Yu Dɔn “Lan di Sikrit” bɔt Aw fɔ Gɛt Satisfay Maynd?

1. Wetin i min fɔ gɛt satisfay maynd? Wetin i nɔ min?

YU NA pɔsin we gɛt satisfay maynd? Pɔsin we gɛt satisfay maynd kin gɛt gladi-at ɛn pis bay we i de pe atɛnshɔn pan di tin dɛn we i gɛt. I nɔ de fil bad ɔ vɛks bikɔs ɔf wetin i nɔ gɛt. Bɔt fɔ gɛt satisfay maynd nɔ min se wi nɔ bisin bɔt wetin de apin to wi. Fɔ ɛgzampul, i nɔ bad fɔ mek Kristian want fɔ du mɔ fɔ sav Jiova. (Rom. 12:1; 1 Tim. 3:1) Bɔt pan ɔl dat, in at nɔ go pwɛl if dɛn nɔ pik am fɔ du di wok dɛn we i want fɔ du di tɛm we i de ɛkspɛkt.

2. Us bad tin dɛn go apin to pɔsin we nɔ gɛt satisfay maynd?

² Bad tin dɛn kin apin to pɔsin we nɔ gɛt satisfay maynd. Pipul dɛn we nɔ satisfay wit wetin dɛn gɛt kin wok fɔ lɔng tɛm fɔ gɛt tin dɛn we dɛn nɔ rili nid. I sɔri fɔ no se sɔm Kristian dɛn dɔn ivin tif mɔni ɛn ɔda tin dɛn we dɛn want. Sɔntɛm dɛn go tɔk se, ‘A fit fɔ gɛt am,’ ‘I dɔn te we a de wet,’ ɔ ‘A go pe di mɔni leta.’ Bɔt Jiova et tif ɛn dat de mek i gɛt badnem. (Prɔv. 30:9) Ɔda pipul dɛn at dɔn rili pwɛl bikɔs dɛn nɔ gɛt di privilej dɛn we dɛn want ɛn dat dɔn mek dɛn stɔp fɔ sav Jiova. (Gal. 6:9) Wetin go mek pɔsin we dɔn gi in layf to Jiova ɛn baptayz du da kayn tin de? Sɔntɛm i go bi se na bikɔs di pɔsin dɔn stɔp fɔ sho se i gɛt satisfay maynd.

3. Us fayn lɛsin wi lan na Filipians 4:​11, 12 we de ɛnkɔrej wi?

³ Wi ɔl ebul fɔ gɛt satisfay maynd. Apɔsul Pɔl bin rayt se “ilɛk wetin apin to mi, a dɔn lan aw fɔ gɛt satisfay maynd.” (Rid Filipians 4:​11, 12.) I tɔk dɛn wɔd dɛn ya we i bin de na prizin. Bɔt pan ɔl dat, i bin stil gladi. I bin “dɔn lan di sikrit” bɔt aw fɔ gɛt satisfay maynd. If i nɔ izi fɔ mek wi gɛt satisfay maynd, di wɔd dɛn we Pɔl tɔk ɛn di tin dɛn we apin to am go ɛp wi fɔ gɛt kɔnfidɛns se wi go ebul fɔ bi pɔsin we gɛt satisfay maynd. Wi nɔ fɔ ɛkspɛkt se i go izi fɔ mek wi jɔs satisfay wit di tin dɛn we de apin to wi. Bɔt na tin we wi fɔ lan fɔ du. Aw wi go du am? Lɛ wi tɔk bɔt kwaliti dɛn we go ɛp wi fɔ lan bɔt aw fɔ gɛt satisfay maynd.

BI PƆSIN WE GƐT TƐNKI

4. If wi na pɔsin we gɛt tɛnki, aw dat go ɛp wi fɔ gɛt satisfay maynd? (1 Tɛsalonians 5:18)

⁴ I izi fɔ mek pɔsin we gɛt tɛnki gɛt satisfay maynd. (Rid 1 Tɛsalonians 5:18.) Fɔ ɛgzampul, if wi gladi fɔ gɛt di tin dɛn we wi nid, dat kin mek wi nɔ wɔri bɔt di tin dɛn we wi want we wi nɔ gɛt. We wi gladi fɔ di wok dɛn we wi de du fɔ Jiova naw, dat go mek wi pe atɛnshɔn fɔ du wi bɛst pan di wok dɛn we wi gɛt bifo wi pe atɛnshɔn fɔ gɛt nyu wok dɛn. Na dat mek wi nɔ sɔprayz we di Baybul ɛnkɔrej wi fɔ tɛl Jiova tɛnki we wi de pre. We wi gɛt tɛnki, dat de ɛp wi fɔ gɛt “di pis we Gɔd de gi we mɔtalman nɔ ebul ɔndastand.”—Fil. 4:​6, 7.

5. Us rizin dɛn di Izrɛlayt dɛn bin gɛt fɔ sho se dɛn gɛt tɛnki? (Luk bak di pikchɔ.)

⁵ Tink bɔt wetin bin apin to di Izrɛlayt dɛn. Bɔku tɛm, dɛn bin de grɔmbul to Jiova se dɛn nɔ gɛt di fud dɛn we dɛn bin de it na Ijipt. (Nɔm. 11:​4-6) Fɔ tru, layf nɔ bin izi fɔ dɛn na di wildanɛs. Bɔt wetin bin fɔ dɔn ɛp dɛn fɔ gɛt satisfay maynd? Dɛn fɔ dɔn tink bɔt ɔl di tin dɛn we Jiova bin dɔn du fɔ dɛn ɛn sho se dɛn gɛt tɛnki. We dɛn bin de na Ijipt usay dɛn bin de trit dɛn as slev, Jiova bin mek tɛn bad bad tin dɛn apin to di Ijipshian dɛn. Afta Jiova fri di Izrɛlayt dɛn, dɛn bin “tek di Ijipshian dɛn” silva, gold, ɛn klos dɛn. (Ɛks. 12:​35, 36) We di Ijipshian dɛn bin rɔn afta di Izrɛlayt dɛn te dɛn rich na di Rɛd Si, Jiova bin yuz mirekul fɔ sheb di wata. Ɛn we dɛn bin de travul na di wildanɛs, Jiova bin de gi dɛn mana ɛvride fɔ it. Bɔt wetin na bin di prɔblɛm? Di Izrɛlayt dɛn nɔ bin gɛt satisfay maynd bikɔs dɛn nɔ bin gɛt tɛnki fɔ wetin dɛn ɔlrɛdi gɛt, nɔto bikɔs dɛn nɔ bin gɛt di it we dɛn nid.

6. Wetin go ɛp wi fɔ gɛt tɛnki?

⁶ Wetin go ɛp yu fɔ gɛt tɛnki? Fɔs, mek tɛm ɛvride fɔ tink bɔt di gud tin dɛn we yu de ɛnjɔy. Yu kin rayt tu ɔ tri tin dɛn we yu gladi fɔ. (Lam. 3:​22, 23) Sɛkɔn, sho se yu gɛt tɛnki. Tɛl ɔda pipul dɛn tɛnki fɔ wetin dɛn de du fɔ yu. Ɛn di tin we impɔtant pas ɔl, na fɔ de tɛl Jiova tɛnki ɔltɛm. (Sam 75:1) Tɔd, pik padi dɛn we de sho se dɛn gɛt tɛnki. If yu gɛt padi dɛn we nɔ de sho se dɛn gɛt tɛnki ɔ we de grɔmbul ɔltɛm, yusɛf go tan lɛk dɛn. Bɔt if yu gɛt padi dɛn we de sho se dɛn gɛt tɛnki, yu go tan lɛk dɛn. (Dyu. 1:​26-28; 2 Tim. 3:​1, 2, 5) We wi de yuz ɛni chans we wi gɛt fɔ sho se wi gɛt tɛnki, dat go mek wi gɛt satisfay maynd.

7. Wetin bin ɛp Achi fɔ gɛt satisfay maynd?

⁷ Lɛ wi tɔk bɔt wetin bin apin to Achi we de na Indonishia. I tɔk se: “Di tɛm we di COVID-19 pandɛmik bin de, a bin bigin fɔ kɔmpia di tin dɛn we bin de apin to mi to di tin dɛn we bin de apin to mi kɔmpin Kristian dɛn. Dat mek a nɔ bin gɛt satisfay maynd.” (Gal. 6:4) Wetin bin ɛp am fɔ chenj di we aw i bin de tink? Achi tɔk se: “A bigin fɔ kɔnt di blɛsin dɛn we a bin de gɛt ɛvride ɛn tink bɔt di bɔku gud tin dɛn we a dɔn gɛt bikɔs a de pat pan Gɔd in ɔganayzeshɔn. Dɔn a bin de tɛl Jiova tɛnki. Dat bin ɛp mi fɔ gɛt satisfay maynd.” If yu de fil se yu nɔ gɛt satisfay maynd, yu nɔ tink se i go fayn fɔ mek yu du wetin Achi bin du fɔ mek yu bi pɔsin we gɛt tɛnki?

KƆNTINYU FƆ PE ATƐNSHƆN PAN WETIN JIOVA WANT ƐN PUT YUSƐF DƆŊ

8. Wetin bin apin to Barɔk?

⁸ Tɛm bin de we prɔfɛt Jɛrimaya in sɛktri we na Barɔk nɔ bin satisfay wit di tin dɛn we i bin gɛt. Di wok we Barɔk bin gɛt nɔ bin izi. I bin gɛt fɔ ɛp Jɛrimaya fɔ tɛl di Izrɛlayt dɛn we nɔ gɛt tɛnki wetin go apin to dɛn bikɔs dɛn nɔ obe Jiova. Barɔk bin bigin fɔ pe atɛnshɔn pan tin dɛn we nɔ impɔtant. Bifo i pe atɛnshɔn fɔ du wetin Jiova want am fɔ du, i bigin fɔ pe tumɔs atɛnshɔn to insɛf ɛn wetin i want fɔ du. Jiova bin yuz Jɛrimaya fɔ tɛl Barɔk se: “Yu de tray fɔ gɛt big tin dɛn fɔ yusɛf. Lɛf fɔ luk fɔ dɛn tin dɛn de.” (Jɛr. 45:​3-5) I tan lɛk Jiova bin de tɛl am se: “Satisfay wit wetin yu gɛt naw.” Barɔk bin tek di kɔrɛkshɔn ɛn kɔntinyu fɔ bi Jiova in tayt padi.

9. Wetin wi lan frɔm 1 Kɔrintians 4:​6, 7? (Luk bak di pikchɔ dɛn.)

⁹ Sɔntɛnde, pɔsin we de sav Jiova go fil se i fɔ gɛt wan patikyula asaynmɛnt. Sɔntɛm i go sabi du bɔku tin dɛn, i de wok tranga wan, ɔ i dɔn sav Jiova fɔ lɔng tɛm. Bɔt sɔntɛm na ɔda pipul dɛn go gɛt di asaynmɛnt we i want. Wetin go ɛp am fɔ tink di rayt we? I kin tink bɔt wetin apɔsul Pɔl bin rayt na 1 Kɔrintians 4:​6, 7. (Rid.) Ɛni asaynmɛnt we dɛn gi wi ɛn ɛni talɛnt we wi gɛt, na frɔm Jiova i kɔmɔt. Jiova nɔ gi wi dɛn gift dɛn ya bikɔs wi impɔtant pas ɔda pipul dɛn. Bifo dat, Jiova de gi wi dɛn tin dɛn ya bikɔs ɔf in spɛshal gudnɛs.—Rom. 12:​3, 6; Ɛfi. 2:​8, 9.

10. Aw wi go lan fɔ put wisɛf dɔŋ?

¹⁰ Wi go lan fɔ put wisɛf dɔŋ we wi tink gud gud wan bɔt di ɛgzampul we Jizɔs sɛt fɔ wi. Tink bɔt wetin bin apin di nɛt we Jizɔs bin was in apɔsul dɛn fut. Apɔsul Jɔn bin rayt se: “Jizɔs no se [1] in Papa dɔn put ɔltin na in an, ɛn [2] i no se i kɔmɔt to Gɔd ɛn [3] i de go to Gɔd,” bɔt pan ɔl dat, “i grap ɛn bigin fɔ was in disaypul dɛn fut.” (Jɔn 13:​3-5) Jizɔs bin fɔ dɔn fil se na in disaypul dɛn fɔ was in fut. Bɔt we i bin de na di wɔl, i nɔ bin ɛva fil se i fɔ gɛt fayn os, bɔku mɔni, ɛn ɛnjɔy insɛf. (Lyuk 9:58) Jizɔs bin put insɛf dɔŋ ɛn i bin gɛt satisfay maynd. I sɛt pafɛkt ɛgzampul fɔ wi.—Jɔn 13:15.

11. We Dɛnis put insɛf dɔŋ, aw dat dɔn ɛp am fɔ gɛt satisfay maynd?

¹¹ Wan brɔda we nem Dɛnis we de na Nɛdaland tɔk se i de tray tranga wan fɔ put insɛf dɔŋ lɛk Jizɔs, bɔt i nɔ izi. I tɔk se: “We pɔsin gɛt asaynmɛnt we a want, sɔntɛnde a kin vɛks bikɔs a tink se na mi fɔ gɛt da asaynmɛnt de. We dat kin apin, a kin stɔdi bɔt aw fɔ bi pɔsin we de put insɛf dɔŋ. A dɔn mak patikyula skripchɔ dɛn na di JW Laybri ap we de tɔk bɔt aw pɔsin fɔ put insɛf dɔŋ, so dat a go fɛn dɛn kwik ɛn rid dɛn bak. A dɔn dawnlod bak tɔk dɛn na mi fon we de tɔk bɔt aw pɔsin fɔ put insɛf dɔŋ, ɛn bɔku tɛm a kin lisin to dɛn.a A dɔn lan se ɔl di wok dɛn we wi de du na fɔ prez Jiova, nɔto fɔ prez wisɛf. Jiova gi wi ɔl sɔntin fɔ du, bɔt na in de mek di wok kɔmɔt fayn.” If yu bigin fɔ fil se yu nɔ gladi bikɔs yu nɔ gɛt di asaynmɛnt we yu want, du tin dɛn we go ɛp yu fɔ bi pɔsin we de put insɛf dɔŋ. Dis go mek yu gɛt tayt padi biznɛs wit Jiova ɛn ɛp yu fɔ gɛt satisfay maynd.—Jems 4:​6, 8.

TINK GUD GUD WAN BƆT YU OP

12. Us op wi gɛt fɔ tumara bambay we de ɛp wi fɔ gɛt satisfay maynd? (Ayzaya 65:​21-25)

¹² Wi go gɛt satisfay maynd mɔ we wi tink gud gud wan bɔt di wɔndaful op we wi gɛt fɔ tumara bambay. Insay di Baybul buk we nem Ayzaya, Jiova bin tɛl wi se i ɔndastand se wi gɛt bɔku prɔblɛm dɛn. Bɔt i prɔmis se i go pul ɔl dɛn prɔblɛm dɛn ya. (Rid Ayzaya 65:​21-25.) Wi go de na os dɛn we fayn ɛn sef. Wi go gɛt wok we wi go ɛnjɔy fɔ du, ɛn wi go it fud dɛn we fayn ɛn we go mek wi gɛt wɛlbɔdi. Wi nɔ go wɔri igen se bad tin go apin to wi ɔ wi pikin dɛn. (Ayz. 32:​17, 18; Izi. 34:25) Wi gɛt kɔnfidɛns se ɔl dɛn fayn fayn prɔmis dɛn ya fɔ tumara bambay go mɔs kam tru.

13. Us tɛm dɛn mɔ wi fɔ pe atɛnshɔn pan di op we wi gɛt?

¹³ Na naw mɔ wi nid fɔ pe atɛnshɔn pan di op we wi gɛt. Wetin mek? Na bikɔs wi de insay “di las dez” ɛn wi ɔl kin gɛt prɔblɛm dɛn we de mek “tin . . . tranga ɛn bad.” (2 Tim. 3:1) Jiova de gi wi di tin dɛn we wi nid fɔ bia ɛvride bay we i de gayd wi, gi wi trɛnk, ɛn gi wi di sɔpɔt we wi nid. (Sam 145:14) Pantap dat, di op we wi gɛt as Kristian dɛn de ɛp wi fɔ bia we wi gɛt prɔblɛm dɛn. Sɔntɛm yu nid fɔ wok tranga wan fɔ mek yu ebul gi yu famili di tin dɛn we dɛn nid. Fɔ se dis min se yu go kɔntinyu fɔ wok tranga wan ɔltɛm fɔ gi yu famili wetin dɛn nid? Nɔ! Jiova dɔn prɔmis fɔ gi wi wetin wi nid, ɛn i go ivin gi wi pas dat na Paradays. (Sam 9:18; 72:​12-14) Sɔntɛm yu gɛt siriɔs pen, pwɛlat, ɔ siriɔs sik we de mɔna yu. Fɔ se na so yu go kɔntinyu fɔ sɔfa sote go? Nɔ, i nɔ go bi so. Gɔd go pul sik ɛn day insay in nyu wɔl. (Rɛv. 21:​3, 4) Da op de go ɛp wi nɔ fɔ fil bad ɔ vɛks bikɔs ɔf di tin dɛn we de apin to wi rayt naw. Wi nɔ go wɔri tumɔs we dɛn nɔ trit wi fayn, we wi gɛt sik we de mɔna wi, ɔ we bad tin dɛn apin to wi. Wetin mek? Na bikɔs ilɛk wetin de apin to wi rayt naw, wi no se di “prɔblɛm na fɔ shɔt tɛm” ɛn we di nyu wɔl kam wi nɔ go sɔfa igen.—2 Kɔr. 4:​17, 18.

14. Aw wi go mek wi op strɔng mɔ ɛn mɔ?

¹⁴ Bikɔs op de ɛp wi fɔ gɛt satisfay maynd, aw wi go mek i strɔng mɔ ɛn mɔ? Jɔs lɛk we pɔsin go nid fɔ yuz glasis fɔ si tin dɛn we de fa klia wan, na so wisɛf go nid fɔ du tin dɛn we go ɛp fɔ mek wi op strɔng mɔ ɛn mɔ so dat wi go ebul imajin wisɛf na Paradays. We wi de wɔri tumɔs bɔt mɔni biznɛs, wi fɔ tink bɔt aw wi layf go tan lɛk we mɔni, dɛt, ɛn po nɔ go de igen. If wi de wɔri bɔt asaynmɛnt dɛn we wi nɔ gɛt yet, wi fɔ tink bɔt aw dɛn tin dɛn de nɔ go impɔtant igen afta wi dɔn pafɛkt ɛn dɔn sav Jiova fɔ lɔng lɔng tɛm. (1 Tim. 6:19) Wi kin wɔri bɔt bɔku tin dɛn rayt naw ɛn sɔntɛm dat kin mek i nɔ izi fɔ lɛ wi tink bɔt di prɔmis dɛn fɔ tumara bambay. Bɔt as tɛm de go, i go izi fɔ lɛ wi de tink bɔt di tin dɛn we Jiova dɔn prɔmis fɔ tumara bambay.

15. Wetin yu lan frɔm di tin dɛn we Krista tɔk?

¹⁵ Lɛ wi tɔk bɔt aw op bin ɛp Krista we mared to Dɛnis we wi bin dɔn tɔk bɔt. I tɔk se: “A gɛt sik we de mek mi mɔsul dɛn rili wik. A nɔ ebul fɔ waka ɛn a nid fɔ yuz wilchia, ɛn bɔku tɛm na bed a kin de. A kin fil pen ɛvride. Dis biɛn tɛm, mi dɔktɔ tɛl mi se a nɔ gɛt fɔ wɛl. Bɔt wantɛm wantɛm a tɛl misɛf se, ‘I nɔ de si tumara bambay di we aw mi de si am.’ A de pe atɛnshɔn pan mi op, ɛn dat de ɛp mi fɔ gɛt kolat. Rayt naw, a nid fɔ bia bɔku prɔblɛm dɛn na dis wɔl, bɔt a go rili ɛnjɔy layf na di nyu wɔl!”

“DI WAN DƐN WE DE FRED AM GO GƐT WETIN DƐN NID”

16. Wetin mek Kiŋ Devid rayt se di wan dɛn we de fred Jiova “go gɛt wetin dɛn nid”?

¹⁶ Jiova in savant we gɛt satisfay maynd kin stil gɛt prɔblɛm dɛn. Di Baybul se tri pan Kiŋ Devid in pikin dɛn bin day. Dɛn bin lay pan am, in padi dɛn bin kɔmɔt biɛn am, ɛn fɔ lɔng tɛm i bin de rɔn fɔ in layf bikɔs wan kiŋ bin want fɔ kil am. Bɔt pan ɔl we prɔblɛm dɛn we nɔ bin izi bin de mit am, i tɔk bɔt Jiova se: “Di wan dɛn we de fred am go gɛt wetin dɛn nid.” (Sam 34:​9, 10) Wetin mek i tɔk dat? Na bikɔs, pan ɔl we wi na Jiova in pipul dɛn, wi nɔ de ɛkspɛkt se wi nɔ go gɛt prɔblɛm dɛn, bɔt wi gɛt kɔnfidɛns se wi go gɛt wetin wi rili nid ɔltɛm. (Sam 145:16) Ɛn wi kin abop pan Jiova fɔ gi wi di trɛnk we wi nid fɔ bia ɔl wi prɔblɛm dɛn. Wi go gɛt kolat ɛn gladi-at ilɛk wetin de apin to wi.

17. Wetin mek yu dɔn mek-ɔp yu maynd fɔ lan di sikrit bɔt aw fɔ gɛt satisfay maynd?

¹⁷ Jiova want mek yu gɛt satisfay maynd. (Sam 131:​1, 2) So du ɔl wetin yu ebul fɔ lan di sikrit bɔt aw fɔ gɛt satisfay maynd. If yu wok tranga wan fɔ bi pɔsin we gɛt tɛnki, kɔntinyu fɔ pe atɛnshɔn pan wetin Jiova want ɛn put yusɛf dɔŋ, ɛn du tin dɛn we go mek yu op strɔng mɔ ɛn mɔ, yu go ebul tɔk se: “Fɔ tru, a satisfay.”—Sam 16:​5, 6.