Yuz di Pat na di Nyu “New World Translation” we Gɛt di Taytul “An Introduction to God’s Word”

1. Us nyu tin wi dɔn gɛt fɔ ɛp wi fɔ du di prichin wok?

¹ Di nyu New World Translation gɛt wan spɛshal sɛkshɔn na di biginin we gɛt di taytul “An Introduction to God’s Word.” (I de insay Krio na wan smɔl buk) Aw wi go yuz dis pat fɔ pripia sɔntin we wi go want fɔ tɔk we wi de prich? Bikɔs i gɛt skripchɔ dɛn we de ɔnda ɛni Baybul tɔpik jɔs lɛk aw di Reasoning buk de, i go ɛp wi fɔ gɛt sɔntin we wi go yuz fɔ bigin prich.

2. Aw wi go yuz di “Introduction to God’s Word” we wi de prich?

² If yu want fɔ yuz kwɛstyɔn 8, yu kin tɔk se: “Wi kam fɛn una bikɔs bɔku pipul dɛn kin wɔnda, ‘Is God to blame for human suffering?’ [Na sɔm eria dɛn, i bɛtɛ fɔ sho di pɔsin di kwɛstyɔn.] Wetin yu tink? [Alaw di pɔsin fɔ tɔk wetin i tink.] Di Baybul gi fayn ansa to da kwɛstyɔn de.” Rid sɔm pan di skripchɔ dɛn ɛn tɔk bɔt dɛn. If di pɔsin we yu de prich to sho se i want fɔ no mɔ, yu kin sho am di 20 kwɛstyɔn dɛn ɛn mek i pik uswan i go want fɔ mek una tɔk bɔt nɛks tɛm we yu go bak to am. Ɔ yu kin gi am wan pan di buk dɛn we wi kin yuz fɔ stɔdi pipul dɛn we tɔk mɔ bɔt wetin una jɔs dɔn tɔk bɔt.

3. Aw wi kin yuz di “Introduction to God’s Word” fɔ bigin tɔk to pipul dɛn na say usay pipul dɛn nɔto Kristian?

³ Kwɛstyɔn 4 ɛn kwɛstyɔn 13 to 17 kin fayn fɔ yuz mɔ if wi de prich na eria dɛn usay pipul dɛn nɔto Kristian. Fɔ ɛgzampul, yu kin yuz di tin dɛn we de na kwɛstyɔn 17 ɛn se: “Wi kam fɛn una fɔ ɛp famili dɛn. Yu go gri se bɔku prɔblɛm dɛn de we de mit famili dɛn tide? [Alaw di pɔsin fɔ tɔk wetin i tink.] Bɔku mared pipul dɛn dɔn si se dɛn wɔd dɛn ya dɔn ɛp dɛn: ‘Mared uman fɔ rɛspɛkt in man.’ [Yu nɔ nid fɔ tɔk se dɛn wɔd ya so kɔmɔt frɔm Lɛta Fɔ Ɛfisɔs 5:33. If na uman yu de tɔk to, yu kin tɛl am wetin de na Lɛta Fɔ Ɛfisɔs 5:28.] Yu tink se if pɔsin fala dis advays i go bɛnifit am na in mared-os?”

4. Wetin yu go du we yu de dɔn fɔ tɔk to pɔsin we nɔto Kristian?

⁴ We yu de dɔn fɔ tɔk to pɔsin, na fɔ arenj fɔ di tɛm we yu go kam to am bak fɔ mek una go kɔntinyu di tɔk. Sɔntɛm, yu kin plan fɔ tɔk bɔt wan pan di ɔda skripchɔ dɛn frɔm di kwɛstyɔn we yu yuz. We di rayt tɛm rich, mek lɛ di pɔsin we yu de prich to no se na frɔm di Baybul yu pul di fayn fayn tin dɛn we yu dɔn de tɛl am. Di tin dɛn we una bin dɔn de tɔk bɔt ɛn wetin di pɔsin tink bɔt di Baybul go ɛp yu fɔ no us buk ɔ magazin i go rili lɛk fɔ rid.—Rid di atikul we de na pej 3 to pej 5 insay di Disɛmba 2013 Wi Kiŋdɔm Ministri.