Pɔynt dɛn we Go Mek Pipul dɛn Bɛnifit Frɔm di Fil Savis Mitin

Jɔs lɛk di Kɔngrigeshɔn mitin dɛn we wi kin gɛt, di fil savis mitin sɛf na wan pan di we dɛn we Jiova de yuz fɔ mek wi go tink bɔt wi kɔmpin dɛn so dat wi go sho lɔv ɛn du fayn tin dɛn. (Ibr 10:​24, 25) Di fil savis mitin fɔ tek lɛk fayv to sɛvin minit ɛn na insay da tɛm de fɔ ɔganayz di grup dɛn, sho di tɛritri fɔ wok, ɛn pre. (If ɔda mitin de afta di mitin fɔ fil savis, dɛn i kin ivin shɔt pas di tɛm we dɛn sho.) Di pɔsin we de kɔndɔkt fɔ pripia sɔntin we go bɛnifit di wan dɛn we de go prich da de de. Fɔ ɛgzampul, if na Satide we bɔku pan di wan dɛn we de na di mitin fɔ fil savis nɔ prich insay di wik, sɔntɛm i go fayn fɔ jɔs tɔk bɔt wetin wi go tɛl di wan dɛn we wi de go prich to. Wetin na sɔm ɔda tɔpik dɛn we go fayn fɔ tɔk bɔt?

• Yuz wetin de na di say we se wetin wi go se we de na Wi Kristian Layf ɛn Prichin Wok—Mitin Buk

• Aw fɔ yuz tin dɛn we jɔs apin ɛn nyuz fɔ bigin tɔk to pɔsin

• Aw fɔ ansa pɔsin we tɔk sɔntin bikɔs i nɔ want fɔ lisin

• Aw fɔ tɔk to pɔsin we nɔ biliv Gɔd, pɔsin we biliv se ɔltin kam bay chans, aw fɔ tɔk to pɔsin we de tɔk ɔda langwej, ɔ pɔsin we de na rilijɔn we nɔ bɔku na una tɛritri

• Aw fɔ yuz sɔntin we de na di jw.org wɛbsayt, JW Library^® ap, ɔ di Baybul

• Aw fɔ yuz wan patikyula tul na di Tichin Tulbɔks

• Aw fɔ du wan patikyula pat pan di prichin wok lɛk, fɔ yuz fon fɔ prich, rayt lɛta, pɔblik witnɛsin, ritɔn visit ɛn fɔ kɔndɔkt Baybul stɔdi dɛn

• Rimaynd dɛn bɔt aw fɔ de sef wan, fɔ ajɔst to ɛnitin, fɔ biev fayn, fɔ tink di rayt we ɔ ɔda tin

• Tɔk bɔt wan lɛsin ɔ vidio frɔm di Kɔntinyu fɔ De Rid ɛn Tich brosho

• Tɔk bɔt aw fɔ ɛp ɛn ɛnkɔrej dɛn fil savis patna

• Tɔk bɔt wan skripchɔ we gɛt sɔntin fɔ du wit di prichin wok ɔ wan fayn fil savis ɛkspiriɛns