Jiova in Pipul dɛn Lɛk fɔ Du Wetin Rayt

1. Us tɛst bin mit Josɛf? Wetin i bin du?

SƆNTIN bin apin we bin rili tɛst Jekɔb in pikin we na Josɛf. Wan uman bin tɛl am fɔ “lidɔm wit am.” Di uman na bin Josɛf in masta we nem Pɔtifa, in wɛf. Josɛf nɔ gri fɔ du wetin i want. Pɔsin insay wi tɛm go tink se, ‘Wetin mek Josɛf nɔ bin gri?’ Pɔtifa nɔ bin de. Dɔn bak, Josɛf na bin slev na da os de, ɛn dis uman go mɔs dɔn mek tin nɔ izi fɔ am bikɔs Josɛf nɔ gri fɔ du wetin i tɛl am fɔ du. Bɔt stil, Josɛf nɔ gri fɔ ledɔm wit di uman, pan ɔl we i bin de mɔna am. Wetin mek? I se: “Wetin fɔ mek in du dis kayn wikɛd tin ɛn sin to PAPA GƆD.”—Jɛn. 39:​7-12.

2. Aw Josɛf bin no se fɔ du mami ɛn dadi biznɛs wit ɔda man in wɛf na sin agens Gɔd?

² Aw Josɛf bin no se fɔ du mami ɛn dadi biznɛs wit ɔda man in wɛf na tin we in Gɔd de si as “wikɛd tin”? Infakt, na afta lɛk 200 ia Jiova bin gi Mozis di lɔ we se: “Una nɔ fɔ kip una kɔmpin in wɛf ɔ in man.” (Ɛks. 20:​14) Bɔt stil, Josɛf bin sabi Jiova gud gud wan, ɛn i bin ebul fɔ no aw Jiova de fil bɔt mami ɛn dadi biznɛs wit ɔda man in wɛf. Fɔ ɛgzampul, Josɛf bin no se Jiova bin mek mared fɔ de bitwin wan man ɛn wan uman. Ɛn i go dɔn yɛri bɔt di tu tɛm dɛn we Jiova bin protɛkt Sera, we na in gret-grani, fɔ lɛ i go kɔntinyu fɔ fetful to in man di tɛm we wan ɔda man bin want fɔ tek am as in wɛf. Dɔn bak, Gɔd bin protɛkt Ayzak in wɛf, we na Ribɛka. (Jɛn. 2:​24; 12:​14-20; 20:​2-7; 26:​6-11) As Josɛf de tink bɔt dɛn tin dɛn ya, i go dɔn kam fɔ no wetin rayt ɛn wetin rɔng na Gɔd in yay. Ɛn bikɔs Josɛf lɛk in Gɔd, i bin lɛk di tin dɛn we rayt na Jiova in yay, ɛn i bin dɔn mekɔp in maynd fɔ du wetin i no se Jiova want am fɔ du.

3. Wetin wi go tɔk bɔt insay dis atikul?

³ Yu lɛk fɔ du wetin rayt? Wan dawt nɔ de se dat na tin we yu lɛk fɔ du. Bɔt wi ɔl nɔ pafɛkt, ɛn if wi nɔ tek tɛm, i go izi fɔ lɛ di we aw di wɔl de si wetin rayt bigin afɛkt wi. (Ayz. 5:​20; Rom. 12:​2) So wi go tɔk bɔt wetin i min fɔ du wetin rayt ɛn aw wi go bɛnifit we wi lɛk fɔ du wetin rayt. Dɔn wi go tɔk bɔt tri tin dɛn we wi go du we go ɛp wi fɔ lɛk Jiova in lɔ dɛn mɔ ɛn mɔ.

WETIN I MIN FƆ DU WETIN RAYT?

4. Us rɔng we sɔm pipul dɛn we tink se dɛn de du wetin rayt de biev?

⁴ Di bigman dɛn pan Gɔd biznɛs we bin de insay Jizɔs in tɛm bin de si dɛnsɛf as pipul dɛn we de du wetin rayt. Bɔt Jizɔs bin kɔndɛm dɛn bikɔs dɛn bin de tɔk bad bɔt ɔda pipul dɛn, ɛn dɛn bin de mek dɛn yon lɔ dɛn bɔt wetin rayt ɛn wetin rɔng. (Ɛkli. 7:​16; Lyuk 16:​15) Na dis sem we sɔm pipul dɛn insay wi tɛm de biev. Dɛn kin se dɛn nɔ de du bad tin bikɔs dɛn dɔn mek dɛn yon lɔ dɛn bɔt wetin rayt ɛn wetin rɔng. Bɔku tɛm, dɛn kin mek prawd, dɛn kin jɔj ɔda pipul dɛn, ɔ tink se dɛn bɛtɛ pas dɛn. Jiova nɔ lɛk pipul dɛn we de so, ɛn dɛn kayn pipul dɛn de nɔ de du wetin rayt atɔl.

5. Akɔdin to di Baybul, wetin i min fɔ du wetin rayt? Gi ɛgzampul dɛn.

⁵ Fɔ du wetin rayt na fayn kwaliti. I min se pɔsin de du wetin rayt na Jiova Gɔd in yay. Insay di Baybul, di wɔd dɛn fɔ “du wetin rayt” kin min fɔ fala di lɔ dɛn we pas ɔl di ɔda lɔ dɛn, dat na Jiova in lɔ dɛn. Fɔ ɛgzampul, Jiova bin se biznɛsman dɛn fɔ yuz skel we “kɔrɛkt [ɔ ɔnɛs].” (Dit. 25:​15) Di orijinal Ibru wɔd we dɛn translet as “ɔnɛs” kin min bak sɔntin we “rayt.” So pɔsin we na Kristian we want fɔ du wetin rayt na Gɔd in yay go ɔnɛs ɔltɛm we i de du biznɛs. Pɔsin we de du wetin rayt kin lɛk jɔstis bak. I et fɔ si we dɛn nɔ de trit pipul dɛn fia wan. Ɛn fɔ lɛ pɔsin we de du wetin rayt go “rili mek [Jiova] gladi,” i de tink bɔt aw Jiova de si di tin dɛn we i de disayd fɔ du.—Kol. 1:​10.

6. Wetin mek wi fɔ gɛt kɔnfidɛns pan Jiova in lɔ dɛn bɔt wetin rayt ɛn wetin rɔng? (Ayzaya 55:​8, 9)

⁶ Di Baybul se na Jiova fɔs bigin du wetin rayt. Na dat mek di Baybul kɔl am “di Wan we de du wetin rayt ɔltɛm.” (Jɛr. 50:​7, NWT) Na Jiova mek ɔltin, so na in nɔmɔ gɛt di rayt fɔ sho wi wetin rayt ɛn wetin rɔng. Bikɔs wi de sin ɛn wi nɔ pafɛkt, wi nɔ kin no wetin rayt ɛn wetin rɔng. Bɔt Jiova pafɛkt, so i no ɔl wetin rayt ɛn wetin rɔng. (Prɔv. 14:​12; rid Ayzaya 55:​8, 9.) Bɔt bikɔs Gɔd mek wi lɛk aw i tan, wi ebul fɔ du wetin i se rayt. (Jɛn. 1:​27) Ɛn wi lɛk fɔ du am. Di lɛk we wi lɛk wi Papa de mek wi falamakata am di bɛst we aw wi ebul.—Ɛfi. 5:​1

7. Wetin mek wi nid lɔ dɛn we wi go ebul fɔ abop pan? Gi wan ɛgzampul.

⁷ Wi de bɛnifit we wi fala Jiova in lɔ dɛn bɔt wetin rayt ɛn wetin rɔng. Yu no wetin mek? Imajin wetin go apin if ɔl di difrɛn bank dɛn gɛt difrɛn valyu fɔ di mɔni we wi de yuz, ɔ if ɔl di wan dɛn we de du bildin wok gɛt dɛn yon difrɛn mɛzhɔmɛnt dɛn as dɛn de du dɛn wok. Na kɔnfyushɔn go de. Ɛn if dɔktɔ ɛn nɔs dɛn nɔ de fala patikyula lɔ dɛn we dɛn de trit pipul dɛn, sɔntɛm sɔm peshɛnt dɛn go day. Fɔ tru, we pipul dɛn gɛt lɔ dɛn we dɛn de abop pan ɛn we ɔlman gri wit, dat de protɛkt wi. Semweso, Gɔd in lɔ dɛn bɔt wetin rayt ɛn wetin rɔng de protɛkt wi.

8. Us blɛsin dɛn de wet fɔ di wan dɛn we lɛk fɔ du wetin rayt?

⁸ Jiova de blɛs di wan dɛn we de tray fɔ fala in lɔ dɛn bɔt wetin rayt ɛn wetin rɔng. I prɔmis wi se: “Udat dɛn de du wetin rayt go gɛt di land, ɛn dɛn go de de sote go.” (Sam 37:​29) Yu ebul imajin di kayn wanwɔd, pis, ɛn gladi-at we wi go ɛnjɔy di tɛm we ɔlman de fala Jiova in lɔ dɛn? Jiova want yu fɔ ɛnjɔy da kayn layf de. Fɔ tru, wi ɔl gɛt gud rizin dɛn fɔ lɛk wetin Jiova se rayt. Aw wi go ebul fɔ lɛk dis kwaliti mɔ ɛn mɔ? Lɛ wi tɔk bɔt tri tin dɛn we wi go du.

WETIN GO ƐP YU FƆ LƐK JIOVA IN LƆ DƐN MƆ ƐN MƆ?

9. Wetin go ɛp wi fɔ lɛk wetin rayt?

⁹ Stɛp 1: Lɛk di Pɔsin we de mek di lɔ dɛn. Fɔ lɛ wi go lɛk wetin rayt, wi nid fɔ lɛk di Wan we de mek di lɔ dɛn bɔt wetin rayt ɛn wetin rɔng mɔ ɛn mɔ. Di mɔ wi de lɛk Jiova, na di mɔ wi go want fɔ fala in lɔ dɛn bɔt wetin rayt. Fɔ ɛgzampul, if Adam ɛn Iv bin lɛk Jiova, dɛn nɔ bin fɔ ɛva tɔn dɛn bak pan in lɔ.—Jɛn. 3:​1-6, 16-19.

10. Aw Ebraam bin kam fɔ ɔndastand Jiova mɔ ɛn mɔ?

¹⁰ Wan dawt nɔ de se wi nɔ want fɔ mek di sem mistek we Adam ɛn Iv bin mek. Wi go ebul fɔ avɔyd dat if wi kɔntinyu fɔ lan bɔt Jiova, gladi fɔ in kwaliti dɛn we i gɛt, ɛn tray fɔ ɔndastand aw i de tink. As wi de du dat, wi go lɛk Jiova mɔ ɛn mɔ. Tink bɔt Ebraam. I bin rili lɛk Jiova. Pan ɔl we Ebraam nɔ bin de ɔndastand sɔm tin dɛn we Jiova bin dɔn disayd fɔ du, i nɔ bin tɔn in bak pan Jiova. Bifo dat, i tray fɔ no Jiova mɔ ɛn mɔ. Fɔ ɛgzampul, we Ebraam bin kam fɔ no se Jiova dɔn disayd fɔ dɔnawe wit Sɔdɔm ɛn Gomɔra, fɔs i bin fred se di Jɔj “fɔ di wanol wɔl” go kil di wan dɛn we de du wetin rayt wit di wikɛd wan dɛn. Ebraam bin tink se dat nɔ fɔ apin. So i bin put insɛf dɔŋ ɛn aks Jiova sɔm kwɛstyɔn dɛn. Jiova bin peshɛnt am ɛn ansa ɔl in kwɛstyɔn dɛn. Leta, Ebraam bin kam fɔ si se Jiova de luk wetin de insay ɔlman in at, ɛn I nɔ de ɛva pɔnish di inosɛnt wan dɛn wit di wan dɛn we gilti.—Jɛn. 18:​20-32.

11. Aw Ebraam bin sho se i lɛk Jiova ɛn i abop pan Am?

¹¹ Di tɔk we Ebraam bin tɔk wit Jiova bɔt Sɔdɔm ɛn Gomɔra bin rili tɔch in at. I bin kam fɔ lɛk ɛn rɛspɛkt in Papa pas aw i bin dɔn de du am. Afta lɔng tɛm, sɔntin bin apin we bin rili tɛst di we aw Ebraam abop pan Jiova. Jiova bin tɛl am fɔ sakrifays in pikin we i lɛk, we na Ayzak. Bɔt bay dis tɛm, Ebraam bin dɔn sabi in Gɔd gud gud wan, so i nɔ bin aks Am ɛni kwɛstyɔn. Ebraam bin jɔs du wetin Jiova tɛl am fɔ du. Bɔt stil, imajin aw i nɔ bin izi fɔ am as i de rɛdi fɔ du dis tin we Jiova bin tɛl am. Ebraam go dɔn tink gud wan bɔt wetin i dɔn lan bɔt Jiova. I bin no se Jiova nɔ go ɛva du ɛnitin we nɔ rayt ɔ we nɔ de sho lɔv. Akɔdin to apɔsul Pɔl, Ebraam bin biliv se Jiova go ebul gi layf bak to in pikin we i lɛk, we na Ayzak. (Ibru. 11:​17-19) I bin biliv dis bikɔs Jiova bin dɔn prɔmis se Ayzak go bi papa to wan neshɔn, ɛn bay da tɛm de, Ayzak nɔ bin dɔn bɔn pikin dɛn yet. Ebraam bin lɛk Jiova, so i bin biliv se in Papa go du wetin rayt ɔltɛm. Pan ɔl we i nɔ bin izi fɔ am, in fet bin mek i obe Jiova.—Jɛn. 22:​1-12.

12. Aw wi go falamakata Ebraam? (Sam 73:​28)

¹² Aw wi go falamakata Ebraam? Wisɛf nid fɔ kɔntinyu fɔ lan bɔt Jiova. As wi de du dat, wi go kam nia am ɛn lɛk am mɔ ɛn mɔ. (Rid Sam 73:​28.) Wi go tren wi kɔnshɛns fɔ lɛ wi ebul tink di we aw Jiova de tink. (Ibru. 5:​14) Dis go mek we pɔsin tray fɔ tɛmt wi fɔ du sɔntin we bad, wi nɔ go gri. Wi nɔ go ivin tink fɔ du ɛnitin we go mek wi Papa in at pwɛl ɛn we go ambɔg wi padi biznɛs wit am. Bɔt us ɔda we wi go sho se wi lɛk wetin rayt?

13. Aw wi go tray tranga wan fɔ du wetin rayt? (Prɔvabs 15:​9, NWT)

¹³ Stɛp 2: Tray fɔ du wetin go mek yu lɛk wetin rayt ɛvride. If wi want fɔ mek wi bɔdi strɔng, wi gɛt fɔ tray tranga wan fɔ de ɛksasayz ɛvride. Na so wi fɔ tray tranga wan bak fɔ lɛk wetin Jiova se rayt. Dis na tin we yu fɔ de du ɛvride. Jiova nɔ de pin pan sɔntin, ɛn i nɔ de ɛva ɛkspɛkt wi fɔ du pas wetin wi ebul du. (Sam 103:​14) I dɔn ɛp wi fɔ no se “i lɛk di wan we de tray tranga wan fɔ du wetin rayt.” (Rid Prɔvabs 15:​9, NWT.) If wi de tray tranga wan fɔ rich wan patikyula gol na Jiova in savis, wi de kɔntinyu fɔ du wetin go mek wi rich da gol de. Na di sem tin wi fɔ du we wi de tray tranga wan fɔ du wetin rayt. Ɛn Jiova go peshɛnt wi ɛn ɛp wi fɔ mek wi ebul du wetin rayt mɔ ɛn mɔ as tɛm de go.—Sam 84:​5, 7.

14. Wetin na “di tin we de protɛkt [wi] chɛst we min wetin rayt”? Wetin mek wi nid am?

¹⁴ Bikɔs Jiova lɛk wi, i de mɛmba wi se fɔ du wetin rayt nɔto ɛvi lod. (1 Jɔn 5:​3) Bifo dat, i de protɛkt wi, ɛn dat na tin we wi nid ɛvride. Mɛmba wetin apɔsul Pɔl bin tɔk bɔt di tin dɛn we Gɔd dɔn gi wi fɔ tek fɛt. (Ɛfi. 6:​14-18) Uswan pan dɛn tin dɛn de bin de protɛkt di sojaman in at? Na “di tin we [bin] de protɛkt [in] chɛst we min wetin rayt.” Dis tin tinap fɔ Jiova in lɔ dɛn bɔt wetin rayt. Jɔs lɛk aw dis tin de protɛkt di at, na so Jiova in lɔ dɛn bɔt wetin rayt go protɛkt yu at, dat na di pɔsin we yu bi insay. Na dat mek i impɔtant fɔ lɛ yu wɛr di tin we de protɛkt yu chɛst we min wetin rayt.—Prɔv. 4:​23.

15. Aw yu go ebul fɔ wɛr di tin we de protɛkt wi chɛst we min wetin rayt?

¹⁵ Aw yu go ebul fɔ wɛr di tin we de protɛkt wi chɛst we min wetin rayt? Yu go ebul fɔ du dat bay we yu de tink bɔt wetin Gɔd go want yu fɔ du we yu de disayd fɔ du tin dɛn ɛvride. We yu de disayd wetin fɔ tɔk, us myuzik fɔ lisin, wetin yu fɔ wach fɔ ɛnjɔy yusɛf, ɔ us buk yu fɔ rid, fɔs na fɔ aks yusɛf dɛn kwɛstyɔn dɛn ya: ‘Wetin a de put insay mi at? Fɔ se Jiova go gladi wit am? Ɔ fɔ se dis tin de sɔpɔt mami ɛn dadi biznɛs di we aw Gɔd nɔ want, fɛt-fɛt, fɔ lɛ pɔsin want ɔltin fɔ insɛf, fɔ lɛ pɔsin jɔs bisin bɔt insɛf, we na tin dɛn we Jiova se nɔ rayt?’ (Fil. 4:​8) If di tin dɛn we yu de disayd fɔ du gri wit wetin Jiova want, dat min se yu de alaw in lɔ dɛn bɔt wetin rayt fɔ protɛkt yu at.

16-17. Aw Ayzaya 48:​18 ɛp wi fɔ no se wi go ebul fala Jiova in lɔ dɛn sote go?

¹⁶ Yu dɔn ɛva wɔri if yu go ebul kɔntinyu fɔ fala Jiova in lɔ dɛn bɔt wetin rayt ɛvride na yu layf, ia afta ia? Tink bɔt wan ɛgzampul we Jiova bin yuz na Ayzaya 48:​18. (Rid.) Jiova bin prɔmis wi se di du we wi de du wetin rayt go “tan lɛk swɛlin na si.” Imajin se yu tinap na di sansan na wan bich, ɛn yu de wach we di swɛlin de kam ɛn go bɔku bɔku tɛm. As yu tinap na di bich de wach di swɛlin, fɔ se yu go bigin wɔri se sɔntɛm di tɛm go kam we di swɛlin nɔ go kam ɛn go igen? Nɔ! Yu no se di swɛlin dɔn de kam ɛn go na da bich de fɔ lɔng lɔng tɛm, ɛn i nɔ go ɛva stɔp.

¹⁷ I pɔsibul fɔ lɛ di du we yu de du wetin rayt tan lɛk swɛlin na si. Aw? We yu nid fɔ disayd fɔ du sɔntin, fɔs na fɔ tink bɔt wetin Jiova go want yu fɔ du. Dɔn na fɔ du am. Ilɛk aw i nɔ go izi fɔ lɛ yu du di tin we yu dɔn disayd, yu Papa we lɛk yu go de wit yu ɔltɛm fɔ ɛp yu fɔ kɔntinyu fɔ du wetin rayt ɛvride.—Ayz. 40:​29-31.

18. Wetin mek wi nɔ fɔ jɔj pipul dɛn akɔdin to wetin wi tink se rayt?

¹⁸ Stɛp 3: Alaw Jiova fɔ jɔj pipul dɛn. As wi de tray tranga wan fɔ fala Jiova in lɔ dɛn bɔt wetin rayt, wi nɔ fɔ jɔj ɔda pipul dɛn ɛn bigin tink se wi bɛtɛ pas dɛn. Wi nɔ gɛt di rayt fɔ disayd if ɔda pipul dɛn de du wetin Jiova want dɛn fɔ du. Wi fɔ mɛmba se na Jiova na di Jɔj “fɔ di wanol wɔl.” (Jɛn. 18:​25) Nɔto wi Jiova gi di wok fɔ jɔj. Infakt, Jizɔs bin kɔmand wi se: “Una lɛf fɔ jɔj pipul dɛn so dat Gɔd nɔ go jɔj una.”—Mat. 7:​1.b

19. Aw Josɛf bin sho se i biliv di we aw Jiova de jɔj?

¹⁹ Lɛ wi tɔk bak bɔt Josɛf, we na man we bin de du wetin rayt in ɛgzampul. I nɔ bin de jɔj ɔda pipul dɛn, ivin di wan dɛn we bin de trit am bad. In yon brɔda dɛn bin atak am, sɛl am as slev, ɛn mek dɛn papa biliv se Josɛf dɔn day. Afta lɔng tɛm, Josɛf bin de bak wit in famili. Bay da tɛm de, in na bin pawaful rula, ɛn i bin fɔ dɔn jɔj in brɔda dɛn ash we ɛn tray fɔ tɔn-dɛt. Josɛf in brɔda dɛn bin de fred se sɔntɛm i go du dat, pan ɔl we dɛn bin rili sɔri fɔ wetin dɛn bin dɔn du. Bɔt Josɛf bin tɛl dɛn se “lɛ dɛn nɔ fred. In nɔto PAPA GƆD we de pɔnish ɔ jɔj pɔsin.” (Jɛn. 37:​18-20, 27, 28, 31-35; 50:​15-21) Josɛf bin put insɛf dɔŋ ɛn mɛmba se na Jiova nɔmɔ gɛt di rayt fɔ jɔj in brɔda dɛn.

20-21. Aw wi go avɔyd fɔ bi pɔsin we de tink se i bɛtɛ pas ɔda pipul dɛn?

²⁰ Jɔs lɛk Josɛf, wi fɔ alaw Jiova fɔ jɔj pipul dɛn. Fɔ ɛgzampul, wi nɔ de bigin tray fɔ no wetin mek wi brɔda ɛn sista dɛn du wetin dɛn de du. Wi nɔ ebul fɔ rid pipul dɛn at; na Jiova nɔmɔ ‘de si insay pɔsin in at.’ (Prɔv. 16:​2) I lɛk ɔlkayn pipul dɛn, ilɛk usay dɛn kɔmɔt ɔ us kɔlchɔ dɛn gɛt. Ɛn Jiova de ɛnkɔrej wi fɔ “rili opin [wi] at.” (2 Kɔr. 6:​13) Wi de tray fɔ sho lɔv to ɔl wi brɔda ɛn sista dɛn, wi nɔ de jɔj dɛn.

²¹ Dis min bak se wi nɔ fɔ jɔj di wan dɛn we nɔ de na di kɔngrigeshɔn. (1 Tim. 2:​3, 4) Yu go ɛva jɔj yu fambul we nɔto Jiova Witnɛs ɛn bigin tɔk se, “Da man de nɔ go ɛva kam na di trut”? Nɔ, yu nɔ go du dat bikɔs i de sho se yu de du tin we yu nɔ gɛt rayt fɔ du, ɛn yu de tink se yu bɛtɛ pas am. Jiova stil de gi “ɔlman we de ɔlsay” di chans fɔ ripɛnt. (Akt 17:​30) Mɛmba ɔltɛm se Jiova de si di wan dɛn we tink se dɛn bɛtɛ pas ɔda pipul dɛn as pipul dɛn we nɔ de du wetin rayt.

22. Wetin mek yu dɔn mekɔp yu maynd fɔ lɛk wetin rayt?

²² Bikɔs wi lɛk wetin Jiova se rayt, dat go mek wi gladi, ɛn i go ɛp wi fɔ bi gud ɛgzampul to ɔda pipul dɛn so dat dɛn go lɛk wi ɛn Gɔd mɔ ɛn mɔ. Lɛ wi nɔ ɛva stɔp fɔ bi pipul dɛn “we rili want fɔ lɛ wetin rayt apin.” (Mat. 5:​6) Biliv tranga wan se Jiova de notis di tray we yu de tray tranga wan fɔ du wetin rayt, ɛn i gladi fɔ ɔl wetin yu de du. Di mɔ we pipul dɛn na dis wɔl de du wetin nɔ rayt, na di mɔ yu fɔ tek kɔrej. Mɛmba ɔltɛm se Jiova ‘lɛk udat de du wetin rayt.’—Sam 146:​8.