Kɔntinyu fɔ Liv Bay Fet

1. Wetin mek apɔsul Pɔl bin satisfay wit di we aw i bin liv in layf?

TƐM bin rich we apɔsul Pɔl bin no se i nɔ go te igen dɛn go kil am, bɔt i bin satisfay wit di we aw i dɔn liv in layf. We i tink bɔt aw i dɔn liv in layf, i tɔk se: “A dɔn rɔn di res dɔn, ɛn a dɔn fala di tin dɛn we wi biliv.” (2 Tim. 4:​6-8) Pɔl bin disayd fɔ du di rayt tin dɛn we i bin de sav Jiova ɛn i bin no se Jiova gladi fɔ am. Wisɛf want fɔ disayd fɔ du di rayt tin dɛn ɛn mek Gɔd gladi. Aw wi go du dat?

2. Wetin i min fɔ liv bay fet?

² Pɔl bin tɔk bɔt insɛf ɛn ɔda fetful Kristian dɛn se: “Wi de liv bay fet, nɔto bay wetin wi de si.” (2 Kɔr. 5:7) Wetin Pɔl bin min? Pipul dɛn we nɔ gɛt fet pan Jiova kin jɔs alaw di tin dɛn we dɛn de si, yɛri, ɛn fil fɔ mek dɛn disayd fɔ du tin dɛn. Bɔt we pɔsin de liv bay fet, i de disayd fɔ du tin dɛn bikɔs i abop pan Jiova Gɔd. Di tin dɛn we i de disayd fɔ du de sho se i biliv se Gɔd go blɛs am ɛn i go bɛnifit we i fala Jiova in advays we de na In Wɔd di Baybul.—Sam 119:66; Ibru. 11:6.

3. Us bɛnifit dɛn pɔsin go gɛt we i de liv bay fet? (2 Kɔrintians 4:18)

³ As wi ɔl no, sɔntɛnde wi kin disayd fɔ du sɔm tin dɛn bikɔs ɔf wetin wi de si, yɛri, ɛn aw wi de fil. Bɔt sɔntɛm wi go gɛt prɔblɛm dɛn if wi jɔs tink bɔt wetin wi de si ɔ yɛri we wi de disayd fɔ du impɔtant tin dɛn. Wetin mek? Na bikɔs sɔntɛnde di tin dɛn we wi de si ɔ yɛri kin ful wi. Ilɛksɛf dɛn nɔ ful wi, if wi jɔs de liv bay wetin wi de si, wi nɔ go du wetin Gɔd want. (Ɛkli. 11:9; Mat. 24:​37-39) Bɔt we wi de liv bay fet, i go izi mɔ fɔ mek wi disayd fɔ du wetin di “Masta gri wit.” (Ɛfi. 5:10) We wi de fala Gɔd in advays, dat go mek wi gɛt kolat ɛn tru tru gladi-at. (Sam 16:​8, 9; Ayz. 48:​17, 18) Ɛn if wi kɔntinyu fɔ liv bay fet, wi go gɛt layf we go de sote go.—Rid 2 Kɔrintians 4:18.

4. Aw pɔsin go no if i de liv bay fet ɔ bay wetin i de si?

⁴ Aw wi go no if wi de liv bay fet ɔ bay wetin wi de si? I go fayn fɔ mek wi ɔl aks wisɛf dɛn kwɛstyɔn dɛn ya: Wetin na di tin dɛn we wi kin tink bɔt we wi want fɔ disayd fɔ du sɔntin? Wi kin jɔs alaw di tin dɛn we wi de si fɔ mek wi disayd wetin wi want fɔ du? Ɔ wi kin disayd fɔ du tin dɛn bikɔs wi abop pan di advays we Jiova de gi? Lɛ wi tɔk bɔt aw wi go kɔntinyu fɔ liv bay fet we wi de disayd fɔ du dɛn tri impɔtant tin dɛn ya: we wi de disayd us wok wi go du, udat wi go mared, ɛn wetin wi fɔ du we wi gɛt dayrɛkshɔn frɔm di ɔganayzeshɔn. Wi go tɔk bɔt tin dɛn we wi fɔ tink bɔt we go ɛp wi we wi de disayd fɔ du ɛniwan pan dɛn tin dɛn ya.

WE WI DE DISAYD US WOK WI GO DU

5. Wetin wi fɔ tink bɔt we wi de disayd us wok fɔ du?

⁵ Wi ɔl want fɔ wok ɛn kia fɔ di tin dɛn we wi ɛn wi famili nid. (Ɛkli. 7:12; 1 Tim. 5:8) Sɔm wok dɛn go mek yu gɛt bɔku mɔni. Sɔm wok dɛn go alaw pɔsin fɔ kia fɔ di tin dɛn we i nid ɛvride ɛn ebul kip sɔm mɔni na kɔna fɔ di bambay. Bɔt ɔda wok dɛn go jɔs mek pɔsin gɛt mɔni we i nid fɔ kia fɔ di men tin dɛn we in famili nid. We wi de disayd us wok wi go du, wan dawt nɔ de se wi kin tink bɔt ɔmɔs mɔni wi go gɛt. Bɔt pɔsin go sho se i de liv bay wetin i de si if na dat nɔmɔ i de pe atɛnshɔn pan.

6. Aw wi go sho se wi de liv bay fet we wi de pik us wok wi go du? (Ibruz 13:5)

⁶ If wi de liv bay fet, wi go tink bak bɔt aw di wok go afɛkt wi padi biznɛs wit Jiova. Wi kin aks wisɛf dɛn kwɛstyɔn dɛn ya: ‘Fɔ se di wok go mek a du tin dɛn we Jiova et?’ (Prɔv. 6:​16-19) ‘I go afɛkt di tɛm we a kin yuz fɔ wɔship Jiova ɛn sɔntɛm mek a de fa frɔm mi famili fɔ lɔng tɛm?’ (Fil. 1:10) If di ansa to dɛn kwɛstyɔn dɛn ya na yɛs, i go fayn fɔ mek yu nɔ tek da kayn wok de ilɛksɛf i nɔ izi fɔ gɛt wok. Bikɔs wi de liv bay fet, wi de disayd fɔ du tin dɛn we de sho se wi biliv tranga wan se Jiova go kia fɔ di tin dɛn we wi nid.—Mat. 6:33; rid Ibruz 13:5.

7-8. Aw wan brɔda we de na Sawt Amɛrika bin sho se i de liv bay fet? (Luk bak di pikchɔ.)

⁷ Notis aw wan brɔda we nem Aviaa we de na Sawt Amɛrika bin si se i nid fɔ liv bay fet. I tɔk se: “A bin aplay fɔ wok we di salari go dɔbul di salari we dɛn bin de pe mi ɛn we go mek a gɛt bɔku pan di tin dɛn we a want.” Bɔt Avia bin rili want fɔ payɔnia. I kɔntinyu fɔ tɔk se: “Dɛn bin gri fɔ mek di maneja fɔ di kɔntri intavyu mi. Bifo di intavyu, a bin pre fɔ mek Jiova ɛp mi ɛn a bin biliv tranga wan se Jiova no wetin na di bɛst tin fɔ mi. A bin want fɔ go bifo na mi wokples ɛn gɛt bɔku mɔni, bɔt a nɔ want dis wok if i nɔ go ɛp mi fɔ rich mi spirichwal gol dɛn.”

⁸ Avia tɔk se: “We dɛn bin de intavyu mi, di maneja tɛl mi se a go gɛt fɔ de wok ovataym bɔku tɛm. A bin tek tɛm tɛl am klia wan se a nɔ go du dat bikɔs i go ambɔg di tɛm we a de yuz fɔ wɔship Jiova.” So Avia bin disayd nɔ fɔ tek di wok. Afta tu wik pas, i bigin fɔ payɔnia. Ɛn leta insay da ia de, i bin ebul fɔ gɛt pat-taym wok. I tɔk se: “Jiova bin yɛri mi prea ɛn i gi mi wok we de mek a ebul fɔ payɔnia. A rili gladi fɔ gɛt wok we de alaw mi fɔ yuz bɔku pan mi tɛm fɔ sav Jiova ɛn wok fɔ mi brɔda ɛn sista dɛn.”

9. Wetin yu lan frɔm Trezɔ in ɛkspiriɛns?

⁹ Wetin wi go du if wi notis se di wok we wi de du rayt naw nɔ de alaw wi fɔ liv wi layf di kayn we we de sho se wi de liv bay fet? Lɛ wi tɔk bɔt wan brɔda we nem Trezɔ we de na Kongo in ɛkspiriɛns. I tɔk se: “Mi nyu wok na bin wok we bɔku pipul dɛn want. Di salari we dɛn bin de pe mi bin bɔku fa fawe pas di salari na mi fɔs wokples, ɛn di wok bin mek bɔku pipul dɛn rɛspɛkt mi.” Bɔt Trezɔ bin de mis mitin bɔku tɛm bikɔs i bin de wok ovataym. Dɛn bin de mɔna am bak fɔ ayd sɔm tin dɛn we di ɔfis bin de du we nɔ fayn. Trezɔ bin want fɔ lɛf di wok, bɔt i bin de wɔri if i go gɛt ɔda wok. Wetin bin ɛp am? I tɔk se: “Abakɔk 3:​17-19 bin ɛp mi fɔ ɔndastand se ilɛk a lɔs mi wok Jiova go kia fɔ mi. So a bin lɛf di wok.” I tɔk bak se: “Bɔku bɔsman dɛn kin tink se pɔsin go sakrifays ɛnitin, ivin in famili ɛn in padi biznɛs wit Gɔd fɔ wok we dɛn go pe am bɔku mɔni. A gladi we a nɔ bin alaw mi wok fɔ ambɔg mi padi biznɛs wit Jiova ɛn mi famili. Afta wan ia, Jiova bin ɛp mi fɔ gɛt wok we go alaw mi fɔ liv simpul layf ɛn fɔ spɛn mɔ tɛm fɔ du in wok. We wi put Jiova fɔs na wi layf sɔntɛm wi go gɛt mɔni prɔblɛm, bɔt Jiova go kia fɔ wi.” Fɔ tru, if wi abop pan di advays we Jiova de gi wi ɛn in prɔmis dɛn, wi go kɔntinyu fɔ liv bay fet ɛn i go blɛs wi.

WE WI DE DISAYD UDAT FƆ MARED

10. Wetin go mek wi liv bay wetin wi de si we wi de disayd udat fɔ mared?

¹⁰ Mared na gift frɔm Jiova ɛn na nɔmal tin fɔ mek pɔsin want fɔ mared. We sista de tink bɔt brɔda fɔ mared, sɔntɛm i go notis di brɔda in abit dɛn, di we aw i luk, di tin dɛn we pipul dɛn de tɔk bɔt am, aw i de andul mɔni, di tin dɛn we i de du fɔ ɛp in famili, ɛn aw di brɔda de mek i fil.b Dɛn tin dɛn ya impɔtant. Bɔt if na dɛn tin dɛn ya nɔmɔ i de tink bɔt, i go bi pɔsin we de liv bay wetin i de si.

11. Aw wi go sho se wi de liv bay fet we wi de disayd udat fɔ mared? (1 Kɔrintians 7:39)

¹¹ Jiova kin rili gladi fɔ wi brɔda ɛn sista dɛn we de fala in advays we dɛn de disayd udat fɔ mared! Fɔ ɛgzampul, dɛn kin tink bɔt di advays we se dɛn nɔ fɔ “tu yɔŋ” ɔ dɛn fɔ machɔ fɔs bifo dɛn bigin wach pɔsin fɔ mared. (1 Kɔr. 7:36) Dɛn de pe atɛnshɔn mɔ to di kwaliti dɛn we Jiova se gud maredman ɔ mareduman fɔ gɛt. (Prɔv. 31:​10-13, 26-28; Ɛfi. 5:33; 1 Tim. 5:8) If pɔsin we nɔ de sav Jiova sho se i lɛk dɛn, dɛn de fala di advays we de na 1 Kɔrintians 7:39 (Rid) we se, na “pɔsin nɔmɔ we biliv di Masta” dɛn fɔ mared. Dɛn de kɔntinyu fɔ liv bay fet ɛn gɛt kɔnfidɛns se Jiova go gi dɛn di sɔpɔt we dɛn nid we i kam to aw dɛn de fil.—Sam 55:22.

12. Wetin yu lan frɔm Rosa in ɛgzampul?

¹² Lɛ wi tɔk bɔt Rosa we na payɔnia we de na Kolombia in ɛkspiriɛns. Bikɔs ɔf di wok we i bin de du, in ɛn wan man we nɔto Jiova Witnɛs bin de si fast fast ɛn di man bin bigin fɔ sho se i lɛk am. Rosa bin lɛk am. I tɔk se: “I bin tan lɛk se na gud man. I bin de ɛp pipul dɛn na di eria, ɛn i nɔ bin de smok, tek drɔgs, ɔ drink pasmak. A bin lɛk di we aw i bin de trit mi. I bin gɛt ɔl di kwaliti dɛn we a de luk fɔ, bɔt in nɔto Jiova Witnɛs.” I tɔk bak se: “I nɔ bin izi fɔ tɛl am se a nɔ want am bikɔs na pɔsin we a bin rili want. Da tɛm de, a bin de fil se na mi wangren de ɛn a bin want fɔ mared, bɔt a nɔ bin si ɛnibɔdi na di trut fɔ mared.” Bɔt Rosa nɔ bin jɔs pe atɛnshɔn pan wetin i de si. I bin tink bɔt aw di tin we i go disayd go afɛkt in padi biznɛs wit Jiova. So i bin stɔp fɔ tɔk to di man ɛn pe atɛnshɔn fɔ wok fɔ Jiova. Shɔt tɛm afta dat, dɛn bin invayt am fɔ atɛnd di Skul fɔ Pipul dɛn We De Prich bɔt Gɔd in Kiŋdɔm, ɛn naw in na spɛshal payɔnia. Rosa tɔk se: “Jiova dɔn mek a rili gladi.” Pan ɔl we i nɔ go izi fɔ sho se wi gɛt fet we wi de disayd wetin fɔ du bɔt tin dɛn we wi rili want, wi go gɛt blɛsin ɔltɛm we wi du wetin Jiova want.

WE JIOVA IN ƆGANAYZESHƆN DE GI DAYRƐKSHƆN

13. Wetin go mek wi sho se wi de liv bay di tin dɛn we wi de si we Jiova in ɔganayzeshɔn gi wi dayrɛkshɔn?

¹³ Bɔku tɛm Jiova in ɔganayzeshɔn kin yuz di ɛlda dɛn, sakit ovasia dɛn, di branch ɔfis, ɔ di Gɔvnin Bɔdi fɔ gi wi dayrɛkshɔn we de ɛp wi fɔ sav Jiova. Bɔt wetin wi go du if sɔntɛnde wi nɔ ɔndastand di rizin we mek dɛn gi wi dayrɛkshɔn? Sɔntɛm wi go jɔs pe atɛnshɔn to di bad tin we go apin to wi if wi fala da dayrɛkshɔn de. Sɔntɛm wi go ivin bigin fɔ pe atɛnshɔn to di pafɛkt we di brɔda dɛn we gi di dayrɛkshɔn nɔ pafɛkt.

14. Wetin go ɛp wi fɔ sho se wi de liv bay fet we Jiova in ɔganayzeshɔn gi wi dayrɛkshɔn? (Ibruz 13:17)

¹⁴ If wi de liv bay fet, wi go biliv se na Jiova de gayd in ɔganayzeshɔn ɛn i no wetin gud fɔ wi. Bikɔs ɔf dat, wi nɔ go westɛm fɔ obe ɛn wi go gladi fɔ obe. (Rid Ibruz 13:17.) Wi no se we wi de obe dat go ɛp fɔ mek wanwɔd de na di kɔngrigeshɔn. (Ɛfi. 4:​2, 3) Wi biliv se pan ɔl we di brɔda dɛn we de bifo nɔ pafɛkt, Jiova go blɛs wi if wi obe. (1 Sam. 15:22) We di rayt tɛm rich, i go kɔrɛkt ɛnitin we i nid fɔ kɔrɛkt.—Mayk. 7:7.

15-16. Wetin bin ɛp wan brɔda fɔ sho se i de liv bay fet pan ɔl we i bin gɛt dawt bɔt di dayrɛkshɔn we dɛn gi am? (Luk bak di pikchɔ.)

¹⁵ Lɛ wi tɔk bɔt wan ɛkspiriɛns we de sho di bɛnifit we pɔsin de gɛt we i de liv bay fet. Pan ɔl we Spanish na di men langwej we dɛn de tɔk insay Peru, bɔku pipul dɛn we dɛn kin prich to de tɔk dɛn lokal langwej dɛn. Wan pan dɛn lokal langwej dɛn ya na Kɛchwa. Fɔ lɔng tɛm, brɔda ɛn sista dɛn we de tɔk Kɛchwa bin de luk fɔ pipul dɛn we de tɔk Kɛchwa na dɛn tɛritri. Bɔt fɔ mek dɛn go obe di lɔ we di gɔvmɛnt gi, dɛn bin mek sɔm ajɔstmɛnt dɛn to di we aw dɛn de prich. (Rom. 13:1) Bikɔs ɔf dat, sɔm brɔda ɛn sista dɛn bin de wɔnda if dat nɔ go ambɔg di wok na di tɛritri. Bikɔs di brɔda ɛn sista dɛn bin fala di dayrɛkshɔn, Jiova blɛs dɛn ɛn dɛn bin ebul fɔ fɛn bɔku pipul dɛn we de tɔk Kɛchwa.

¹⁶ Kɛvin we na ɛlda na wan Kɛchwa kɔngrigeshɔn bin de pat pan di pipul dɛn we bin de wɔri. I tɔk se: “A bin de tink to misɛf se, ‘Aw wi go ebul fɛn pipul dɛn we de tɔk Kɛchwa naw?’” Wetin Kɛvin bin du? I tɔk se: “A tink bɔt Prɔvabs 3:5. Ɛn a tink bɔt Mozis. I bin gɛt di wok fɔ pul di Izrɛlayt dɛn kɔmɔt na Ijipt ɛn kɛr dɛn go na say we i tan lɛk se i go izi fɔ mek di Ijipshian dɛn kil dɛn. Bɔt stil, i bin obe, ɛn Jiova bin blɛs am wɔndaful we bikɔs i obe.” (Ɛks. 14:​1, 2, 9-11, 21, 22) Kɛvin bin rɛdi fɔ ajɔst di we aw i bin de prich. Wetin bin apin we i obe? I tɔk se: “A bin sɔprayz we a si di we aw Jiova bin blɛs wi. Trade, wi bin de waka fɔ lɔng tɛm we wi de prich ɛn sɔntɛnde na jɔs wan ɔ tu pipul dɛn wi bin de fɛn we de tɔk Kɛchwa. Naw, wi de pe atɛnshɔn fɔ prich na tɛritri dɛn we gɛt bɔku pipul dɛn we de tɔk Kɛchwa. Bikɔs ɔf dat, wi gɛt bɔku pipul dɛn we wi de tɔk to, ritɔn visit dɛn, ɛn Baybul stɔdi dɛn. Naw, bɔku pipul dɛn de atɛnd wi mitin.” Fɔ tru, we wi sho se wi de liv bay fet, Jiova go blɛs wi ɔltɛm.

17. Wetin yu dɔn lan frɔm dis atikul?

¹⁷ Wi dɔn tɔk bɔt tri impɔtant eria dɛn we wi go sho se wi de liv bay fet. Bɔt wi fɔ sho se wi de liv bay fet pan ɔl di tin dɛn we wi de du, lɛk we wi de disayd wetin wi de pik fɔ ɛnjɔy wisɛf, ɔ we wi de du tin dɛn fɔ ɛnjɔy wisɛf, ɛn we wi de disayd ɔmɔs buk fɔ lan ɔ fɔ mɛn pikin. Ilɛk wetin wi de disayd fɔ du, wi nɔ fɔ jɔs alaw di tin dɛn we wi de si fɔ mek wi disayd dɛn tin dɛn de, bɔt wi fɔ alaw bak wi padi biznɛs wit Jiova, in advays, ɛn in prɔmis fɔ kia fɔ wi fɔ afɛkt wetin wi de disayd fɔ du. If wi du dat, wi go ebul fɔ “obe Jiova wi Gɔd sote go.”—Mayk. 4:5.