LIV YU LAYF LƐK KRISTIAN
Aw Yu Go Bi Pɔsin we De Stɔdi di Baybul Gud Gud Wan?
Yu go lɛk fɔ kɔntinyu fɔ fetful lɛk Daniɛl we yu gɛt prɔblɛm? Daniɛl bin stɔdi Gɔd in Wɔd gud gud wan ɛn i bin de stɔdi di prɔfɛsi dɛn bak gud gud wan. (Dan 9:2) We yu stɔdi di Baybul gud gud wan dat go ɛp yu fɔ kɔntinyu fɔ bi fetful. Aw dat go apin? I go mek yu gɛt mɔ fet se Jiova in prɔmis dɛn go kam tru. (Jɔs 23:14) I go ɛp yu bak fɔ lɛk Gɔd mɔ ɛn mɔ ɛn dat go mek yu want fɔ du wetin rayt. (Sam 97:10) Bɔt usay yu go bigin? Mek wi tɔk bɔt dɛn tin dɛn ya.
Wetin a fɔ stɔdi? Fɔ stɔdi gud gud wan min se wi fɔ pripia fɔ di mitin dɛn. Wi go ɛnjɔy fɔ de du wi Baybul ridin ɛni wik if wi tek tɛm fɔ no bɔt tin dɛn we wi nɔ ɔndastand. Pantap dat, sɔm pipul dɛn dɔn disayd fɔ lan mɔ bɔt Baybul prɔfɛsi, di difrɛn kwaliti dɛn we Gɔd in spirit de gi, di travul we di apɔsul Pɔl bin de travul fɔ prich, ɔ ivin di tin dɛn we Jiova Gɔd mek. Ɛnitɛm we yu tink bɔt wan Baybul kwɛstyɔn, rayt am ɛn mek am di tɔpik fɔ di nɛks tɛm we yu gɛt fɔ stɔdi.
Usay a go fɛn tin dɛn we a go want fɔ no mɔ bɔt? Fɔ no wetin-ɛn-wetin yu go nid fɔ du, wach di fim we gɛt di taytul, Tin dɛn fɔ Du Risach Kin Ɛp Wi Fɛn Jɛntri dɛn na di Baybul. Fɔ tɛst yusɛf, tray fɔ no mɔ bɔt di wan dɛn we bin de rul di ol wɔl we di wayl bif dɛn tinap fɔ, we Daniɛl chapta 7 tɔk bɔt.
Ɔmɔs tɛm a fɔ yuz fɔ stɔdi? Di men tin we go mek wi gɛt tayt padi biznɛs wit Gɔd na we wi de stɔdi ɔltɛm. Yu kin bigin bay we yu de stɔdi fɔ shɔt tɛm if nid de, ɛn smɔl smɔl yu go de ad pan di tɛm we yu de yuz fɔ stɔdi. We yu de stɔdi Gɔd in Wɔd i tan lɛk se yu de luk gud wan fɔ valyu tin dɛn we ayd; di mɔ valyu tin we yu fɛn, na di mɔ yu go want fɔ luk! (Prɔ 2:3-6) Yu go rili want fɔ no mɔ bɔt Gɔd in Wɔd, ɛn da tɛm de fɔ go de stɔdi di Baybul go bi sɔntin we yu go de du ɔltɛm.—1Pi 2:2.
WETIN DI WAYL BIF DƐN WE DANIƐL CHAPTA 7 TƆK BƆT TINAP FƆ?
ƆDA KWƐSTYƆN:
Aw Daniɛl 7:8, 24 bin kam tru?
DI NƐKS TIN WE YU GO STƆDI BƆT:
Wetin di bif dɛn na Rɛvɛleshɔn chapta 13 tinap fɔ?