Yuz di Fayn We Aw Dɛn Mek di Baybul Tich Buk fɔ Ebul Tich Fayn
As yu studɛnt de lan wetin rili di Baybul de tich ɛn du di tin dɛn we i de lan, dat go ɛp am fɔ go bifo as i de sav Gɔd. (Sam 1:1-3) Wi go ɛp wi studɛnt dɛn fɔ go bifo bay we wi de yuz sɔm pan di tin dɛn we de insay di Baybul Tich buk.
Di Kwɛstyɔn dɛn we De na di Chapta In Biginin: Ɛni chapta gɛt kwɛstyɔn dɛn na di biginin ɛn di ansa dɛn de insay di chapta. Aks di kwɛstyɔn di kayn we we di studɛnt nɔ go nid fɔ ansa. Yu de du dat bikɔs yu want lɛ i bɛt-bɛt fɔ wetin una de kam stɔdi. Ɔ yu kin aks am fɔ tɔk smɔl bɔt ɛni kwɛstyɔn. If i tɔk sɔntin we nɔ kɔrɛkt, yu nɔ nid fɔ kɔrɛkt wantɛm wantɛm. Di ansa we i go gi go ɛp yu fɔ no us pɔynt yu nid fɔ pe atɛnshɔn to ɛn us pɔynt yu fɔ tɔk mɔ bɔt.—Prɔv. 16:23; 18:13.
Mɔ Tin dɛn fɔ Nɔ: If di studɛnt ɔndastand ɛn i gri wit di pɔynt we de na di say we una de stɔdi, yu kin ɛnkɔrej am fɔ rid mɔ bɔt dis fɔ insɛf na di say we nem Mɔ Tin dɛn fɔ No. Di nɛks tɛm we una de stɔdi, yu kin yuz smɔl tɛm fɔ mek shɔ se i ɔndastand wetin i rid. Bɔt if yu tink se di studɛnt go bɛnifit mɔ, yu kin yuz smɔl tɛm we una de stɔdi fɔ tɔk bɔt wetin de na di say we nem Mɔ Tin dɛn fɔ No ɔ yu kin mek una ɔl tu tɔk bɔt am bay we una rid di paregraf dɛn ɛn aks am kwɛstyɔn dɛn we yu bin dɔn pripia bifo yu kam fɔ du di stɔdi.
Rivishɔn Bɔks: Di rivishɔn bɔks we de na di las pej na di chapta gɛt ansa dɛn to di kwɛstyɔn dɛn we de na di chapta in biginin. Yu kin yuz am fɔ ɛp yu studɛnt fɔ mek shɔ se i ɔndastand ɛn i ebul fɔ ɛksplen di men pɔynt dɛn na di chapta. Rid ɛni pɔynt lawd wan wit di skripchɔ we de nia de. Dɔn aks di studɛnt fɔ ɛksplen aw dis skripchɔ sho se wetin di pɔynt tɔk bɔt na tru.—Di Apɔsul Dɛn Wok [Akt] 17:2, 3.