“Na Jiova Gɛt di Fɛt”

Insay 1999, di gɔvmɛnt na Frans bin se wi branch ɔfis na Frans fɔ pe taks frɔm di doneshɔn dɛn we dɛn bin dɔn de gɛt frɔm 1993 to 1996. Dɛn nɔ bin jɔj di kes fia wan na Frans. Wi bin tray fɔ apil bikɔs ɔf wetin dɛn disayd, bɔt na di sem ansa dɛn gi wi ɛn di gɔvmɛnt bin tek 4.5 milyɔn yuro ($6,300,000 U.S.) frɔm di branch in bank akawnt. Di wangren chans we wi bin gɛt fɔ gɛt di mɔni bak na fɔ go wit wi kes na di European Court of Human Rights (ECHR). Bifo di kɔt sidɔm pan wi kes, dɛn bin disayd fɔ lɛ wi ɛn di gɔvmɛnt lɔya dɛn atɛnd wan mitin bifo wan pan di Kɔt rɛjistra dɛn, dat na di wan dɛn we de wok na di Kɔt fɔ lisin to di kes ɛn si aw wi go sɛtul am so dat di kes nɔ go go na Kɔt.

Wi bin de ɛkspɛkt se di rɛjistra go tɛl wi fɔ pe sɔm pan di mɔni we di gɔvmɛnt se wi fɔ pe fɔ sɔlv di prɔblɛm. Bɔt wi bin ɔndastand klia wan se if wi ivin pe 1 yuro wi go dɔn go agens Baybul prinsipul. Di brɔda ɛn sista dɛn gi dɛn kɔntribyushɔn dɛn de fɔ sɔpɔt di prichin wok, so nɔto di gɔvmɛnt gɛt am. (Mat. 22:21) Bɔt stil, wi bin atɛnd di mitin fɔ sho se wi gɛt rɛspɛkt fɔ di lɔ dɛn na di European Court.

Wi bin gɛt di mitin fɔ tɔk bɔt di kes na wan pan di fayn kɔnfrɛns rum dɛn na di Kɔt. Di mitin nɔ stat fayn. We di rɛjistra stat fɔ tɔk, i bin se i de ɛkspɛkt se Jiova Witnɛs dɛn na Frans fɔ pe sɔm pan di taks we di gɔvmɛnt se dɛn fɔ pe. Jiova in spirit bin muv wi fɔ aks am se, “Yu no se di gɔvmɛnt dɔn ɔlrɛdi siz pas 4.5 milyɔn yuro frɔm wi bank akawnt?”

Ɔlman si se i bin shɔk. We di gɔvmɛnt lɔya dɛn tɔk se na so di gɔvmɛnt du, dat bin rili chenj di we aw di rɛjistra si di kes. I tɔk pan dɛn ɛn ɛnd di mitin wantɛm wantɛm. Na da tɛm de a no se na Jiova bin chenj ɔltin di we aw wi nɔ bin de ɛva ɛkspɛkt fɔ mek wi go win di kes. Wi bin rili gladi we wi kɔmɔt na di mitin, ɛn i bin at fɔ biliv wetin dɔn apin.

Insay Jun 30, 2011, di ECHR bin kam togɛda ɛn disayd se na wi gɛt rayt. Di Kɔt tɔk se di taks nɔ ligal ɛn tɛl di gɔvmɛnt fɔ gi bak di mɔni we dɛn bin dɔn siz, ɛn ad intrɛst pantap. Dis impɔtant Kɔt kes dɔn de protɛkt tru wɔship na Frans te to tide. Di kwɛstyɔn we wi nɔ bin no se wi go aks bin tan lɛk di ston we kil Golayat. Wetin bin mek wi win? Na bikɔs jɔs lɛk aw Devid bin tɛl Golayat, “na Jiova gɛt di fɛt.”—1 Sam. 17:​45-47.

Dis nɔto di fɔstɛm we wi dɔn win kes. Pan ɔl we pawaful gɔvmɛnt dɛn ɛn rilijɔn dɛn de agens wi, wi dɔn win 1,225 kes dɛn na di kɔt dɛn we ay pas ɔl na 70 kɔntri dɛn ɛn intanashɔnal kɔt dɛn. Dɛn kes dɛn ya we wi dɔn win de protɛkt di rayt dɛn we wi gɛt, lɛk di rayt fɔ de as rilijɔs grup, fɔ prich na pɔblik, nɔ fɔ put an pan sɛrimɔni dɛn lɛk fɔ siŋ di nashɔnal antɛm ɔ fɔ salut di kɔntri flag, ɛn nɔ fɔ tek blɔd.

Aw a bin kam fɔ de pat pan wan kɔt kes na Yurop pan ɔl we a de wok na Jiova Witnɛs dɛn Wɔl Ɛdkwata na Nyu Yɔk, insay Amɛrika?

MI MAMA ƐN PAPA BIN GƐT ZIL FƆ PRICH LƐK MISHƆNARI

Mi mama ɛn papa we na Jɔj ɛn Lusil bin gradyuet na di 12 klas na Giliad ɛn dɛn bin de sav na Itiopia we dɛn bɔn mi insay 1956. Dɛn gi mi Filip in nem, we na pɔsin we bin gɛt zil fɔ prich insay di fɔstɛm Kristian dɛn tɛm. (Akt 21:8) Insay di nɛks ia, di gɔvmɛnt bin ban wi wɔship. Pan ɔl we a bin smɔl, a mɛmba klia wan se mi famili bin de ayd fɔ wɔship Jiova. As pikin, a bin tink se na fayn tin! Bɔt i sɔri fɔ no se di gɔvmɛnt bin fos wi fɔ kɔmɔt na di kɔntri insay 1960.

We wi bin transfa na Wichita, Kansas, insay Amɛrika, mi mama ɛn papa bin stil gɛt di zil we dɛn bin gɛt as mishɔnari fɔ du di prichin wok. Dɛn bin tich mi, mi big sista we na Judi, ɛn mi smɔl brɔda we na Lɛsli, fɔ lɛk Jiova ɛn sav am wit ɔl wi at. Na Itiopia dɛn bin bɔn Judi ɛn Lɛsli bak. A bin baptayz we a ol 13 ia. Afta tri ia, wi famili bin transfa usay dɛn bin nid mɔ pipul dɛn fɔ prich na Arikipa, insay Peru.

Insay 1974 we a bin jɔs ol 18 ia, di branch na Peru bin sɛn mi ɛn 4 ɔda brɔda dɛn as spɛshal payɔnia dɛn. Dɛn bin sɛn wi fɔ prich na tɛritri dɛn we dɛn nɔ prich yet, ɔp na di Sɛntral Andis Mawntin dɛn. Dat min se wi fɔ prich to di lokal pipul dɛn we de tɔk Kɛchwa ɛn Aymara langwej dɛn. Wi bin de travul insay motoka we wi bin de yuz as wi os we wi bin de kɔl Di Ak bikɔs i gɛt bɔks shep. A lɛk fɔ tink bɔt di tɛm dɛn we a bin de yuz di Baybul fɔ sho di lokal pipul dɛn se i nɔ go te igen Jiova go pul po, sik, ɛn day. (Rɛv. 21:​3, 4) Bɔku pipul dɛn bin disayd fɔ sav Jiova.

A BIGIN FƆ WOK NA WƆL ƐDKWATA

Insay 1977, we Albat Shroda we na wan pan di Gɔvnin Bɔdi mɛmba fɔ Jiova Witnɛs dɛn go waka na Peru, i bin ɛnkɔrej mi fɔ aplay fɔ wok na Bɛtɛl na wɔl ɛdkwata. Ɛn na dat a bin du. Shɔt tɛm afta dat, insay Jun 17, 1977 a bigin fɔ wok na Bɛtɛl insay Bruklin. Fɔ 4 ia, a bin de wok na di Klinin ɛn Mɛntenans dipatmɛnt dɛn.

Insay Jun 1978, a mit Ilizabɛt Avalɔn na wan intanashɔnal kɔnvɛnshɔn na Nyu Ɔlins insay Luiziana. Insɛf bin gɛt mama ɛn papa we bin de sav Jiova wit ɔl dɛn at. Ilizabɛt bin dɔn de rɛgyula payɔnia fɔ 4 ia, ɛn i bin want fɔ kɔntinyu fɔ sav Jiova ful-taym. Wi bin de tɔk ɛn wi bin kam fɔ sabi wisɛf mɔ, ɛn wi bin rili lɛk wisɛf. Wi mared insay Ɔktoba 20, 1979, ɛn wi ɔltu bigin fɔ wok na Bɛtɛl.

Di brɔda ɛn sista dɛn na wi fɔs kɔngrigeshɔn na Bruklin Spanish bin lɛk wi. Insay di ia dɛn we dɔn pas, wi dɔn de na tri ɔda kɔngrigeshɔn dɛn usay di brɔda ɛn sista dɛn dɔn sho se dɛn lɛk wi ɛn ɛnkɔrej wi fɔ kɔntinyu fɔ wok na Bɛtɛl. Wi gladi fɔ ɔl di tin dɛn we dɛn bin du fɔ wi, ɛn di sɔpɔt we wi padi dɛn ɛn fambul dɛn bin de sɔpɔt wi fɔ kia fɔ wi mama ɛn papa dɛn we dɛn ol.

A LAN FƆ FƐT KES DƐN NA KƆT

Insay Janwari 1982, a bin sɔprayz we dɛn tɛl mi fɔ bigin wok na di Ligal Dipatmɛnt na Bɛtɛl. Afta tri ia, dɛn bin sɛn mi na lɔ skul ɛn a bin gɛt laysin fɔ bi lɔya. Dɛn tɛm dɛn de we a bin de stɔdi bɔt lɔ, a bin rili sɔprayz fɔ lan se pipul dɛn na Amɛrika ɛn ɔda kɔntri dɛn gɛt fridɔm fɔ du bɔku tin dɛn bikɔs ɔf di kes dɛn we Jiova Witnɛs dɛn dɔn win na kɔt. Dɛn bin de tɔk mɔ bɔt dɛn impɔtant kes dɛn ya na klas.

Insay 1986 we a ol 30 ia, dɛn bin pik mi fɔ bi ovasia fɔ di Ligal Dipatmɛnt. Bikɔs a bin rili yɔŋ ɛn a nɔ bin ɔndastand gud gud wan di kayn wok we a bin gɛt fɔ du, a bin gladi ɛn a bin de wɔri.

A bin kwalifay fɔ bi lɔya insay 1988, bɔt a nɔ bin no aw di lɔ kɔz we a du dɔn afɛkt mi ɛn mi padi biznɛs wit Jiova. Fɔ lan bɔku buk kin mek pɔsin prawd ɛn fil se i impɔtant pas ɔda pipul dɛn we nɔ lan buk lɛk am. Bɔt Ilizabɛt bin ɛp mi. I bin ɛp mi fɔ bigin du di tin dɛn we a bin de du bifo a go lɔ skul fɔ gɛt tayt padi biznɛs wit Jiova bak. I bin tek sɔm tɛm, bɔt a bin ebul fɔ gɛt tayt padi biznɛs wit Jiova bak. Frɔm wetin apin to mi, a dɔn lan se fɔ lan bɔku buk nɔto di tin we impɔtant pas ɔl na layf. Di tin we go mek pɔsin in layf rili gɛt valyu na we i gɛt tayt padi biznɛs wit Jiova, ɛn we i lɛk Jiova ɛn in pipul dɛn.

TINAP FƆ DI GUD NYUZ ƐN YUZ DI LƆ FƆ GƐT RAYT FƆ PRICH DI GUD NYUZ

Afta a dɔn mi kɔz na lɔ skul, a bin pe atɛnshɔn mɔ fɔ ɔganayz tin dɛn na di ligal dipatmɛnt na Bɛtɛl ɛn fɔ protɛkt Jiova in ɔganayzeshɔn ɛn di rayt we wi gɛt fɔ prich di gud nyuz. A bin gladi fɔ di wok we a bin de du, bɔt i nɔ izi ɔltɛm bikɔs tin dɛn de chenj kwik kwik wan na di ɔganayzeshɔn. Fɔ ɛgzampul, insay dɛn 1990, dɛn bin tɛl di Ligal Dipatmɛnt fɔ ɛp wit infɔmeshɔn dɛn we go ɛp di ɔganayzeshɔn fɔ no aw fɔ chenj di arenjmɛnt we bin de fɔ aks pipul dɛn fɔ gi kɔntribyushɔn fɔ wi pɔblikeshɔn dɛn. Afta dat, Jiova Witnɛs dɛn bigin gi pipul dɛn pɔblikeshɔn dɛn fɔ fri. Dis bin ɛp fɔ ridyus di wok na Bɛtɛl ɛn fɔ di wan dɛn we de prich, ɛn te naw dis dɔn mek dɛn nɔ de aks wi fɔ pe taks. Sɔm pipul dɛn bin tink se dis chenj go mek wi nɔ gɛt bɛtɛ mɔni ɛn ambɔg di prichin wok. Bɔt dat nɔ bin apin. Di pipul dɛn we dɔn de sav Jiova frɔm 1990 dɔn dɔbul, ɛn tide pipul dɛn ebul fɔ gɛt wi pɔblikeshɔn dɛn fɔ lan bɔt Jiova fɔ fri. A dɔn si se di wangren rizin we mek di big chenj dɛn we di ɔganayzeshɔn dɔn mek kɔmɔt fayn na bikɔs ɔf Jiova in ɛp ɛn di dayrɛkshɔn we wi de gɛt frɔm di fetful slev.—Ɛks. 15:2; Mat. 24:45.

Wi nɔ de win kes dɛn na kɔt jɔs bikɔs wi gɛt gud lɔya dɛn. Bɔku tɛm, di tin we de mek di jɔj dɛn ɛn ɔda gɔvmɛnt wokman dɛn tɔk fɔ wi na bikɔs ɔf di fayn we aw Jiova in pipul dɛn de biev. A bin si ɛgzampul we sho se dis na tru insay 1998 we tri Gɔvnin Bɔdi mɛmba dɛn ɛn dɛn wɛf dɛn bin atɛnd kɔnvɛnshɔn dɛn na Kyuba we bin spɛshal. Dɛn bin de biev fayn ɛn sho rɛspɛkt fɔ pipul dɛn, ɛn dis bin ɛp di gɔvmɛnt wokman dɛn fɔ si klia wan se wi nɔ miks pan pɔlitiks. Dɛn bin notis dis mɔ pas wetin wi bin de tɔk na di mitin dɛn.

Bɔt sɔntɛnde, di wangren we fɔ sɔlv prɔblɛm dɛn we gɛt sɔntin fɔ du wit di lɔ, na fɔ go na kɔt ɛn “tinap fɔ di gud nyuz ɛn yuz di lɔ fɔ gɛt rayt fɔ prich di gud nyuz.” (Fil. 1:7) Fɔ ɛgzampul, fɔ lɔng tɛm di gɔvmɛnt na Yurop ɛn Sawt Koria nɔ bin gri se di brɔda dɛn gɛt rayt fɔ disayd nɔ fɔ bi soja. Bikɔs ɔf dat, na lɛk 18,000 brɔda dɛn na Yurop ɛn i pas 19,000 brɔda dɛn na Sawt Koria we dɛn dɔn put na prizin bikɔs dɛn kɔnshɛns nɔ alaw dɛn fɔ bi soja.

Faynali, insay Julay 7, 2011, di ECHR bin kɔt di kes bitwin Bayatyan ɛn Amenia, ɛn dɛn bin disayd se di gɔvmɛnt fɔ alaw pipul dɛn ɔlsay na Yurop fɔ du ɔda wok dɛn if dɛn kɔnshɛns nɔ alaw dɛn fɔ bi soja. Di Sawt Korian Kɔnstityushɔnal Kɔt bin disayd fɔ du di sem tin insay Jun 28, 2018. Wi nɔ fɔ dɔn ebul win ɛni wan pan dɛn kes dɛn ya if sɔm pan wi yɔŋ brɔda dɛn bin fred ɛn du wetin di gɔvmɛnt want dɛn fɔ du.

Di ligal dipatmɛnt na wɔl ɛdkwata ɛn ɔda branch ɔfis dɛn ɔlsay na di wɔl de wok tranga wan fɔ tinap fɔ di rayt we wi gɛt fɔ wɔship Jiova ɛn fɔ prich bɔt di Kiŋdɔm. Wi gladi fɔ di ɔnɔ we wi gɛt fɔ tɔk fɔ wi brɔda ɛn sista dɛn we di gɔvmɛnt de agens dɛn. Ilɛk wi win ɔ wi nɔ win kes na kɔt, wi de gɛt chans fɔ prich to gɔvnɔ ɛn kiŋ dɛn na di neshɔn. (Mat. 10:18) Di jɔj dɛn, gɔvmɛnt wokman dɛn, di midia, ɛn ɔlman fɔ yuz di skripchɔ dɛn we wi kin tɔk bɔt na ɔl di dɔkyumɛnt dɛn we wi kin yuz na kɔt ɛn wetin wi kin tɔk fɔ sɔpɔt wi kes. Dis kin mek sɔm pipul dɛn want fɔ lan mɔ bɔt Jiova Witnɛs dɛn ɛn wetin dɛn biliv. Sɔm pan dɛn pipul dɛn ya dɔn bi wi brɔda ɛn sista dɛn.

JIOVA TƐNKI!

I dɔn pas 40 ia we a gɛt di ɔnɔ fɔ wok wit branch ɔfis dɛn ɔlsay na di wɔl we dɛn gɛt kɔt kes dɛn ɛn fɔ tinap bifo bɔku ay kɔt dɛn ɛn impɔtant gɔvmɛnt wokman dɛn. A lɛk mi kɔmpin wokman dɛn na di Ligal Dipatmɛnt na wɔl ɛdkwata ɛn di ligal dipatmɛnt dɛn we de ɔlsay na di wɔl, ɛn a kin kɔle dɛn. A satisfay wit di we aw a dɔn liv mi layf ɛn a dɔn gɛt bɔku blɛsin dɛn.

I dɔn pas 45 ia we mi wɛf Ilizabɛt dɔn de wit mi ɛn de sɔpɔt mi di tɛm dɛn we tin fayn ɛn we tin tranga. A lɛk am bikɔs pan ɔl we i gɛt sik we de mek i nɔ gɛt bɛtɛ trɛnk, i stil de sɔpɔt mi.

Wi dɔn si fɔ wisɛf se nɔto bikɔs ɔf wetin wi sabi go mek wi gɛt trɛnk ɛn ebul fɔ du tin dɛn. Bɔt jɔs lɛk wetin Devid bin se, na “Jiova de gi trɛnk to in pipul dɛn.” (Sam 28:8) Fɔ tru, “na Jiova gɛt di fɛt.”