Jiova Na di Wan We De Fɔgiv Wi Pas Ɔlman

1. Us tru tin Kiŋ Sɔlɔmɔn tɔk na Ɛkliziastis 7:​20?

KIŊ Sɔlɔmɔn bin rayt se: “Nɔbɔdi nɔ de na [di] wɔl we de du wetin PAPA GƆD want ɔltɛm ɛn nɔ de ɛva sin.” (Ɛkli. 7:​20) Dat na tru! Wi ɔl na sina dɛn. (1 Jɔn 1:​8) So wi ɔl nid fɔ mek Gɔd ɛn ɔda pipul dɛn fɔgiv wi.

2. Aw wi kin fil we wi tayt padi fɔgiv wi?

² Yu go mɔs mɛmba di tɛm we yu bin ɔfɛn yu tayt padi. Yu bin want fɔ bi in padi bak, so yu bin tɛl am sɔri wit ɔl yu at. Aw yu bin fil we yu padi bin fɔgiv yu wit ɔl in at? Yu at bin kol, nɔto so? Yɛs, ɛn yu bin gladi bak!

3. Wetin wi go tɔk bɔt insay dis atikul?

³ Wi want Jiova fɔ bi wi bɛst Padi, bɔt sɔntɛnde, wi kin tɔk ɔ du tin dɛn we de mek i vɛks. Bɔt wetin mek wi fɔ biliv se Jiova rili want fɔ fɔgiv wi? Aw di we aw Jiova de fɔgiv wi pas di we aw wi kin fɔgiv ɔda pipul dɛn? Ɛn udat dɛn Jiova kin fɔgiv?

JIOVA RƐDI FƆ FƆGIV

4. Wetin mek wi fɔ biliv se Jiova rɛdi fɔ fɔgiv?

⁴ Gɔd in Wɔd ɛp wi fɔ no klia wan se Jiova rɛdi fɔ fɔgiv. We Jiova bin de tɔk bɔt insɛf to Mozis na Mawnt Saynay, I bin yuz wan enjɛl fɔ tɔk se: “Mi, GƆD [“Jiova,” NWT], di PAPA GƆD we gud ɛn de sho masi, we nɔ gɛt shɔtat, we in lɔv nɔ de fel, ɛn PAPA GƆD we pɔsin kin put in op ɛn trɔs pan. A de sho lɔv to tawzin pan tawzin pipul dɛn ɛn de fɔgiv udat du bad, udat brok lɔ ɛn udat kɔmit sin.” (Ɛks. 34:​6, 7) Jiova na Gɔd we gud ɛn we gɛt sɔri-at, ɛn i rɛdi ɔltɛm fɔ fɔgiv sina dɛn we ripɛnt.—Nɛi. 9:​17; Sam 86:​15.

5. Akɔdin to Sam 103:​13, 14, wetin Jiova kin du bikɔs i no mɔtalman gud gud wan?

⁵ Bikɔs na Jiova mek wi, i no ɔltin bɔt wi. Jɔs tink bɔt dat! I no ɔltin bɔt ɛniwan pan wi we de na dis wɔl. (Sam 139:​15-17, NWT) So i kin si ɔl di mistek dɛn we wi kin mek bikɔs wi bɔn as mɔtalman dɛn we nɔ pafɛkt. I ivin no wetin dɔn apin to wi we mek wi bi di kayn pipul dɛn we wi bi rayt naw. Bikɔs Jiova no wi dis kayn we, wetin dat kin mek i du? Dat kin mek i sɔri fɔ wi.—Sam 78:​39; rid Sam 103:​13, 14.

6. Aw Jiova dɔn pruv se i rili want fɔ fɔgiv wi?

⁶ Jiova dɔn pruv se i rili want fɔ fɔgiv wi. I ɔndastand se na bikɔs ɔf di tin dɛn we di fɔs man, Adam, bin du na in mek wi ɔl de sin ɛn day. (Rom. 5:​12) No we nɔ bin de fɔ mek wi fri wisɛf ɔ ɛni ɔda pɔsin frɔm dis swɛ. (Sam 49:​7-9) Bɔt wi Gɔd we lɛk wi bin sɔri fɔ wi ɛn du sɔntin fɔ fri wi. Wetin i bin du? Akɔdin to Jɔn 3:​16, Jiova bin sɛn in wangren Pikin we insɛf sɛf mek fɔ kam day fɔ wi. (Mat. 20:​28; Rom. 5:​19) Jizɔs bin tek wi ples, i bin sɔfa ɛn day fɔ fri ɛnibɔdi we sho se i gɛt fet pan am. (Ibru. 2:​9) Jiova bin rili fil am fɔ si in Pikin we i rili lɛk de sɔfa ɛn day shemful wan! Fɔ tru, Jiova nɔ bin fɔ dɔn alaw in Pikin fɔ day if I nɔ bin want fɔ fɔgiv wi.

7. Wetin na sɔm Baybul ɛgzampul dɛn bɔt pipul dɛn we Jiova bin fɔgiv fɔ fri?

⁷ Di Baybul gɛt bɔku ɛgzampul dɛn bɔt pipul dɛn we Jiova bin fɔgiv fɔ fri. (Ɛfi. 4:​32) Udat yu tink bɔt? Sɔntɛm yu tink bɔt Kiŋ Manasɛ. Da wikɛd man de bin sin agens Jiova bad bad wan. I bin de bifo pan lay lay wɔship. I bin kil in yon pikin dɛn bay we i bin de sakrifays dɛn to lay lay gɔd dɛn. I bin ivin gɛt maynd fɔ put aydɔl na Jiova in oli tɛmpul. Di Baybul tɔk bɔt am se: “I du bɔku wikɛdnɛs na PAPA GƆD [“Jiova,” NWT] in yay we mek i vɛks.” (2 Kro. 33:​2-7) Bɔt, we Manasɛ bin sho se i dɔn ripɛnt wit ɔl in at, Jiova bin fɔgiv am fɔ fri. Gɔd bin ivin alaw am fɔ bi kiŋ bak. (2 Kro. 33:​12, 13) Sɔntɛm yu tink bak bɔt Kiŋ Devid, we bin kɔmit siriɔs sin dɛn agens Jiova, lɛk we i bin du mami ɛn dadi biznɛs wit uman we nɔto in wɛf ɛn kil. Bɔt, we Devid bin ripɛnt wit ɔl in at ɛn gri se i dɔn sin, Jiova bin fɔgiv am bak. (2 Sam. 12:​9, 10, 13, 14) So, wi biliv tranga wan se Jiova rili want fɔ fɔgiv wi. Ɛn as wi go si, di we aw Jiova de fɔgiv pas di we aw mɔtalman de fɔgiv.

DI WE AW JIOVA DE FƆGIV PAS DI WE AW MƆTALMAN DE FƆGIV

8. Bikɔs Jiova na di bɛst Jɔj, aw dat de afɛkt di fɔgiv we i de fɔgiv?

⁸ Jiova na di Jɔj “fɔ di wanol wɔl.” (Jɛn. 18:​25) Pɔsin we na gud jɔj nid fɔ ɔndastand di lɔ gud gud wan. Ɛn Jiova na da kayn pɔsin de bikɔs apat frɔm we in na wi Jɔj, na In bak de gi wi lɔ. (Ayz. 33:​22) No ɔda pɔsin nɔ de we sabi wetin rayt ɛn rɔng lɛk aw Jiova sabi am. Wetin bak pɔsin we na gud jɔj nid? I nid fɔ no di tru bɔt ɔltin bifo i pas in jɔjmɛnt. So Jiova na di bɛst Jɔj bikɔs ɔltɛm i kin no di tru bɔt sɔntin.

9. Wetin-ɛn-wetin Jiova no we kin mek i disayd if i fɔ fɔgiv pɔsin ɔ i nɔ fɔ fɔgiv am?

⁹ Jiova nɔ tan lɛk mɔtalman jɔj dɛn bikɔs ɔltɛm i kin no di tru bɔt ɔltin. (Jɛn. 18:​20, 21; Sam 90:​8) I nɔ jɔs no wetin mɔtalman kin si ɔ yɛri. I ɔndastand gud gud wan aw di abit dɛn we pɔsin kin gɛt frɔm in mama ɛn papa, di buk we i lan, di say we i de, di we aw i de fil, ɛn in wɛlbɔdi kin afɛkt di tin dɛn we i de du. Dɔn bak, Jiova no wetin de na wi at. I ɔndastand gud gud wan wetin kin mek pɔsin du sɔntin. Natin nɔ de we wi go ebul ayd pan Jiova. (Ibru. 4:​13) So we Jiova de fɔgiv pɔsin, na bikɔs i no di tru bɔt ɔltin.

10. Wetin mek wi go se Jiova de jɔj fia wan ɔltɛm? (Ditarɔnɔmi 32:​4)

¹⁰ Jiova kin jɔj fia wan ɔltɛm. I nɔ de tek wan pɔsin bɛtɛ pas ɔda pɔsin. Jiova nɔ de ɛva fɔgiv pɔsin bikɔs i fayn, i jɛntri, i impɔtant, ɔ i sabi du bɔku tin dɛn. (1 Sam. 16:​7; Jems 2:​1-4) Nɔbɔdi nɔ ebul fos Jiova fɔ du ɛnitin ɔ fɔ brayb am. (2 Kro. 19:​7) I nɔ de ɛva disayd fɔ du sɔntin bikɔs i vɛks ɔ i jɔs de sɔri fɔ pɔsin. (Ɛks. 34:​7) Wan dawt nɔ de se Jiova na di bɛst Jɔj bikɔs i ɔndastand ɔltin bɔt wi ɛn di tin dɛn we de apin to wi.—Rid Ditarɔnɔmi 32:​4.

11. Aw di we aw Jiova de fɔgiv pas di we aw mɔtalman de fɔgiv?

¹¹ Di man dɛn we rayt di Ibru Skripchɔ dɛn bin no se di we aw Jiova de fɔgiv pas di we aw mɔtalman de fɔgiv. Sɔntɛnde, dɛn bin de yuz wan spɛshal Ibru wɔd fɔ tɔk bɔt di we aw Jiova de fɔgiv. Wan buk tɔk se “di wangren we aw dɛn bin de yuz da wɔd de na fɔ tɔk bɔt di we aw Gɔd de fɔgiv sina dɛn. Dɛn nɔ bin de ɛva yuz da wɔd de fɔ tɔk bɔt aw mɔtalman de fɔgiv in kɔmpin.” Na Jiova nɔmɔ gɛt di pawa fɔ fɔgiv pɔsin we dɔn ripɛnt fɔ ɔl di sin dɛn we i dɔn kɔmit. Wetin kin apin we Jiova de fɔgiv wi?

12-13. (a) Aw pɔsin kin fil we Jiova dɔn fɔgiv am? (b) Aw lɔng Jiova kin fɔgiv pɔsin fɔ?

¹² We wi gri se Jiova dɔn fɔgiv wi, wi de “fil fayn,” ɛn wi de ivin gɛt kolat ɛn klin kɔnshɛns. Wi go ebul fil dɛn we dɛn de nɔmɔ we “Jiova insɛf sɛf” fɔgiv wi. (Akt 3:​19) We Jiova fɔgiv wi, i de alaw wi fɔ bi in padi bak ɛn i kin tan lɛk se wi nɔ bin ɛva sin.

¹³ Afta Jiova dɔn fɔgiv wi, i nɔ go ɛva blem wi ɔ pɔnish wi bak fɔ da sin de we wi bin dɔn kɔmit. (Ayz. 43:​25; Jɛr. 31:​34) Jiova de put wi sin fa frɔm wi ‘lɛk aw ist de fa frɔm wɛst.’b (Sam 103:​12) We wi tink bɔt di wɔndaful we aw Jiova de fɔgiv wi, dat de mek wi gladi ɛn kɔle. (Sam 130:​4) Bɔt udat dɛn Jiova de fɔgiv?

UDAT DƐN JIOVA DE FƆGIV?

14. Wetin wi dɔn lan bɔt wetin kin mek Jiova disayd fɔ fɔgiv?

¹⁴ As wi dɔn si, Jiova nɔ de disayd fɔ fɔgiv pɔsin bikɔs in sin big ɔ smɔl. Dɔn bak, wi dɔn lan se bikɔs na Jiova mek wi, na In de gi wi lɔ, ɛn in na wi Jɔj, i de yuz di tin dɛn we i no fɔ disayd if i go fɔgiv pɔsin ɔ i nɔ go fɔgiv am. Bɔt wetin Jiova kin tink bɔt bifo i disayd if i go fɔgiv pɔsin ɔ i nɔ go fɔgiv am?

15. Akɔdin to Lyuk 12:​47, 48, wetin na wan tin we Jiova kin tink bɔt?

¹⁵ Wan tin we Jiova kin tink bɔt na if di sina bin no se na bad tin i de du. Jizɔs bin mek dis klia na Lyuk 12:​47, 48. (Rid.) We pɔsin de plan fɔ du sɔntin we i no se bad na Jiova in yay ɛn i du am bay wilful wan, i dɔn kɔmit siriɔs sin. I pɔsibul fɔ mek Jiova disayd se i nɔ go fɔgiv da pɔsin de. (Mak 3:​29; Jɔn 9:​41) Bɔt usay tru de fɔ tɔk, sɔntɛnde wi kin no se di tin we wi bin du bin bad. If na so i bi, ɛni op de fɔ se Jiova go fɔgiv wi? Yɛs! Bikɔs wan ɔda tin de bak we Jiova kin tink bɔt we i de disayd if i go fɔgiv wi.

16. Wetin i min fɔ ripɛnt? Wetin mek wi nid fɔ ripɛnt if wi want fɔ mek Jiova fɔgiv wi?

¹⁶ Wan ɔda tin we Jiova kin tink bɔt na if di sina dɔn ripɛnt wit ɔl in at. Wetin i min fɔ ripɛnt? Fɔ ripɛnt min se pɔsin fɔ “chenj di we aw i de tink, di we aw i de biev, ɔ di tin dɛn we i want fɔ du.” I min fɔ lɛ pɔsin rigrɛt ɛn rili fil bad fɔ di bad tin dɛn we i dɔn du ɔ fɔ we i nɔ du di rayt tin dɛn we i bin fɔ dɔn du. Pɔsin we dɔn ripɛnt nɔ kin jɔs gɛt pwɛlat bikɔs ɔf di bad tin dɛn we i bin dɔn du, bɔt na bikɔs i alaw in padi biznɛs wit Jiova fɔ wik we mek i du dɛn bad tin dɛn de. Mɛmba se Kiŋ Manasɛ ɛn Kiŋ Devid bin kɔmit siriɔs sin dɛn; bɔt Jiova bin fɔgiv dɛn bikɔs dɛn bin ripɛnt wit ɔl dɛn at. (1 Kiŋ 14:​8) So fɔ mek Jiova fɔgiv wi, i nid fɔ si se wi dɔn ripɛnt. Bɔt i nɔ jɔs du fɔ lɛ wi fil sɔri fɔ di sin dɛn we wi dɔn kɔmit. Wi fɔ rɛdi fɔ du sɔntin.c Ɛn dat na di ɔda tin we Jiova kin tink bɔt.

17. Wetin i min fɔ chenj? Wetin mek dat impɔtant if wi nɔ want fɔ kɔmit di sem sin dɛn we wi bin dɔn kɔmit? (Ayzaya 55:​7)

¹⁷ Wan ɔda impɔtant tin we Jiova kin tink bɔt na if di pɔsin dɔn chenj. Fɔ chenj min “fɔ tɔn rawnd.” We min se pɔsin fɔ lɛf di bad tin dɛn we i bin de du ɛn stat fɔ liv di we aw Jiova want in pipul dɛn fɔ liv. (Rid Ayzaya 55:​7.) Di pɔsin fɔ chenj di we aw i de tink so dat i go alaw di we aw Jiova de tink fɔ gayd am. (Rom. 12:​2; Ɛfi. 4:​23) I fɔ mekɔp in maynd fɔ lɛf di bad we aw i bin de tink ɛn du tin. (Kol. 3:​7-10) As wi no, na di fet we wi gɛt pan Krays in sakrifays na in go mek Jiova fɔgiv wi ɛn pul wi sin. Jiova go yuz Krays in sakrifays fɔ fɔgiv wi we i si se wi de du wi bɛst fɔ chenj di we aw wi bin de biev.—1 Jɔn 1:​7.

BILIV TRANGA WAN SE JIOVA GO FƆGIV YU

18. Wetin wi dɔn lan bɔt di we aw Jiova de fɔgiv?

¹⁸ Lɛ wi tɔk smɔl bɔt di men tin dɛn we wi dɔn lan. Jiova na di bɛst Pɔsin we de fɔgiv wi pas ɔlman na di wan ol wɔl. Wetin mek wi se so? Fɔs, i rɛdi fɔ fɔgiv ɔltɛm. Sɛkɔn, i no wi gud gud wan. I no ɔltin bɔt wi ɛn in na di bɛst pɔsin we go ebul no if wi dɔn rili ripɛnt. Ɛn tɔd, Jiova de fɔgiv wi fɔ ɔltin we wi dɔn du, ɛn to am i tan lɛk se wi nɔ kɔmit di sin atɔl. Dis de alaw wi fɔ gɛt klin kɔnshɛns ɛn mek i gladi fɔ wi.

19. Pan ɔl we wi nɔ pafɛkt ɛn wi go kɔntinyu fɔ sin, wetin mek wi go stil gɛt gladi-at?

¹⁹ As wi no, bikɔs wi nɔ pafɛkt, wi go kɔntinyu fɔ sin. Bɔt wi kin gɛt kɔrej frɔm di wɔd dɛn we de na di buk we nem Insight on the Scriptures, Vɔlyum 2, pej 771, we se: “Jiova gɛt sɔri-at ɛn i no se in savant dɛn wik. So dɛn nɔ nid fɔ fil bad ɔltɛm bikɔs dɛn nɔ pafɛkt ɛn dɛn de mek mistek. (Sam 103:​8-14; 130:​3) If dɛn de du dɛn bɛst fɔ liv dɛn layf di we aw Jiova want, dɛn go ebul fɔ gɛt gladi-at. (Fil 4:​4-6; 1Jɔ 3:​19-22).” Dis de rili ɛnkɔrej wi!

20. Wetin wi go tɔk bɔt insay di nɛks atikul?

²⁰ Wi gladi bikɔs Jiova rɛdi fɔ fɔgiv wi we wi rili fil sɔri fɔ di sin dɛn we wi dɔn kɔmit. Bɔt aw wi go ebul fɔ falamakata di we aw Jiova de fɔgiv? Aw di fɔgiv we wi de fɔgiv fiba di we aw Jiova de fɔgiv, bɔt aw i difrɛn? Wetin mek i impɔtant fɔ ɔndastand da difrɛns de? Di nɛks atikul go ansa dɛn kwɛstyɔn dɛn de.