Tin dɛn fɔ Ɛp Wi Tich
1. Aw Kristian dɛn we de prich tan lɛk wokman dɛn?
1 Wokman dɛn de yuz difrɛn tin dɛn fɔ wok. Na wan wan tɛm dɛn kin yuz sɔm pan dɛn, bɔt ɔda men wan dɛn de we dɛn kin yuz ɔltɛm fɔ wok. Wokman dɛn kin gɛt dɛn kayn tin dɛn ya ɔltɛm we dɛn de wok, ɛn na dɛn tin dɛn ya dɛn kin rili sabi fɔ wok wit. Di Baybul ɛnkɔrej ɔl Kristian dɛn fɔ sabi prich fayn ɛn fɔ bi “wokman we nɔ de shem fɔ du in wok.” (2 Tim. 2:15) Us tin impɔtant pas ɔl we wi kin yuz fɔ ‘mek disaypul’? (Mat. 28:19, 20) Na Gɔd in Wɔd. So yu fɔ tray tranga wan fɔ sabi fɔ “lan pipul di tru wɔd bɔt Gɔd, aw yu fɔ lan dɛn.” Bɔt ɔda tin dɛn de we ɔl Kristian dɛn fɔ lan aw fɔ yuz fayn fɔ tich pipul dɛn di trut.—Prɔv. 22:29.
2. Wetin na sɔm tin dɛn we wi kin yuz fɔ tich pipul dɛn?
2 Tin dɛn we Wi De Yuz Fas Fas fɔ Prich: Apat frɔm di Baybul, us ɔda tin dɛn wi fɔ yuz fɔ tich? Wan men wan we wi gɛt fɔ tich pipul dɛn di trut, na di buk we nem Wetin Rili di Baybul De Tich? Afta wi dɔn fɔ stɔdi pɔsin dis buk, wi kin yuz di buk we nem Kɔntinyu fɔ Du Wetin Go Mek Gɔd Lɛk Yu fɔ tich am fɔ fala di advays dɛn we de na di Baybul pan ɔltin we i de du. So i go fayn fɔ lɛ wi rili sabi yuz dɛn tu buk dɛn ya so gud gud wan. Sɔm ɔda smɔl buk dɛn de bak we wi fɔ yuz. Wan buk we wi kin yuz fɔ stat Baybul stɔdi na Gɔd Gɛt Gud Nyus fɔ Wi! If bɔku pipul dɛn na di eria we wi de prich nɔ sabi rid fayn ɔ dɛn de tɔk langwej we wi nɔ gɛt bɛtɛ buk dɛn insay da langwej de, ɔ sɔntɛm buk nɔ de insay da langwej de sɛf, wi kin yuz Lisin to Gɔd ɔ Lisin to Gɔd ɛn De Sote Go. Wan ɔda buk we go ɛp wi Baybul stɔdi dɛn fɔ no mɔ bɔt di ɔganayzeshɔn na di buk we nem Udat dɛn De Du Wetin Jiova Want? Fim dɛn we go ɛp wi fɔ mek disaypul dɛn ɛn we wi fɔ lan aw fɔ yuz gud gud wan na lɛk, Wetin Mek I Fayn fɔ Stɔdi di Baybul?, Wetin Kin Apin na Kiŋdɔm Ɔl? ɛn Does God Have a Name?
3. Wetin sɔm atikul dɛn we gɛt fɔ de kam na Wi Kiŋdɔm Ministri go ɛp wi fɔ du?
3 Sɔm atikul dɛn gɛt fɔ de kam na Wi Kiŋdɔm Ministri we go ɛp wi fɔ rili sabi yuz dɛn buk dɛn ya we wi de yuz fɔ tich pipul dɛn di Baybul. As wi de tray fɔ sabi fɔ yuz dɛn tin ya fayn, wi go sho se wi de fala di advays we de na di Baybul, we se: “Yu fɔ bikyaful wetin yu de du ɛn wetin yu de lan pipul. Nɔ fɔ lɛf fɔ du dɛn tin ya; if yu de du dɛn ɔltɛm yu go sev yusɛf ɛn ɔl dɛn wan we de lisin to yu.”—1 Tim. 4:16.