Falamakata di We Aw Jiova ɛn Jizɔs De Tink

1-2. Wetin i min fɔ lɛk Jiova? Aw Jizɔs bin sho se i lɛk Jiova wit ɔl in maynd?

“YU FƆ lɛk Jiova we na yu Gɔd wit ɔl yu at, wit ɔl yu layf, wit ɔl yu trɛnk, ɛn wit ɔl yu maynd.” (Lyuk 10:27) Jizɔs tɔk klia wan se dis Lɔ impɔtant pas ɔl di ɔda wan dɛn insay di Lɔ we Gɔd Bin Gi Mozis. Mɛmba se fɔ lɛk Jiova gɛt sɔntin fɔ du wit wi at, we min di tin dɛn we wi want ɛn di we aw wi de fil. I min bak se wi fɔ sav Jiova wit ɔl wi at ɛn wi trɛnk. Bɔt fɔ lɛk Jiova gɛt sɔntin bak fɔ du wit wi maynd, we min di we aw wi de tink. Na tru se wi nɔ go ɛva ebul fɔ rili ɔndastand gud gud wan di we aw Jiova de tink. Bɔt wi go ebul fɔ ɔndastand di we aw i de tink we wi stɔdi di Baybul fɔ no “aw Krays de tink” bikɔs Jizɔs bin falamakata di we aw in Papa de tink pafɛkt wan.​—1 Krɔ. 2:16 ɛn di stɔdi not “we do have the mind of Christ.”

² Jizɔs bin lɛk Jiova wit ɔl in maynd. I bin no wetin Gɔd want mek i du ɛn i mek-ɔp in manyd fɔ du am pan ɔl we i bin no se dat go mek i sɔfa. Bikɔs Jizɔs bin pe atɛnshɔn fɔ du wetin in Papa want, i nɔ bin alaw ɛnitin fɔ impɔtant to am pas fɔ du wetin in Papa want.

3. Wetin apɔsul Pita bin lan frɔm Jizɔs? Wetin Pita bin ɛnkɔrej in kɔmpin Kristian dɛn fɔ du? (1 Pita 4:1)

³ Pita ɛn in kɔmpin apɔsul dɛn bin gɛt chans fɔ spɛn tɛm wit Jizɔs ɛn lan fɔ tink lɛk aw i de tink. We Pita bin rayt di fɔs lɛta we Gɔd yuz am fɔ rayt, i bin ɛnkɔrej di Kristian dɛn fɔ rɛdi dɛnsɛf fɔ tink lɛk Krays.a (Rid 1 Pita 4:1.) Pita bin yuz wɔd dɛn we sojaman dɛn kin yuz we i bin rayt se: “Unasɛf rɛdi.” So if Kristian dɛn de tink lɛk aw Krays de tink, dɛn go rɛdi fɔ fɛt agens di bad tin dɛn we dɛn go want fɔ du ɛn agens dis wɔl we Setan de rul.—2 Kɔr. 10:​3-5; Ɛfi. 6:12.

4. Wetin wi go tɔk bɔt insay dis atikul?

⁴ Wi go tɔk bɔt di we aw Jizɔs de tink ɛn si aw wisɛf go tink lɛk am. Wi go lan aw wi go (1) falamakata di we aw Jiova de tink we go ɛp wi ɔl fɔ tink di sem we, (2) bi pɔsin we ɔmbul, ɛn (3) du tin wit sɛns bay we wi de pre to Jiova fɔ sho se wi abop pan am.

FALAMAKATA DI WE AW JIOVA DE TINK

5. Wetin Pita bin du wan tɛm we sho se i nɔ bin de tink lɛk aw Jiova de tink?

⁵ Lɛ wi tɔk bɔt wan tɛm we Pita bin sho se i nɔ de tink lɛk aw Jiova de tink. Jizɔs bin dɔn tɛl in apɔsul dɛn se i go go na Jerusɛlɛm, ɛn dɛn go ol am ɛn go wit am to di bigman dɛn pan Gɔd biznɛs we de de, i go bia we dɛn de mek i sɔfa, ɛn dɛn go kil am. (Mat. 16:21) Sɔntɛm i nɔ bin izi fɔ mek Pita ɔndastand se Jiova go alaw fɔ mek dɛn kil Jizɔs we na di Mɛsaya we Gɔd bin dɔn prɔmis se go kam ɛn di pɔsin we go gi op to di Izrɛlayt dɛn. (Mat. 16:16) So Pita go wit Jizɔs na kɔna ɛn tɛl am se: “Masta, sɔri fɔ yusɛf; dis nɔ go apin to yu.” (Mat. 16:22) Bikɔs Pita nɔ bin de tink di we aw Jiova de tink, in ɛn Jizɔs nɔ bin de tink di sem we.

6. Wetin Jizɔs bin du we sho se di we aw i de tink gri wit di we aw Jiova de tink?

⁶ Di we aw Jizɔs bin de tink gri wit di we aw in Papa we de na ɛvin de tink. Jizɔs bin tɛl Pita se: “Lɛf mi, Setan! Yu de blɔk mi we, bikɔs yu nɔ de tink lɛk aw Gɔd de tink, yu de tink lɛk mɔtalman.” (Mat. 16:23) I go bi se Pita nɔ bin min bad, bɔt Jizɔs nɔ bin lisin to in advays. Wi kin lan lɛsin frɔm dis tin we bin apin. Jiova nɔ bin want mek Jizɔs du tin dɛn we de sho se i jɔs bisin bɔt insɛf. Dis tin we apin bin mek Pita lan se i impɔtant fɔ tink lɛk aw Gɔd de tink.

7. Aw Pita bin sho leta se i rɛdi fɔ ajɔst di we aw i de tink ɛn tink lɛk aw Jiova de tink? (Luk di pikchɔ frɔnt pej.)

⁷ Leta, Pita bin sho se i want fɔ tink lɛk aw Jiova de tink. Tɛm bin dɔn rich fɔ mek Jɛntayl dɛn we nɔ sakɔmsayz de pat pan Gɔd in pipul dɛn. Gɔd bin sɛn Pita fɔ go prich to wan Jɛntayl we nem Kɔnilyɔs we na wan pan di fɔs Jɛntayl dɛn we go bi Kristian. Di Ju pipul dɛn nɔ bin gɛt natin fɔ du wit di Jɛntayl dɛn, na dat mek Pita bin nid ɛp fɔ mek i rɛdi fɔ go prich to di Jɛntayl dɛn. We Pita ɔndastand aw Jiova de fil bɔt di Jɛntayl dɛn, i ajɔst di we aw i bin de tink. Bikɔs ɔf dat, i bin go we Kɔnilyɔs sɛn kɔl am ɛn i “nɔ dawt atɔl.” (Akt 10:​28, 29) I prich to Kɔnilyɔs ɛn ɔl di wan dɛn we de na in os ɛn dɛn bin baptayz.—Akt 10:​21-23, 34, 35, 44-48.

8. Aw wi go sho se di we aw wi de tink gri wit di we aw Jiova de tink? (1 Pita 3:8 ɛn futnot)

⁸ Afta sɔm ia dɔn pas, Pita bin ɛnkɔrej in kɔmpin Kristian dɛn fɔ “tink di sem we.” (Rid 1 Pita 3:8 ɛn futnot) Wi ɛn wi brɔda ɛn sista dɛn go ebul tink di sem we if wi falamakata di we aw Jiova de tink jɔs lɛk aw wi dɔn lan na di Baybul. Fɔ ɛgzampul, Jizɔs ɛnkɔrej di wan dɛn we de fala am fɔ put di Kiŋdɔm fɔs na dɛn layf. (Mat. 6:33) Sɔntɛm bikɔs wan pɔblisha we de na yu kɔngrigeshɔn de tink bɔt dis, i go disayd fɔ sav Jiova ful-taym. Bifo wi advays di pɔsin fɔ du ɔda tin we go mek layf izi fɔ am, wi fɔ tɔk fayn bɔt dis impɔtant tin we i want fɔ du ɛn du wetin wi ebul fɔ sɔpɔt am.

BI PƆSIN WE ƆMBUL

9-10. Aw Jizɔs bin sho se in na pɔsin we rili ɔmbul?

⁹ Di nɛt bifo dɛn kil Jizɔs, i bin tich Pita ɛn di ɔda apɔsul dɛn wan impɔtant lɛsin bɔt aw dɛn fɔ bi pipul dɛn we ɔmbul. Bifo dis tɛm, Jizɔs bin dɔn sɛn Pita ɛn Jɔn fɔ rɛdi di tin dɛn we dɛn nid fɔ mek Jizɔs go it wit in apɔsul dɛn fɔ di las tɛm bifo i day. I go bi se wan pan di tin dɛn we dɛn du na fɔ mek shɔ se bol ɛn tawɛl dɛn de fɔ was di strenja dɛn fut bifo dɛn it. Bɔt udat go rɛdi fɔ put insɛf dɔŋ ɛn du dis wok we di tɛm rich?

¹⁰ Jizɔs nɔ bin westɛm fɔ sho se i rili ɔmbul. Jizɔs in disaypul dɛn bin sɔprayz we dɛn si am de du wok we savant dɛn kin du. Jizɔs bin pul di klos we i kin wɛr pantap, tek wan tawɛl ɛn tay am na in wes, put wata insay wan bol ɛn bigin fɔ was dɛn fut. (Jɔn 13:​4, 5) I go mɔs dɔn tek sɔm tɛm fɔ mek Jizɔs was ɔl in 12 apɔsul dɛn fut; i bin ivin was Judas we go ɛp pipul dɛn fɔ arɛst am in fut. Bɔt Jizɔs bin put insɛf dɔŋ ɛn du di wok. Dɔn Jizɔs tek tɛm ɛksplen to dɛn se: “Una ɔndastand wetin a dɔn du to una? Una de kɔl mi ‘Ticha’ ɛn ‘Masta,’ ɛn na di rayt tin una de du, bikɔs mi na Ticha ɛn Masta. So if mi we na di Masta ɛn Ticha dɔn was una fut, unasɛf fɔ was una kɔmpin dɛn fut.”—Jɔn 13:​12-14.

11. Aw Pita sho se i bin dɔn lan fɔ bi pɔsin we ɔmbul? (1 Pita 5:5) (Luk bak di pikchɔ.)

¹¹ Pita bin lan fɔ bi pɔsin we ɔmbul frɔm Jizɔs in ɛgzampul. Afta Jizɔs go bak na ɛvin, Pita bin pafɔm wan mirekul fɔ mɛn wan man we nɔ bin ebul fɔ waka frɔm we dɛn bɔn am. (Akt 1:​8, 9; 3:​2, 6-8) Dis wɔndaful tin we Pita du bin mek bɔku pipul dɛn gɛda rawnd am. (Akt 3:11) Bikɔs Pita kɔmɔt na say we pipul dɛn want fɔ bi impɔtant pɔsin ɛn gɛt pozishɔn, fɔ se i bin tinap ɛn ɛnjɔy di prez we dɛn de prez am? Nɔ. Pita bin put insɛf dɔŋ ɛn gi di prez to Jiova ɛn Jizɔs we fit fɔ gɛt am bay we i tɔk se: Na “bikɔs ɔf [Jizɔs] in nem ɛn di fet we wi gɛt pan in nem, na in mek dis man we una no ɛn de si dɔn strɔng.” (Akt 3:​12-16) Sɔntɛm di wɔd dɛn we Pita yuz insay wan lɛta we i rayt to di Kristian dɛn fɔ ɛnkɔrej dɛn fɔ bi pipul dɛn we ɔmbul go mek wi mɛmba di tɛm we Jizɔs bin rap tawɛl rawnd in wes ɛn was in apɔsul dɛn fut.—Rid 1 Pita 5:5.

12. Aw wi go falamakata Pita fɔ kɔntinyu fɔ tray fɔ bi pipul dɛn we ɔmbul?

¹² Wi kin falamakata Pita in ɛgzampul fɔ tray fɔ bi pipul dɛn we ɔmbul. Mɛmba se fɔ bi pɔsin we ɔmbul nɔ jɔs min fɔ tɔk di rayt wɔd dɛn. Di wɔd dɛn we Pita yuz fɔ translet di wɔd dɛn “put unasɛf dɔŋ,” sho se fɔ bi pɔsin we ɔmbul gɛt sɔntin fɔ du wit di we aw wi tink bɔt wisɛf ɛn ɔda pipul dɛn. Wi de wok fɔ ɔda pipul dɛn bikɔs wi lɛk Jiova ɛn wi lɛk pipul dɛn, nɔto bikɔs wi want mek dɛn prez wi. If wi gladi fɔ du ɛni wok we wi ebul fɔ du fɔ Jiova ɛn wi brɔda ɛn sista dɛn ilɛk pipul dɛn si wi ɔ dɛn nɔ si wi, dat de sho se wi na pipul dɛn we ɔmbul.—Mat. 6:​1-4.

BI PƆSIN WE DE “DU TIN WIT SƐNS”

13. Ɛksplen wetin i min fɔ “du tin wit sɛns.”

¹³ Wetin i min fɔ bi pɔsin we de “du tin wit sɛns”? (1 Pit. 4:7) Kristian we de du tin wit sɛns de du in bɛst fɔ disayd fɔ du tin dɛn we de sho se i de tink lɛk aw Jiova de tink. Da kayn Kristian de no se natin nɔ de we impɔtant pas in padi biznɛs wit Jiova. I de tink di rayt we bɔt insɛf bikɔs i no se nɔto ɔltin i sabi. Ɛn i de sho se i abop pan Jiova bay we i de put insɛf dɔŋ ɛn pre to am ɔltɛm.b

14. Wetin Pita du wan tɛm we sho se i nɔ bin abop pan Jiova?

¹⁴ Di las nɛt bifo Jizɔs day, i bin tɛl in disaypul dɛn se: “Una ɔl go lɛf mi dis nɛt bikɔs ɔf wetin go apin to mi.” Bɔt Pita bin tɔk wit kɔnfidɛns se: “Pan ɔl we ɔl di ɔda wan dɛn go lɛf yu, a nɔ go ɛva lɛf yu!” Da nɛt de Jizɔs bin advays sɔm pan in disaypul dɛn se: “Una go de wach ɛn pre ɔltɛm.” (Mat. 26:​31, 33, 41) Sɔntɛm if Pita bin fala di advays we Jizɔs bin gi dɛn, i bin fɔ gɛt maynd fɔ tɔk se in na wan pan Jizɔs in disaypul dɛn. Bifo dat, Pita bin dinay in Masta, ɛn i bin rili fil am we i du dat.—Mat. 26:​69-75.

15. Aw Jizɔs bin kɔntinyu fɔ du tin wit sɛns di nɛt bifo dɛn kil am?

¹⁵ Jizɔs bin abop pan Jiova wit ɔl in at. Pan ɔl we Jizɔs bin pafɛkt, i bin pre bɔku tɛm. Na dat bin mek i gɛt maynd fɔ du wetin Jiova bin want am fɔ du. (Mat. 26:​39, 42, 44; Jɔn 18:​4, 5) Wan dawt nɔ de se Pita nɔ ɛva fɔgɛt aw Jizɔs bin pre bɔku tɛm di nɛt bifo dɛn kil am.

16. Aw Pita bin sho se i dɔn lan fɔ du tin wit sɛns? (1 Pita 4:7)

¹⁶ As tɛm de go, Pita bin lan fɔ abop pan Jiova mɔ bay we i bin de pre to am. We Jizɔs gɛt layf bak, i bin tɛl Pita ɛn di ɔda apɔsul dɛn se dɛn go gɛt oli spirit we go ɛp dɛn fɔ du di prichin wok. Bɔt Jizɔs tɛl dɛn fɔ de na Jerusɛlɛm te dɛn gɛt di oli spirit. (Lyuk 24:49; Akt 1:​4, 5) Wetin Pita du we i bin de wet? Pita ɛn in kɔmpin Kristian dɛn “bin de pre.” (Akt 1:​13, 14) Leta, insay Pita in fɔs lɛta, i bin ɛnkɔrej in kɔmpin Kristian dɛn fɔ du tin wit sɛns ɛn abop pan Jiova bay we dɛn de pre to am. (Rid 1 Pita 4:7.) Pita bin lan fɔ abop pan Jiova ɛn bi pila fɔ di kɔngrigeshɔn.—Gal. 2:9.

17. Ilɛk tin dɛn de we wi sabi fɔ du, wetin wi fɔ kɔntinyu fɔ du? (Luk bak di pikchɔ.)

¹⁷ Fɔ mek wi go du tin wit sɛns, wi fɔ de pre to Jiova ɔltɛm. Wi no se wi fɔ de pre to Jiova ɔltɛm ilɛk wetin wi sabi fɔ du. So wi de pre to Jiova mɔ we wi gɛt impɔtant tin dɛn fɔ disayd fɔ mek i go gayd wi, ɛn biliv se i no wetin fayn fɔ wi.

18. Wetin go ɛp wi fɔ ajɔst di we aw wi de tink fɔ mek wi go ebul tink lɛk aw Jiova de tink?

¹⁸ Wi rili gladi bikɔs Jiova mek wi di kayn we we wi ebul sho di kwaliti dɛn we i gɛt. (Jɛn. 1:26) As wi ɔl no, wi nɔ go ebul fɔ falamakata Jiova pafɛkt wan. (Ayz. 55:9) Bɔt jɔs lɛk Pita, wi go ebul fɔ tink mɔ lɛk aw Jiova de tink. Lɛ wi du dat bay we wi kɔntinyu fɔ falamakata di we aw Gɔd de tink, bi pɔsin we ɔmbul, ɛn du tin wit sɛns.