Una Kɔntinyu fɔ “Ɛp Una Kɔmpin dɛn fɔ Tinap Tranga Wan”

1. Akɔdin to 1 Tɛsalonians 5:​11, us wok wi ɔl de du?

YU KƆNGRIGESHƆN dɔn ɛva bil nyu Kiŋdɔm Ɔl ɔ mek di say dɛn we dɔn pwɛl na una Kiŋdɔm Ɔl? If na so i bi, wan dawt nɔ de se yu mɛmba di fɔs mitin we una bin gɛt na di nyu Kiŋdɔm Ɔl. Yu bin rili gladi fɔ wetin Jiova du. Infakt, sɔntɛm yu go dɔn gladi sote yu want fɔ kray ɛn nɔ ebul fɔ siŋ fɔ stat di mitin. Wi nyu Kiŋdɔm Ɔl we dɛn kin dɔn bil fayn fayn wan kin mek pipul dɛn prez Jiova. Bɔt wi go mek Jiova gɛt mɔ prez we wi du wan ɔda bildin wok. Da wok de gɛt fɔ du wit sɔntin we valyu pas nɔmal bildin dɛn. I gɛt fɔ du wit di pipul dɛn we de kam na dɛn ples dɛn de fɔ wɔship. Apɔsul Pɔl bin yuz wan wɔd we min bak “fɔ bil” fɔ ebul tɔk bɔt di aydia fɔ ɛp ɔda pipul dɛn fɔ tinap tranga wan akɔdin to wetin de na wi tim tɛks na 1 Tɛsalonians 5:​11.—Rid.

2. Wetin wi go tɔk bɔt insay dis atikul?

² Apɔsul Pɔl na wan fayn ɛgzampul bɔt pɔsin we sabi aw fɔ ɛp in kɔmpin Kristian dɛn fɔ tinap tranga wan. I bin de fil fɔ dɛn. Insay dis atikul, wi go tɔk bɔt aw i bin ɛp in brɔda ɛn sista dɛn (1) fɔ bia prɔblɛm dɛn, (2) fɔ gɛt pis wit ɔda pipul dɛn, ɛn (3) fɔ gɛt fet pan Jiova mɔ ɛn mɔ. Lɛ wi si aw wi go falamakata am ɛn ɛp wi brɔda ɛn sista dɛn fɔ tinap tranga wan tide.—1 Kɔr. 11:​1.

PƆL BIN ƐP IN BRƆDA ƐN SISTA DƐN FƆ BIA PRƆBLƐM DƐN

3. Aw Pɔl bin de tink di rayt we bɔt di prichin wok ɛn di wok we i bin de du fɔ sɔpɔt insɛf?

³ Pɔl bin rili lɛk in brɔda ɛn sista dɛn. Insɛf bin dɔn gɛt prɔblɛm dɛn. So i bin de sho sɔri-at ɛn fil fɔ in kɔmpin Kristian dɛn we dɛn gɛt prɔblɛm dɛn. Wantɛm, Pɔl nɔ bin gɛt mɔni, ɛn i bin nid fɔ fɛn wok fɔ sɔpɔt insɛf ɛn in kɔmpin dɛn. (Akt 20:​34) Na tɛnt i bin de mek. We i bin go na Kɔrint, fɔs i bin de wok wit Akwila ɛn Prisila, we dɛnsɛf bin de mek tɛnt. Bɔt “ɛvri sabat” i bin de prich to di Ju ɛn Grik pipul dɛn. Dɔn we Saylas ɛn Timoti bin go na Kɔrint, “Pɔl bigin fɔ yuz ɔl in tɛm fɔ tɔk bɔt Gɔd in wɔd.” (Akt 18:​2-5) Pɔl nɔ bin ɛva fɔgɛt in men rizin fɔ de alayv, we na fɔ sav Jiova. Bikɔs Pɔl bin sɛt fayn ɛgzampul fɔ wok tranga wan na di prichin wok ɛn fɔ kia fɔ di tin dɛn we i nid, i bin ebul fɔ ɛnkɔrej in brɔda ɛn sista dɛn. I bin mɛmba dɛn se dɛn nɔ fɔ alaw di prɔblɛm we de mit dɛn ɛn di kia we dɛn fɔ kia fɔ di tin dɛn we dɛn famili nid fɔ mek dɛn fɔgɛt bɔt “di tin dɛn we rili impɔtant,” we na ɔl di tin dɛn we wi de du fɔ wɔship Jiova.—Fil. 1:​10.

4. Aw Pɔl ɛn Timoti bin ɛp dɛn kɔmpin Kristian dɛn fɔ bia we pipul dɛn bin de mek dɛn sɔfa?

⁴ Jɔs afta dɛn gɛt wan kɔngrigeshɔn na Tɛsalonayka, pipul dɛn bin mek di nyu Kristian dɛn sɔfa. We bɔku pipul dɛn we bin de agens Kristian dɛn nɔ bin ebul fɔ si Pɔl ɛn Saylas, dɛn bin drɛg “sɔm pan di brɔda dɛn go to di rula dɛn na di siti” ɛn tɔk lawd wan se: “Dɛn man ya de agens Siza in lɔ dɛn.” (Akt 17:​6, 7) Yu ebul imajin aw dɛn nyu Kristian dɛn de bin de fred we dɛn bin kam fɔ no se di pipul dɛn we de na di siti dɔn tɔn agens dɛn? Dat bin fɔ dɔn mek dɛn nɔ gɛt bɛtɛ zil igen fɔ sav Jiova, bɔt Pɔl nɔ bin want dat fɔ apin. Pan ɔl we in ɛn Saylas bin gɛt fɔ kɔmɔt de, dɛn bin mek shɔ se dɛn du ɔl wetin dɛn ebul fɔ kia fɔ da nyu kɔngrigeshɔn de. Pɔl bin mɛmba di Kristian dɛn na Tɛsalonayka se: “Wi sɛn Timoti, we na wi brɔda . . . fɔ mek i ɛp una fɔ tinap tranga wan ɛn kɔrej una ɛn mek una fet strɔng, so dat dɛn prɔblɛm ya nɔ go shek ɛnibɔdi.” (1 Tɛs. 3:​2, 3) I go bi se pipul dɛn bin dɔn mek Timoti insɛf sɔfa na in om-tɔŋ na Listra. I bin si aw Pɔl bin ɛp di brɔda ɛn sista dɛn we bin de de. We Timoti bin si aw Jiova bin ɛp dɛn, i bin ebul fɔ ɛp in nyu brɔda ɛn sista dɛn fɔ no se tin go fayn fɔ dɛnsɛf.—Akt 14:​8, 19-22; Ibru. 12:​2.

5. Aw wan brɔda we nem Brayant bin bɛnifit frɔm di ɛp we wan ɛlda bin ɛp am?

⁵ Us ɔda we Pɔl bin ɛp in kɔmpin Kristian dɛn? We Pɔl ɛn Banabas bin go bak na Listra, Aykoniɔm, ɛn Antiɔk, dɛn bin “pik ɛlda dɛn fɔ dɛn na ɛni kɔngrigeshɔn.” (Akt 14:​21-23) Wan dawt nɔ de se dɛn ɛlda dɛn de bin rili ɛnkɔrej di brɔda ɛn sista dɛn na di kɔngrigeshɔn dɛn, jɔs lɛk aw di ɛlda dɛn de du tide. Notis wetin wan brɔda we nem Brayant bin tɔk. I se: “We a bin ol 15 ia, mi papa lɛf os ɛn mi mama bin disfɛloship. A bin fil lɛk se dɛn dɔn tɔn dɛn bak pan mi ɛn mi at bin pwɛl.” Wetin bin ɛp Brayant dis tɛm we nɔ bin izi fɔ am? I tɔk se: “Wan ɛlda we nem Toni, bin de tɔk to mi na mitin ɛn ɔda tɛm dɛn. I tɛl mi bɔt brɔda ɛn sista dɛn we bin gɛt prɔblɛm dɛn, bɔt dɛn bin stil gladi. I rid Sam 27:​10 wit mi, ɛn bɔku tɛm i bin de tɔk bɔt Ɛzikaya we bin sav Jiova fetful wan pan ɔl we in papa nɔto bin gud ɛgzampul.” Aw dis bin ɛp Brayant? Brayant tɔk se: “Bikɔs Toni bin ɛnkɔrej mi, a bigin fɔ sav Jiova ful-taym.” Ɛlda dɛn, una rɛdi ɔltɛm fɔ yuz ‘gud wɔd dɛn’ fɔ ɛnkɔrej di wan dɛn we tan lɛk Brayant.—Prɔv. 12:​25.

6. Aw Pɔl bin yuz stori bɔt pipul dɛn fɔ ɛnkɔrej in brɔda ɛn sista dɛn?

⁶ Pɔl bin mɛmba in brɔda ɛn sista dɛn se “bɔku witnɛs dɛn we tan lɛk klawd” bin bia prɔblɛm dɛn bikɔs Jiova bin ɛp dɛn. (Ibru. 12:​1) Pɔl bin ɔndastand se stori bɔt pipul dɛn we bin de trade we bin bia ɔlkayn prɔblɛm dɛn go ebul ɛp in brɔda ɛn sista dɛn fɔ gɛt di maynd we dɛn nid ɛn fɔ ɛp dɛn fɔ pe atɛnshɔn to “di Gɔd we de alayv in siti.” (Ibru. 12:​22) Na di sem tin tide. Yu nɔ bin gɛt fet mɔ ɛn mɔ we yu rid bɔt aw Jiova bin ɛp Gidiɔn, Berak, Devid, Samiɛl, ɛn bɔku ɔda fetful savant dɛn? (Ibru. 11:​32-35) Wetin yu tink bɔt Jiova in fetful savant dɛn tide? Na wɔl ɛdkwata, bɔku tɛm wi kin gɛt lɛta dɛn frɔm brɔda ɛn sista dɛn we dɔn ebul fɔ gɛt mɔ fet afta dɛn rid stori bɔt wan pan Jiova in fetful savant dɛn tide.

PƆL BIN SHO IN BRƆDA ƐN SISTA DƐN AW FƆ GƐT PIS WIT ƆDA PIPUL DƐN

7. Wetin yu lan frɔm Pɔl in advays we de na Romans 14:​19-21?

⁷ Wi de ɛp wi brɔda ɛn sista dɛn fɔ tinap tranga wan we wi de tray ɔltɛm fɔ ɛp fɔ mek pis kɔntinyu fɔ de na di kɔngrigeshɔn. Wi nɔ de alaw di difrɛn we dɛn aw wi de tink bɔt sɔntin fɔ ambɔg di wanwɔd we de na di kɔngrigeshɔn. Ɛn bikɔs wi gɛt rayt pan sɔntin, wi nɔ go se paopa na wetin wi want fɔ apin if nɔbɔdi nɔ pwɛl Baybul prinsipul. Lɛ wi tɔk bɔt wan ɛgzampul. Di kɔngrigeshɔn na Rom bin gɛt Kristian dɛn we na Ju ɛn Kristian dɛn we nɔto Ju. We di Lɔ we Gɔd bin gi Mozis bin dɔn ɛnd, Jiova in savant dɛn nɔ bin nid fɔ obe igen di lɔ dɛn bɔt fɔ it sɔm patikyula it dɛn. (Mak 7:​19) Frɔm da tɛm de, sɔm Ju dɛn we na Kristian bin de fil fri fɔ it ɔlkayn it. Bɔt ɔda Ju Kristian dɛn nɔ bin fil se i bin rayt fɔ mek dɛn it dɛn it dɛn de. So dat bin mek wanwɔd nɔ bin de na di kɔngrigeshɔn. Pɔl bin tɔk mɔ bɔt wetin mek i impɔtant fɔ mek dɛn kɔntinyu fɔ mek pis go de na di kɔngrigeshɔn bay we i tɔk se: “I fayn nɔ fɔ it bif ɔ drink wayn ɔ du ɛnitin we go mek yu brɔda nɔ gɛt bɛtɛ fet igen.” (Rid Romans 14:​19-21.) So Pɔl bin ɛp in kɔmpin Kristian dɛn fɔ no se dɛn we dɛn de aw dɛn de tink go ambɔg dɛn ɛn di wan ol kɔngrigeshɔn. I bin rɛdi bak fɔ chenj di we aw i bin de biev so dat i nɔ go du ɛnitin we go mek in brɔda nɔ gɛt bɛtɛ fet. (1 Kɔr. 9:​19-22) Wisɛf go ebul ɛp wi brɔda ɛn sista dɛn fɔ tinap tranga wan ɛn kɔntinyu fɔ ɛp fɔ mek pis de na di kɔngrigeshɔn if wi avɔyd fɔ agyu bɔt tin dɛn we gɛt fɔ du wit di difrɛn we dɛn aw pipul dɛn de si tin.

8. Wetin Pɔl bin du we wan impɔtant tin bin apin we bin fɔ ambɔg di pis na di kɔngrigeshɔn?

⁸ Pɔl sɛt fayn ɛgzampul fɔ ɛp fɔ mek pis de bitwin di wan dɛn we nɔ bin gri bɔt impɔtant tin dɛn. Fɔ ɛgzampul, sɔm pan di fɔstɛm Kristian dɛn bin tɔk se di wan dɛn we nɔto Ju we dɔn bi Kristian fɔ sakɔmsayz, so dat di wan dɛn we na Ju nɔ go tɔk bad bɔt dɛn. (Gal. 6:​12) Pɔl nɔ bin rili gri wit di we aw dɛn bin de tink, bɔt bifo i se paopa dɛn fɔ du wetin i want, i bin put insɛf dɔŋ ɛn aks fɔ advays frɔm di apɔsul dɛn ɛn ɛlda dɛn na Jerusɛlɛm. (Akt 15:​1, 2) Bikɔs Pɔl bin du tin da we de, i bin ɛp dɛn Kristian dɛn de fɔ kɔntinyu fɔ gɛt gladi-at ɛn pis na di kɔngrigeshɔn.—Akt 15:​30, 31.

9. Aw wi go fala Pɔl in ɛgzampul?

⁹ If siriɔs cham-mɔt apin, wi go mek pis de bay we wi aks di ɛlda dɛn fɔ advays. Bɔku tɛm, Baybul advays dɛn kin de na wi pɔblikeshɔn dɛn ɔ gaydlayn dɛn we di ɔganayzeshɔn de mek. If wi pe atɛnshɔn fɔ fala dɛn advays dɛn de ɛn nɔ pe atɛnshɔn to wetin wi tink, wi go ɛp fɔ mek pis de na di kɔngrigeshɔn.

10. Wetin bak Pɔl du fɔ mek pis de na di kɔngrigeshɔn?

¹⁰ Pɔl bin mek pis de na di kɔngrigeshɔn bay we i bin de pe atɛnshɔn to in brɔda ɛn sista dɛn fayn kwaliti dɛn we dɛn gɛt, ɛn nɔ pe atɛnshɔn pan dɛn bad abit dɛn. Fɔ ɛgzampul, we apɔsul Pɔl bin de dɔn fɔ rayt in lɛta to di Kristian dɛn na Rom, i bin kɔl bɔku pipul dɛn nem dɛn, ɛn bɔku tɛm i bin de tɔk fayn tin bɔt dɛn ɔ sɔntin we i no bɔt dɛn. Wi go falamakata Pɔl bay we wi de tɔk bɔt wi brɔda ɛn sista dɛn fayn kwaliti dɛn ɔltɛm. We wi du dat, wi de ɛp wi brɔda ɛn sista dɛn fɔ gɛt tayt padi biznɛs wit dɛnsɛf ɛn ɛp di kɔngrigeshɔn fɔ tinap tranga wan.

11. We wi gɛt cham-mɔt wit ɔda pɔsin, aw wi go mek pis de bak?

¹¹ Sɔntɛnde, ivin machɔ Kristian dɛn kin agyu ɛn dɛn nɔ kin gri bɔt sɔm tin dɛn. Dat bin apin to Pɔl ɛn in tayt padi Banabas. Dɛn tu man dɛn ya bin de agyu if dɛn fɔ go wit Mak ɔ dɛn nɔ fɔ go wit am na dɛn nɛks mishɔnari patrol. Dɛn “agyu siriɔs wan” ɛn skata. (Akt 15:​37-39) Bɔt Pɔl, Banabas, ɛn Mak bin sɛtul dɛn cham-mɔt ɛn sho se dɛn valyu di pis ɛn wanwɔd na di kɔngrigeshɔn. Leta, Pɔl bin tɔk fayn bɔt Banabas ɛn Mak. (1 Kɔr. 9:​6; Kol. 4:​10) Wisɛf nid fɔ sɛtul ɛni cham-mɔt we wi gɛt wit wi brɔda ɛn sista dɛn na di kɔngrigeshɔn ɛn kɔntinyu fɔ pe atɛnshɔn pan dɛn gud kwaliti dɛn. We wi de du dat, wi go mek pis ɛn wanwɔd de.—Ɛfi. 4:​3.

PƆL ƐP IN BRƆDA ƐN SISTA DƐN FƆ GƐT STRƆNG FET

12. Wetin na sɔm pan di prɔblɛm dɛn we wi brɔda ɛn sista dɛn kin gɛt?

¹² Wi go ɛp wi brɔda ɛn sista dɛn fɔ tinap tranga wan bay we wi ɛp dɛn fɔ gɛt strɔng fet pan Jiova. Sɔm pan wi brɔda ɛn sista dɛn gɛt famili dɛn we nɔ de sav Jiova, skulmet dɛn, ɔ wokmet dɛn we kin provok dɛn. Ɔda wan dɛn gɛt siriɔs wɛlbɔdi prɔblɛm dɛn ɔ i nɔ izi fɔ lɛ dɛn lɛf fɔ fil bad bikɔs ɔf aw ɔda pipul dɛn bin dɔn trit dɛn. Stil, ɔda brɔda ɛn sista dɛn dɔn baptayz fɔ lɔng tɛm, ɛn i dɔn te we dɛn de wet fɔ lɛ dis wɔl dɔn. Dɛn tin dɛn ya we de apin kin tɛst Kristian dɛn fet tide. Di Kristian dɛn we bin de trade dɛnsɛf bin gɛt dɛn sem prɔblɛm dɛn ya. Wetin Pɔl bin du fɔ ɛp in brɔda ɛn sista dɛn fɔ tinap tranga wan?

13. Aw Pɔl bin ɛp di wan dɛn we dɛn fambul dɛn bin de tɔk bad bɔt bikɔs ɔf wetin dɛn biliv?

¹³ Pɔl bin de yuz di Skripchɔ dɛn fɔ ɛp in brɔda ɛn sista dɛn fɔ gɛt strɔng fet. Fɔ ɛgzampul, sɔntɛm di Ju Kristian dɛn nɔ bin no aw fɔ ansa dɛn famili dɛn we nɔto bin Kristian, we dɛn bin de se di Ju dɛn rilijɔn bɛtɛ pas Kristian dɛn rilijɔn. Fɔ tru, Pɔl in lɛta we i bin rayt to di Ibru Kristian dɛn bin rili ɛp dɛn fɔ tinap tranga wan. (Ibru. 1:​5, 6; 2:​2, 3; 9:​24, 25) Di fayn tin dɛn we i bin tɔk go ɛp dɛn fɔ no aw fɔ ansa di wan dɛn we bin de tɔk bad bɔt dɛn. Tide, wi go ebul ɛp wi brɔda ɛn sista dɛn we dɛn de provok fɔ mek dɛn go yuz wi pɔblikeshɔn dɛn fɔ ɛksplen di rizin we mek dɛn biliv wetin dɛn biliv. Ɛn if dɛn de provok wi yɔŋ wan dɛn na skul bikɔs dɛn nɔ de sɛlibret batde ɛn ɔda ɔlide dɛn, wi kin ɛp dɛn fɔ fɛn infɔmeshɔn dɛn na Lɛsin 44 insay di buk we nem Ɛnjɔy Layf Sote Go! fɔ sho wetin mek dɛn nɔ de sɛlibret batde ɛn ɔda ɔlide dɛn.

14. Pan ɔl we Pɔl bin bizi de du di prichin ɛn tichin wok, wetin i bin du?

¹⁴ Pɔl bin ɛnkɔrej in brɔda ɛn sista dɛn fɔ sho lɔv bay di “fayn tin dɛn” we dɛn de du. (Ibru. 10:​24) I nɔ bin jɔs ɛp in brɔda ɛn sista dɛn bay wetin i bin de se, bɔt i bin ɛp dɛn bay wetin i bin de du. Fɔ ɛgzampul, we tin fɔ it bin shɔtin fɔ Pɔl in kɔmpin Kristian dɛn na Judia, i bin ɛp dɛn fɔ gɛt di tin dɛn we dɛn nid. (Akt 11:​27-30) Infakt, pan ɔl we Pɔl bin bizi de du di prichin ɛn tichin wok, i bin de luk fɔ we dɛn ɔltɛm fɔ ɛp di wan dɛn we nid ɛp. (Gal. 2:​10) We i bin de du dat, i bin ɛp in kɔmpin Kristian dɛn fɔ gɛt kɔnfidɛns mɔ ɛn mɔ se Jiova go kia fɔ dɛn. Tide, we wi yuz wi tɛm, wi trɛnk, ɛn wetin wi sabi du fɔ ɛp wit di dizasta rilif wok, wisɛf de ɛp wi brɔda ɛn sista dɛn fɔ gɛt fet mɔ ɛn mɔ. Wi go ebul du dis bak bay we wi de gi kɔntribyushɔn fɔ di wok we de apin ɔlsay na di wɔl. We wi du dɛn tin ya ɛn ɔda tin dɛn, wi go ɛp wi brɔda ɛn sista dɛn fɔ abop se Jiova nɔ go ɛva lɛf dɛn.

15-16. Aw wi fɔ trit di wan dɛn we nɔ gɛt bɛtɛ fet igen?

¹⁵ Pɔl nɔ bin giv-ɔp pan di wan dɛn we nɔ bin gɛt bɛtɛ fet igen. I bin sho se i de sɔri fɔ dɛn ɛn i bin tɔk fayn to dɛn. (Ibru. 6:​9; 10:​39) Fɔ ɛgzampul, insay in lɛta we i rayt to di Ibru Kristian dɛn, bɔku tɛm i bin yuz di wɔd “wi” fɔ sho se insɛf fɔ aplay di advays we i de gi. (Ibru. 2:​1, 3) Lɛk Pɔl, wi nɔ de giv-ɔp pan di wan dɛn we nɔ gɛt bɛtɛ fet igen. Bifo dat, wi de ɛp dɛn fɔ tinap tranga wan bay we wi de sho se wi rili bisin bɔt dɛn. We wi de du dat, wi de sho se wi lɛk dɛn. Di fayn we aw wi go tɔk go mek wi wɔd dɛn ɛnkɔrej dɛn ɛn ɛp dɛn fɔ tinap tranga wan.

¹⁶ Pɔl bin ɛp in brɔda ɛn sista dɛn fɔ no se Jiova no di gud wok we dɛn de du. (Ibru. 10:​32-34) Wisɛf kin du di sem tin we wi de ɛp wi kɔmpin Kristian we nɔ gɛt bɛtɛ fet igen. Wi kin aks am fɔ tɛl wi aw i kam na di trut ɔ ɛnkɔrej am fɔ tink bɔt tɛm dɛn we Jiova bin sɔpɔt am. Wi kin yuz da chans de fɔ ɛp am fɔ no se Jiova nɔ fɔgɛt bɔt di fayn tin dɛn we i bin dɔn du we sho se i lɛk Am, ɛn Jiova nɔ go ɛva lɛf am tumara bambay. (Ibru. 6:​10; 13:​5, 6) Sɔntɛm we wi ebul fɔ tɔk wit wi brɔda ɛn sista dɛn dis kayn we, wi go ɛnkɔrej dɛn fɔ kɔntinyu fɔ sav Jiova.

“UNA KƆNTINYU FƆ ƐNKƆREJ UNA KƆMPIN DƐN”

17. Wetin na sɔm tin dɛn we wi fɔ kɔntinyu fɔ du?

¹⁷ Jɔs lɛk aw pɔsin we de bil de sabi in wok mɔ as tɛm de go, na so wisɛf fɔ kɔntinyu fɔ sabi aw fɔ ɛp wi kɔmpin Kristian dɛn fɔ tinap tranga wan. Wi go ɛp dɛn fɔ mek dɛn gɛt trɛnk fɔ bia prɔblɛm dɛn we de mit dɛn bay we wi de tɔk bɔt ɛgzampul bɔt pipul dɛn we bin dɔn bia prɔblɛm dɛn trade. Wi go ɛp fɔ mek pis kɔntinyu fɔ de na di kɔngrigeshɔn bay we wi de tɔk bɔt di gud kwaliti dɛn we ɔda pipul dɛn gɛt, we sɔntin apin we go want fɔ ambɔg di pis we de na di kɔngrigeshɔn, ɛn we wi gɛt cham-mɔt wit ɔda pɔsin. Ɛn wi go kɔntinyu fɔ ɛp wi brɔda ɛn sista dɛn fɔ tinap tranga wan ɛn gɛt strɔng fet bay we wi de tɔk bɔt impɔtant Baybul trut to dɛn, we wi de ɛp dɛn wit wetin dɛn nid, ɛn we wi de sɔpɔt ɛniwan we nɔ gɛt bɛtɛ fet igen.

18. Wetin yu dɔn mekɔp yu maynd fɔ du?

¹⁸ Di wan dɛn we de du bildin wok na di ɔganayzeshɔn gladi ɛn satisfay. Wi go gɛt gladi-at ɛn satisfay we wi ɛp wi brɔda ɛn sista dɛn fɔ kɔntinyu fɔ tinap tranga wan na di kɔngrigeshɔn. Nɔmal bildin dɛn kin pwɛl as tɛm de go, bɔt wi wok fɔ ɛp wi brɔda ɛn sista dɛn fɔ tinap tranga wan go de sote go. Lɛ wi mekɔp wi maynd fɔ “kɔntinyu fɔ ɛnkɔrej [wi] kɔmpin dɛn ɛn ɛp [wi] kɔmpin dɛn fɔ tinap tranga wan.”—1 Tɛs. 5:​11.