Yu Go Stil Ebul Bɛnifit Frɔm di Tin dɛn we Yu Bin Dɔn Lan na di Baybul?

1. Aw di tin dɛn we di Baybul de tich bin afɛkt yu di fɔstɛm we yu lan di trut?

DI MEN tin dɛn we di Baybul de tich dɔn chenj wi layf. Fɔ ɛgzampul, we wi bin lan se Gɔd in nem na Jiova, wi bigin fɔ du tin dɛn we go mek wi bi in padi. (Ayz. 42:8) We wi lan di tru bɔt wetin kin apin to pɔsin we dɔn day, wi nɔ bin de wɔnda igen if di wan dɛn we wi lɛk we dɔn day de sɔfa. (Ɛkli. 9:10) Ɛn we wi lan se Gɔd dɔn prɔmis fɔ mek dis wɔl bi Paradays, wi nɔ bin de wɔri igen bɔt wetin go apin to wi tumara bambay. Wi bin gɛt kɔnfidɛns se wi nɔ go jɔs liv fɔ shɔt tɛm, lɛk 70 ɔ 80 ia, bɔt wi go liv sote go.—Sam 37:29; 90:10.

2. Aw 2 Pita 1:​12, 13 sho se ivin machɔ Kristian dɛn kin bɛnifit frɔm di men tin dɛn we di Baybul de tich?

² Wi nɔ fɔ ɛva fɔgɛt aw di men tin dɛn we di Baybul de tich rili impɔtant. Tink bɔt di Kristian dɛn we apɔsul Pita bin rayt in sɛkɔn lɛta to. Dɛn bin “tinap tranga wan na di trut.” (Rid 2 Pita 1:​12, 13.) Bɔt da tɛm de, wikɛd pipul dɛn bin de na di kɔngrigeshɔn we bin de tich lay lay tin dɛn fɔ mek di brɔda ɛn sista dɛn kɔmɔt na di trut. (2 Pit. 2:​1-3) Pita bin want fɔ ɛp in brɔda ɛn sista so dat dɛn go protɛkt dɛnsɛf frɔm dɛn lay lay tin dɛn de we dɛn bin de tich. Fɔ du dat, i mɛmba dɛn bɔt sɔm pan di tin dɛn we dɛn bin dɔn ɔlrɛdi lan. Dɛn tin dɛn ya we dɛn bin dɔn lan go ɛp dɛn fɔ kɔntinyu fɔ fetful to Jiova.

3. Wetin mek ɔl Kristian dɛn fɔ kɔntinyu fɔ de tink gud gud wan bɔt di men tin dɛn we di Baybul de tich? Gi ɛgzampul.

³ As wi de bi machɔ Kristian, wi go ebul lan nyu lɛsin dɛn frɔm di men tin dɛn we di Baybul de tich. Fɔ ɛgzampul, mama we rili sabi kuk ɛn in galpikin kin yuz di sem tin dɛn we dɛn kin yuz fɔ kuk plasas. Bɔt bikɔs di mama dɔn de kuk fɔ lɔng tɛm, i dɔn lan aw fɔ yuz dɛn tin dɛn de difrɛn we dɛn fɔ mek nyu ɛn swit it. Semweso, Jiova in savant dɛn we dɔn de sav am fɔ lɔng tɛm ɛn nyu Baybul studɛnt dɛn kin lan difrɛn lɛsin dɛn frɔm di men tin dɛn we di Baybul de tich. Di tin dɛn we de apin to wi ɔ di wok dɛn we wi de du na di kɔngrigeshɔn go dɔn chenj frɔm we wi baptayz. We wi aplay di tin dɛn we wi bin dɔn lan trade to wetin de apin to wi naw, wi kin lan nyu we dɛn we dɛn go ɛp wi. Lɛ wi tɔk bɔt wetin machɔ Kristian dɛn kin lan frɔm tri men tin dɛn we di Baybul de tich.

NA JIOVA MEK ƆLTIN

4. We wi lan se na Jiova mek ɔltin, aw dat bin afɛkt wi?

⁴ “Di wan we mek ɔltin na Gɔd.” (Ibru. 3:4) Wi no se na Pɔsin we gɛt sɛns ɛn pawa pas ɔlman mek di wɔl ɛn ɔltin we gɛt layf we de de. Na in mek wi, so i sabi wi gud gud wan. Pantap dat, i bisin bɔt wi. I no wetin gud fɔ wi. Bikɔs wi no se na Jiova mek ɔltin, dat dɔn rili chenj wi layf difrɛn we dɛn ɛn i dɔn mek wi layf gɛt rial minin.

5. Us tru tin go ɛp wi fɔ put wisɛf dɔŋ? (Ayzaya 45:​9-12)

⁵ Bikɔs wi dɔn lan di tru se na Jiova mek ɔltin, dat de tich wi se wi fɔ put wisɛf dɔŋ. Afta Job pe tumɔs atɛnshɔn to insɛf ɛn ɔda pipul dɛn, Jiova bin mɛmba am se na In na di ɔlmayti, di Pɔsin we mek ɔltin. (Job 38:​1-4) Dis bin ɛp Job fɔ no se di we aw Gɔd de du tin pas di we aw mɔtalman de du tin fa fawe. Prɔfɛt Ayzaya bin rayt sɔntin we gri wit dis. I bin rayt se: “Fɔ se di kle fɔ aks di Pɔsin we de wok wit kle se: ‘Wetin yu de mek?’”—Rid Ayzaya 45:​9-12.

6. Ustɛm mɔ i go fayn fɔ mek wi tink bɔt di sɛns ɛn pawa we Jiova gɛt? (Luk bak di pikchɔ dɛn.)

⁶ If pɔsin dɔn de sav Jiova fɔ lɔng tɛm, sɔntɛm i go bigin fɔ abop pan di we aw i de tink ɛn nɔ abop pan Jiova ɛn In Wɔd fɔ gayd am. (Job 37:​23, 24) Bɔt wetin go apin if pɔsin tink gud gud wan bɔt di kayn sɛns ɛn pawa we di Wan we mek wi gɛt we wi nɔ go kɔmpia to ɛnibɔdi? (Ayz. 40:22; 55:​8, 9) Dis tru tin we i dɔn lan na di Baybul go ɛp am fɔ kɔntinyu fɔ put insɛf dɔŋ ɛn nɔ abop pan in yon sɛns.

7. Wetin Reila bin du fɔ fala dayrɛkshɔn?

⁷ Reila we de na Slovenia, dɔn si se we i de tink bɔt di Wan we mek am, dat dɔn ɛp am fɔ ajɔst to di chenj dɛn we di ɔganayzeshɔn de mek. I tɔk se: “Sɔntɛnde, i nɔ bin izi fɔ mek a ajɔst to di chenj dɛn we di wan dɛn we de bifo bin de mek. Fɔ ɛgzampul, ivin afta a bin dɔn wach di 2023 Gɔvnin Bɔdi Ɔpdet #8, a bin stil shɔk di fɔs tɛm we a si brɔda we gɛt biabia de gi tɔk. So a bin pre to Jiova fɔ ɛp mi fɔ ajɔst to dis chenj.” Reila bin kam fɔ si se bikɔs na Jiova mek di ɛvin ɛn di wɔl, i ebul fɔ gayd in ɔganayzeshɔn di rayt we. If i nɔ izi fɔ yu fɔ ajɔst to di nyu we aw di ɔganayzeshɔn ɔndastand Baybul tichin ɔ fɔ gri fɔ fala nyu dayrɛkshɔn, yu nɔ tink se i go fayn fɔ put yusɛf dɔŋ ɛn tink gud gud wan bɔt di kayn sɛns ɛn pawa we di Wan we mek wi gɛt?—Rom. 11:​33-36.

WETIN MEK GƆD DE ALAW MƆTALMAN FƆ SƆFA?

8. Aw wi dɔn bɛnifit we wi dɔn lan wetin mek Gɔd de alaw mɔtalman fɔ sɔfa?

⁸ Wetin mek Gɔd de alaw mɔtalman fɔ sɔfa? Sɔm pipul dɛn we nɔ ebul fɔ gɛt ansa to da kwɛstyɔn de dɔn vɛks pan Gɔd ɔ tink se Gɔd nɔ de atɔl. (Prɔv. 19:3) Bɔt yu dɔn lan se nɔto Jiova de mek pipul dɛn de sɔfa, bɔt na bikɔs dɛn bɔn wi wit sin ɛn di pafɛkt we wi nɔ pafɛkt na dat de mek pipul dɛn de sɔfa. Yu dɔn lan bak se bikɔs Jiova peshɛnt dat dɔn mek bɔku bɔku pipul dɛn dɔn kam fɔ no am ɛn si fɔ dɛnsɛf aw Jiova go mek mɔtalman lɛf fɔ sɔfa. (2 Pit. 3:​9, 15) Dɛn tru tin dɛn ya dɔn kɔrej yu ɛn ɛp yu fɔ gɛt tayt padi biznɛs wit Jiova.

9. Ustɛm dɛn i go fayn fɔ mek wi tink bɔt di rizin dɛn we mek Jiova de alaw mɔtalman fɔ sɔfa?

⁹ Wi no se wi nid fɔ peshɛnt as wi de wet fɔ di tɛm we Jiova go mek mɔtalman lɛf fɔ sɔfa. Bɔt we wi ɔ di wan dɛn we wi lɛk gɛt prɔblɛm, ɔ we dɛn nɔ trit wi ɔ di wan dɛn we wi lɛk fia wan, ɔ we pɔsin we wi lɛk day, sɔntɛm dat go mek wi wɔnda wetin mek Jiova nɔ de du sɔntin wantɛm wantɛm. (Aba. 1:​2, 3) We dis kayn tin apin, i go fayn fɔ mek wi tink bɔt di rizin dɛn we mek Jiova de alaw di wan dɛn we de du wetin rayt fɔ sɔfa.a (Sam 34:19) Wi kin tink bak bɔt aw Gɔd want fɔ mek mɔtalman lɛf fɔ sɔfa.

10. We An in mama day, wetin bin ɛp am fɔ ebul bia?

¹⁰ We wi no wetin mek Gɔd de alaw mɔtalman fɔ sɔfa, dat de ɛp wi fɔ bia we wi gɛt prɔblɛm. Wan sista we nem An we de na di ayland na Mayɔt, na di Indian Oshɔn, tɔk se: “We mi mama bin day, mi at bin rili pwɛl. Bɔt bɔku tɛm a kin mɛmba misɛf se nɔto Jiova de mek mɔtalman de sɔfa. I rili want fɔ pul ɔl di tin dɛn we de mek mɔtalman de sɔfa ɛn gi layf bak to di wan dɛn we wi lɛk we dɔn day. We a kin tink gud gud wan bɔt dɛn tru tin dɛn de, dat de ɛp mi fɔ gɛt kolat we kin mek bɔku tɛm a sɔprayz.”

11. We wi no di rizin dɛn we mek Jiova de alaw mɔtalman fɔ sɔfa, aw dat go ɛp wi fɔ kɔntinyu fɔ du di prichin wok?

¹¹ We wi no di tru tin we mek Gɔd de alaw mɔtalman fɔ sɔfa, dat go mek wi kɔntinyu fɔ du di prichin wok. Afta Pita bin dɔn tɔk se Jiova de peshɛnt wit wi bikɔs i want mek pipul dɛn ripɛnt ɛn sev, i bin rayt se: “Una tink bɔt uskayn pipul dɛn una fɔ bi. Una fɔ bi pipul dɛn we de biev oli we ɛn we de du tin dɛn we de sho se una fetful to Gɔd.” (2 Pit. 3:11) Wan pan di tin dɛn we wi go du “we de sho se wi fetful to Gɔd” na wi prichin wok. Jɔs lɛk wi Papa, wi lɛk pipul dɛn. Wi want mek dɛn de na Gɔd in nyu wɔl usay ɔlman go de du wetin rayt. Jiova peshɛnt ɛn i de gi di pipul dɛn we de na yu eria chans fɔ wɔship am. Na big big ɔnɔ wi gɛt fɔ bi Gɔd in kɔmpin wokman dɛn ɛn fɔ ɛp di wan dɛn we wi ebul fɔ ɛp fɔ lan bɔt am bifo di ɛnd kam!—1 Kɔr. 3:9.

WI DE INSAY “DI LAS DEZ”

12. Aw wi dɔn bɛnifit we wi dɔn lan se wi de insay “di las dez”?

¹² Di Baybul tɔk kɔrɛkt wan aw pipul dɛn go tan lɛk insay “di las dez.” (2 Tim. 3:​1-5) We wi si aw pipul dɛn arawnd wi de biev, wi de si klia wan se wetin di Baybul tɔk na tru. We wi si aw di we aw pipul dɛn de biev de bad-ɔf mɔ ɛn mɔ, dat de mek wi biliv tranga wan se wi kin abop pan Gɔd in Wɔd.—2 Tim. 3:​13-15.

13. Akɔdin to Jizɔs in parebul na Lyuk 12:​15-21, wetin sɔntɛm wi go aks wisɛf?

¹³ We wi no se wi de insay “di las dez,” dat de ɛp wi fɔ pe atɛnshɔn pan wetin rili impɔtant. Notis wetin mek i impɔtant fɔ du dis frɔm Jizɔs in parebul we de na Lyuk 12:​15-21. (Rid.) Wetin mek Gɔd se di jɛntriman “na pɔsin we nɔ de tink”? Nɔto bikɔs di man bin jɛntri, bɔt na bikɔs di man bin pe tumɔs atɛnshɔn pan tin dɛn we nɔ rili impɔtant. I bin “kip jɛntri fɔ insɛf, bɔt i nɔ [bin] jɛntri na Gɔd in yay.” Di man bin mek big mistek we i nɔ yuz in tɛm wit sɛns, bikɔs i nɔ bin gɛt bɛtɛ tɛm igen fɔ liv. Gɔd bin tɛl di man se: “Dis nɛt dɛn go tek yu layf.” Tide, as di tɛm de kam nia fɔ lɛ di wɔl dɔn, sɔntɛm wi go aks wisɛf dɛn kwɛstyɔn dɛn ya: ‘Fɔ se di gol dɛn we a sɛt de sho se a de yuz mi tɛm di bɛst we? Uskayn gol dɛn a de ɛp mi pikin dɛn fɔ sɛt? Fɔ se a de yuz mi trɛnk, mi tɛm, ɛn mi mɔni ɛn prɔpati jɔs fɔ kip jɛntri fɔ misɛf ɔ fɔ kip jɛntri na ɛvin?’

14. Aw Miki in ɛkspiriɛns ɛp wi fɔ si wetin mek i impɔtant fɔ mɛmba se wi de insay di las dez?

¹⁴ We wi tink gud gud wan bɔt di tin dɛn we de sho se wi de insay di las dez, dat go ɛp wi fɔ disayd fɔ du di rayt tin dɛn. Na dat bin apin to wan sista we nem Miki. I tɔk se: “We a dɔn skul, a bin rili want fɔ go na yunivasiti fɔ stɔdi bɔt animal dɛn ɛn gɛt wok. A bin gɛt gol bak fɔ rɛgyula payɔnia ɛn fɔ go usay dɛn nid mɔ pipul dɛn fɔ prich. Machɔ brɔda ɛn sista dɛn na di kɔngrigeshɔn bin tɛl mi fɔ tink gud gud wan if a go ebul fɔ gɛt di kayn wok we a want ɛn stil ebul fɔ payɔnia ɔ go usay dɛn nid mɔ pipul dɛn fɔ prich. Dɛn bin mɛmba mi se i nɔ go te igen dis wɔl go dɔn. Bɔt insay di nyu wɔl, a go gɛt chans fɔ stɔdi bɔt ɔl di animal dɛn sote go. So a bin disayd fɔ lan sɔntin we nɔ go tek bɔku pan mi tɛm ɛn we a go ebul yuz fɔ sɔpɔt misɛf. Dis bin mek a gɛt wok we de ɛp mi fɔ gɛt mɔni fɔ sɔpɔt misɛf as a de rɛgyula payɔnia ɛn leta fɔ go na Ɛkwedɔ, usay dɛn nid mɔ pipul dɛn fɔ prich.” Naw Miki ɛn in man de du sakit wok na da kɔntri de.

15. Aw pipul dɛn go stil biev we dɛn yɛri di gud nyuz? Gi wan ɛgzampul. (Luk bak di pikchɔ dɛn.)

¹⁵ Wi at nɔ fɔ pwɛl if pipul dɛn nɔ gri fɔ lisin to wi di fɔs tɛm we wi prich to dɛn. Pipul dɛn kin chenj. Tink bɔt Jizɔs in stɛp-brɔda we na Jems in ɛgzampul. I bin si Jizɔs frɔm we Jizɔs bin smɔl te i big, bi di Mɛsaya, ɛn tich di kayn we we no mɔtalman nɔ wande tich. Bɔt pan ɔl dat, Jems nɔ bin stil bi Jizɔs in disaypul. Na afta Jizɔs gɛt layf bak in brɔda bi disaypul, ɛn i bin gɛt zil!b (Jɔn 7:5; Gal. 2:9) I impɔtant fɔ mek yu nɔ giv-ɔp pan yu fambul dɛn we nɔ want fɔ lisin to di mɛsej bɔt di Kiŋdɔm ɛn fɔ prich bak to pipul dɛn we nɔ bin want fɔ lisin to di gud nyuz. Mɛmba se wi de insay di las dez, so wi prichin wok rili ɔjɛnt. Sɔntɛm wetin yu de tɛl dɛn tide go afɛkt dɛn leta, sɔntɛm ivin afta da big big trɔbul bigin.c

KƆNTINYU FƆ SHO SE YU GLADI FƆ DI TIN DƐN WE JIOVA DE MƐMBA WI

16. Aw yu dɔn bɛnifit frɔm di tin dɛn we Jiova dɔn mɛmba wi? (Luk bak di bɔks we gɛt di taytul “Yuz Dɛn fɔ Ɛp Ɔda Pipul Dɛn.”)

¹⁶ Sɔm pan di spirichwal it we wi kin gɛt na fɔ pipul dɛn we nɔ wande yɛri di men tin dɛn we di Baybul de tich. Fɔ ɛgzampul, wi pɔblik tɔk insay di wik, sɔm patikyula atikul dɛn ɛn vidio dɛn na jw.org, ɛn wi magazin dɛn fɔ di pɔblik na fɔ pipul dɛn mɔ we nɔto Jiova Witnɛs dɛn. Bɔt pan ɔl dat, wi stil de bɛnifit frɔm dɛn spirichwal it dɛn de. Dɛn de ɛp wi fɔ lɛk Jiova mɔ ɛn mɔ, fɔ gɛt stɔng fet pan in Wɔd, ɛn ɛp wi fɔ sabi tich ɔda pipul dɛn di men tin dɛn we di Baybul de tich fayn fayn wan.—Sam 19:7.

17. Us tin dɛn go apin we go mek yu tink bɔt di men tin dɛn we di Baybul de tich?

¹⁷ As Jiova Witnɛs dɛn, we di ɔganayzeshɔn ɔndastand Baybul tichin nyu we, dat kin mek wi gladi. Bɔt wi gladi bak fɔ di men tin dɛn we di Baybul de tich we mek wi disayd fɔ kam na di trut. If wi ɛva fil se wi want fɔ du wetin wi tink bifo wi fala wetin Jiova in ɔganayzeshɔn de tɛl wi, wi fɔ mɛmba se na di ɔlmayti ɛn di Wan we mek wi we gɛt sɛns de dayrɛkt di ɔganayzeshɔn. We wi ɔ pɔsin we wi lɛk gɛt prɔblɛm, wi go peshɛnt ɛn tink bɔt wetin mek Jiova de alaw mɔtalman fɔ sɔfa. We wi de disayd aw wi fɔ yuz wi tɛm ɛn di tin dɛn we wi gɛt, wi go mɛmba se wi de insay di las dez. Lɛ di tin dɛn we Jiova de tich wi kɔntinyu fɔ ɛp wi fɔ gɛt sɛns ɛn sav am fetful wan.