Falamakata di Fetful Enjɛl Dɛn

1-2. (a) Us difrɛns de bitwin wi ɛn di enjɛl dɛn? (b) Aw wi ɛn di enjɛl dɛn fiba?

WE JIOVA briŋ yu kam na di trut, i invayt yu fɔ jɔyn wan famili we gɛt pipul dɛn we kɔmɔt difrɛn say dɛn, we lɛk dɛnsɛf, ɛn we de wɔship am, ɛn bɔku bɔku fetful enjɛl dɛnsɛf de pat pan dis famili. (Dan. 7:9, 10) We wi de tink bɔt enjɛl dɛn, sɔntɛm wi go tink bɔt aw dɛn difrɛn frɔm wi. Fɔ ɛgzampul, di enjɛl dɛn bin dɔn de lɔng lɔng tɛm bifo Gɔd mek mɔtalman. (Job 38:4, 7) Dɛn gɛt pawa pas wi fa fawe. Dɛn oli ɛn dɛn de du wetin rayt pas wi fa fawe bikɔs wi nɔ pafɛkt.​—Lyuk 9:26.

² Bɔt pan ɔl we wi difrɛn dɛn we dɛn ya, ɔda tin dɛn de we mek wi fiba. Fɔ ɛgzampul, wi ɛn di enjɛl dɛn ebul fɔ sho di fayn kwaliti dɛn we Jiova gɛt. Wi gɛt fridɔm fɔ du wetin wi want jɔs lɛk di enjɛl dɛn. Jɔs lɛk di enjɛl dɛn, wi gɛt nem dɛn, difrɛn abit dɛn, ɛn difrɛn wok dɛn. Ɛn jɔs lɛk di enjɛl dɛn, wi no se wi nid fɔ wɔship di Wan we mek wi.​—1 Pit. 1:12.

3. Wetin wi go lan frɔm di fetful enjɛl dɛn?

³ Bikɔs wi fiba di enjɛl dɛn bɔku we dɛn, dɛn gud ɛgzampul go ɛnkɔrej ɛn tich wi. Infakt, wi go lan bɔku fayn lɛsin dɛn frɔm dɛn. Insay dis atikul, wi go tɔk bɔt aw wi go falamakata di we aw di fetful enjɛl dɛn de put dɛnsɛf dɔŋ, aw dɛn lɛk pipul dɛn, aw dɛn de bia, ɛn aw dɛn de wok tranga wan fɔ mek di kɔngrigeshɔn klin.

DI ENJƐL DƐN DE PUT DƐNSƐF DƆŊ

4. (a) Aw di enjɛl dɛn de sho se dɛn de put dɛnsɛf dɔŋ? (b) Wetin mek di enjɛl dɛn de put dɛnsɛf dɔŋ? (Sam 89:7)

⁴ Di fetful enjɛl dɛn de put dɛnsɛf dɔŋ. Pan ɔl we dɛn gɛt ɛkspiriɛns, pawa, ɛn sɛns, dɛn de obe Jiova. (Sam 103:20) We dɛn de du dɛn wok, dɛn nɔ de ɛva bost bɔt wetin dɛn du ɔ sho dɛn pawa fɔ mek dɛn pe atɛnshɔn to dɛn. Di enjɛl dɛn de gladi fɔ du wetin Gɔd want pan ɔl we pipul dɛn nɔ ɛva no dɛn nem dɛn.a (Jɛn. 32:24, 29; 2 Kiŋ 19:35) Dɛn nɔ de gri fɔ tek di prez we Jiova fɔ gɛt. Wetin mek di enjɛl dɛn de rili put dɛnsɛf dɔŋ? Na bikɔs dɛn lɛk Jiova ɛn dɛn rili gɛt rɛspɛkt fɔ am.​—Rid Sam 89:7.

5. Aw wan enjɛl bin sho se i de put insɛf dɔŋ we i bin de kɔrɛkt apɔsul Jɔn? (Luk bak di pikchɔ.)

⁵ Lɛ wi tɔk bɔt wan ɛgzampul we sho se di enjɛl dɛn de put dɛnsɛf dɔŋ. Arawnd di ia 96 afta Krays, wan enjɛl we di Baybul nɔ sho in nem bin sho apɔsul Jɔn wan wɔndaful vishɔn. (Rɛv. 1:1) Wetin Jɔn bin du we i si di vishɔn? I bin tray fɔ wɔship di enjɛl. Bɔt wantɛm wantɛm da fetful enjɛl de bin stɔp am ɛn tɔk se: “Tek tɛm! Nɔ du dat! Mi na jɔs slev lɛk yu ɛn yu brɔda dɛn . . . Wɔship Gɔd!” (Rɛv. 19:10) Da enjɛl de bin sho se i de rili put insɛf dɔŋ! Di enjɛl nɔ bin want mek Jɔn prez am ɔ kɔle am. Wantɛm wantɛm, i bin tɛl Jɔn fɔ wɔship Jiova Gɔd. Dɔn i nɔ bin mek lɛk se i bɛtɛ pas Jɔn. Pan ɔl we di enjɛl dɔn sav Jiova fɔ lɔng lɔng tɛm ɛn i gɛt pawa pas Jɔn, i bin put insɛf dɔŋ ɛn tɔk se in na di apɔsul in kɔmpin slev. Ɛn pan ɔl we di enjɛl bin nid fɔ kɔrɛkt Jɔn, i nɔ bin tɔk to dis ol apɔsul ash wan. Bifo dat, i bin tɔk fayn to am. I go bi se di enjɛl no se Jɔn bin kɔle pasmak bikɔs ɔf wetin i si, na dat mek i tray fɔ wɔship am.

6. Aw wi go falamakata di we aw di enjɛl dɛn de put dɛnsɛf dɔŋ?

⁶ Aw wi go falamakata di we aw di enjɛl dɛn de put dɛnsɛf dɔŋ? Wisɛf go ebul du wi wok dɛn ɛn nɔ bost ɔ tray fɔ tek di prez fɔ wetin wi ebul fɔ du. (1 Kɔr. 4:7) Dɔn bak, wi nɔ fɔ fil se wi bɛtɛ pas ɔda pipul dɛn bikɔs wi dɔn de sav Jiova fɔ lɔng tɛm pas dɛn ɔ bikɔs wi gɛt patikyula wok dɛn we wi de du. Infakt, as wi de gɛt mɔ wok dɛn, na di mɔ wi fɔ si wisɛf as di wan dɛn we nɔ impɔtant pas ɔl. (Lyuk 9:48) Jɔs lɛk di enjɛl dɛn, wi want fɔ wok fɔ ɔda pipul dɛn. Wi nɔ want fɔ mek ɔda pipul dɛn tink se wi impɔtant pas dɛn.

7. Aw wi go sho se wi de put wisɛf dɔŋ we wi de kɔrɛkt ɔ advays pɔsin?

⁷ Wi go sho bak se wi na pɔsin we de put insɛf dɔŋ if wi nid fɔ kɔrɛkt ɔ advays pɔsin, i kin bi wi kɔmpin Kristian ɔ wi pikin. Sɔntɛnde, wi go nid fɔ gi pɔsin strɔng advays. Bɔt jɔs lɛk di enjɛl we bin tek tɛm fɔ kɔrɛkt Jɔn, wisɛf go ebul gi pɔsin strɔng advays ɛn nɔ mek in at pwɛl. If wi nɔ tink se wi bɛtɛ pas ɔda pipul dɛn, wi go ebul yuz di Baybul fɔ gi advays di kayn we we go sho se wi gɛt rɛspɛkt ɛn sɔri-at.​—Kol. 4:6.

DI ENJƐL DƐN LƐK PIPUL DƐN

8. (a) Akɔdin to Lyuk 15:10, aw di enjɛl dɛn de sho se dɛn lɛk pipul dɛn? (b) Wetin di enjɛl dɛn de du fɔ sɔpɔt di prichin wok? (Luk bak frɔnt pej.)

⁸ Di enjɛl dɛn nɔ jɔs de pe atɛnshɔn pan dɛn yon wok ɛn nɔ bisin bɔt mɔtalman. Dɛn lɛk pipul dɛn. Dɛn kin gladi we sina ripɛnt, dat na we wan ship we dɔn lɔs kam bak to Jiova ɔ we pɔsin chenj di we aw i de liv ɛn kam na di trut. (Rid Lyuk 15:10.) Di enjɛl dɛn bizi bak de sɔpɔt di prichin wok. (Rɛv. 14:6) Pan ɔl we nɔto dɛnsɛf sɛf de prich to pipul dɛn, dɛn kin dayrɛkt pɔblisha to pɔsin we want fɔ lan bɔt Jiova. Fɔ tru, wi nɔ go tɔk wit kɔnfidɛns se di enjɛl dɛn dayrɛkt wi to wan patikyula pɔsin. Afta ɔl, Jiova kin yuz bak in oli spirit fɔ ɛp pipul dɛn we want fɔ lan bɔt am, ɔ fɔ gayd in savant dɛn to dɛn pipul dɛn de. (Akt 16:6, 7) Bɔt stil, wi no se i de yuz in enjɛl dɛn fɔ du bɔku tin dɛn. So we wi de prich di gud nyuz, wi kin tɔk wit kɔnfidɛns se di enjɛl dɛn go rɛdi fɔ sɔpɔt wi.​—Luk di bɔks we gɛt di taytul, “Gɔd Bin Ansa Dɛn Prea Dɛn.”b

9. Aw wi go falamakata di enjɛl dɛn fɔ lɛk pipul dɛn?

⁹ Aw wi go falamakata di enjɛl dɛn fɔ lɛk pipul dɛn? We dɛn anawns se pɔsin we dɛn bin dɔn pul kɔmɔt na di kɔngrgeshɔn dɔn bak, wi fɔ gladi jɔs lɛk di enjɛl dɛn. Wi kin du wetin wi ebul fɔ wɛlkɔm di brɔda ɔ sista bak ɛn mek i no se wi lɛk am. (Lyuk 15:4-7; 2 Kɔr. 2:6-8) Wi kin falamakata di enjɛl dɛn bak we wi du ɔl wetin wi ebul fɔ du di prichin wok. (Ɛkli. 11:6) Ɛn jɔs lɛk aw di enjɛl dɛn de sɔpɔt wi fɔ prich di gud nyuz, na so wisɛf fɔ luk fɔ we dɛn fɔ sɔpɔt wi brɔda ɛn sista dɛn fɔ du di prichin wok. Fɔ ɛgzampul, fɔ se wi go ebul mek arenjmɛnt fɔ prich wit pɔblisha we nɔ gɛt bɛtɛ ɛkspiriɛns? Fɔ se wi go ebul sɔpɔt brɔda ɛn sista dɛn we dɔn ol ɔ we sik fɔ mek dɛn go ebul fɔ du di prichin wok?

10. Wetin wi lan frɔm Sera in ɛkspiriɛns?

¹⁰ Wetin wi go du if di tin dɛn we de apin to wi de mek wi nɔ ebul du wetin wi want fɔ du fɔ Jiova? Wi kin stil fɛn we dɛn fɔ wok wit di enjɛl dɛn fɔ du di prichin wok. Lɛ wi tɔk bɔt wan sista we nem Serac we de na India in ɛkspiriɛns. Afta Sera dɔn payɔnia fɔ lɛk 20 ia, i bin sik siriɔs wan ɛn nɔ ebul fɔ kɔmɔt na bed. In at bin rili pwɛl ɛn i nɔmal fɔ fil da we de. Bɔt smɔl smɔl, Sera bin ebul fɔ gɛt gladi-at bak bikɔs di brɔda ɛn sista dɛn na in kɔngrigeshɔn bin de ɛp am ɛn i bin de rid di Baybul ɔltɛm. Bikɔs ɔf di tin we dɔn apin to am, i bin nid fɔ fɛn nyu we dɛn fɔ prich. Na tɛlifon nɔmɔ i bin ebul yuz fɔ prich, bikɔs i nɔ bin ivin ebul fɔ sidɔm fɔ rayt lɛta. So i bin de kɔl in ritɔn visit dɛn, ɛn dɛn bin de tɛl am bɔt ɔda pipul dɛn we go want fɔ lan bɔt Jiova. Wetin bin apin? Afta sɔm mɔnt, Sera bin gɛt 70 Baybul stɔdi dɛn ɛn in wan nɔ bin ebul fɔ stɔdi dɛn ɔl! So i bin arenj fɔ mek ɔda brɔda ɛn sista dɛn ɛp fɔ stɔdi sɔm pan di pipul dɛn. Bɔku pan di studɛnt dɛn de atɛnd di mitin dɛn naw. Di enjɛl dɛn kin gladi fɔ wok wit brɔda ɛn sista dɛn lɛk Sera we de du ɔl wetin dɛn ebul fɔ du di prichin wok!

DI ENJƐL DƐN DE SHO SE DƐN DE BIA

11. Aw di fetful enjɛl dɛn dɔn sho se dɛn de rili bia?

¹¹ Di fetful enjɛl dɛn de sɛt fayn ɛgzampul fɔ bia. Fɔ lɔng tɛm, dɛn dɔn de bia we bad tin dɛn de apin ɛn we dɛn nɔ de trit pipul dɛn fia wan. Dɛn bin si we Setan ɛn bɔku ɔda enjɛl dɛn we dɛn ɔl bin de sav Jiova togɛda tɔn agens Jiova. (Jɛn. 3:1; 6:1, 2; Jud 6) Di Baybul tɔk bɔt wan fetful enjɛl we wan pawaful dimɔn bin fɛt wit. (Dan. 10:13) Dɔn bak, frɔm we Gɔd mek mɔtalman, di enjɛl dɛn dɔn si se di wan dɛn we de disayd fɔ wɔship Jiova di rayt we nɔ bɔku. Bɔt pan ɔl dat, dɛn fetful enjɛl dɛn ya de kɔntinyu fɔ sav Jiova wit gladi-at ɛn zil. Dɛn no se we di rayt tɛm rich, Gɔd go pul ɔl di wan dɛn we nɔ de trit dɛn kɔmpin dɛn fia wan.

12. Wetin go ɛp wi fɔ bia?

¹² Aw wi go falamakata di enjɛl dɛn fɔ bia? Jɔs lɛk di enjɛl dɛn, sɔntɛm wi go si we pipul dɛn nɔ de trit dɛn kɔmpin dɛn fia wan ɔ dɛn go de agens wi. Bɔt jɔs lɛk di enjɛl dɛn, wisɛf biliv se we di rayt tɛm rich, Gɔd go pul ɔl di bad tin dɛn we de apin. So, jɔs lɛk di fetful enjɛl dɛn, “wi nɔ [de] giv-ɔp fɔ du wetin fayn.” (Gal. 6:9) Ɛn Gɔd dɔn prɔmis wi se i go ɛp wi fɔ bia. (1 Kɔr. 10:13) Wi kin pre to Jiova fɔ in spirit we go mek wi peshɛnt ɛn gɛt gladi-at. (Gal. 5:22; Kol. 1:11) Wetin yu go du we pipul dɛn de agens yu? Abop pan Jiova wit ɔl yu at ɛn nɔ fred. Jiova go sɔpɔt yu ɛn gi yu di trɛnk we yu nid ɔltɛm.​—Ibru. 13:6.

DI ENJƐL DƐN DE ƐP FƆ KLIN DI KƆNGRIGESHƆN

13. Us spɛshal wok di enjɛl dɛn gɛt insay dis las dez? (Matyu 13:47-49)

¹³ Insay dis las dez, Jiova dɔn gi di enjɛl dɛn spɛshal wok. (Rid Matyu 13:​47-49.) Bɔku pipul dɛn ɔlsay na di wɔl want fɔ yɛri di gud nyuz. Sɔm pan dɛn pipul dɛn ya de du tin dɛn we go mek dɛn bi tru Kristian, bɔt di ɔda wan dɛn nɔ de du dat. Gɔd dɔn gi di enjɛl dɛn di wok fɔ “put di wikɛd wan dɛn wansay ɛn put di wan dɛn we de du wetin rayt ɔdasay.” Dat min se na dɛn gɛt di wok fɔ ɛp fɔ mek di kɔngrigeshɔn klin. Dis nɔ min se ɔl di wan dɛn we dɔn stɔp fɔ wɔship Jiova wit wi nɔ go ɛva kam bak ilɛk wetin mek dɛn stɔp. I nɔ min bak se prɔblɛm dɛn nɔ go ɛva de na di kɔngrigeshɔn. Bɔt wi shɔ se di enjɛl dɛn de wok tranga wan fɔ ɛp fɔ mek di kɔngrigeshɔn klin.

14-15. Aw wi go falamakata di enjɛl dɛn fɔ sho se wi want fɔ ɛp fɔ mek di kɔngrigeshɔn klin? (Luk bak di pikchɔ dɛn.)

¹⁴ Aw wi go falamakata di enjɛl dɛn fɔ sho se wi want fɔ ɛp fɔ mek di kɔngrigeshɔn klin? Wi go du dat bay we wi du wetin wi ebul fɔ mek di kɔngrigeshɔn klin. Fɔ mek wi go ebul ɛp fɔ klin di kɔngrigeshɔn, wi fɔ tray tranga wan fɔ protɛkt wi at bay we wi de pik padi dɛn we lɛk Jiova ɛn avɔyd ɛnitin we go ambɔg wi padi biznɛs wit am. (Sam 101:3) Wi kin ɛp wi kɔmpin Kristian dɛn bak fɔ kɔntinyu fɔ fetful to Jiova. Fɔ ɛgzampul, wetin wi fɔ du if wi no se wi kɔmpin Kristian dɔn kɔmit siriɔs sin? Wi go ɛnkɔrej di pɔsin fɔ tɔk to di ɛlda dɛn bikɔs wi lɛk am. If i nɔ gri fɔ tɔk to di ɛlda dɛn, wi kin tɔk to dɛn. Wi want fɔ ɛp wi kɔmpin Kristian we dɔn pwɛl in padi biznɛs wit Jiova fɔ gɛt di ɛp we i nid kwik kwik wan!—Jems 5:14, 15.

¹⁵ I sɔri fɔ no se dɛn kin pul di wan dɛn we kɔmit siriɔs sin kɔmɔt na di kɔngrigeshɔn. We dis kayn tin apin, wi kin “lɛf fɔ kip kɔmpin” wit dɛn.d (1 Kɔr. 5:9-13) Dis arenjmɛnt de ɛp fɔ mek di kɔngrigeshɔn kɔntinyu fɔ klin. Dɔn bak, we wi disayd nɔ fɔ kip kɔmpin wit di wan dɛn we dɛn dɔn pul kɔmɔt na di kɔngrigeshɔn, wi de sho se wi rili lɛk dɛn. We wi tray tranga wan fɔ du wetin di Baybul se, sɔntɛm dat go ɛp dɛn fɔ kam bak to Jiova. If dɛn kam bak, wi go jɔyn Jiova ɛn in enjɛl dɛn fɔ gladi.​—Lyuk 15:7.

16. Us we dɛn yu go tray tranga wan fɔ falamakata di enjɛl dɛn?

¹⁶ Na big big ɔnɔ wi gɛt fɔ mek Jiova alaw wi fɔ lan bɔt di enjɛl dɛn ɛn wok wit dɛn! Lɛ wi falamakata di fayn kwaliti dɛn we dɛn gɛt, lɛk: di put we dɛn de put dɛnsɛf dɔŋ, di lɛk we dɛn lɛk pipul dɛn, di bia we dɛn de bia, ɛn we dɛn want fɔ mek di kɔngrigeshɔn klin. If wi falamakata di fetful enjɛl dɛn, wisɛf go de pat pan Jiova in famili we de wɔship am sote go.