔship!
1 We Watch Tower Bible and Tract Society of Pennsylvania bin ol di mitin we dɛn kin gɛt wan tɛm pan ia, insay Ɔktoba 4, 2014, dɛn bin anawns se dɛn go chenj di we aw di siŋ buk de naw. Dat na bin gud nyus! Dɛn bin mɛmba di ɔdiɛns bɔt aw dɛn Kiŋdɔm siŋ ya impɔtant we wi de wɔship Jiova.—Sam 96:2.
2 Yu go de wɔnda, ‘Wetin mek nid de fɔ chenj di we aw di siŋ buk de?’ Bɔku rizin dɛn de. Wan rizin na bikɔs di we aw wi ɔndastand di Baybul dɔn de chenj ɛn dat de afɛkt wi siŋ dɛn. (Prɔv. 4:18) Ɔda rizin na dat: Na frɔm di New World Translation Baybul we wi bin de yuz fɔs dɛn pul bɔku pan di wɔd dɛn we de na di siŋ buk we wi de yuz naw. Dɛn fɔ ajɔst di wɔd dɛn so dat i go fit di wɔd dɛn we de insay di nyu Baybul. Bikɔs bɔku wok go de fɔ chenj di wɔd dɛn to nyu wan, dɛn bin disayd fɔ ad sɔm nyu siŋ dɛn na di siŋ buk.
3 Wi go nid fɔ wet te dɛn print nyu siŋ buk bifo wi bigin yuz di nyu siŋ dɛn? Nɔ, nid nɔ de. Wi gladi fɔ tɛl una se insay sɔm mɔnt dɛn we go kam, dɛn go put di nyu siŋ dɛn na wi wɛbsayt we na jw.org. We ɛni nyu siŋ kɔmɔt, na in wi go siŋ we di Savis Mitin dɔn. Dɛn go rayt nia de “nyu siŋ.”
4 Aw fɔ Lan di Nyu Siŋ Dɛn: I nɔ kin izi fɔ lan nyu siŋ. Bɔt wi fɔ tan lɛk wan pan di man dɛn we rayt di Sam buk we bin se: “A nɔ go sɛt mi mɔt.” Wisɛf fɔ siŋ we wi kam mitin. (Sam 30:12) Fɔ lan nyu siŋ, du wetin de dɔŋ ya.
Lisin di siŋ in tyun bɔku tɛm. I go de na wi wɛbsayt. Di mɔ yu de lisin to di tyun, na di mɔ i go izi fɔ lɛ yu mɛmba am.
Stɔdi di wɔd dɛn ɛn tray fɔ kram dɛn.
Siŋ di tyun wit di wɔd dɛn. Du am te yu sabi di siŋ gud gud wan.
Una siŋ di nyu siŋ dɛn bɔku tɛm insay una Famili Wɔship sote ɔlman sabi siŋ dɛn.
5 Insay di mɔnt dɛn we de kam, if na di nyu siŋ wi gɛt fɔ siŋ we di Savis Mitin dɔn, di ɔdiɛns go lisin to di tyun wan tɛm. Di ɔdiɛns go siŋ di siŋ as di tyun de ple lɛk aw wi kin du we wi de siŋ ɔda siŋ dɛn.
6 If yu tink gud wan bɔt dat, yu go si se fɔ siŋ na mitin de gi wi chans fɔ mek wi ɔl jɔyn wi vɔys dɛn fɔ prez Jiova. So i nɔ go fayn fɔ mek wi kɔmɔt na wi sidɔm ples fɔ natin we dɛn dɔn sho di siŋ we wi fɔ siŋ.
7 Ɔda we de we wi go sho se wi rili gladi fɔ di siŋ dɛn we wi de yuz fɔ wɔship Jiova. Na asɛmbli ɛn kɔnvɛnshɔn dɛn, bifo di program stat na mɔnin ɛn aftanun, dɛn kin ple kiŋdɔm siŋ dɛn. Sɔm brɔda ɛn sista dɛn kin yuz dɛn yon mɔni fɔ travul tu tɛm insay di ia fɔ go na Patasin, Nyu Yɔk, fɔ go mek fayn fayn myuzik dɛn we wi fɔ yuz na wi wɔship. So we di chiaman tɛl wi fɔ go sidɔm ɛn lisin to di Kiŋdɔm siŋ dɛn, wi fɔ du dat. We wi du dis i go ɛp wi fɔ rɛdi wi at fɔ di tin dɛn we gɛt fɔ kam.—Ɛzra 7:10.
8 Tide, wi go dɔn wi mitin wit wan pan di nyu siŋ dɛn we gɛt di taytul “The Kingdom Is in Place—Let It Come!” Dɛn bin ple dis siŋ ya na di mitin we dɛn kin ol wan tɛm pan ia ɛn dɛn mek am fɔ mɛmba di 100 ia we di Kiŋdɔm dɔn bigin rul.
9 Di nyu siŋ dɛn na “gud tin” dɛn frɔm Jiova. (Mat. 12:35a) Lɛ wi mekɔp wi maynd fɔ lan di nyu siŋ dɛn ɛn siŋ dɛn wit ɔl wi at, so dat wi go gi Jiova di prez ɛn ɔnɔ we i fit fɔ gɛt!—Sam 147:1