Aw fɔ Prich wit Kat ɛn Tebul?

Wi dɔn si se fɔ yuz kat ɛn tebul dɛn usay wi kin put buk ɛn magazin dɛn fɔ prich, na fayn we fɔ mek wi ebul fɔ ɛp pipul dɛn we want fɔ no mɔ bɔt di Baybul fɔ kam na di trut. (Jɔn 6:44) Na dat mek dɛn dɔn ɛnkɔrej ɛlda dɛn fɔ mek dɛn arenj fɔ de du pɔblik prichin na say dɛn usay bɔku pipul dɛn kin pas na di eria usay di kɔngrigeshɔn fɔ prich. Bikɔs wi kin ebul fɔ muv di kat ɛn tebul dɛn we wi de yuz fɔ prich, wi nɔ go nid fɔ tek ɛkskyuz to di bigman dɛn. Udat ɛn udat go fit fɔ prich dis kayn we? Na pɔblisha dɛn we de tink gud wan bɔt udat fɔ prich to, pɔblisha dɛn we de drɛs di kayn we we de sho rɛspɛkt, ɛn pɔblisha dɛn we sabi fɔ tɔk fayn to pɔsin. Lɛ wi tɔk bɔt sɔm tin dɛn we wi fɔ du ɛn tin dɛn we wi nɔ fɔ du we go ɛp wi fɔ ebul prich fayn.

Tin dɛn we wi fɔ du:

Grit di pɔsin fayn, tɔk to am lɛk padi, ɛn tray fɔ ɛp pipul dɛn we de pas. Sɔm pɔblisha dɛn kin smayl ɛn grit di pɔsin fayn. If pɔsin wach di kat ɔ tebul we wi de yuz fɔ prich, yu kin tɔk se, “Yu kin tek sɔntin if yu want.”
Nɔ tinap nia di kat ɔ tebul tumɔs, bɔt dat nɔ min se yu fɔ go tu fa frɔm am. Na sɔm say dɛn, pɔblisha dɛn dɔn ebul fɔ prich to bɔku pipul dɛn we dɛn nɔ go tu fa frɔm di kat ɔ tebul we dɛn de prich wit. Ɔda pɔblisha dɛn dɔn notis se we dɛn de nia tumɔs, dat kin mek pipul dɛn we de pas kin fred fɔ tinap ɛn luk. So dɛn kin tinap fawe smɔl ɛn wet te dɛn si pɔsin tinap nia di kat ɔ tebul. We pɔsin kam nia di tebul ɔ kat, tray fɔ tɔk to am. Yu kin aks am se, “Yu dɔn ɛva tink bɔt dis kwɛstyɔn?”
Yuz di Baybul ɛnitɛm yu gɛt chans.
If di pɔsin tek di Baybul Tich buk ɔ ɛniwan pan di buk dɛn we wi kin yuz fɔ stɔdi pɔsin di Baybul, na fɔ ɛksplen to am aw wi kin du Baybul stɔdi. Ask di pɔsin if i want lɛ yu yuz yu fon ɔ tablɛt fɔ ple di fim we nem Wetin Mek I Fayn fɔ Stɔdi di Baybul?
If pɔsin rili want fɔ no mɔ, na fɔ aks am fɔ in adrɛs ɛn in fon nɔmba. If di pɔsin nɔ de na di eria usay una kɔngrigeshɔn fɔ prich, na fɔ fil di Please Follow Up (S-43) fɔm ɛn gi am to di sɛktri na yu kɔngrigeshɔn wantɛm wantɛm.