Abop pan di Sɔri-At we di “Jɔj fɔ di Wan Ol Wɔl” Gɛt!

1. Us lɛsin Jiova bin tich Ebraam we bin kɔrej am?

TRADE trade, Gɔd bin yuz wan enjɛl fɔ tɛl Ebraam se i go dɔnawe wit Sɔdɔm ɛn Gomɔra. Dis bin mek da fetful man de wɔri. I bin aks se: “Yu go rili kil di wan dɛn we de du wetin rayt wit di wan dɛn we wikɛd? . . . Fɔ se di jɔj fɔ di wan ol wɔl nɔ go du wetin rayt?” Jiova bin peshɛnt fɔ tich in padi we i rili lɛk lɛsin we de bɛnifit ɛn kɔrej wi ɔl: Gɔd nɔ go ɛva dɔnawe wit pipul dɛn we de du wetin rayt.—Jɛn. 18:​23-33.

2. Wetin mek wi shɔ se we Jiova de jɔj pipul dɛn, i de du wetin rayt ɛn sho sɔri-at ɔltɛm?

² Wetin mek wi shɔ se we Jiova de jɔj pipul dɛn, i de du wetin rayt ɛn sho sɔri-at? Na bikɔs wi no se “Jiova de si wetin de insay [pipul dɛn] at.” (1 Sam. 16:7) Infakt, i no “wetin de na ɔlman in at.” (1 Kiŋ 8:39; 1 Kro. 28:9) I rili fayn fɔ no dis. Jiova gɛt sɛns pas wi fa fawe, so sɔntɛm nɔto ɔltɛm wi go ebul fɔ rili ɔndastand wetin mek i de disayd fɔ du patikyula tin dɛn. Na dat mek apɔsul Pɔl bin tɔk bɔt Jiova Gɔd se: “I nɔ pɔsibul fɔ rili faynd awt bɔt in jɔjmɛnt dɛn.”—Rom. 11:33.

3-4. Us kwɛstyɔn dɛn sɔntɛm wi kin tink bɔt? Wetin wi go tɔk bɔt insay dis atikul? (Jɔn 5:​28, 29)

³ Bɔt stil, sɔntɛm wi kin aks di sem kwɛstyɔn dɛn we Ebraam bin aks. Sɔntɛm wi go ivin wɔnda: ‘Fɔ se op de fɔ pipul dɛn lɛk di wan dɛn we Gɔd bin dɔnawe wit we bin de na Sɔdɔm ɛn Gomɔra? Fɔ se sɔm go de pat pan “di wan dɛn we nɔ du wetin rayt [we] go gɛt layf bak”?’—Akt 24:15.

⁴ Lɛ wi tɔk smɔl bak bɔt wetin wi ɔndastand bɔt di layf we pipul dɛn go gɛt bak. Dis biɛn tɛm, wi bin gɛt nyu we fɔ ɔndastand wetin i min fɔ mek pipul dɛn “gɛt layf bak fɔ liv” ɛn fɔ mek dɛn “gɛt layf bak fɔ mek dɛn jɔj dɛn.”a (Rid Jɔn 5:​28, 29.) Dis nyu we aw wi ɔndastand dɛn wɔd dɛn ya dɔn mek wi mek ɔda ajɔstmɛnt dɛn we wi go tɔk bɔt insay dis atikul ɛn di wan we de afta am. Di fɔs tin we wi go du we wi de tɔk bɔt di rayt we aw Jiova de jɔj, na fɔ tink bɔt wetin wi nɔ no ɛn wetin wi no.

DI TIN DƐN WE WI NƆ NO

5. Wetin wi pɔblikeshɔn dɛn bin dɔn tɔk trade bɔt di pipul dɛn we Jiova dɔnawe wit na Sɔdɔm ɛn Gomɔra?

⁵ Trade, wi pɔblikeshɔn dɛn tɔk bɔt wetin go apin to di pipul dɛn we Jiova bin dɔnawe wit we nɔ bin de du wetin rayt. Wi bin tɔk se pipul dɛn we Jiova bin dɔnawe wit lɛk di wan dɛn na Sɔdɔm ɛn Gomɔra, nɔ go gɛt layf bak. Bɔt afta di fetful slev dɔn tek tɛm stɔdi ɛn pre bɔt dis, dat mek dɛn tink bɔt dis kwɛstyɔn, Fɔ se na so i go rili bi?

6. Gi sɔm ɛgzampul dɛn bɔt pipul dɛn we nɔ bin de du wetin rayt we Jiova bin dɔnawe wit? Wetin di Baybul nɔ tɛl wi?

⁶ Lɛ wi tɔk bɔt sɔm ɛgzampul dɛn na di Baybul. Bɔku ɛgzampul dɛn de na di Baybul we de tɔk bɔt pipul dɛn we nɔ bin de du wetin rayt we Jiova bin dɔnawe wit. Fɔ ɛgzampul, apat frɔm Noa ɛn in famili, Jiova bin yuz di Flɔd fɔ dɔnawe wit ɔlman we bin de na di wɔl. Dɔn bak, i bin yuz di Izrɛlayt dɛn fɔ dɔnawe wit di sɛvin neshɔn dɛn we bin de na di Prɔmis Land. I sɛn wan enjɛl bak fɔ dɔnawe wit 185,000 Asirian sojaman dɛn insay wan nɛt. (Jɛn. 7:23; Dit. 7:​1-3; Ayz. 37:​36, 37) Frɔm dɛn ɛgzampul dɛn ya, fɔ se di Baybul tɛl wi klia wan se Jiova bin disayd fɔ dɔnawe wit dɛn pipul dɛn de sote go ɛn dɛn nɔ go gɛt chans fɔ gɛt layf bak? Nɔ, i nɔ tɛl wi dat. Wetin mek wi se so?

7. Wetin wi nɔ no bɔt di pipul dɛn we Jiova bin yuz di Flɔd fɔ dɔnawe wit ɔ di pipul dɛn we di Izrɛlayt dɛn bin dɔnawe wit na Kenan? (Luk pikchɔ na di frɔnt pej.)

⁷ Insay di ɛgzampul dɛn we wi jɔs tɔk bɔt, wi nɔ no aw Jiova bin jɔj ɛni wan pan dɛn pipul dɛn de ɛn wi nɔ no if di wan dɛn we dɛn kil bin gɛt chans fɔ lan bɔt Jiova ɛn ripɛnt. We di Baybul tɔk bɔt di tɛm fɔ di Flɔd, i tɔk se, Noa “bin de prich bɔt wetin rayt.” (2 Pit. 2:5) Bɔt di Baybul nɔ tɔk se we Noa bin de bil di big big ak, i tray bak fɔ prich to ɔlman we bin de na di wɔl. Semweso, wi nɔ no if ɔl di wikɛd pipul dɛn we bin de na Kenan bin gɛt chans fɔ lan bɔt Jiova ɛn chenj di we aw dɛn bin de liv.

8. Wetin wi nɔ no bɔt di pipul dɛn na Sɔdɔm ɛn Gomɔra?

⁸ Wetin wi go se bɔt di pipul dɛn na Sɔdɔm ɛn Gomɔra? Wan man we nem Lɔt we bin de du wetin rayt bin de wit dɛn. Bɔt fɔ se wi no if Lɔt bin prich to dɛn ɔl? Nɔ. Na tru se dɛn bin wikɛd, bɔt ɛniwan pan dɛn bin no wetin rayt ɔ rɔng? Mɛmba se bɔku bɔku man dɛn na da siti bin want fɔ rep Lɔt in strenja dɛn. Di Baybul tɔk se ivin “smɔl bɔbɔ” dɛn bin de wit dɛn. (Jɛn. 19:4; 2 Pit. 2:7) Fɔ se wi rili no if Jiova Gɔd we gɛt sɔri-at, bin disayd se nɔn pan dɛn pipul dɛn ya nɔ go gɛt layf bak? Jiova bin mek Ebraam no se i nɔ ivin rich tɛn pipul dɛn na da siti de we bin de du wetin rayt. (Jɛn. 18:32) So dɛn nɔ bin de du wetin rayt ɛn na di rayt tin Jiova bin du fɔ dɔnawe wit dɛn. Fɔ se wi shɔ se nɔn pan dɛn nɔ go de pan “di wan dɛn we nɔ du wetin rayt [we] go gɛt layf bak”? Nɔ, wi nɔ shɔ bɔt dat!

9. Wetin wi nɔ no bɔt Sɔlɔmɔn?

⁹ Di Baybul gɛt akawnt dɛn bak bɔt pipul dɛn we bin de du wetin rayt bɔt we leta lɛf fɔ du wetin rayt. Kiŋ Sɔlɔmɔn na wan ɛgzampul. I bin no udat Jiova bi ɛn aw i fɔ wɔship Am ɛn Jiova bin rili blɛs am. Bɔt leta, Sɔlɔmɔn bin bigin fɔ wɔship lay lay gɔd dɛn. Dis bin mek Jiova rili vɛks ɛn di wan ol neshɔn bin sɔfa fɔ lɔng tɛm bikɔs ɔf Sɔlɔmɔn in sin dɛn. Na tru se di Baybul se dɛn bɛr Sɔlɔmɔn wit “in gret gret granpa dɛn,” ivin wit fetful man dɛn lɛk Kiŋ Devid. (1 Kiŋ 11:​5-9, 43; 2 Kiŋ 23:13) Bɔt fɔ se di we aw dɛn bɛr am na garanti fɔ se i go gɛt layf bak? Di Baybul nɔ tɛl wi. Bɔt sɔntɛm, sɔm pipul dɛn go tink se “we pɔsin day, i dɔn fri frɔm in sin.” (Rom. 6:7) Dat na tru, bɔt dis nɔ min se ɔl di wan dɛn we dɔn day go gɛt layf bak. Afta ɔl, nɔto jɔs bikɔs pɔsin dɔn day min se i gɛt rayt fɔ gɛt layf bak. Di chans fɔ gɛt layf bak na gift frɔm Gɔd we lɛk wi. I de gi da gift de to di wan dɛn we i want fɔ gi chans fɔ sav am sote go. (Job 14:13, 14; Jɔn 6:44) Fɔ se Sɔlɔmɔn go gɛt da gift de? Na Jiova no di ansa; wi nɔ no. Bɔt wi no se Jiova go du wetin rayt.

DI TIN DƐN WE WI NO

10. Fɔ se Jiova kin gladi fɔ dɔnawe wit pipul dɛn? (Izikɛl 33:11) (Luk bak di pikchɔ.)

¹⁰ Rid Izikɛl 33:11. We i kam to di we aw Jiova de jɔj pipul dɛn, i tɛl wi aw i de fil bɔt dat. I bin yuz apɔsul Pita fɔ tɔk di sem wɔd dɛn we Izikɛl bin rayt. Pita bin se: “Jiova . . . nɔ want fɔ dɔnawe wit ɛnibɔdi.” (2 Pit. 3:9) Dɛn wɔd dɛn ya de rili kɔrej wi bikɔs wi no se Jiova nɔ want fɔ dɔnawe wit ɛnibɔdi sote go pas i gɛt gud rizin fɔ du dat. I rili gɛt sɔri-at ɛn i de sho sɔri-at ɛnitɛm i nid fɔ du dat.

11. Udat dɛn nɔ go gɛt layf bak? Aw wi no dat?

¹¹ Wetin wi no bɔt di pipul dɛn we nɔ go gɛt layf bak? Di ɛgzampul dɛn we di Baybul tɔk bɔt nɔ bɔku.b Jizɔs bin sho se Judas Iskariɔt nɔ go gɛt layf bak. (Mak 14:21; Luk bak Jɔn 17:12 ɛn di stɔdi not.) Judas bin no se wetin i bin de du bin de agens Jiova ɛn In Bɔypikin. Bɔt i stil du am. (Luk Mak 3:29 ɛn di stɔdi not dɛn.) Semweso, Jizɔs bin tɔk se sɔm pan di bigman dɛn pan Gɔd biznɛs we bin de agens am nɔ go gɛt layf bak we dɛn day. (Mat. 23:33; Luk Jɔn 19:11 ɛn di stɔdi not fɔ “the man.”) Ɛn apɔsul Pɔl bin gi wɔnin se apɔstet dɛn we nɔ gri fɔ ripɛnt nɔ go gɛt layf bak.​—Ibru. 6:4-8; 10:29.

12. Wetin wi no bɔt Jiova in sɔri-at? Gi ɛgzampul dɛn.

¹² Bɔt, wetin wi no bɔt Jiova in sɔri-at? Aw i dɔn sho se i “nɔ want fɔ dɔnawe wit ɛnibɔdi”? Tink bɔt di sɔri-at we i bin sho sɔm pipul dɛn we bin kɔmit siriɔs sin dɛn. Kiŋ Devid bin kɔmit bɔku siriɔs sin dɛn. I bin ivin du mami ɛn dadi biznɛs wit ɔda pɔsin in wɛf ɛn kil. Bɔt Devid bin ripɛnt, so Jiova bin sɔri fɔ am ɛn fɔgiv am. (2 Sam. 12:1-13) Kiŋ Manasɛ bin du bɔku bad bad tin dɛn fɔ lɔng tɛm. Bɔt pan ɔl dat, Jiova bin sho am sɔri-at ɛn si rizin fɔ fɔgiv am. (2 Kro. 33:​9-16) Dɛn ɛgzampul dɛn ya mɛmba wi se Jiova de sho sɔri-at ɛnitɛm i si rizin fɔ du dat. I go gi layf bak to dɛn kayn pipul dɛn de bikɔs dɛn bin gri se dɛn dɔn kɔmit siriɔs sin dɛn ɛn ripɛnt.

13. (a) Wetin mek Jiova bin sho sɔri-at to di pipul dɛn na Ninivɛ? (b) Wetin Jizɔs bin leta tɔk bɔt di pipul dɛn na Ninivɛ?

¹³ Wi no bak bɔt di sɔri-at we Jiova bin sho di pipul dɛn na Ninivɛ. Gɔd bin tɛl Jona se: “A dɔn notis di wikɛd tin dɛn we dɛn de du.” Bɔt we dɛn ripɛnt, Jiova bin fɔgiv dɛn. I bin sho sɔri-at pas Jona fa fawe. Gɔd bin gɛt fɔ mɛmba in prɔfɛt we bin vɛks se di pipul dɛn na Ninivɛ “nɔ no wetin rayt frɔm rɔng.” (Jona 1:1, 2; 3:10; 4:9-11) Leta, Jizɔs bin yuz da ɛgzampul de fɔ tich pipul dɛn bɔt aw Jiova de du tin tret ɛn di sɔri-at we i gɛt. Jizɔs bin tɔk se di pipul dɛn we bin de na Ninivɛ we bin ripɛnt “go gɛt layf bak” fɔ mek dɛn jɔj dɛn.​—Mat. 12:41.

14. Wetin di layf we pipul dɛn go “gɛt layf bak fɔ mek dɛn jɔj dɛn” min fɔ di pipul dɛn na Ninivɛ?

¹⁴ Bɔt wetin di Baybul min we i se di pipul dɛn na Ninivɛ go “gɛt layf bak” fɔ mek dɛn jɔj dɛn. Jizɔs bin tɔk se pipul dɛn go “gɛt layf bak fɔ mek dɛn jɔj dɛn.” (Jɔn 5:29) I bin de tɔk bɔt di tɛm we i go rul fɔ Wan Tawzin Ia, ɛn da tɛm de “di wan dɛn we du wetin rayt ɛn di wan dɛn we nɔ du wetin rayt go gɛt layf bak.” (Akt 24:15) Fɔ di wan dɛn we nɔ du wetin rayt, dɛn go “gɛt layf bak fɔ mek dɛn jɔj dɛn.” Dis min se Jiova ɛn Jizɔs go wach dɛn fɔ si aw dɛn de biev ɛn si if dɛn de obe ɛn aplay di tin dɛn we dɛn de lan. If pɔsin we bin de na Ninivɛ we gɛt layf bak nɔ gri fɔ wɔship Jiova di we aw i want, Jiova go dɔnawe wit am. (Ayz. 65:20) Bɔt ɔl di wan dɛn we go disayd fɔ wɔship Jiova fetful wan go gɛt di chans fɔ gɛt layf we go de sote go.​—Dan. 12:2.

15. (a) Wetin mek wi fɔ avɔyd fɔ de tɔk se nɔn pan di wan dɛn we Jiova bin dɔnawe wit na Sɔdɔm ɛn Gomɔra nɔ go gɛt layf bak? (b) Aw wi fɔ ɔndastand di wɔd dɛn we de na Jud 7? (Luk di bɔks we gɛt di taytul “Wetin Jud Bin Min?”)

¹⁵ We Jizɔs bin de tɔk bɔt di pipul dɛn na Sɔdɔm ɛn Gomɔra, i bin tɔk se tin go bɛtɛ fɔ dɛn “Jɔjmɛnt De” pas di pipul dɛn we nɔ bin de lisin to am ɛn di tin dɛn we i bin de tich. (Mat. 10:​14, 15; 11:​23, 24; Lyuk 10:12) Wetin Jizɔs bin min? Fɔ se Jizɔs bin jɔs de tray fɔ mek tin big fɔ sho se di pipul dɛn we bin de insay in tɛm bin wɔs pas di pipul dɛn we bin de na Sɔdɔm ɛn Gomɔra? Wɛl, mɛmba se we Jizɔs bin de tɔk se di pipul dɛn na Ninivɛ go gɛt layf bak fɔ mek dɛn jɔj dɛn, i bin min wetin i de tɔk. Di “Jɔjmɛnt De” we i tɔk bɔt na ya na di sem wit di wan we i tɔk bɔt we i bin de tɔk bɔt di pipul dɛn na Ninivɛ. Jɔs lɛk di pipul dɛn we bin de na Ninivɛ, di pipul dɛn na Sɔdɔm ɛn Gomɔra bin du bad tin dɛn. Bɔt di pipul dɛn na Ninivɛ bin gɛt chans fɔ ripɛnt. Dɔn bak, mɛmba wetin Jizɔs bin bɔt di wan dɛn we “go gɛt layf bak fɔ mek dɛn jɔj dɛn.” Pipul dɛn we “bin de du wikɛd tin dɛn” go de pat pan dɛn. (Jɔn 5:29) So i tan lɛk se sɔntɛm op go de fɔ di pipul dɛn na Sɔdɔm ɛn Gomɔra. I pɔsibul se sɔntɛm sɔm pan dɛn go gɛt layf bak ɛn sɔntɛm wi go gɛt chans fɔ tich dɛn bɔt Jiova ɛn Jizɔs Krays.

16. Wetin wi no bɔt aw Jiova go disayd udat fɔ gi layf bak? (Jɛrimaya 17:10)

¹⁶ Rid Jɛrimaya 17:10. Insay dis vas, wi rid bɔt wetin wi no bɔt di we aw Jiova de jɔj: Na Jiova na di wan we ebul fɔ “luk insay pɔsin in at ɛn chɛk di dip tin dɛn we i de tink bɔt.” Jɔs lɛk aw i dɔn de du ɔltɛm, we i kam to di layf we pipul dɛn go gɛt tumara bambay, Jiova go “pe ɔlman akɔdin to di tin dɛn we i de du.” I go du di rayt tin, bɔt i go sho sɔri-at we i si nid fɔ du dat. So wi nɔ fɔ tink se pɔsin nɔ gɛt op fɔ gɛt layf bak pas if wi shɔ se na dat di Baybul se.

“DI JƆJ FƆ DI WAN OL WƆL NƆ GO DU WETIN RAYT?”

17. Wetin go apin tumara bambay to di wan dɛn we dɔn day?

¹⁷ Frɔm we Adam ɛn Iv bin jɔyn Setan ɛn tɔn dɛn bak pan Jiova Gɔd, bɔku bɔku pipul dɛn dɔn day. Day na bad bad “ɛnimi!” (1 Kɔr. 15:26) Wetin go apin to ɔl dɛn pipul dɛn de? Wan smɔl nɔmba we na 144,000 we na Krays in fetful disaypul dɛn go gɛt layf bak fɔ go de na ɛvin wit bɔdi we nɔ de day. (Rɛv. 14:1) Dɔn bɔku bɔku pipul dɛn we na fetful man ɛn uman dɛn we bin lɛk Jiova go de pat pan di wan dɛn we de “du wetin rayt we go gɛt layf bak,” ɛn dɛn go de sote te go na dis wɔl if dɛn kɔntinyu fɔ du wetin rayt insay di Wan Tawzin Ia we Krays go de rul ɛn di tɛm fɔ di faynal tɛst. (Dan. 12:13; Ibru. 12:1) Dɔn bak insay di Wan Tawzin Ia we Krays go de rul, “di wan dɛn we nɔ de du wetin rayt,” we na di wan dɛn we nɔ bin ɛva sav Jiova, ɔ “we bin de du wikɛd tin dɛn,” go gɛt di chans fɔ chenj di we aw dɛn de liv ɛn sav Jiova fetful wan. (Lyuk 23:​42, 43) Bɔt sɔm pipul dɛn bin rili wikɛd, dɛn bin mekɔp dɛn maynd nɔ fɔ obe Jiova ɔ du wetin i want, so Jiova dɔn disayd se i nɔ go gi dɛn layf atɔl.—Lyuk 12:​4, 5.

18-19. (a) Wetin mek wi fɔ gɛt kɔnfidɛns pan di we aw Jiova de jɔj di wan dɛn we dɔn day? (Ayz 55:​8, 9) (b) Wetin wi go tɔk bɔt insay di nɛks atikul?

¹⁸ Fɔ se wi gɛt gud rizin fɔ gɛt kɔnfidɛns se we Jiova de jɔj pipul dɛn, i de du wetin rayt ɔltɛm? Yɛs! Jɔs lɛk Ebraam, wi no klia wan se Jiova na “di jɔj fɔ di wan ol wɔl” we pafɛkt, we gɛt sɛns pas ɔlman, ɛn we gɛt sɔri-at. I dɔn tren in Bɔypikin ɛn gi am di wok fɔ jɔj ɔlman. (Jɔn 5:22) Jizɔs ɛn in Papa ebul fɔ no wetin de na ɔlman in at. (Mat. 9:4) So we dɛn de jɔj ɛnibɔdi, dɛn de du “wetin rayt” ɔltɛm!

¹⁹ Lɛ wi mekɔp wi maynd fɔ biliv se ɔl di tin dɛn we Jiova de disayd fɔ du na di rayt tin. Wi no se wi nɔ kwalifay fɔ jɔj, bɔt in kwalifay fɔ jɔj! (Rid Ayzaya 55:​8, 9.) Na dat mek wi biliv Jiova ɛn in Bɔypikin fɔ jɔj ɔlman. Dɔn bak, wi no se wi Kiŋ we na Jizɔs go falamakata in Papa pafɛkt wan fɔ du tin tret ɛn fɔ sho sɔri-at. (Ayz. 11:​3, 4) Bɔt wetin wi go se bɔt di we aw Jiova ɛn Jizɔs go jɔj pipul dɛn di tɛm fɔ da big big trɔbul? Wetin wi nɔ no? Ɛn wetin wi no? Wi go tɔk bɔt dɛn kwɛstyɔn dɛn ya insay di nɛks atikul.