Yu Go Ebul Gɛt Pis di Tɛm we Prɔblɛm De!

1. Wetin na “di pis we Gɔd de gi”? Aw wi go bɛnifit we wi gɛt am? (Filipians 4:​6, 7)

WI GƐT wan kayn pis we pipul dɛn na di wɔl nɔ no bɔt. Na “di pis we Gɔd de gi,” we na di wɔri we wi nɔ de wɔri bikɔs wi gɛt tayt padi biznɛs wit wi Papa we de na ɛvin. We wi gɛt di pis we Gɔd de gi, wi de fil sef. (Rid Filipians 4:​6, 7.) Wi de ɛnjɔy tayt padi biznɛs wit di wan dɛn we lɛk am. Ɛn wi de ɛnjɔy tayt padi biznɛs wit “di Gɔd we de gi pis.” (1 Tɛs. 5:​23) We wi no, trɔst, ɛn obe wi Papa, di pis we Gɔd de gi go mek wi nɔ wɔri we wi gɛt prɔblɛm we nɔ izi.

2. Wetin mek wi shɔ se i pɔsibul fɔ gɛt di pis we Gɔd de gi?

² Yu tink se i pɔsibul fɔ mek wi gɛt di pis we Gɔd de gi we wi gɛt prɔblɛm dɛn lɛk sik we de prɛd, dizasta, wɔ, ɔ we dɛn de mek wi sɔfa? Ɛniwan pan dɛn prɔblɛm dɛn ya go mek wi fred. Bɔt Jizɔs bin advays in disaypul dɛn se: “Una nɔ wɔri, ɛn una nɔ fred.” (Jɔn 14:​27) Wi gladi fɔ no se wi gɛt brɔda ɛn sista dɛn we dɔn fala Jizɔs in advays. Wit Jiova in ɛp, dɛn ebul fɔ gɛt pis we dɛn de bia prɔblɛm we nɔ izi.

AW WI GO EBUL FƆ GƐT PIS DI TƐM WE SIK WE DE PRƐD DE?

3. Aw sik we de prɛd kin ambɔg wi pis?

³ Sik we de prɛd kin afɛkt ɔlmost ɔltin we wi de du na wi layf. Tink bɔt aw di COVID-19 pandɛmik dɔn ambɔg bɔku pipul dɛn. Insay wan sɔve, we dɛn kɔnt tɛn pipul dɛn, i pas fayv pan dɛn we kɔmplen se dɛn nɔ ebul fɔ slip di tɛm we di pandɛmik de. Di pandɛmik bin mek bɔku pipul dɛn wɔri, dɛn at bin pwɛl, dɛn bin de drink bɔku rɔm ɛn tek drɔgs, bɔku pipul dɛn bin de fɛt na os, ɛn bɔku pipul dɛn bin want fɔ kil dɛnsɛf. If sik we de prɛd de na yu eria, wetin go ɛp yu fɔ mek yu nɔ wɔri pasmak ɛn ɛnjɔy di pis we Gɔd de gi?

4. We wi no bɔt Jizɔs in prɔfɛsi bɔt di las dez, wetin mek dat de mek wi gɛt pis?

⁴ Jizɔs bin dɔn tɔk se insay di las dez, sik we de prɛd go de “na difrɛn ples dɛn.” (Lyuk 21:​11) We wi no dat, aw dat go mek wi gɛt pis? Wi nɔ kin sɔprayz we sik we de prɛd de. Wi no se dɛn tin dɛn ya de apin jɔs lɛk aw Jizɔs se dɛn go bi. So wi gɛt rizin fɔ fala di advays we Jizɔs bin gi to di wan dɛn we de insay di tɛm fɔ lɛ di wɔl dɔn. I bin se: “Una nɔ fred.”—Mat. 24:​6.

5. (a) Aw di wɔd dɛn we de na Filipians 4:​8, 9 ɛp wi fɔ no wetin wi fɔ pre bɔt we sik we de prɛd de? (b) Aw di lisin we yu de lisin to odio rɛkɔdin dɛn we di ɔganayzeshɔn dɔn mek go bɛnifit yu?

⁵ Sik we de prɛd kin mek wi rili wɔri ɛn ivin fred. Dat bin apin to wan sista we nem Dezi.b Afta COVID-19 kil in kɔzin, in ɔnkul, ɛn in dɔktɔ, i bin fred se i go gɛt di sik ɛn pas am to in mama we dɔn ol. Bikɔs ɔf di pandɛmik, i bin de wɔri se i go lɔs in wok. So i bin de wɔnda aw i go ebul fɔ gɛt mɔni fɔ bay tin fɔ it ɛn fɔ pe in rɛnt. I bin de wɔri pasmak bɔt dɛn tin dɛn ya te i nɔ ebul fɔ slip na nɛt. Bɔt Dezi bin ebul fɔ gɛt pis bak. Aw? I bin pre bɔt patikyula tin dɛn. I bin pre fɔ mek Jiova ɛp am fɔ mek i nɔ wɔri ɛn fɔ mek i go de tink bɔt tin dɛn we fayn. (Rid Filipians 4:​8, 9.) I bin lisin we Jiova de yuz di odio Baybul ridin fɔ “tɔk” to am. I tɔk se: “Di fayn we aw di rida dɛn bin de rid bin mek a lɛf fɔ wɔri, ɛn i mɛmba mi se Jiova bisin bɔt mi.”—Sam 94:​19.

6. Aw pasɔnal stɔdi ɛn di mitin dɛn go ɛp yu?

⁶ Wan dawt nɔ de se sik we de prɛd kin ambɔg sɔm pan di tin dɛn we yu dɔn yus fɔ du. Bɔt nɔ alaw am fɔ ambɔg yu pasɔnal stɔdi ɔ stɔp yu fɔ atɛnd mitin. Di ɛkspiriɛns dɛn we de na wi pɔblikeshɔn ɛn vidio dɛn go mɛmba yu se yu brɔda ɛn sista dɛn de kɔntinyu fɔ sav Jiova fetful wan pan ɔl we dɛn gɛt da sem kayn prɔblɛm de. (1 Pit. 5:​9) Di mitin dɛn go ɛp yu fɔ tink bɔt di fayn tin dɛn we di Baybul de tich. Di mitin dɛn go mek yu gɛt chans bak fɔ ɛnkɔrej ɔda pipul dɛn ɛn fɔ mek dɛnsɛf ɛnkɔrej yu. (Rom. 1:​11, 12) We yu tink bɔt aw Jiova dɔn sɔpɔt in savant dɛn we bin sik, we bin de fred, ɔ we na dɛn wangren de, yu go gɛt mɔ fet ɛn yu go biliv tranga wan se i go sɔpɔt yu bak.

7. Us lɛsin yu go lan frɔm apɔsul Jɔn?

⁷ Tray fɔ de tɔk wit yu brɔda ɛn sista dɛn. We sik we de prɛd de, wi de tray nɔ fɔ go nia pipul dɛn, ivin di wan dɛn we wi ɔl de wɔship Jiova. Bɔt stil, sɔntɛm yu go fil lɛk apɔsul Jɔn. I bin want fɔ si in padi, we na Geɔs, fes-to-fes. (3 Jɔn 13, 14) Stil, Jɔn bin no se fɔ sɔm tɛm, i nɔ go ebul fɔ si Geɔs. So Jɔn bin du wetin i bin ebul fɔ du; i bin rayt lɛta to Geɔs. If i nɔ pɔsibul fɔ mek yu go fɛn yu brɔda ɛn sista dɛn fes-to-fes, tray fɔ yuz fon fɔ kɔl dɛn, du vidio kɔl, ɔ sɛn tɛks mɛsej to dɛn. We yu de tɔk wit yu Kristian brɔda ɛn sista dɛn, yu nɔ go de fil se na yu wangren de ɛn yu nɔ go de wɔri pasmak. Tɔk to di ɛlda dɛn if yu gɛt prɔblɛm we de mek yu wɔri pasmak, ɛn gri fɔ mek dɛn ɛnkɔrej yu.—Ayz. 32:​1, 2.

AW WI GO EBUL FƆ GƐT PIS WE DIZASTA APIN?

8. We dizasta apin, aw dat kin ambɔg yu pis?

⁸ If yu dɔn ɛva sɔfa bikɔs ɔf flɔd, atkwek, ɔ faya, sɔntɛm yu wɔri fɔ lɔng tɛm afta di prɔblɛm apin. If pipul dɛn we yu lɛk day ɔ yu os ɛn prɔpati dɛn pwɛl, yu at go dɔn pwɛl, ɛn yu go dɔn fil se yu nɔ gɛt op igen, ɔ yu go ivin vɛks. Dis nɔ min se yu lɛk prɔpati ɔ yu nɔ gɛt fet. Prɔblɛm we nɔ izi dɔn mit yu, ɛn sɔm pipul dɛn go de ɛkspɛkt yu fɔ du tin we nɔ fayn. (Job 1:​11) Bɔt yu go stil ebul fɔ gɛt pis. Aw?

9. Wetin Jizɔs bin se fɔ rɛdi wi fɔ dizasta dɛn we go apin?

⁹ Mɛmba wetin Jizɔs bin se go apin. Sɔm pipul dɛn de tink se dizasta nɔ go ɛva mit dɛn. Bɔt wi no se mɔ dizasta dɛn go apin insay wi yon tɛm, ɛn sɔm pan dɛn dizasta dɛn ya go afɛkt wi. Jizɔs bin tɛl in disaypul dɛn se “big big atkwek dɛn” ɛn ɔda dizasta dɛn go apin bifo di ɛnd kam. (Lyuk 21:​11) I bin tɔk bak se “bɔku pipul dɛn go de brok lɔ,” we de apin tide. Fɔ ɛgzampul, wi de si kraym, fɛt-fɛt, ɛn tɛrɔrist atak dɛn. (Mat. 24:​12) Jizɔs nɔ bin ɛva tɔk se if wi de sɔfa bikɔs ɔf dɛn kayn prɔblɛm dɛn ya, dat min se Jiova dɔn tɔn in bak pan wi. Infakt, dizasta dɔn afɛkt bɔku pan Jiova in fetful savant dɛn. (Ayz. 57:​1; 2 Kɔr. 11:​25) Jiova nɔ go yuz mirekul fɔ protɛkt wi frɔm ɔl di dizasta dɛn we de apin, bɔt i go gi wi wetin wi nid fɔ mek wi nɔ wɔri ɛn fɔ mek wi gɛt pis.

10. We wi rɛdi naw fɔ dizasta, aw dat de sho se wi gɛt fet? (Prɔvabs 22:​3)

¹⁰ I go izi fɔ mek wi nɔ wɔri we imajɛnsi apin if wi dɔn pripia fɔ am. Bɔt yu tink se di rɛdi we wi go rɛdi fɔ we dizasta go apin min se wi nɔ gɛt fet pan Jiova? Nɔ, nɔto so i bi. Infakt, di rɛdi we wi de rɛdi fɔ dizasta de sho se wi gɛt fet se Jiova ebul fɔ kia fɔ wi. Aw? Gɔd in Wɔd advays wi fɔ rɛdi fɔ dizasta dɛn we go apin. (Rid Prɔvabs 22:​3.) Ɛn Gɔd in ɔganayzeshɔn de yuz di atikul dɛn na di magazin, di mitin dɛn, ɛn anawnsmɛnt dɛn fɔ ɛnkɔrej wi ɔltɛm fɔ rɛdi fɔ imajɛnsi.c Wi trɔst Jiova? If wi trɔst am, wi go fala da advays de naw, bifo dizasta go apin.

11. Wetin yu lan frɔm Magrɛt in ɛgzampul?

¹¹ Tink bɔt wan sista we nem Magrɛt in ɛkspiriɛns. Di gɔvmɛnt bin tɛl am fɔ kɔmɔt na in os bikɔs dɛn bin gɛt big big faya na di eria. Bikɔs bɔku bɔku pipul dɛn bin de tray fɔ rɔnawe wantɛm wantɛm, bɔku motoka dɛn bin de na di rod ɛn trafik bin blɔk. Bɔku blak smok bin de ɔlsay, ɛn Magrɛt nɔ bin ebul fɔ kɔmɔt insay in motoka. Bɔt i bin ebul fɔ sev bikɔs i bin rɛdi. I bin gɛt wan map we i go yuz fɔ fɛn ɔda rod fɔ kɔmɔt na di eria. I bin dɔn ivin drayv na da rod de bifo tɛm so dat i go ebul fɔ no usay fɔ go we imajɛnsi apin. Bikɔs Magrɛt bin rɛdi, i bin ebul fɔ sev frɔm di big big faya.

12. Wetin mek wi de fala dayrɛkshɔn dɛn we dɛn gi fɔ protɛkt wi?

¹² Fɔ protɛkt wi ɛn ɔda pipul dɛn, sɔntɛm di wan dɛn gɛt pawa go tɛl wi fɔ obe kɔfi-ɔda, fɔ kɔmɔt sɔnsay, ɔ fɔ fala wetin dɛn go tɛl wi we prɔblɛm de. Sɔm pipul dɛn nɔ kin obe dɛn dayrɛkshɔn dɛn ya bikɔs dɛn nɔ want fɔ lɛf dɛn prɔpati dɛn biɛn. Wetin Kristian fɔ du? Di Baybul tɛl wi se: “Fɔ di Masta in sek, una put unasɛf ɔnda ɔl wetin mɔtalman mek, ilɛk na kiŋ we de oba una ɔ gɔvnɔ dɛn we i sɛn.” (1 Pit. 2:​13, 14) Gɔd in ɔganayzeshɔn de gi wi bak dayrɛkshɔn we go protɛkt wi. Dɛn kin mɛmba wi ɔltɛm fɔ gi di ɛlda dɛn wi tɛlifon nɔmba ɛn adrɛs we wi de yuz naw so dat dɛn go ebul fɔ kɔl wi we imajɛnsi apin. Yu dɔn du dat? Sɔntɛm dɛn go gi wi dayrɛkshɔn bak fɔ de na wi os ɔ fɔ lɛf wi os, ɛn bɔt aw wi fɔ gɛt rilif sɔplay dɛn, ɔ bɔt aw ɛn ustɛm wi fɔ ɛp ɔda pipul dɛn. If wi nɔ gri fɔ obe, wi go put wi layf ɛn di ɛlda dɛn layf pan denja. Mɛmba se na dɛn fetful man dɛn ya de kia fɔ wi. (Ibru. 13:​17) Magrɛt bin tɔk se: “A biliv tranga wan se bikɔs a bin fala di dayrɛkshɔn we di ɛlda dɛn ɛn di ɔganayzeshɔn bin gi, na dat mek a sev mi layf.”

13. Wetin dɔn ɛp bɔku Kristian dɛn we rɔnawe kɔmɔt na dɛn os fɔ gɛt pis ɛn gladi-at?

¹³ Bɔku brɔda ɛn sista dɛn we dɔn rɔnawe kɔmɔt na dɛn os bikɔs ɔf dizasta ɔ wɔ dɔn du dɛn bɛst fɔ ajɔst to dɛn nyu layf ɛn fɔ du mɔ fɔ sav Jiova. Jɔs lɛk di fɔstɛm Kristian dɛn we bin skata bikɔs pipul dɛn bin de mek dɛn sɔfa, dɛn de kɔntinyu fɔ “tɔk bɔt di gud nyuz.” (Akt 8:​4) We dɛn de prich, dat de ɛp dɛn fɔ pe atɛnshɔn pan di Kiŋdɔm ɛn nɔ pe atɛnshɔn pan di prɔblɛm we dɛn gɛt. So dat dɔn mek dɛn kɔntinyu fɔ gɛt pis ɛn gladi-at.

AW WI GO EBUL FƆ GƐT PIS WE DƐN DE MEK WI SƆFA?

14. We pipul dɛn de mek wi sɔfa, aw dat de ambɔg wi pis?

¹⁴ We dɛn de mek wi sɔfa, wi kin lɔs bɔku tin dɛn we de ɛp wi fɔ gɛt pis. Wi kin gladi we wi ebul fɔ mit togɛda, fɔ du di prichin wok, ɛn fɔ du di tin dɛn we wi dɔn yus fɔ du ɛn nɔ fred se dɛn go arɛst wi. Bɔt if dɛn stɔp wi fɔ du dɛn tin dɛn de, wi kin wɔri ɛn fred wetin go apin nɛks. Na nɔmal tin fɔ fil dɛn kayn we dɛn ya. Bɔt stil, wi nid fɔ tek tɛm. Jizɔs bin tɔk se we pipul dɛn mek in disaypul dɛn sɔfa, i pɔsibul fɔ lɛ dat mek dɛn lɛf fɔ gɛt fet. (Jɔn 16:​1, 2) So aw wi go kɔntinyu fɔ gɛt pis we dɛn de mek wi sɔfa?

15. Wetin mek wi nɔ fɔ fred we pipul dɛn de mek wi sɔfa? (Jɔn 15:​20; 16:​33)

¹⁵ Gɔd in Wɔd tɛl wi se: “Ɔl di wan dɛn we want fɔ fetful to Gɔd ɛn we gɛt wanwɔd wit Krays Jizɔs, pipul dɛn go mek dɛnsɛf sɔfa.” (2 Tim. 3:​12) I nɔ bin izi fɔ mek wan brɔda we nem Andre biliv se dɛn go mek Jiova in savant dɛn ɔl sɔfa afta dɛn ban di wok na in kɔntri. I bin tink se: ‘Jiova Witnɛs dɛn bɔku na di kɔntri, aw di gɔvmɛnt go ebul fɔ arɛst wi ɔl?’ Da we de aw Andre bin de tink nɔ bin mek i ebul fɔ gɛt pis. Bifo dat, i bin de wɔri ɔltɛm. Ɔda brɔda dɛn bin lɛf ɔltin na Jiova in an ɛn nɔ tink se dɛn nɔ go arɛst dɛn. Dɛn bin no se sɔntɛm dɛn go arɛst dɛn, bɔt dɛn nɔ bin wɔri tumɔs lɛk Andre. So i bin disayd fɔ ajɔst di we aw i de tink ɛn abop pan Jiova wit ɔl in at. I nɔ te, i bin ebul fɔ gɛt pis. Ɛn naw, i gɛt gladi-at pan ɔl we bɔku prɔblɛm dɛn stil de. Na di sem tin go apin to wi. Jizɔs nɔ bin jɔs tɛl wi fɔ ɛkspɛkt se pipul dɛn go mek wi sɔfa. I bin mek wi no bak se wi go ebul fɔ kɔntinyu fɔ fetful to Jiova.—Rid Jɔn 15:​20; 16:​33.

16. Us dayrɛkshɔn wi nid fɔ obe we pipul dɛn de mek wi sɔfa?

¹⁶ We dɛn ban wi wok ɔ stɔp wi fɔ mek wi nɔ du sɔm tin dɛn, sɔntɛm wi go gɛt dayrɛkshɔn dɛn frɔm di branch ɔfis ɛn di ɛlda dɛn. Dɛn dayrɛkshɔn dɛn ya na fɔ protɛkt wi, fɔ mek shɔ se wi gɛt di tin dɛn we wi nid fɔ gɛt tayt padi biznɛs wit Jiova ɛn fɔ ɛp wi fɔ kɔntinyu fɔ du di prichin wok di bɛst we aw wi ebul. Du yu bɛst fɔ obe di dayrɛkshɔn we dɛn gi yu, ivin if yu nɔ rili ɔndastand di rizin we mek dɛn gi yu di dayrɛkshɔn. (Jems 3:​17) Dɔn bak, nɔ ɛva gi infɔmeshɔn bɔt wi brɔda ɛn sista dɛn ɔ bɔt di kɔngrigeshɔn to pipul dɛn we nɔ gɛt rayt fɔ no bɔt dat.—Ɛkli. 3:​7.

17. Lɛk di apɔsul dɛn we bin de insay di fɔstɛm Kristian dɛn tɛm, wetin wi dɔn mekɔp wi maynd fɔ du?

¹⁷ Wan men rizin we mek Setan de fɛt agens Gɔd in pipul dɛn na bikɔs na dɛn “gɛt di wok fɔ prich bɔt Jizɔs.” (Rɛv. 12:​17) Nɔ alaw Setan ɛn in wɔl fɔ mek yu fred. We wi kɔntinyu fɔ prich ɛn tich pan ɔl we pipul dɛn de agens wi, dat de mek wi gɛt pis ɛn gladi-at. Insay di fɔstɛm Kristian dɛn tɛm, we di Ju bigman dɛn bin tɛl di apɔsul dɛn fɔ stɔp fɔ prich, dɛn fetful man dɛn de bin disayd fɔ obe Gɔd. Dɛn bin kɔntinyu fɔ prich, ɛn da wok de bin mek dɛn gɛt gladi-at. (Akt 5:​27-29, 41, 42) As wi no, we dɛn stɔp wi fɔ du sɔm tin dɛn, wi fɔ tek tɛm we wi de prich. (Mat. 10:​16) Bɔt if wi du wi bɛst, wi go gɛt pis bikɔs wi no se wi de mek Jiova gladi ɛn wi de ɛp fɔ prich bɔt mɛsej we de sev pipul dɛn layf.

“DI GƆD WE GƐT PIS GO DE WIT [YU]”

18. Udat go ebul fɔ gi wi tru tru pis?

¹⁸ Gɛt kɔnfidɛns se ivin tɛm dɛn we tin nɔ rili izi, wi go stil ebul fɔ gɛt pis. Dɛn tɛm dɛn de, wi fɔ mɛmba se di pis we wi nid na di pis we Gɔd de gi, dat na di pis we na Jiova in wangren ebul fɔ gi wi. Abop pan am we yu gɛt prɔblɛm dɛn lɛk sik we de prɛd, dizasta, ɔ we pipul dɛn de mek yu sɔfa. Kɔntinyu fɔ de na Jiova in ɔganayzeshɔn. Tink bɔt aw tin go rili fayn tumara bambay. As yu de du dat, “di Gɔd we gɛt pis go de wit [yu].” (Fil. 4:​9) Insay di nɛks atikul, wi go tɔk bɔt aw wi go ɛp wi kɔmpin Kristian dɛn we gɛt prɔblɛm fɔ gɛt di pis we Gɔd de gi.