Lan Frɔm Pɔblisha dɛn We Rili Sabi Prich

Wi rili valyu pɔblisha dɛn we sabi prich na di kɔngrigeshɔn. Sɔm dɛn dɔn sav Jiova fetful wan fɔ lɔng tɛm. Fɔ sɔm ɔda wan dɛn, i nɔ tu te yet we dɛn dɔn lan aw fɔ prich fayn. Dɛn pɔblisha dɛn ya dɔn si aw Jizɔs de kɔntrol di kɔngrigeshɔn insay dis tɛm we di wɔl want dɔn bay we i de mek di prichin wok de go bifo. (Mat. 28:19, 20) We dɛn de prich, dat dɔn ɛp dɛn fɔ gɛt “pawa” fɔ ebul bia wit prɔblɛm dɛn ɔ ɛni ɔda bad tin we kin mit dɛn. (2 Kɔr. 4:7) Bɔku tin de fɔ lan frɔm dɛn pɔblisha dɛn ya we rili sabi fɔ prich. Ɛnitɛm dɛn gɛt di chans, dɛn kin gladi fɔ tich ɔda pɔblisha dɛn di tin dɛn we dɛn dɔn lan. (Sam 71:18) So i go fayn fɔ lɛ wi gi dɛn chans fɔ mek dɛn tich wi. Aw wi go du dis?

We Wi De Prich. Nyu pɔblisha dɛn ɔ di wan dɛn we nɔ sabi prich fayn nid ɛp fɔ mek dɛn go ebul fɔ prich fayn. Wi go lan bɔku tin dɛn if wi de wach aw di wan dɛn we sabi prich, kin prich. (Rid di tɔd paregraf ɔnda di sɔbɛdin we gɛt di taytul, “Ɛp di Wan dɛn We Jɔs Bigin Prich” insay di atikul we nem, “Kɔntinyu fɔ Prich wit Zil” we de insay di Fɛbwari 1, 2015, Wachtawa.) Aw yu dɔn bɛnifit we yu de prich wit dɛn kayn pɔblisha dɛn ya?

Yu nɔ tink se i go fayn fɔ lɛ yu tɛl wan pɔblisha we rili sabi prich fɔ se yu go lɛk fɔ prich wit am na fil savis? If di pɔblisha sik ɔ i ol, i go fayn wan wantɛm fɔ lɛ yu du wan pan yu Baybul stɔdi dɛn na in os. Afta di stɔdi, aks di pɔblisha wetin i tink bɔt di stɔdi.

Spɛn Tɛm wit Dɛn: Yu go kam fɔ no pɔblisha we rili sabi prich bay we yu spɛn tɛm wit am. Invayt am we yu de du yu famili wɔship ɛn aks am kwɛstyɔn dɛn. If di pɔblisha sik ɔ i ol, yu nɔ tink se i go fayn fɔ arenj fɔ du famili wɔship na in os? Tray fɔ no aw i lan di trut. Us blɛsin dɛn i dɔn ɛnjɔy? Aw i dɔn si di prichin wok dɔn go bifo na di kɔntri? Us gladi at i dɔn gɛt we i de sav Jiova?

Tray fɔ ɔndastand ɛn no se nɔto ɔltin di pɔblisha go ebul fɔ ɛp yu wit. Lɛk wi ɔl, pɔblisha dɛn we dɔn prich fɔ lɔng tɛm gɛt difrɛn gift we i kam pan di prichin wok. (Rom 12:6-8) Sɔm pan dɛn kin dɔn ol ɛn nɔ kin ebul fɔ spɛn bɔku tɛm wit wi. Bɔt, wi kin ebul lan bɔku tin dɛn frɔm dɛn bikɔs dɛn dɔn de sav Jiova fetful wan fɔ lɔng tɛm.