Yu Rɛdi fɔ Gi Yu Layf to Jiova?

1-2. Wetin pɔsin fɔ du bifo i baptayz?

INSAY di fayv ia we dɔn pas, i pas wan milyɔn pipul dɛn we dɔn baptayz as Jiova Witnɛs dɛn. Jɔs lɛk Timoti we na bin disaypul insay di fɔstɛm Kristian dɛn tɛm, bɔku pan dɛn pipul dɛn ya bin lan di trut “frɔm di tɛm we dɛn na bin yɔŋbebi.” (2 Tim. 3:14, 15) Ɔda wan dɛn bin lan bɔt Jiova we dɛn dɔn big, ɛn sɔm na we dɛn dɔn ol. Wan uman we bin de stɔdi di Baybul wit Jiova Witnɛs dɛn, baptayz we i ol 97 ia!

² If yu de stɔdi di Baybul ɔ if yu mama ɛn papa na Jiova Witnɛs dɛn, yu de tink bɔt fɔ baptayz? Dat na fayn gol! Bɔt bifo yu baptayz, yu go nid fɔ gi yu layf to Jiova. Dis atikul go ɛksplen wetin i min fɔ gi yu layf to Jiova. I go ɛp yu bak fɔ si wetin mek yu nɔ fɔ fred fɔ gi yu layf to Gɔd ɛn baptayz we yu rɛdi.

WETIN I MIN FƆ GI YU LAYF TO JIOVA?

3. Gi Baybul ɛgzampul dɛn bɔt pipul dɛn we bin gi dɛn layf to Jiova.

³ Insay di Baybul, pɔsin we dɔn gi in layf to Jiova, dɔn disayd fɔ sav am wan spɛshal we. Di Izrɛlayt dɛn na bin neshɔn we bin dɔn gi dɛnsɛf to Jiova. Bɔt sɔm Izrɛlayt dɛn bin gi dɛn layf to Jiova wan spɛshal we. Fɔ ɛgzampul, Erɔn bin de wɛr tɔban na in ed, ɛn dɛn put wan shayn tin we flat lɛk plet we na gold pan di tɔban fɔ “sho se in na pɔsin we dɛn dɔn gi to PAPA GƆD fɔ wok.” Da gold plet de bin de sho se dɛn dɔn pik am fɔ sav Jiova wan spɛshal we, dat na fɔ bi Izrɛl dɛn ay prist. (Liv. 8:9) Di Nazarayt dɛn bak bin gi dɛn layf to Jiova wan spɛshal we. Di wɔd “Nazarayt” we kɔmɔt frɔm wan Ibru wɔd nazia, min “Pɔsin We Dɔn Gi Insɛf fɔ Du Spɛshal Wok.” Nazarayt dɛn bin gɛt fɔ obe di spɛshal lɔ dɛn we dɛn bin rayt insay di Lɔ we Gɔd Bin Gi Mozis.​—Nɔm. 6:2-8.

4. (a) We yu gi yu layf to Jiova, wetin fɔ bi di tin we impɔtant pas ɔl na yu layf? (b) Wetin i min fɔ mek pɔsin “nɔ du wetin i want”? (Luk bak di pikchɔ.)

⁴ We yu gi yu layf to Jiova, yu dɔn disayd fɔ bi Jizɔs Krays in disaypul, ɛn yu dɔn disayd fɔ mek wetin Gɔd want bi di tin we impɔtant pas ɔl ɔda tin na yu layf. Wetin dat min? Jizɔs bin se: “If ɛnibɔdi want fɔ fala mi, i nɔ fɔ du wetin in want.” (Mat. 16:24) As pɔsin we dɔn gi in layf to Jiova, yu go nid fɔ avɔyd ɛnitin we nɔ go mek Jiova gladi. (2 Kɔr. 5:14, 15) Dat min se yu nɔ go gri fɔ du “di tin dɛn we di bɔdi want,” lɛk fɔ du mami ɛn dadi biznɛs di we aw Gɔd nɔ want. (Gal. 5:19-21; 1 Kɔr. 6:18) Fɔ se i nɔ go izi fɔ mek yu obe dɛn lɔ dɛn de? If yu lɛk Jiova ɛn yu biliv tranga wan se in lɔ dɛn go bɛnifit yu, i go izi fɔ mek yu obe dɛn lɔ dɛn de. (Sam 119:97; Ayz. 48:17, 18) Wan brɔda we nem Nikolas tɔk se: “Yu kin disayd fɔ si Jiova in lɔ dɛn lɛk prizin get we de mek yu nɔ ebul fɔ du wetin yu want, ɔ lɛk di ayɛn dɛn na layɔn in kej we de protɛkt yu fɔ mek di layɔn nɔ du yu bad.”

5. (a) Aw yu go gi yu layf to Jiova? (b) Wetin na di difrɛns bitwin fɔ gi yu layf to Jiova ɛn fɔ baptayz? (Luk bak di pikchɔ.)

⁵ Aw yu go gi yu layf to Jiova? Yu fɔ pre to am ɛn prɔmis am se na in wangren yu go wɔship ɛn yu go put wetin i want fɔs na yu layf. Dat min se yu de prɔmis Jiova se yu go kɔntinyu fɔ lɛk am “wit ɔl yu at, wit ɔl yu layf, wit ɔl yu maynd, ɛn wit ɔl yu trɛnk.” (Mak 12:30) Yu de gi yu layf to Jiova usay yu wangren de, dat na bitwin yu ɛn Jiova nɔmɔ. Bɔt ɔda pipul dɛn go de usay yu de baptayz; di baptayz we yu de baptayz de mek dɛn no se yu dɔn gi yu layf to Jiova. Di gi we yu de gi yu layf to Gɔd na siriɔs prɔmis. Yu gol na fɔ du wetin yu dɔn prɔmis ɛn Jiova de ɛkspɛkt yu fɔ du dat.​—Ɛkli. 5:4, 5.

WETIN MEK YU FƆ GI YU LAYF TO JIOVA?

6. Wetin go mek pɔsin disayd fɔ gi in layf to Jiova?

⁶ Di men rizin we fɔ mek yu gi yu layf to Jiova na bikɔs yu lɛk am. Di lɛk we yu lɛk Jiova nɔ jɔs gɛt fɔ du wit di we aw yu de fil. Bɔt yu lɛk am bikɔs yu dɔn “rili no di kɔrɛkt tin” ɛn “ɔndastand tin dɛn we gɛt fɔ du wit Gɔd biznɛs.” (Kol. 1:9) Di stɔdi we yu de stɔdi di Baybul dɔn mek yu biliv tranga wan se (1) Jiova na rial pɔsin, (2) na in dayrɛkt pipul dɛn fɔ rayt di Baybul, ɛn (3) i de yuz in ɔganayzeshɔn fɔ du wetin i want.

7. Wetin wi fɔ du bifo wi gi wi layf to Gɔd?

⁷ Di wan dɛn we de gi dɛn layf to Jiova fɔ no di men tin dɛn we di Baybul de tich ɛn obe di lɔ dɛn we de na di Baybul. Dɛn de du dɛn bɛst fɔ tɛl ɔda pipul dɛn wetin dɛn dɔn lan. (Mat. 28:19, 20) Dɛn dɔn kam fɔ lɛk Jiova mɔ ɛn mɔ ɛn na in wangren dɛn want fɔ wɔship. Na da we de yu de si yusɛf? If yu lɛk Jiova wit ɔl yu at, yu nɔ go gi yu layf to am ɛn baptayz bikɔs yu want mek yu Baybul ticha ɔ yu mama ɛn papa gladi; ɔ bikɔs na dat ɔl yu padi dɛn de du.

8. If yu na pɔsin we gɛt tɛnki, aw dat go ɛp yu fɔ disayd fɔ gi yu layf to Jiova? (Sam 116:12-14)

⁸ We yu tink bɔt ɔl di tin dɛn we Jiova dɔn du fɔ yu, yu go want fɔ sho se yu gɛt tɛnki ɛn gi yu layf to am. (Rid Sam 116:12-14.) Di Baybul kɔl Jiova di Pɔsin we de gi “ɔl gud gift ɛn ɔl pafɛkt prɛzɛnt.” (Jems 1:17) Di gift we pas ɔl we Gɔd dɔn gi wi na we i mek in Bɔypikin Jizɔs sakrifays in layf fɔ wi. Jɔs tink bɔt dis! Di day we Jizɔs day fɔ bay wi bak dɔn mek i pɔsibul fɔ mek yu gɛt tayt padi biznɛs wit Jiova. Ɛn i dɔn mek yu gɛt chans fɔ gɛt layf we go de sote go. (1 Jɔn 4:9, 10, 19) Fɔ gi yu layf to Jiova na wan pan di bɛst we dɛn fɔ sho se yu gladi fɔ da lɔv de we pas ɔl ɔda lɔv we ɛnibɔdi dɔn ɛva sho, ɛn fɔ ɔl di ɔda gud tin dɛn we Jiova dɔn du fɔ yu. (Dit. 16:17; 2 Kɔr. 5:15) Dɛn tɔk bɔt da kayn tɛnki de na lɛsin 46, pɔynt 4, na di Ɛnjɔy Layf Sote Go! buk, we gɛt di tri-minit vidio we gɛt di taytul, Gi Yu Gift to Gɔd.

YU DƆN RƐDI FƆ GI YU LAYF TO JIOVA ƐN BAPTAYZ?

9. Wetin mek pɔsin nɔ fɔ fil se dɛn de fos am fɔ gi in layf to Jiova?

⁹ Sɔntɛm yu de fil se yu nɔ rɛdi yet fɔ gi yu layf to Jiova ɛn baptayz. Sɔntɛm yu stil nid fɔ mek chenj dɛn na yu layf so dat yu go ebul fɔ obe Jiova in lɔ dɛn, ɔ sɔntɛm yu nid mɔ tɛm fɔ mek yu fet go strɔng mɔ ɛn mɔ. (Kol. 2:6, 7) Ɔl Baybul studɛnt dɛn nɔ go lɛk Jiova di sem we, ɛn nɔto ɔl yɔŋ wan dɛn go rɛdi fɔ gi dɛn layf to Jiova ɛn baptayz di sem ej. Tray fɔ ɔndastand di chenj dɛn we yu nid fɔ mek, dɔn du wetin yu ebul fɔ du ɛn nɔ kɔmpia yusɛf wit ɔda pɔsin.​—Gal. 6:4, 5.

10. Wetin yu go du if yu si se yu nɔ rɛdi yet fɔ gi yu layf to Jiova ɛn baptayz? (Luk bak di bɔks we gɛt di taytul “Fɔ di Wan dɛn We Dɛn De Mɛn na di Trut.”)

¹⁰ Ivin if yu kam fɔ si se yu nɔ rɛdi yet fɔ gi yu layf to Jiova, lɛ dat kɔntinyu fɔ bi yu gol. Pre to Jiova fɔ mek i ɛp yu fɔ mek di chenj dɛn we yu nid fɔ mek na yu layf. (Fil. 2:13; 3:16) Gɛt kɔnfidɛns se i go yɛri yu prea ɛn ɛp yu.​—1 Jɔn 5:14.

WETIN MEK SƆM PIPUL DƐN KIN FRED FƆ GI DƐN LAYF TO JIOVA ƐN BAPTAYZ?

11. Aw Jiova go ɛp wi fɔ kɔntinyu fɔ fetful to am?

¹¹ Sɔm pipul dɛn we dɔn rɛdi fɔ gi dɛn layf to Jiova ɛn baptayz stil de fred. Sɔntɛm dɛn go de fred se afta dɛn baptayz, dɛn go kɔmit siriɔs sin we go mek dɛn disfɛloship dɛn. If na dat yu de fred, no se Jiova go gi yu ɔl wetin yu nid fɔ kɔntinyu fɔ “waka di we aw [i] want fɔ lɛ [yu] rili mek i gladi.” (Kol. 1:10) I go gi yu bak di trɛnk fɔ du wetin rayt. I dɔn ɔlrɛdi ɛp bɔku ɔda pipul dɛn fɔ du wetin rayt. (1 Kɔr. 10:13) Dat na wan rizin we mek di pipul dɛn we dɛn de disfɛloship na di kɔngrigeshɔn nɔ bɔku. Jiova de ɛp in pipul dɛn fɔ kɔntinyu fɔ sav am fetful wan.

12. Aw wi go avɔyd fɔ kɔmit siriɔs sin?

¹² Bikɔs wi nɔ pafɛkt, wi ɔl kin gɛt tɛmteshɔn fɔ du bad tin dɛn. (Jems 1:14) Bɔt na yu fɔ disayd wetin yu go du we sɔntin tɛmt yu. Di tru na dat na yu de kɔntrol di we aw yu de liv yu layf. Sɔm pipul dɛn go tɔk se wi nɔ ebul fɔ kɔntrol aw wi de fil ɛn wetin wi de du, bɔt dat nɔto tru. Yu go ebul fɔ kɔntrol di rɔng we dɛn aw yu de fil. So ivin if sɔntin tɛmt yu, yu go ebul fɔ disayd nɔ fɔ du bad tin. Ɔda tin dɛn de bak we go ɛp yu fɔ mek yu nɔ sin. Fɔ ɛgzampul, pre to Jiova ɛvride. Kɔntinyu fɔ de du yu pasɔnal stɔdi ɔltɛm. Atɛnd di mitin dɛn. Prich di gud nyuz to ɔda pipul dɛn. We yu de du dɛn tin dɛn ya ɔltɛm, dat go ɛp yu fɔ gɛt di trɛnk we yu nid fɔ kɔntinyu fɔ fetful to Jiova. Ɛn nɔ ɛva fɔgɛt se Jiova go ɛp yu fɔ du dat.​—Gal. 5:16.

13. Us gud ɛgzampul Josɛf bin sɛt fɔ wi?

¹³ I go izi fɔ mek yu kɔntinyu fɔ fetful to Jiova if yu disayd bifo tɛm wetin yu go du if sɔntin tɛmt yu. Di Baybul tɔk bɔt bɔku pipul dɛn we bin du dat pan ɔl we dɛnsɛf nɔ bin pafɛkt. Fɔ ɛgzampul, Pɔtifa in wɛf bin tray bɔku tɛm fɔ tɛmt Josɛf fɔ du mami ɛn dadi biznɛs wit am. Bɔt Josɛf bin ɔlrɛdi no wetin fɔ du. Di Baybul tɛl wi se i “nɔ gri,” ɛn Josɛf bin tɔk se: “Wetin fɔ mek [a] du dis kayn wikɛd tin ɛn sin to PAPA GƆD”? (Jɛn. 39:8-10) Dis sho klia wan se Josɛf bin no wetin fɔ du bifo Pɔtifa in wɛf tɛmt am. Na dat mek i bin izi fɔ mek Josɛf du di rayt tin we Pɔtifa in wɛf tɛmt am.

14. Aw wi go avɔyd fɔ du bad we sɔntin tɛmt wi?

¹⁴ Aw yu go falamakata Josɛf ɛn kɔntinyu fɔ fetful to Gɔd we sɔntin tɛmt yu? Yu go ebul disayd naw wetin fɔ du we sɔntin tɛmt yu. Nɔ westɛm fɔ avɔyd tin dɛn we Jiova et, ɛn nɔ gri fɔ ivin tink bɔt dɛn. (Sam 97:10; 119:165) If yu du dat, yu nɔ go sin we sɔntin tɛmt yu. Yu go ɔlrɛdi no wetin fɔ du.

15. Aw pɔsin go sho se i ‘de luk fɔ Jiova wit ɔl in at?’ (Ibruz 11:6)

¹⁵ Sɔntɛm yu no se yu dɔn fɛn di trut ɛn yu want fɔ sav Jiova wit ɔl yu at, bɔt stil, yu nɔ fil se yu rɛdi fɔ gi yu layf to Jiova ɛn baptayz. Yu go ebul du wetin Kiŋ Devid bin du. Yu kin beg Jiova se: “E Gɔd, chɛk mi gud gud wan ɛn no mi at. Tek tɛm wach mi ɛn no di tin dɛn we a de tink bɔt we de mek a wɔri. Luk if a gɛt ɛni bad tin insay mi ɛn mek lɛ a waka na di rod we go mek a gɛt layf we go de sote go.” (Sam 139:23, 24) Jiova de blɛs di wan dɛn we “de luk fɔ am wit ɔl dɛn at.” Di tray we yu de tray fɔ du tin dɛn we go mek yu gi yu layf to Jiova ɛn baptayz de sho se yu de luk fɔ am wit ɔl yu at.​—Rid Ibruz 11:6.

KƆNTINYU FƆ KAM NIA JIOVA

16-17. Aw Jiova de briŋ di wan dɛn we dɛn de mɛn na di trut to am? (Jɔn 6:44)

¹⁶ Jizɔs bin tɔk se na Jiova de briŋ in disaypul dɛn to am. (Rid Jɔn 6:44.) Tink bɔt aw dat rili wɔndaful ɛn wetin dat min fɔ yu. Jiova de si gud tin pan ɛnibɔdi we i de briŋ kam to insɛf. I de si di pɔsin as in “spɛshal prɔpati” ɔ sɔntin we “rili gɛt valyu.” (Dit. 7:6; futnot. NWT) Na da we de i de si yu bak.

¹⁷ Bɔt sɔntɛm, i go bi se yu na yɔŋ pɔsin we dɛn de mɛn na di trut. Sɔntɛm yu de fil se yu de sav Jiova jɔs bikɔs yu mama ɛn papa de sav am, nɔto bikɔs Jiova briŋ yu kam to am. Bɔt di Baybul se: “Kam nia Gɔd, ɛn insɛf go kam nia [yu].” (Jems 4:8; 1 Kro. 28:9) We yu fɔs disayd fɔ kam nia Jiova, insɛf go kam nia yu. Jiova nɔ jɔs de si yu lɛk se yu de pat pan wan grup. Na in de briŋ ɛniwan pan wi to am, ivin di wan dɛn we dɛn mama ɛn papa na Jiova Witnɛs. We da pɔsin de in fɔs disayd fɔ go nia Jiova, Jiova insɛf go du sɔntin jɔs lɛk aw wi dɔn rid na Jems 4:8.​—Luk bak 2 Tɛsalonians 2:13.

18. Wetin wi go tɔk bɔt insay di nɛks atikul? (Sam 40:8)

¹⁸ We yu gi yu layf to Jiova ɛn baptayz, yu de du di sem tin we Jizɔs bin du. I bin rɛdi fɔ gi insɛf to in Papa fɔ du ɛnitin we i tɛl am fɔ du. (Rid Sam 40:8; Ibru. 10:7) Insay di nɛks atikul, wi go tɔk bɔt wetin go ɛp yu fɔ kɔntinyu fɔ sav Jiova fetful wan afta yu baptayz.