Lɛ di Lɔ fɔ Du “Gud” Muv Yu

WE Lisaa bin de tɔk bɔt wetin bin mek i kam fɔ lɛk di trut, i se: “Di tin we bin rili tɔch mi at na di we aw di brɔda ɛn sista dɛn bin gud.” Na di sem tin An sɛf tɔk. I se: “A bin kam fɔ lɛk di trut mɔ bikɔs ɔf di we aw di brɔda ɛn sista dɛn bin gud, nɔto jɔs bikɔs ɔf di tin dɛn we dɛn bin de tich.” Dɛn tu sista dɛn ya de ɛnjɔy fɔ rid di Baybul ɛn tink gud wan bɔt am, bɔt di tin we bin rili afɛkt dɛn na di gud we dɛn bin du to dɛn.

Aw wi go du gud di kayn we we go tɔch ɔda pipul dɛn at? Lɛ wi tɔk bɔt tu we dɛn, dat na wetin wi de tɔk ɛn wetin wi de du. Dɔn wi go si udat dɛn wi fɔ du gud to.

DU “GUD” BAY WETIN YU DE SE

Prɔvabs chapta 31 tɔk se gud wɛf de tɔk “gud wɔd dɛn.” (Prɔv. 31:​26, NWT) I tan lɛk se i de fala wan ‘lɔ’ we de afɛkt wetin i de tɔk ɛn aw i de tɔk. Papa dɛnsɛf fɔ fala dis ‘lɔ’ we dɛn de tɔk. Bɔku mama ɛn papa dɛn no se we dɛn tɔk ash wan to dɛn pikin dɛn, dat kin mek dɛn nɔ fil fayn. So if mama ɛn papa dɛn de ala pan dɛn pikin dɛn ɛn nɔ de tɔk fayn to dɛn, i go mɔs bi se dɛn pikin dɛn nɔ go lisin to dɛn. I go izi fɔ lɛ pikin dɛn lisin ɛn obe dɛn mama ɛn papa dɛn if dɛn tɔk fayn we to dɛn.

Ilɛk yu na kombra ɔ yu nɔto kombra, aw yu go lan fɔ tɔk gud wɔd dɛn? Di fɔs pat na Prɔvabs 31:​26 (NWT) ɛp wi fɔ no di ansa. I se: “Na sɛns wɔd dɛn de kɔmɔt na in mɔt.” Dat min se wi fɔ tek tɛm pik di wɔd dɛn we wi de tɔk ɛn di we aw wi de tɔk dɛn. I go fayn fɔ lɛ wi de aks wisɛf dis kwɛstyɔn, ‘Fɔ se dis tin we a de kam tɔk go mek pipul dɛn vɛks ɔ i go ɛp fɔ mek pis de?’ (Prɔv. 15:​1) I rili mek sɛns fɔ lɛ wi tink bifo wi tɔk.

Wan ɔda prɔvab se: “Wɔd we pɔsin nɔ tink bɔt bifo i pul am na [in] mɔt, kin kɔt shap lɛk sɔd.” (Prɔv. 12:​18) We wi tink gud wan bɔt aw di wɔd dɛn we wi de tɔk ɛn di we aw wi de tɔk de afɛkt ɔda pipul dɛn, dat go ɛp wi fɔ kɔntrol wetin wi de tɔk. Fɔ tru, we wi fala di lɔ fɔ du “gud”, i go ɛp wi fɔ lɛ wi nɔ yuz bad wɔd dɛn ɛn tɔk ash we. (Ɛfi. 4:​31, 32) Wi go chenj di bad tin dɛn we wi de tink ɛn tɔk to gud wɔd dɛn, ɛn wi go tɔk fayn we. Jiova sɛt fayn ɛgzampul fɔ wi we i kam to dis bay di we aw i bin ɛnkɔrej in savant Ilayja we i bin de fred. Di enjɛl we Jiova bin sɛn bin tɔk wit “smɔl fayn vɔys.” (1 Kiŋ 19:​12) Bɔt fɔ lɛ wi bi pɔsin we gud, wi nɔ fɔ jɔs tɔk gud wɔd dɛn. Wi fɔ du gud tin dɛn bak. Aw?

DI GUD TIN DƐN WE WI DE DU KIN ƐNKƆREJ ƆDA PIPUL DƐN

Wi de falamakata Jiova bay we wi de tɔk gud wɔd dɛn ɛn du gud tin dɛn. (Ɛfi. 4:​32; 5:​1, 2) Lisa, we wi bin dɔn tɔk bɔt, bin tɔk bɔt di gud tin dɛn we di brɔda ɛn sista dɛn bin du to am. I se: “We dɛn bin gi wi famili kwik notis, tu brɔda dɛn ɛn dɛn wɛf dɛn bin tek ɛkskyuz na dɛn wokples fɔ kam ɛp wi pak. A nɔ bin dɔn ivin stat fɔ stɔdi di Baybul da tɛm de.” Di gud tin dɛn we dɛn bin du to Lisa bin mek i stat fɔ tink gud wan bɔt di trut.

An, we wi bin dɔn tɔk bɔt, insɛf bin gladi fɔ di gud we di brɔda ɛn sista dɛn bin de du to am. I se: “Bikɔs ɔf di we aw di pipul dɛn na di wɔl bin de trit mi, i bin at fɔ lɛ a trɔst pipul dɛn.” I kɔntinyu fɔ tɔk se: “We a bin mit di brɔda ɛn sista dɛn, a nɔ bin trɔst dɛn. A bin de tink to misɛf se, ‘Wetin mek dɛn bisin bɔt mi so?’ Bɔt bikɔs mi Baybul ticha bin de du gud to mi wit ɔl in at, dat bin mek a kam fɔ trɔst am.” So wetin bin apin? An tɔk se: “Leta, a stat fɔ pe atɛnshɔn mɔ pan wetin a de lan.”

Notis se na di gud we di brɔda ɛn sista dɛn na di kɔngrigeshɔn bin de du to Lisa ɛn An bin rili tɔch dɛn at, ɛn dat bin mek dɛn bin want fɔ lan bɔt di trut. I bin ɛp dɛn bak fɔ bigin trɔst Jiova ɛn in pipul dɛn.

FALAMAKATA GƆD ƐN DU GUD TO ƆDA PIPUL DƐN

Bikɔs ɔf aw sɔm pipul dɛn mɛn ɔ usay dɛn de, i izi fɔ mek dɛn smayl ɛn tɔk fayn to ɔda pipul dɛn. I fayn we sɔm pipul dɛn de biev fayn bikɔs ɔf usay dɛn de ɔ di kayn pɔsin we dɛn bi. Bɔt if na dat nɔmɔ de muv wi fɔ du dɛn tin ya, dat min se wi nɔ rili de falamakata Gɔd in gudnɛs.—Luk Akt 28:​2.

Fɔ du gud na wan pan di kwaliti dɛn we Gɔd in oli spirit de gi. (Gal. 5:​22, 23) So dis min se wi nid Gɔd in oli spirit fɔ muv wi fɔ du gud. We wi du dat, wi de falamakata Jiova ɛn Jizɔs. As Kristian dɛn, wi rili bisin bɔt ɔda pipul dɛn. So na lɔv fɔ Jiova Gɔd ɛn wi kɔmpin mɔtalman de muv wi fɔ du gud. Na dat de mek di gud we wi de du de bi wɔndaful kwaliti we de kɔmɔt na wi at ɛn we de mek Gɔd gladi.

UDAT WI FƆ DU GUD TO?

I izi fɔ du gud to di wan dɛn we de du gud to wi ɔ di wan dɛn we wi sabi. (2 Sam. 2:​6) Wan we aw wi kin du dat na fɔ tɛl dɛn tɛnki. (Kol. 3:​15) Bɔt wetin go apin if wi fil se sɔmbɔdi nɔ fit fɔ mek wi du gud to am?

Tink bɔt dis: Na Jiova na di bɛst ɛgzampul fɔ sho spɛshal gudnɛs to ɔlman, ilɛk dɛn fit fɔ mek i sho dɛn ɔ dɛn nɔ fit. Ɛn in Wɔd di Baybul de tich wi wan impɔtant lɛsin bɔt aw fɔ sho dis kwaliti. Dɛn yuz di wɔd dɛn “spɛshal gudnɛs” bɔku tɛm na di Kristian Grik Skripchɔ dɛn. Aw Gɔd de du wi gud?

Tink bɔt di bɔku bɔku pipul dɛn we Jiova dɔn de du gud bay we i de gi dɛn wetin dɛn nid fɔ kɔntinyu fɔ liv. (Mat. 5:​45) Infakt, ivin bifo wi no Jiova, i bin dɔn du gud to wi. (Ɛfi. 2:​4, 5, 8) Fɔ ɛgzampul, i gi in bɛst, in wangren Pikin we insɛf sɛf mek, fɔ ɔl mɔtalman. Apɔsul Pɔl rayt se Jiova dɔn pe di prayz fɔ wi “akɔdin to in spɛshal gudnɛs we rili bɔku.” (Ɛfi. 1:​7) So pan ɔl we wi de sin ɛn mek Jiova in at pwɛl, i de kɔntinyu fɔ gayd wi ɛn tich wi. Jɔs lɛk aw ‘ren we de drisul’ kin fɔdɔm saful wan pan gras, na so Jiova de tek tɛm dayrɛkt wi wit di tin dɛn we i de tich wi ɛn di wɔd dɛn we i de tɔk. (Dit. 32:​2) I nɔ pɔsibul fɔ pe am fɔ ɔl di gud tin dɛn we i de du fɔ wi. Ɛn di tru na dat if Jiova nɔ bin fɔ dɔn sho wi in spɛshal gudnɛs, wi nɔ bin fɔ gɛt op fɔ tumara bambay.—Luk 1 Pita 1:​13.

Wan dawt nɔ de se Jiova in gudnɛs de mek wi kam nia am ɛn muv wi fɔ falamakata am. So bifo wi pik-ɛn-chuz udat wi de du gud to, wi fɔ tray tranga wan fɔ falamakata Jiova bay we wi de du gud to ɔda pipul dɛn ɛvride. (1 Tɛs. 5:​15) We wi de du gud ɔltɛm, wi go tan lɛk faya we de wam pɔsin di tɛm we ples kol. Wi kin mek di wan dɛn we de na wi famili, wi kɔmpin Kristian dɛn, wi wokmet dɛn, wi skulmet dɛn, ɛn wi neba dɛn gladi.

Tink bɔt di wan dɛn na yu famili ɔ di kɔngrigeshɔn we go bɛnifit bikɔs ɔf di gud wɔd dɛn we yu de tɔk ɛn di gud tin dɛn we yu de du fɔ dɛn. Sɔntɛm, pɔsin go de na yu kɔngrigeshɔn we rili nid ɛp fɔ kia fɔ in os ɛn in gadin, ɔ fɔ du ɔda tin dɛn we i kin du ɔltɛm, lɛk fɔ go bay-bay. Dɔn bak, we yu mit pɔsin na fil savis we rili nid ɛp, yu go ebul du sɔntin fɔ ɛp am?

Mek di lɔ fɔ du “gud” gayd di wɔd dɛn we wi de tɔk ɛn di tin dɛn we wi de du we wi de falamakata Jiova.