Kɔntinyu fɔ Protɛkt Yusɛf Frɔm Tin dɛn we De Tɛmt Yu

1-2. (a) Us wɔnin Jizɔs bin gi in disaypul dɛn? (b) Wetin mek in disaypul dɛn bin rɔnawe ɛn lɛf am? (Luk bak di pikchɔ dɛn.)

“DI SPIRIT kin rili want fɔ du sɔntin, bɔt di bɔdi wik.”a (Mat. 26:41b) Dɛn wɔd dɛn de sho se Jizɔs bin ɔndastand se wi nɔ pafɛkt ɛn wi de mek mistek dɛn. Bɔt i tɔk dɛn wɔd dɛn de bak fɔ wɔn wi: Wi nɔ fɔ tink se wi go ebul du wetin rayt ɔltɛm. Bifo Jizɔs tɔk dɛn wɔd dɛn de, in disaypul dɛn bin tɔk wit kɔnfidɛns se dɛn nɔ go ɛva lɛf dɛn Masta. (Mat. 26:35) Na di rayt tin dɛn bin want fɔ du. Bɔt, dɛn nɔ bin no se tin dɛn go apin we go mek i nɔ izi fɔ mek dɛn du di rayt tin. Na dat mek Jizɔs bin wɔn dɛn se: “Una go de wach ɛn pre ɔltɛm, so dat una nɔ go du bad we sɔntin tɛmt una.”—Mat. 26:41a.

² I sɔri fɔ no se, di disaypul dɛn nɔ bin kɔntinyu fɔ wach. We dɛn bin arɛst Jizɔs, yu tink se dɛn bin kɔntinyu fɔ de wit am ɔ dɛn bin fred ɛn rɔnawe? Bikɔs di disaypul dɛn nɔ bin de ɛkspɛkt wetin apin, dɛn bin du di sem tin we dɛn tɔk se dɛn nɔ go ɛva du, we na fɔ rɔnawe ɛn lɛf Jizɔs.—Mat. 26:56.

3. (a) Fɔ mek wi kɔntinyu fɔ de biɛn Jiova, wetin mek wi nɔ fɔ tink se wi go ebul du di rayt tin ɔltɛm? (b) Wetin wi go tɔk bɔt insay dis atikul?

³ Wi nɔ fɔ tink se wi go ebul du di rayt tin ɔltɛm. Na tru se wi dɔn mek-ɔp wi maynd nɔ fɔ alaw ɛnitin fɔ mek wi kɔmɔt biɛn Jiova. Bɔt, wi nɔ pafɛkt ɛn i kin izi fɔ mek sɔntin tɛmt wi fɔ du di rɔng tin. (Rom. 5:12; 7:21-23) Tin dɛn go apin we go tɛmt wi fɔ du di rɔng tin di tɛm dɛn we wi nɔ de ɛkspɛkt. Fɔ mek wi kɔntinyu fɔ de biɛn Jiova ɛn in Bɔypikin, wi nid fɔ fala Jizɔs in advays fɔ kɔntinyu fɔ protɛkt wisɛf frɔm tin dɛn we go tɛmt wi fɔ sin. Dis atikul go ɛp wi fɔ du dat. Fɔs, wi go tɔk bɔt di kayn tin dɛn we wi fɔ rili protɛkt wisɛf frɔm. Dɔn, wi go tɔk bɔt aw wi go protɛkt wisɛf frɔm tin dɛn we go tɛmt wi. Faynali, wi go tɔk bɔt aw wi go kɔntinyu fɔ protɛkt wisɛf.

PE ATƐNSHƆN TO DI SAY DƐN WE YU WIK

4-5. Wetin mek wi fɔ kɔntinyu fɔ protɛkt wisɛf ivin frɔm sin dɛn we nɔ tu siriɔs?

⁴ Ivin sin dɛn we nɔ tu siriɔs kin ambɔg wi padi biznɛs wit Jiova. Dɛn kin mek bak wi kɔmit siriɔs sin dɛn.

⁵ Wi ɔl kin gɛt tɛmteshɔn fɔ sin. Bɔt wi ɔl gɛt difrɛn say dɛn we wi wik, i kin bi fɔ kɔmit siriɔs sin, fɔ du tin dɛn we nɔ klin na Jiova in yay, ɔ fɔ tink lɛk aw pipul dɛn na di wɔl de tink. Fɔ ɛgzampul, sɔntɛm wan pɔsin go de tray tranga wan fɔ avɔyd fɔ du mami ɛn dadi biznɛs di we aw Gɔd nɔ want. Ɔda pɔsin go nid fɔ tray tranga wan fɔ avɔyd fɔ du tin dɛn we nɔ klin, lɛk fɔ ple ple wit insɛf ɔ fɔ wach rud rud pikchɔ ɔ fim dɛn. Bɔt stil, sɔntɛm ɔda pɔsin de tray tranga wan fɔ lɛf fɔ fred mɔtalman, fɔ lɛf fɔ mek prawd, fɔ lɛf fɔ vɛks kwik, ɔ ɔda tin. Jɔs lɛk aw Jems bin tɔk, “na di tin we pɔsin want, na in de tɛst am ɛn tɛmt am.”—Jems 1:14.

6. Wetin wi fɔ ɔnɛs bɔt?

⁶ Yu no di tin dɛn we kin tɛmt yu izi wan? I nɔ mek sɛns fɔ tink se wi nɔ gɛt say dɛn we wi wik ɔ fɔ tink se wi strɔng ɛn wi nɔ go sin. (1 Jɔn 1:8) Mɛmba se, Pɔl bin tɔk se i pɔsibul fɔ mek ivin di wan dɛn we “kwalifay na Gɔd in yay” kɔmit sin we sɔntin tɛmt dɛn if dɛn nɔ kɔntinyu fɔ protɛkt dɛnsɛf. (Gal. 6:1) Wi fɔ ɔnɛs wit wisɛf ɛn gri se say dɛn de we wi wik.—2 Kɔr. 13:5.

7. Wetin wi fɔ pe atɛnshɔn to mɔ? Gi wan ɛgzampul.

⁷ We wi dɔn no di tin dɛn we kin tɛmt wi izi wan, wetin wi fɔ du? Du tin dɛn we go ɛp yu fɔ tinap tranga wan fɔ mek dɛn tin dɛn de nɔ tɛmt yu! Fɔ ɛgzampul, insay di tɛm we dɛn bin de rayt di Baybul, di pat na di siti wɔl we bin izi fɔ lɛ ɛnimi dɛn ɛnta na di get dɛn. So, na di get dɛn mɔ dɛn bin de protɛkt. Semweso, wi nid fɔ pe atɛnshɔn mɔ to di say dɛn we wi no se wi wik.—1 Kɔr. 9:27.

AW WI GO PROTƐKT WISƐF FRƆM TƐMTESHƆN ƐN SIN?

8-9. Aw di yɔŋman we Prɔvabs chapta 7 tɔk bɔt bin fɔ dɔn avɔyd fɔ kɔmit siriɔs sin? (Prɔvabs 7:8, 9, 13, 14, 21)

⁸ Aw wi go protɛkt wisɛf frɔm tɛmteshɔn ɛn sin? Lɛ wi tɔk bɔt wetin wi go lan frɔm di yɔŋman we Prɔvabs chapta 7 tɔk bɔt. I bin du mami ɛn dadi biznɛs di we aw Gɔd nɔ want wit bambot uman. Vas 22 tɛl wi se di yɔŋman bin go to di uman “wantɛm wantɛm.” Bɔt di vas dɛn bifo vas 22 sho se i bin dɔn de du ɔda tin dɛn smɔl smɔl we mek i ɛnd-ɔp fɔ sin.

⁹ Wetin bin mek i ɛnd-ɔp fɔ sin? Fɔs, wan ivintɛm, i bin “pas na di strit nia [di uman we bambot in] kɔna.” Ɛn i waka go na di say usay in os de. (Rid Prɔvabs 7:​8, 9.) Dɔn, we i si di uman, i nɔ bin tɔn bak. Bifo dat, i bin gri fɔ mek di uman kis am ɛn i bin lisin to am we i bin de tɔk bɔt di pis sakrifays dɛn we i dɔn mek, sɔntɛm i bin du dat fɔ mek di yɔŋman tink se in nɔto bad pɔsin. (Rid Prɔvabs 7:​13, 14, 21.) If di yɔŋman nɔ bin fɔ dɔn du ɔl dɛn tin dɛn ya we nɔ mek sɛns, i fɔ dɔn avɔyd di tin dɛn we tɛmt am ɛn i nɔ bin fɔ sin.

10. Aw pɔsin kin mek di sem mistek we da yɔŋman de bin mek?

¹⁰ Dis tin we Sɔlɔmɔn rayt bɔt de sho wetin kin apin to ɛnibɔdi we de sav Jiova. Sɔntɛm pɔsin go kɔmit siriɔs sin ɛn leta fil se ɔltin jɔs apin “wantɛm wantɛm.” Ɔ sɔntɛm i go tɔk se, “i jɔs apin lɛk dat.” Bɔt, if i tink bɔt wetin dɔn apin, i go mɔs si se i bin dɔn de du sɔm tin dɛn we nɔ mek sɛns we mek i ɛnd-ɔp fɔ sin. Sɔntɛm sɔm pan dɛn tin dɛn de na bad padi dɛn, ɛnjɔymɛnt we nɔ fayn, ɔ i bin de go na wɛbsayt ɔ ples dɛn we Kristian nɔ fɔ go. Sɔntɛm i bin dɔn stɔp bak fɔ pre, rid di Baybul, atɛnd di mitin dɛn, ɔ fɔ de prich. Jɔs lɛk da yɔŋman we Prɔvabs tɔk bɔt, na di tin dɛn we i disayd fɔ du mek i sin, i nɔ jɔs apin wantɛm wantɛm.

11. Fɔ mek wi nɔ kɔmit sin, wetin wi fɔ avɔyd?

¹¹ Wetin na di lɛsin fɔ wi? Wi nɔ jɔs nid fɔ avɔyd fɔ kɔmit sin, bɔt wi nid fɔ avɔyd bak di tin dɛn we go mek wi ɛnd-ɔp fɔ sin. Sɔlɔmɔn bin mek wi no dat klia wan afta i tɔk bɔt di yɔŋman ɛn di bambot uman. We i bin de tɔk bɔt di uman, i se: “Nɔ mistek go usay i de.” (Prɔv. 7:25) I tɔk bak bɔt da kayn wewɔd uman de se: “De fa frɔm [am]; nɔ go nia in os.” (Prɔv. 5:3, 8) Fɔ tru, wi go ebul protɛkt wisɛf frɔm sin we wi avɔyd di tin dɛn we go mek wi ɛnd-ɔp fɔ sin.b Dis min se wi go nid fɔ avɔyd tin dɛn we nɔ bad fɔ Kristian dɛn bɔt we wi no se go ɛnd-ɔp fɔ tɛmt wi fɔ sin.—Mat. 5:29, 30.

12. Wetin Job bin mek-ɔp in maynd fɔ du? Aw dat bin ɛp am fɔ protɛkt insɛf fɔ mek sɔntin nɔ tɛmt am? (Job 31:1)

¹² Fɔ avɔyd tin dɛn we go mek wi ɛnd-ɔp fɔ sin, wi nid fɔ rili mek-ɔp wi maynd fɔ protɛkt wisɛf frɔm dɛn tin dɛn de. Na dat Job bin du. I bin “mek agrimɛnt wit [in] yay” nɔ fɔ ɛva luk ɔda uman dɛn di kayn we we go mek i want fɔ du mami ɛn dadi biznɛs wit dɛn. (Rid Job 31:1.) If i du wetin i dɔn mek-ɔp in maynd fɔ du, dat go mek i nɔ ɛva du mami ɛn dadi biznɛs di we aw Gɔd nɔ want. Wisɛf kin mek-ɔp wi maynd fɔ avɔyd ɛnitin we go tɛmt wi fɔ sin.

13. Wetin mek wi fɔ protɛkt di we aw wi de tink? (Luk bak di pikchɔ dɛn.)

¹³ Wi fɔ protɛkt bak di we aw wi de tink. (Ɛks. 20:17) Sɔm pipul dɛn biliv se i nɔ bad fɔ lɛ pɔsin imajin insɛf de du tin dɛn we nɔ fayn wans i nɔ de du dɛn. Bɔt i rɔng fɔ tink da kayn we de. If pɔsin de tink bɔt tin dɛn we nɔ fayn, na di mɔ i go want fɔ du dɛn. If i du dat, i nɔ go izi fɔ am fɔ avɔyd fɔ sin. As wi ɔl no, sɔntɛnde, bad tin dɛn kin kam na wi maynd. We dat apin, di impɔtant tin we wi fɔ du na fɔ pul am na wi maynd wantɛm wantɛm ɛn tink bɔt gud tin dɛn. We wi du dat, wi nɔ go alaw bad tin dɛn fɔ de na wi maynd we go mek wi kɔmit siriɔs sin.—Fil. 4:8; Kol. 3:2; Jems 1:13-15.

14. Wetin go ɛp wi bak fɔ protɛkt wisɛf frɔm tin dɛn we go tɛmt wi?

¹⁴ Wetin go ɛp wi bak fɔ protɛkt wisɛf frɔm tin dɛn we go tɛmt wi? Wi fɔ biliv tranga wan se wi go bɛnifit ɔltɛm we wi obe Jiova in lɔ dɛn. Sɔntɛnde, i nɔ go izi fɔ mek di tin dɛn we wi de tink bɔt ɛn wetin wi want gri wit wetin Gɔd want, bɔt we wi tray tranga wan fɔ du dat, wi go gɛt tru tru gladi-at.

15. We wi rili want fɔ du wetin rayt, aw dat go ɛp wi fɔ protɛkt wisɛf frɔm tin dɛn we go tɛmt wi?

¹⁵ Wi fɔ du tin dɛn we go mek wi want fɔ du di rayt tin. If wi lan fɔ “et wetin bad ɛn lɛk wetin gud,” dat go ɛp wi fɔ rili mek-ɔp wi maynd fɔ du wetin rayt ɛn avɔyd tin dɛn we go mek wi ɛnd-ɔp fɔ sin. (Emɔs 5:15) We wi want fɔ du wetin rayt, dat go ɛp wi bak fɔ kɔntinyu fɔ tinap tranga wan ɛn nɔ sin we sɔntin tɛmt wi di tɛm we wi nɔ de ɛkspɛkt.

16. We wi de du spirichwal tin dɛn, aw dat go ɛp wi fɔ kɔntinyu fɔ protɛkt wisɛf? (Luk bak di pikchɔ dɛn.)

¹⁶ Wetin go mek wi want fɔ du di rayt tin dɛn? Wi fɔ de du tin dɛn ɔltɛm we go mek wi lɛk Jiova mɔ ɛn mɔ. We wi de na mitin ɔ fil savis, i nɔ go izi fɔ mek sɔntin tɛmt wi fɔ du bad. Bifo dat, i go ɛp wi fɔ mek wi rili want fɔ du tin dɛn we go mek Jiova gladi. (Mat. 28:19, 20; Ibru. 10:24, 25) We wi de rid ɛn stɔdi Gɔd in Wɔd ɛn tink gud gud wan bɔt am, dat go mek wi rili lɛk wetin gud ɛn et wetin bad. (Jɔs. 1:8; Sam 1:2, 3; 119:97, 101) Mɛmba se, Jizɔs bin tɛl in disaypul dɛn se: “Una go de . . . pre ɔltɛm, so dat una nɔ go du bad we sɔntin tɛmt una.” (Mat. 26:41) We wi de pre to wi Papa we de na ɛvin, wi de gi am chans fɔ ɛp wi ɛn mek wi kɔntinyu fɔ mek-ɔp wi maynd fɔ du tin dɛn we go mek i gladi.—Jems 4:8.

KƆNTINYU FƆ PROTƐKT YUSƐF

17. Us abit Pita bin gɛt we nɔ bin izi fɔ lɛf?

¹⁷ Sɔntɛm, wi go ebul fɔ lɛf sɔm bad abit dɛn we wi gɛt. Bɔt sɔntɛm i nɔ go izi fɔ lɛf ɔda abit dɛn we wi gɛt we nɔ fayn. Lɛ wi tɔk bɔt wetin bin apin to apɔsul Pita. Bikɔs i bin de fred mɔtalman, i bin dinay Jizɔs tri tɛm. (Mat. 26:69-75) Di maynd we Pita bin gɛt fɔ prich bifo di Sanɛndrin bin mek i tan lɛk se i dɔn lɛf fɔ fred. (Akt 5:27-29) Bɔt, afta sɔm tɛm, “bikɔs i bin de fred di wan dɛn we sakɔmsayz,” i bin lɛf fɔ it wit Kristian dɛn we nɔto Ju. (Gal. 2:11, 12) Pita bin dɔn bigin fred mɔtalman bak. Sɔntɛm, i nɔ bin ɛva lɛf fɔ fred mɔtalman.

18. Wetin kin apin to sɔm bad abit dɛn we wi gɛt?

¹⁸ Sɔntɛm da sem kayn tin de kin apin to wi. Jɔs lɛk Pita, sɔntɛnde wi go nid fɔ tray tranga wan fɔ avɔyd wan bad abit we wi tink se wi bin dɔn lɛf. Fɔ ɛgzampul, wan brɔda bin tɔk se: “A bin dɔn lɛf fɔ wach rud rud pikchɔ ɔ fim dɛn fɔ tɛn ia ɛn a bin biliv tranga wan se a dɔn lɛf da bad abit de. Bɔt da bad abit de bin tan lɛk wan bad bad animal we ayd ɛn de wet fɔ di rayt tɛm fɔ atak.” Di gud tin na dat, di brɔda nɔ bin giv-ɔp. I bin kam fɔ no se i nid fɔ tray tranga wan ɛvride fɔ avɔyd da bad abit de, sɔntɛm i go nid fɔ du dat te i day. In wɛf ɛn di ɛlda dɛn na di kɔngrigeshɔn bin ɛp am fɔ mek i du tin dɛn we go mek i avɔyd fɔ wach rud rud pikchɔ ɔ fim dɛn.

19. Wetin wi go du if wi gɛt wan bad abit we wi stil nɔ lɛf yet?

¹⁹ Wetin wi go du fɔ mek di bad abit we wi nɔ ebul fɔ lɛf yet nɔ mek wi kɔmit sin? Na we wi de fala di advays we Jizɔs bin gi bɔt tin dɛn we de tɛmt wi. I bin se: “Una go de wach.” Ivin tɛm dɛn we yu fil se yu strɔng, kɔntinyu fɔ avɔyd tin dɛn we go tɛmt yu. (1 Kɔr. 10:12) Kɔntinyu fɔ du di tin dɛn we bin ɛp yu fɔ lɛf di bad abit. Prɔvabs 28:14 tɔk se: “Pɔsin we rɛdi ɔltɛm go gladi.”—2 Pit. 3:14.

DI BƐNIFIT DƐN WE WI GO GƐT WE WI KƆNTINYU FƆ PROTƐKT WISƐF

20-21. (a) Us bɛnifit dɛn wi go gɛt we wi kɔntinyu fɔ protɛkt wisɛf frɔm tin dɛn we de tɛmt wi? (b) If wi du wetin wi ebul, wetin Jiova go du fɔ wi? (2 Kɔrintians 4:7)

²⁰ Wi shɔ se we wi kɔntinyu fɔ protɛkt wisɛf frɔm tin dɛn we de tɛmt wi, dat go bɛnifit wi ɔltɛm. We wi sin, sɔntɛm wi go “ɛnjɔy . . . fɔ shɔt tɛm,” bɔt we wi liv wi layf di we aw Jiova want, wi go gɛt tru tru gladi-at. (Ibru. 11:25; Sam 19:8) Wi go gladi bikɔs i mek wi fɔ obe in lɔ dɛn. (Jɛn. 1:27) Dat go mek wi gɛt klin kɔnshɛns ɛn kɔntinyu fɔ du tin dɛn we go mek wi gɛt layf we go de sote go.—1 Tim. 6:12; 2 Tim. 1:3; Jud 20, 21.

²¹ Fɔ tru, “di bɔdi wik.” Bɔt dis nɔ min se wi nɔ ebul du ɛnitin bɔt di say dɛn we wi wik. Jiova rɛdi fɔ gi wi di pawa we wi nid. (Rid 2 Kɔrintians 4:7.) Bɔt, mɛmba se na di pawa we pas mɔtalman in yon Gɔd de gi. Na wi gɛt di wok fɔ protɛkt wisɛf ɛvride frɔm tin dɛn we de tɛmt wi. If wi du wetin wi ebul, wi gɛt kɔnfidɛns se Jiova go ansa wi prea fɔ gi wi mɔ trɛnk we wi nid am. (1 Kɔr. 10:13) Fɔ tru, Jiova go ɛp wi fɔ kɔntinyu fɔ protɛkt wisɛf frɔm tin dɛn we de tɛmt wi.