Yu Go Falamakata Jiova ɛn Jizɔs fɔ Du Tin wit Ɔl Yu At Insay Dis Mɛmorial Tɛm
1. Wetin mek Jiova Witnɛs dɛn kin du ɔl wetin dɛn ebul du insay di Mɛmorial tɛm?
1 Jiova de du ɔl wetin i want fɔ apin, wit ɔl in at. We Ayzaya 9:7 bin de tɔk bɔt sɔm pan di blɛsin dɛn we di Kiŋdɔm go briŋ kam, i bin se: “Na PAPA GƆD Ɔlmayti in pawa go du dat.” Semweso, di tɛm we Gɔd in Pikin bin de na di wɔl, i bin sho se i want fɔ wɔship Gɔd di rayt we wit ɔl in at. (Jɔn 2:13-17; 4:34) Ɛni ia, insay di Mɛmorial tɛm, bɔku pɔblisha dɛn we de ɔlsay na di wɔl kin du ɔl wetin dɛn ebul fɔ falamakata Jiova ɛn Jizɔs bay we dɛn de du mɔ na di prichin wok. Yu go bi wan pan dɛn pipul ya?
2. Wetin fɔ prich wit ɔl wi at go ɛp wi fɔ du frɔm Mach 7?
2 Invayt Pipul dɛn fɔ di Mɛmorial: Dis ia, wi go bigin fɔ invayt pipul dɛn fɔ kam di Mɛmorial, Satide, Mach 7. Plan yusɛf naw fɔ mek yu ebul fɔ prich wit ɔl yu at. Ɔlman na di kɔngrigeshɔn go rili gladi fɔ du mɔ na di prichin wok as dɛn de tray fɔ prich na ɔl di eria dɛn we dɛn kɔngrigeshɔn fɔ prich. Du ɔl wetin yu ebul fɔ yuz di inviteshɔn ɔ di jw.org Wɛbsayt fɔ invayt yu Baybul stɔdi dɛn, yu ritɔn visit dɛn, yu wokmet dɛn, yu fambul dɛn, ɛn yu skulmet dɛn.
3. Aw wi go du mɔ na di prichin wok insay Mach ɛn Epril?
3 Ɔgzilari Payɔnia: If wi lɛk fɔ du gud wit ɔl wi at, dat go mek wi want fɔ du mɔ na di prichin wok. Bikɔs pɔblisha dɛn go gɛt di chans fɔ gi 30 awa insay Mach ɛn Epril, bɔku go ebul fɔ ɔgzilari payɔnia. Insay una famili wɔship ɔ we yu de du yu pasɔnal stɔdi, pre ɛn tink gud wan bɔt aw yu go ebul ɔgzilari payɔnia. (Prɔv. 15:22) Di we aw yu gladi fɔ invayt mɔ pipul dɛn fɔ kam di Mɛmorial go mek ɔda pɔblisha dɛnsɛf want fɔ du mɔ na di prichin wok. If yu ajɔst di tin dɛn we yu de du fɔ mek yu ebul du mɔ, yu go sho se yu want fɔ falamakata Jizɔs fɔ prich wit ɔl yu at.—Mak 6:31-34.
4. Us blɛsin dɛn wi go gɛt if wi falamakata di we aw Jiova ɛn Jizɔs de du tin wit ɔl dɛn at?
4 Insay di Mɛmorial tɛm, wi go gɛt bɔku bɔku blɛsin dɛn if wi falamakata di kayn we aw Jiova ɛn Jizɔs de du tin wit ɔl dɛn at. Wi go ebul fɔ prich to mɔ pipul dɛn na di eria usay wi kɔngrigeshɔn fɔ prich. Wi go gɛt gladi at ɛn wi go satisfay we wi de sav Jiova ɛn we wi de ɛp ɔda pipul dɛn. (Di Apɔsul Dɛn Wok [Akt] 20:35) Di tin we impɔtant pas ɔl na dat wi go de du tin we de mek Gɔd ɛn in Pikin gladi.