Wetin Wi Kin Lan Frɔm Prɔfɛt—Abakɔk
1. Aw di tin dɛn we bin de apin to Abakɔk fiba wetin de apin insay wi yon tɛm?
1 Insay di wɔl we wi de so naw, wikɛdnɛs dɔn pasmak ɔlsay, so dis kin mek wi fil lɛk Abakɔk we bin aks Jiova se: “Aw lɔŋ a go de kɔmplen ɛn bifo yu go yɛri ɛn tap bad fɔ mit wi?” (Aba. 1:2, 3; 2 Tim. 3:1, 13) If wi tink gud wan bɔt Abakɔk in mɛsej ɛn di fetful we i bin fetful, dat go ɛp wi fɔ bia as wi de wet fɔ di tɛm we Jiova go jɔj dis wikɛd wɔl.—2 Pit. 3:7.
2. Aw wi go sho se wi gɛt fet bay di we aw wi de liv?
2 Sho se Yu Gɛt Fet bay di We Aw Yu De Liv: Abakɔk nɔ bin alaw di tin dɛn we de apin arawnd am fɔ mek in at pwɛl, bifo dat i bin kɔntinyu fɔ du wetin Gɔd want ɛn fɔ mek i gɛt tayt padi biznɛs wit Gɔd. (Aba. 2:1) Jiova bin gi di prɔfɛt kɔnfidɛns fɔ se wetin i dɔn tɔk go apin di rayt tɛm ɛn “udat de du tin tret wan go ɔrayt bikɔs i biliv PAPA GƆD.” (Aba. 2:2-4) Wetin dat min fɔ Kristian dɛn we de insay dis tɛm we nɔ de fa igen fɔ mek di wɔl dɔn? I nɔ rili impɔtant fɔ no ustɛm di ɛnd go kam bɔt wetin impɔtant na fɔ rili biliv se di ɛnd go kam. Fet de mek wi kɔntinyu fɔ du wetin Gɔd want ɛn mek di prichin wok impɔtant pas ɔltin na wi layf.—Ibru 10:38, 39.
3. Wetin mek wi fɔ kɔntinyu fɔ gɛt gladi at we wi de sav Jiova?
3 Sav Jiova wit Gladi At: Di tɛm we Gɔg we de na Megɔg go atak Gɔd in pipul dɛn, tin dɛn go apin we go tɛst if wi rili gɛt fet. (Izi. 38:2, 10-12) Fɛt-fɛt kin mek tin tranga, ivin fɔ di wan dɛn we kin ɛnd ɔp fɔ win. Bɛtɛ it nɔ kin de. Pipul dɛn kin lɔs dɛn prɔpati dɛn, ɛn tin kin tranga pasmak. Wetin wi go du we dɛn kayn tin ya kin apin? Abakɔk bin no se tin go tranga so i bin mekɔp in maynd se i go kɔntinyu fɔ gɛt gladi at we i de sav Jiova. (Aba. 3:16-19) Di gladi we “PAPA GƆD de mek [wi] gladi,” go ɛp wi fɔ bia ɛni prɔblɛm dɛn we go mit wi tumara bambay.—Nɛi. 8:10; Ibru 12:2.
4. Wetin wi go ebul fɔ du naw ɛn tumara bambay?
4 Di wan dɛn we Jiova go sev jɔjmɛnt de go kɔntinyu fɔ lan wetin Gɔd want. (Aba. 2:14) Di wan we go gɛt layf bak dɛnsɛf go lan bɔt Jiova. So naw wi fɔ yuz ɛni chans we wi gɛt fɔ tɔk bɔt Jiova ɛn di wɔndaful tin dɛn we i dɔn du!—Sam 34:1; 71:17.