Wi Rili Lɛk Jiova, Wi Papa

1-2. Wetin mek Jiova mek am pɔsibul fɔ lɛ wi jɔyn in famili? Aw i du dat?

JIOVA dɔn invayt wi fɔ jɔyn in famili we de wɔship am. Dis na wɔndaful inviteshɔn! Di famili we de wɔship Jiova na pipul dɛn we dɔn gi dɛn layf to Gɔd, ɛn dɛn de sho se dɛn gɛt fet pan di day we in Pikin day fɔ fri wi frɔm sin ɛn day. Wi na famili we gɛt gladi-at. Wi layf gɛt minin naw, ɛn wi gladi bikɔs wi gɛt op fɔ gɛt layf we go de sote go na ɛvin ɔ Paradays na dis wɔl.

² Jiova don mek am pɔsibul fɔ lɛ wi de na in famili bikɔs i rili lɛk wi. Bɔt fɔ lɛ dat apin, Jiova bin gɛt fɔ mek wan big sakrifays. (Jɔn 3:​16) ‘Gɔd gi sɔntin we gɛt valyu fɔ bay wi.’ (1 Kɔr. 6:​20) Di day we Jizɔs day fɔ fri wi frɔm sin ɛn day, dɔn mek am pɔsibul fɔ lɛ wi gɛt tayt padi biznɛs wit Jiova. Wi gɛt di ɔnɔ fɔ kɔl di Pɔsin we de oba di wan ol wɔl wi Papa. Ɛn as wi bin tɔk insay di atikul bifo dis wan, Jiova na di bɛst Papa fɔ wi.

3. Us kwɛstyɔn dɛn wi fɔ aks wisɛf we wi tink bɔt ɔl di gud tin dɛn we Jiova dɔn du fɔ wi? (Luk bak di bɔks we gɛt di taytul “Jiova De Notis Mi?”)

³ Jɔs lɛk wan pan di man dɛn we rayt di Baybul, wi kin aks se: “Wetin a go gi PAPA GƆD [“Jiova,” NWT] bak fɔ ɔl di gud we i de du fɔ mi?” (Sam 116:​12) Di tru tin na dat, wi nɔ go ɛva ebul fɔ pe bak wi Papa we de na ɛvin. Bɔt di lɛk we i lɛk wi de mek wisɛf lɛk am. Di apɔsul Jɔn rayt se: “Wi lɛk Gɔd ɛn wi kɔmpin bikɔs na Gɔd fɔs lɛk wi.” (1 Jɔn 4:​19) Us we dɛn wi go sho se wi lɛk wi Papa we de na ɛvin?

KƆNTINYU FƆ DE NIA JIOVA

4. Frɔm wetin de na Jems 4:​8, wetin mek wi fɔ tray fɔ bi Jiova in padi?

⁴ Jiova want wi fɔ bi in padi ɛn fɔ tɔk wit am. (Rid Jems 4:​8.) I de ɛnkɔrej wi “fɔ de pre ɔltɛm,” ɛn i rɛdi ɔltɛm fɔ lisin to wi. (Rom 12:​12) Jiova nɔ ɛva bizi ɔ taya pasmak fɔ lisin to wi. Ɛn wisɛf de lisin to am bay we wi de rid in Wɔd, di Baybul, ɛn wi buk ɛn magazin dɛn we de ɛp wi fɔ ɔndastand di Baybul. Wi go lisin bak to Jiova bay we wi de lisin gud gud wan na wi Kristian mitin dɛn. Jɔs lɛk aw pikin dɛn kin gɛt tayt padi biznɛs wit dɛn mama ɛn papa dɛn bikɔs dɛn de tɔk ɔltɛm, na so bak wi go kɔntinyu fɔ gɛt tayt padi biznɛs wit Jiova we wi de tɔk wit am ɔltɛm.

5. Aw wi go mek wi prea di kayn we we Jiova go want fɔ lisin?

⁵ Tink bɔt wetin wi prea dɛn to Jiova kin tan lɛk. Jiova want wi fɔ de tɛl am wetin wi tink ɛn aw wi de fil we wi de pre to am. (Sam 62:​8, NWT) Wi fɔ aks wisɛf dis kwɛstyɔn: ‘Mi prea dɛn tan lɛk sɔntin we pɔsin bin dɔn kram ɔ mɛsej we pɔsin bin dɔn rayt, ɔ na wan we de kɔmɔt frɔm mi at jɔs lɛk lɛta we a de yuz mi yon an fɔ rayt?’ Wi nɔ gɛt wan dawt fɔ se yu rili lɛk Jiova, ɛn yu want fɔ kɔntinyu fɔ mek una padi biznɛs tayt mɔ ɛn mɔ. Fɔ du dat, yu fɔ de tɔk wit am ɔltɛm. Tɛl am aw yu de fil na yu at. Tɛl am wetin de mek yu gladi ɛn wetin de mek yu at pwɛl. Na fɔ biliv tranga wan se yu kin aks am fɔ ɛp yu.

6. Wetin wi fɔ du fɔ kɔntinyu fɔ de nia wi Papa we de na ɛvin?

⁶ Bɔt fɔ kɔntinyu fɔ de nia wi Papa we de na ɛvin, wi fɔ de tɛl am tɛnki ɔltɛm. Wi gri wit wan pan di man dɛn we rayt di sam buk we se: ‘PAPA GƆD [“Jiova,” NWT], yu wɔndaful, nɔbɔdi nɔ ebul fɔ kɔnt wetin yu dɔn du. Infakt sɛf, di plan we yu gɛt fɔ wi, nɔbɔdi nɔ go ebul tɔk bɔt dɛn, dɛn so bɔku dat if a bin want fɔ kɔnt a nɔ go ebul bikɔs dɛn tu bɔku fɔ kɔnt.’ (Sam 40:​5) Wi nɔ fɔ jɔs fil gud bɔt wetin Jiova dɔn du fɔ wi bɔt wi fɔ sho se wi gɛt tɛnki bay wetin wi de tɔk ɛn wetin wi de du. Dis de sho se wi difrɛn frɔm bɔku pipul dɛn tide. Wi de na wɔl usay bɔku pipul dɛn nɔ de sho se dɛn gladi fɔ ɔl wetin Gɔd de du fɔ dɛn. Infakt, wan tin we de sho se wi de na “di las dez” na we pipul dɛn nɔ gɛt tɛnki. (2 Tim. 3:​1, 2, NWT) Lɛ wi nɔ ɛva biev da kayn we de!

7. Wetin Jiova want wi fɔ du? Wetin mek?

⁷ Mama ɛn papa dɛn nɔ want dɛn pikin dɛn fɔ de fɛt bɔt dɛn want dɛn fɔ bi padi. Semweso, Jiova want ɔl di wan dɛn we de wɔship am fɔ bi padi dɛn. Infakt, di lɛk we wi lɛk wi brɔda ɛn sista dɛn de sho se wi na tru Kristian dɛn. (Jɔn 13:​35) Wi gri wit wetin wan pan di man dɛn we rayt di sam buk rayt we i se: “I fayn ɛn i swit wɛn PAPA GƆD in pipul gɛda wit wan at fɔ wɔship am.” (Sam 133:​1) We wi lɛk wi brɔda ɛn sista dɛn, wi de sho Jiova se wi lɛk am. (1 Jɔn 4:​20) I rili wɔndaful fɔ de wit brɔda ɛn sista dɛn we “de du gud” ɛn we “gɛt sɔri at.”—Ɛfi. 4:​32.

SHO SE YU LƐK JIOVA BAY WE YU DE OBE AM

8. Frɔm wetin de na 1 Jɔn 5:​3, wetin na di men rizin we mek wi de obe Jiova?

⁸ Jiova want pikin dɛn fɔ obe dɛn mama ɛn papa dɛn, ɛn i want wi fɔ obe am bak. (Ɛfi. 6:​1) Jiova fit fɔ lɛ wi obe am bikɔs na in mek wi, na in de gi wi wetin wi nid fɔ liv, ɛn i gɛt sɛns pas ɛni mɔtalman mama ɔ papa. Bɔt di men rizin we mek wi fɔ obe Jiova na bikɔs wi lɛk am. (Rid Jɔn In Fɔs Lɛta 5:​3.) Jiova nɔ de fos wi fɔ obe am pan ɔl we wi gɛt bɔku rizin fɔ du dat. Jiova dɔn gi wi wan gift we na fridɔm, so i kin gladi we wi disayd fɔ obe am bikɔs wi lɛk am.

9-10. Wetin mek i impɔtant fɔ no di lɔ dɛn we Gɔd de gi wi ɛn fɔ obe dɛn?

⁹ Mama ɛn papa dɛn want dɛn pikin dɛn fɔ fil sef. Na dat mek dɛn de mek lɔ dɛn we de protɛkt dɛn pikin dɛn. We pikin dɛn obe dɛn lɔ dɛn de, dɛn de sho se dɛn trɔst dɛn mama ɛn papa ɛn dɛn rɛspɛkt dɛn. So na dat mek i rili impɔtant fɔ mek wi sabi ɛn obe di lɔ dɛn we wi Papa we de na ɛvin de gi. We wi du dat, wi de sho Jiova se wi lɛk am ɛn rɛspɛkt am ɛn wi wisɛf de bɛnifit. (Ayz. 48:​17, 18) Bɔt di wan dɛn we nɔ de gri fɔ obe Jiova in lɔ dɛn kin ɛnd-ɔp fɔ ambɔg dɛnsɛf.—Gal. 6:​7, 8.

¹⁰ We wi liv wi layf di kayn we we de mek Jiova gladi, dat de mek bad bad tin nɔ apin to wi, wi nɔ go gɛt pwɛlat, ɛn wi padi biznɛs wit am nɔ go ambɔg. Jiova no wetin gud fɔ wi. Arora we de na Amɛrika tɔk se: “A no se fɔ obe Jiova de mek wi liv di bɛst layf ɔltɛm.” Dis na tru fɔ wi ɔl. Yu dɔn ɛva bɛnifit we yu obe di fayn lɔ dɛn we Jiova de gi?

11. Aw prea de ɛp wi?

¹¹ Prea de ɛp wi fɔ obe ilɛksɛf tin nɔ izi. Sɔntɛnde, i nɔ kin izi fɔ obe Jiova bikɔs wi nɔ pafɛkt, bɔt wi fɔ tray tranga wan ɔltɛm fɔ de obe am. Wan pan di man dɛn we rayt di sam buk bin beg Gɔd se: “Mek lɛ a rɛdi fɔ obe yu.” (Sam 51:​12, NWT) Dinis we na rɛgyula payɔnia bin tɔk se: “If a si se i nɔ izi fɔ obe wan pan Jiova in lɔ dɛn, a kin pre to am fɔ gi mi trɛnk fɔ du wetin rayt.” Wi fɔ biliv tranga wan se Jiova kin ansa da kayn prea de ɔltɛm.—Lyuk 11:​9-13.

ƐP ƆDA PIPUL DƐN FƆ LƐK WI PAPA

12. Frɔm wetin de na Lɛta Fɔ Ɛfisɔs 5:​1, wetin wi fɔ du?

¹² Rid Lɛta Fɔ Ɛfisɔs 5:​1. As Jiova in “pikin dɛn we i lɛk,” wi de du wi bɛst fɔ falamakata am. Wi de falamakata in kwaliti dɛn bay we wi de sho lɔv, du gud, ɛn fɔgiv ɔda pipul dɛn. We pipul dɛn we nɔ no Gɔd si di fayn we aw wi de liv, dat de mek dɛn want fɔ lan mɔ bɔt am. (1 Pit. 2:​12) Mama ɛn papa dɛn we na Kristian fɔ tray fɔ trit dɛn pikin dɛn di we aw Jiova de trit dɛn. We dɛn du dat, dɛn pikin dɛn go want fɔ mek Jiova dɛn padi.

13. Wetin wi fɔ du fɔ mek wi gɛt maynd?

¹³ Smɔl pikin dɛn kin blɔf wit dɛn papa, ɛn dɛn kin gladi fɔ tɔk bɔt am. Semweso, wi de blɔf wit Jiova, wi Papa we de na ɛvin, ɛn wi want lɛ ɔda pipul dɛn sabi am. Insay wi at, wi ɔl de fil jɔs lɛk aw Kiŋ Devid bin fil we i se: “A go blɔf fɔ wetin PAPA GƆD [“Jiova,” NWT] de du.” (Sam 34:​2) Bɔt wetin wi go du if wi de shem? Aw wi go gɛt maynd? Wi go gɛt maynd we wi tink bɔt aw wi go mek Jiova gladi we wi tɔk to ɔda pipul dɛn bɔt am ɛn aw ɔda pipul dɛn go bɛnifit we dɛn lan bɔt am. Jiova go gi wi di kayn maynd we wi nid. I bin ɛp wi fɔstɛm Kristian brɔda dɛn fɔ gɛt maynd, ɛn i go ɛp wi bak.—1 Tɛs. 2:​2.

14. Wetin na sɔm rizin dɛn we mek i impɔtant fɔ mek disaypul dɛn?

¹⁴ Jiova nɔ de pik-ɛn-chuz, ɛn i gladi we i de si se wi lɛk ɔda pipul dɛn, ilɛk usay dɛn kɔmɔt. (Akt 10:​34, 35) Wan pan di bɛst we we wi go sho se wi lɛk ɔda pipul dɛn na we wi de prich di gud nyuz to dɛn. (Mat. 28:​19, 20, NWT) Wetin dis wok go du? Di wan dɛn we de lisin to wi go liv bɛtɛ layf naw, ɛn dɛn go gɛt di chans fɔ ɛnjɔy layf we go de sote go tumara bambay.—1 Tim. 4:​16.

LƐK WI PAPA ƐN GƐT GLADI-AT

15-16. Us rizin dɛn wi gɛt fɔ mek wi gɛt gladi-at?

¹⁵ Jiova na Papa we lɛk wi, so i want in famili fɔ gɛt gladi-at. (Ayz. 65:​14) Wi gɛt bɔku rizin dɛn fɔ gɛt gladi-at rayt naw, ilɛksɛf wi de gɛt prɔblɛm dɛn. Fɔ ɛgzampul, wi biliv tranga wan se wi Papa we de na ɛvin rili lɛk wi. Wi no di tru tin dɛn we de na Gɔd in Wɔd, di Baybul. (Jɛr. 15:​16) Ɛn wi de pat ɔf wan spɛshal famili we gɛt pipul dɛn we lɛk Jiova, we lɛk in lɔ dɛn, ɛn dɛn lɛk ɔda pipul dɛn.—Sam 106:​4, 5.

¹⁶ Wi go kɔntinyu fɔ gɛt gladi-at bikɔs wi biliv tranga wan se layf gɛt fɔ bɛtɛ fɔ wi tumara bambay. Wi no se i nɔ go te igen, Jiova go pul ɔl di wikɛd pipul dɛn, ɛn i go yuz in Kiŋdɔm fɔ mek di wɔl bi Paradays. Wi gɛt bak di wɔndaful op fɔ se di wan dɛn we dɔn day go gɛt layf bak, ɛn dɛn go de wit di wan dɛn we dɛn lɛk. (Jɔn 5:​28, 29) Dat go rili mek wi gladi! Ɛn di tin we impɔtant pas ɔl na dat, wi shɔ se i nɔ go te igen, ɔlman we de na ɛvin ɛn na dis wɔl go ɔnɔ, prez, ɛn wɔship wi Papa we lɛk wi bikɔs na in nɔmɔ fit fɔ gɛt am.