Kwɛstyɔn Bɔks
◼ Pɔblisha dɛn fɔ yuz di Intanɛt fɔ prich ɔ stɔdi di Baybul wit strenja dɛn we de na ɔda kɔntri dɛn?
Sɔm pɔblisha dɛn dɔn yuz di Intanɛt fɔ gɛt Baybul stɔdi dɛn na kɔntri dɛn usay di gɔvmɛnt dɔn stɔp wi wok ɔ na kɔntri dɛn we bɔku pɔblisha dɛn nɔ de. Na sɔm say dɛn, dis dɔn rili ɛp pipul dɛn fɔ lan bɔt Jiova. Bɔt i kin bad we pɔblisha ɛn strenja de sɛn imel to dɛnsɛf. (Rid di Julay 2007 Wi Kiŋdɔm Ministri, pej 3.) Pan ɔl we di pɔblisha du dis bikɔs i want fɔ ɛp pipul dɛn we rili want fɔ no mɔ bɔt di Kiŋdɔm, dɛn kayn tin dɛn de kin mek brɔda ɔ sista bigin kip kɔmpin wit bad padi dɛn ɔ ivin pipul dɛn we dɔn lɛf fɔ wɔship Jiova ɛn we de tɔk bad tin dɛn fɔ ful pipul dɛn. (1 Kɔr. 1:19-25; Kɔl. 2:8) Apat frɔm dat, na kɔntri dɛn usay di gɔvmɛnt dɔn stɔp di prichin wok, i pɔsibul se di gɔvmɛnt de wach ɛni imel we yu go de sɛn. Tin lɛk dat go put di brɔda ɛn sista dɛn we de na da kɔntri de pan trɔbul. So, pɔblisha dɛn nɔ fɔ go na di Intanɛt fɔ go fɛn pipul dɛn fɔ prich di gud nyus to frɔm ɔda kɔntri.
Pas nɔmɔ di branch ɔfis na di kɔntri tɛl wi wetin fɔ du we wi de prich to pɔsin we kam waka na di kɔntri ɔdasay apat frɔm os to os, wi nɔ fɔ tray fɔ ɛp am fɔ no mɔ afta i dɔn go bak na di kɔntri we i kɔmɔt. Bifo dat, wi kin sho am aw fɔ yuz jw.org fɔ no mɔ bɔt di Baybul ɔ aw i fɔ tɔk wit di brɔda dɛn we de na di branch ɔfis we de na di kɔntri. Wi kin ɛnkɔrej am bak fɔ go na di Kiŋdɔm Ɔl we de nia am. Na tru se Kiŋdɔm Ɔl nɔ de na sɔm kɔntri dɛn. So if i want fɔ lɛ Jiova Witnɛs dɛn we de na in eria go fɛn am, wi kin fil di Please Follow Up (S-43) fɔm ɛn gi am to di sɛktri, in go yuz jw.org fɔ sɛn am. Di branch ɔfis we de ɛp wit di wok na di kɔntri usay di pɔsin de, go no wetin de apin de ɛn na dɛn go rili no aw fɔ ɛp am fɔ no mɔ.—Rid di Jun 2014 Wi Kiŋdɔm Ministri, pej 7, ɛn di Novɛmba 2011 Wi Kiŋdɔm Ministri, pej 2.
If pɔsin we wi de stɔdi di Baybul wit naw naw, muf go na ɔda kɔntri ɔ if wi de stɔdi wit pɔsin we de na ɔda kɔntri we na di Intanɛt nɔmɔ wi sabi am, wi fɔ du wetin wi dɔn tɔk bɔt ɔp. Bɔt wi kin kɔntinyu fɔ ɛp am te pɔblisha we de na in eria ebul fɔ de go fɛn am. Pan ɔl dat, if di pɔsin de na kɔntri usay di gɔvmɛnt dɔn stɔp di prichin wok, wi fɔ tek tɛm we wi de yuz lɛta, tɛlifon, tablɛt ɔ ɔda kayn we fɔ tɔk bɔt di Baybul wit am.—Mat. 10:16.