“We [Wi] De Go Nia Gɔd, dat Gud” fɔ Wi!

1-2. (a) Wetin pɔsin nid fɔ du fɔ gɛt tayt padi biznɛs wit ɔda pɔsin? (b) Wetin wi go tɔk bɔt insay dis atikul?

YU GƐT tayt padi? Wetin yu bin du fɔ mek una bi padi? I go bi se yu bin de spɛn tɛm wit am, lan bɔt di tin dɛn we dɔn apin to am, ɛn tray fɔ no di tin dɛn we i lɛk ɛn di tin dɛn we i nɔ lɛk. Yu bin kam fɔ no se i gɛt fayn kwaliti dɛn we yu go lɛk fɔ gɛt. Yu bin kam fɔ lɛk di pɔsin as yu padi.

² Fɔ gɛt tayt padi biznɛs wit pɔsin, yu nid fɔ spɛn tɛm wit am. Na di sem tin wi nid fɔ du fɔ gɛt tayt padi biznɛs wit Jiova Gɔd. Dis atikul go tɔk bɔt aw wi go ebul go nia Gɔd mɔ ɛn mɔ ɛn di bɛnifit dɛn we wi go gɛt we wi du dat. Fɔs, lɛ wi tɔk bɔt wetin mek i fayn fɔ go nia wi bɛst Padi we na Jiova.

3. Wetin mek wi nid fɔ tink gud gud wan bɔt di bɛnifit dɛn we wi go gɛt we wi go nia Jiova? Gi ɛgzampul.

³ Wan dawt nɔ de se yu gri se i fayn fɔ go nia Jiova. Bɔt we wi tink gud gud wan bɔt aw dat rili fayn, i go mek wi want fɔ kɔntinyu fɔ go nia am mɔ ɛn mɔ. (Sam 63:6-8) Fɔ ɛgzampul, wi no se fɔ it di rayt tin dɛn, fɔ ɛksasayz, fɔ rɛst, ɛn fɔ drink wata na tin dɛn we gud fɔ wi. Bɔt bɔku pipul dɛn nɔ kin tink bɔt dɛn tin dɛn de, ɛn dɛn nɔ kin du di tin dɛn we dɛn nid fɔ du fɔ kia fɔ dɛn wɛlbɔdi. Bɔt di mɔ we wi de tink bɔt di bɛnifit dɛn we wi go gɛt we wi du tin dɛn we de mek wi gɛt wɛlbɔdi, na di mɔ wi go want fɔ kɔntinyu fɔ du dɛn tin dɛn de. Semweso, sɔntɛm wi no se i fayn fɔ go nia Jiova, bɔt we wi de tink gud gud wan bɔt di bɛnifit dɛn we wi go gɛt we wi du dat, i go mek wi want fɔ kɔntinyu fɔ go nia wi Padi mɔ ɛn mɔ.​—Sam 119:27-30.

4. Wetin di man we rayt Sam 73:28 tɔk?

⁴ Rid Sam 73:28. Di pɔsin we rayt Sam 73 na bin Livayt we dɛn bin pik fɔ siŋ na Jiova in tɛmpul. I go bi se i bin dɔn de wɔship Jiova fetful wan fɔ lɔng tɛm. Bɔt i bin stil fil se i nid fɔ mɛmba insɛf ɛn ɔda pipul dɛn se fɔ “de go nia Gɔd” gud fɔ in ɛn dɛn. Wetin na sɔm bɛnifit dɛn we wi go gɛt we wi go nia Gɔd?

WI DE GƐT GLADI-AT WE WI “DE GO NIA GƆD”

5. (a) Wetin mek wi de gɛt gladi-at we wi de go nia Jiova mɔ ɛn mɔ? (b) Akɔdin to Prɔvabs 2:6-16, aw di sɛns we Jiova de gi de ɛp ɛn protɛkt yu?

⁵ Di mɔ we wi de go nia Jiova, na di mɔ wi de gladi. (Sam 65:4) Bɔku rizin dɛn de we go mek wi gladi. Fɔ ɛgzampul, wi de bɛnifit we wi fala di sɛns we de insay Gɔd in Wɔd di Baybul. Da kayn sɛns de de protɛkt wi frɔm bad tin dɛn ɛn ɛp wi nɔ fɔ mek siriɔs mistek dɛn. (Rid Prɔvabs 2:​6-16.) Na dat mek di Baybul tɔk se: “Di pɔsin we de tray fɔ gɛt sɛns go gladi, ɛn di pɔsin we de tink gud gud wan fɔ ɔndastand” go gladi.​—Prɔv. 3:13.

6. Wetin mek di man we rayt Sam 73 nɔ bin gladi fɔ sɔm tɛm?

⁶ As wi ɔl no, tɛm dɛn kin de we ivin Jiova in savant dɛn kin gɛt pwɛlat. Di man we rayt Sam 73 nɔ bin gladi fɔ sɔm tɛm bikɔs i bigin fɔ tink di rɔng we. I bin vɛks ɛn bigin fɔ jɛlɔs bikɔs i bin de tink se bɛtɛ de fala bad pipul dɛn we nɔ ivin bisin bɔt Gɔd ɔ In lɔ dɛn. I bigin fɔ tink se pipul dɛn we prawd ɛn lɛk fɛt-fɛt jɛntri ɔltɛm ɛn gɛt wɛlbɔdi, ɛn dɛn nɔ de ivin sɔfa. Bɔt dis we aw i bin de tink nɔ bin kɔrɛkt. (Sam 73:3-7, 12) Wan tɛm, di man we rayt Sam 73 in at bin so pwɛl dat i bigin fɔ tink se na fɔ natin i de sav Jiova. We in at bin rili pwɛl i tɔk se: “Na fɔ natin a dɔn kɔntinyu fɔ gɛt klinat ɛn fɔ pul mi an pan bad.”​—Sam 73:13.

7. We wi at pwɛl, wetin wi go du fɔ gɛt gladi-at bak? (Luk bak di pikchɔ na di pej.)

⁷ Di man we rayt dis sam nɔ bin alaw di pwɛlat we i bin gɛt fɔ mek i nɔ ebul du ɛnitin. I bin du sɔntin. I “go insay Gɔd in tɛmpul,” usay Jiova kɔrɛkt di we aw i bin de tink. (Sam 73:17-19) Jiova we na wi bɛst Padi kin no we wi at pwɛl. If wi pre to am fɔ ɛp wi fɔ no wetin fɔ du ɛn alaw am fɔ yuz in Wɔd ɛn di kɔngrigeshɔn fɔ ɛp wi, wi go gɛt di trɛnk we wi nid fɔ bia we wi at pwɛl. Ivin we wi de wɔri pasmak, Jiova go kɔrej wi ɛn mek wi fil fayn.​—Sam 94:19.a

WE WI “DE GO NIA GƆD” BƐTƐ GO FALA WI ƐN WI GO GƐT OP FƆ TUMARA BAMBAY

8. Us ɔda tu impɔtant bɛnifit dɛn wi go gɛt we wi de go nia Gɔd?

⁸ Tu ɔda impɔtant bɛnifit dɛn de we wi go gɛt we wi de go nia Gɔd. Fɔs, i go mek bɛtɛ fala wi. Sɛkɔn, i go mek wi gɛt strɔng op fɔ tumara bambay. (Jɛr. 29:11) Lɛ wi tek tɛm tɔk mɔ bɔt dɛn bɛnifit dɛn ya.

9. We wi de go nia Jiova, aw dat go mek wi gɛt mɔ gladi-at?

⁹ Bɛtɛ go fala wi we wi de go nia Jiova. Tide, bɔku pipul dɛn de se Gɔd nɔ de. So dɛn nɔ no wetin mek wi de na di wɔl ɛn dɛn biliv se tumara bambay nɔbɔdi nɔ go de na di wɔl igen. Bɔt frɔm wetin wi dɔn lan na di Baybul, wi biliv tranga wan se Gɔd “de pe di wan dɛn we de luk fɔ am wit ɔl dɛn at.” (Ibru. 11:6) Ivin rayt naw, wi gɛt mɔ gladi-at bikɔs wi de du wetin wi Papa Jiova we de na ɛvin want wi fɔ du, dat na fɔ sav am.​—Dyu. 10:12, 13.

10. Akɔdin to Sam 37:29, us op de tumara bambay fɔ di wan dɛn we abop pan Jiova?

¹⁰ Bɔku pipul dɛn nɔ gɛt rial op fɔ tumara bambay. Dɛn jɔs de wok, mared, bɔn pikin dɛn, ɛn kip mɔni fɔ di tɛm we dɛn go ol. Dɛn nɔ no wetin Gɔd dɔn prɔmis fɔ du tumara bambay. Bɔt Jiova in savant dɛn abop pan am. (Sam 25:3-5; 1 Tim. 6:17) Wi biliv di Gɔd we wi de go nia ɛn wi biliv di tin dɛn we i dɔn prɔmis wi. Wi biliv se tumara bambay wi go wɔship am sote go na Paradays.​—Rid Sam 37:29.

11. We wi de go nia Gɔd, aw dat de afɛkt wi? Aw dat de afɛkt am?

¹¹ Wi de bɛnifit bɔku ɔda we dɛn we wi de go nia Gɔd. Fɔ ɛgzampul, Jiova prɔmis fɔ fɔgiv wi sin dɛn we wi ripɛnt. (Ayz. 1:18) Bikɔs ɔf dat, wi nɔ nid fɔ kɔntinyu fɔ fil bad bikɔs ɔf di sin dɛn we wi bin dɔn kɔmit. (Sam 32:1-5) Dɔn bak, Jiova de gladi we wi de go nia am. (Prɔv. 23:15) As wi ɔl no, bɔku ɔda blɛsin dɛn de we wi de gɛt bikɔs wi na Jiova in padi dɛn. Bɔt aw yu go kɔntinyu fɔ go nia Gɔd?

AW YU GO KƆNTINYU FƆ “GO NIA GƆD”?

12. Wetin yu dɔn du fɔ go nia Gɔd mɔ ɛn mɔ?

¹² If yu dɔn baptayz, dat min se yu dɔn ɔlrɛdi du bɔku tin fɔ go nia Jiova. Yu dɔn lan bɔku tru tin dɛn bɔt Jiova Gɔd ɛn Krays Jizɔs, yu dɔn ripɛnt fɔ di sin dɛn we yu bin dɔn kɔmit, yu dɔn sho se yu gɛt strɔng fet pan Gɔd, ɛn yu dɔn mek-ɔp yu maynd fɔ du wetin i want. Bɔt fɔ mek wi go ebul go nia Gɔd mɔ ɛn mɔ, wi nid fɔ kɔntinyu fɔ du dɛn tin dɛn de.​—Kol. 2:6.

13. Us tri tin dɛn go ɛp wi fɔ kɔntinyu fɔ go nia Jiova mɔ ɛn mɔ?

¹³ Wetin go ɛp wi fɔ kɔntinyu fɔ go nia Jiova mɔ ɛn mɔ? (1) Wi nid fɔ kɔntinyu fɔ rid ɛn stɔdi di Baybul. We wi de rid di Baybul, wi nɔ fɔ jɔs lan tin dɛn bɔt Gɔd. Bifo dat, wi fɔ tray fɔ ɔndastand aw Gɔd de tink ɛn wetin i want wi fɔ du, ɛn liv wi layf di we aw i want. (Ɛfi. 5:15-17) (2) Wi nid fɔ tray fɔ gɛt strɔng fet bay we wi de tink gud gud wan bɔt di bɔku pruf dɛn we wi gɛt we de sho se Jiova lɛk wi. (3) Wi nid fɔ kɔntinyu fɔ et di tin dɛn we Jiova et ɛn avɔyd padi biznɛs wit pipul dɛn we de du dɛn tin dɛn de.​—Sam 1:1; 101:3.

14. Akɔdin to 1 Kɔrintians 10:31, wetin na sɔm tin dɛn we wi kin du ɛvride fɔ mek Jiova gladi? (Luk bak di pikchɔ dɛn.)

¹⁴ Rid 1 Kɔrintians 10:31. I impɔtant fɔ lɛ wi du tin dɛn we de mek Jiova gladi. Dis nɔ jɔs gɛt fɔ du wit fɔ prich ɛn atɛnd di mitin dɛn. Di tin dɛn we wi de du ɛvride na tin dɛn we fɔ mek Jiova gladi. Fɔ ɛgzampul, we wi ɔnɛs pan ɔl wetin wi de du ɛn du gud to ɔda pipul dɛn, wi de mek Jiova gladi. (2 Kɔr. 8:21; 9:7) I want bak lɛ wi sho se wi rili valyu di layf we i dɔn gi wi. So wi de tek tɛm wit di we aw wi de it ɛn drink, ɛn wi de du ɔda tin dɛn we go ɛp wi fɔ gɛt wɛlbɔdi. Ɛnitin we wi du fɔ mek Jiova gladi, ilɛk i luk lɛk se na smɔl tin, i de lɛk wi mɔ bikɔs ɔf dat.​—Lyuk 16:10.

15. Aw Jiova de ɛkspɛkt wi fɔ trit ɔda pipul dɛn?

¹⁵ Jiova de du gud to di wan dɛn we de du wetin rayt ɛn di wan dɛn we nɔ de du wetin rayt. (Mat. 5:45) I de ɛkspɛkt wi fɔ trit pipul dɛn da sem we de. Fɔ ɛgzampul, wi nɔ ‘fɔ tɔk bad bɔt ɛnibɔdi, wi nɔ fɔ lɛk fɔ mek plaba, ɛn wi fɔ tek tɛm du tin wit ɔlman.’ (Taytɔs 3:2) So ilɛk wi ɛn ɔda pipul dɛn nɔ biliv di sem tin, wi nɔ fɔ tink se wi bɛtɛ pas dɛn. (2 Tim. 2:23-25) Wi de go nia Jiova mɔ ɛn mɔ we wi du gud to ɔda pipul dɛn ɔltɛm ɛn trit dɛn fayn.

WI GO EBUL GO “NIA GƆD” IVIN WE WI MEK MISTEK

16. Aw di man we rayt Sam 73 bigin fɔ fil afta sɔm tɛm?

¹⁶ Bɔt wetin yu go du if afta sɔm tɛm yu bigin fɔ fil se yu nɔ fit fɔ lɛ Jiova lɛk yu? Jɔs lɛk aw wi bin dɔn tɔk, dis kayn tin bin apin to di man we rayt Sam 73. I bin tɔk se: “I lɛf smɔl mek a kɔmɔt na di rayt rod; a bin want fɔ fɔdɔm.” (Sam 73:2) I bin tɔk se in “at nɔ bin swit” ɛn i “nɔ bin de tink di rayt we,” ɛn i bin tan “lɛk wayl animal we nɔ gɛt sɛns” bifo Jiova. (Sam 73:21, 22) Fɔ se i bin fil se i nɔ gɛt op igen ɛn i nɔ fit fɔ mek Jiova lɛk am bikɔs ɔf di mistek dɛn we i bin mek?

17. (a) Wetin di man we rayt Sam 73 bin du ivin di tɛm we in at bin rili pwɛl? (b) Us lɛsin wi kin lan frɔm wetin bin apin to am? (Luk bak di pikchɔ dɛn.)

¹⁷ If di man we rayt Sam 73 bin de fil se Jiova dɔn tɔn in bak pan am, i go bi se i nɔ bin kɔntinyu fɔ fil da we de fɔ lɔng tɛm. I tan lɛk se di tɛm we in at bin rili pwɛl, i bin si se i nid fɔ go nia Gɔd mɔ ɛn mɔ, jɔs lɛk wetin i bin tɔk we i se: “Bɔt naw a de wit yu [Jiova] ɔltɛm; yu dɔn ol mi raytan. Yu de yuz yu advays fɔ gayd mi, ɛn afta dat yu go mek a gɛt glori.” (Sam 73:23, 24) Wisɛf fɔ beg Jiova fɔ gi wi trɛnk we wi de fil se wi nɔ gɛt bɛtɛ trɛnk igen ɔ we wi at pwɛl. (Sam 73:26; 94:18) Ilɛk wi mek siriɔs mistek dɛn, wi go ebul kam bak to Jiova ɛn biliv se i “rɛdi fɔ fɔgiv” wi. (Sam 86:5) Di tɛm we wi at rili pwɛl na da tɛm de wi fɔ go nia wi Gɔd mɔ ɛn mɔ.​—Sam 103:13, 14.

KƆNTINYU FƆ “DE GO NIA GƆD” SOTE GO

18. Wetin mek wi go kɔntinyu fɔ go nia Jiova sote go?

¹⁸ Wi nɔ go ɛva stɔp fɔ go nia Jiova ɛn fɔ lan bɔt am. Di Baybul tɔk se “wi nɔ ebul fɔ ɔndastand” gud gud wan di we aw Jiova de du tin, in sɛns, ɛn di tin dɛn we i no.​—Rom. 11:33.

19. Us kɔnfidɛns di Sam dɛn gi wi?

¹⁹ Sam 79:13 tɔk se: “Wi we na yu pipul dɛn ɛn we na di ship we yu de kia fɔ go tɛl yu tɛnki sote go; ɛn wi go prez yu frɔm jɛnɛreshɔn to jɛnɛreshɔn.” As yu de kɔntinyu fɔ go nia Gɔd, gɛt kɔnfidɛns se yusɛf go gɛt blɛsin dɛn we go de sote go ɛn tɔk wit kɔnfidɛns se: “Gɔd go mek a strɔng ɛn na in nɔmɔ a gɛt sote go.”—Sam 73:26.