Jiova De Ɛp Wi fɔ Bia

1. Wetin mek i nɔ izi fɔ kɔntinyu fɔ bia te di ɛnd kam? Udat go ɛp wi? (1 Pita 5:10)

WI ƆL gɛt difrɛn prɔblɛm dɛn, so sɔntɛnde wi kin fil se wi nɔ go ebul fɔ kɔntinyu fɔ bia te di ɛnd kam. Sɔm pan Jiova in pipul dɛn de sɔfa bikɔs dɛn dɔn sik fɔ lɔng tɛm. Ɔda wan dɛn de sɔfa bikɔs pɔsin we dɛn lɛk dɔn day. Ɛn ɔda wan dɛn de sɔfa bikɔs dɛn famili ɔ di gɔvmɛnt de agens dɛn. (Mat. 10:​18, 36, 37) Bɔt gɛt kɔnfidɛns se ilɛk uskayn prɔblɛm yu gɛt, Jiova go ɛp yu fɔ bia.—Rid 1 Pita 5:10.

2. As Kristian dɛn, wetin mek wi ebul fɔ bia?

² Fɔ bia min se wi de kɔntinyu fɔ fetful to Jiova ɛn sav am wit gladi-at pan ɔl we wi gɛt prɔblɛm dɛn, pipul dɛn de mek wi sɔfa, ɔ we sɔntin tɛmt wi. Kristian dɛn ebul fɔ bia bikɔs dɛn abop pan Jiova, we na di wan we de gi “pawa we pas mɔtalman in yon,” nɔto bikɔs dɛn abop pan dɛn yon trɛnk. (2 Kɔr. 4:7) Insay dis atikul, wi go tɔk bɔt 4 tin dɛn we Jiova dɔn gi wi we de ɛp wi fɔ bia. Wi go lan bak bɔt aw wi go bɛnifit frɔm ɛniwan pan dɛn tin dɛn de.

PREA

3. Wetin mek wi go se prea na mirekul?

³ Jiova dɔn du wɔndaful tin we go ɛp wi fɔ bia. Pan ɔl we wi na sina dɛn, i dɔn mek am pɔsibul fɔ mek wi ebul tɔk to am, ɛn i de lisin to wi. (Ibru. 4:16) Tink bɔt dis: Wi ebul pre to Jiova ɛnitɛm ɛn wi kin pre bɔt ɛnitin. I de yɛri wi prea ilɛk us langwej wi yuz fɔ pre ɛn ilɛk usay wi de. I de yɛri wi ilɛk na wi wangren de ɔ wi de na prizin. (Jona 2:​1, 2; Akt 16:​25, 26) If wi at pwɛl pasmak ɛn wi nɔ ebul fɔ tɔk aw wi de fil, Jiova stil ebul fɔ ɔndastand wetin wi want fɔ se. (Rom. 8:​26, 27) Fɔ tru, prea na mirekul!

4. Aw wi no se Jiova go ɛp wi fɔ bia we wi pre to am?

⁴ Jiova mek wi no insay in Wɔd se “ilɛk wetin wi aks am fɔ, wans na dat i want, i de yɛri wi.” (1 Jɔn 5:14) Fɔ se wi fɔ aks Jiova fɔ ɛp wi fɔ bia? Yɛs! Wetin mek? Na bikɔs dat gri wit wetin i want. Wetin mek wi se so? Na bikɔs we wi ebul fɔ bia, wi de mek Jiova ebul fɔ ansa Setan we de provok am. (Prɔv. 27:11) Apat frɔm dat, di Baybul tɔk se Jiova rɛdi fɔ “sho in trɛnk fɔ di wan dɛn we fetful to am wit ɔl dɛn at.” (2 Kro. 16:9) So wi gɛt kɔnfidɛns se Jiova gɛt di pawa fɔ ɛp wi fɔ bia ɛn i want fɔ ɛp wi.—Ayz. 30:18; 41:10; Lyuk 11:13.

5. Aw prea de ɛp wi fɔ gɛt kolat? (Ayzaya 26:3)

⁵ Di Baybul se we wi pre wit ɔl wi at bɔt di tin dɛn we de mek wi wɔri, “di pis we Gɔd de gi we mɔtalman nɔ ebul ɔndastand go gayd [wi] at ɛn maynd.” (Fil. 4:7) Tink bɔt wetin dat min. We pipul dɛn we nɔ de sav Jiova kin gɛt prɔblɛm, dɛn kin tray fɔ du difrɛn tin dɛn fɔ mek dɛn gɛt kolat. Bɔt we wi pre to Jiova, di pis we i de gi wi bɛtɛ fa fawe pas ɛni ɔda tin we pɔsin go du fɔ gɛt kolat. Wi de sho se wi abop pan Jiova wit ɔl wi at we wi pre to am, ɛn i de gi wi “pis ɔltɛm.” (Rid Ayzaya 26:3.) Wan we aw Jiova de du dat na we i de ɛp wi fɔ mɛmba skripchɔ dɛn we de kɔrej wi. Dɛn skripchɔ dɛn de, de mɛmba wi bɔt aw Jiova lɛk wi ɛn aw i want fɔ ɛp wi, ɛn dat de mek wi gɛt kolat.—Sam 62:​1, 2.

6. Aw yu go yuz di chans we yu gɛt fɔ pre fayn fayn wan? (Luk bak di pikchɔ.)

⁶ Wetin yu go du? We yu gɛt prɔblɛm, tɛl Jiova aw yu de fil. “Lɛf wetin de mɔna yu na . . . in an” ɛn pre fɔ mek i gi yu kolat. (Sam 55:22) Pre bak fɔ di sɛns we yu nid fɔ mek yu go ebul fɔ bia wit yu prɔblɛm. (Prɔv. 2:​10, 11) We yu de pre fɔ mek Jiova ɛp yu fɔ bia, nɔ fɔgɛt fɔ tɛl am tɛnki. (Fil. 4:6) Luk fɔ we dɛn aw Jiova de ɛp yu fɔ bia wit yu prɔblɛm ɛn tɛl am tɛnki fɔ di we aw i de sɔpɔt yu. Nɔ alaw yu prɔblɛm dɛn fɔ mek yu nɔ si di blɛsin dɛn we yu dɔn ɔlrɛdi gɛt.—Sam 16:​5, 6.

GƆD IN WƆD

7. We wi de stɔdi di Baybul, aw dat go ɛp wi fɔ bia?

⁷ Jiova dɔn gi wi in Wɔd fɔ ɛp wi fɔ bia. Di Baybul gɛt bɔku vas dɛn we mek wi gɛt kɔnfidɛns se Jiova de sɔpɔt wi. Lɛ wi jɔs tɔk bɔt wan ɛgzampul. Matyu 6:8 se: “Una Papa no wetin una nid ivin bifo una aks am.” Na Jizɔs tɔk dɛn wɔd dɛn de, ɛn i sabi Jiova gud gud wan pas ɛni ɔda pɔsin. So wi nɔ gɛt wan dawt se we wi gɛt prɔblɛm, Jiova kin no di tin dɛn we wi nid ɛn i go ɛp wi. Di Baybul gɛt bɔku prɔmis dɛn we go ɛp wi fɔ mek-ɔp wi maynd fɔ kɔntinyu fɔ bia.—Sam 94:19.

8. (a) Gi wan ɛgzampul bɔt Baybul prinsipul we go ɛp wi fɔ bia. (b) Wetin go ɛp wi fɔ mɛmba Baybul prinsipul dɛn di tɛm we wi nid dɛn?

⁸ Di prinsipul dɛn we de na di Baybul kin ɛp wi fɔ bia. Afta ɔl, di Baybul gɛt advays dɛn we go ɛp wi fɔ disayd fɔ du di rayt tin dɛn. (Prɔv. 2:​6, 7) Fɔ ɛgzampul, di Baybul ɛnkɔrej wi fɔ du wetin wi ebul du fɔ tide ɛn nɔ wɔri tumɔs bɔt wetin go apin ɔ we nɔ go apin di nɛks de. (Mat. 6:34) If wi gɛt di abit fɔ de rid di Baybul ɔltɛm ɛn tink gud gud wan bɔt wetin wi de rid, i go izi fɔ mek wi mɛmba di prinsipul dɛn we wi nid fɔ aplay ɛnitɛm.

9. We wi rid akawnt dɛn na di Baybul bɔt aw Jiova bin ɛp in savant dɛn trade, aw dat de mek wi fil?

⁹ Di Baybul gɛt akawnt dɛn bɔt pipul dɛn lɛk wi we bin abop pan Jiova ɛn aw i bin ɛp dɛn. (Ibru. 11:​32-34; Jems 5:17) We wi tink bɔt dɛn akawnt dɛn de, i de ɛp wi fɔ gɛt kɔnfidɛns se Jiova “na wi sef ples, ɛn nain de gi wi trɛnk, i rɛdi ɔltɛm fɔ ɛp wi di tɛm we prɔblɛm de.” (Sam 46:1) As wi de tink bɔt aw Jiova in savant dɛn we bin de trade bin sho se dɛn gɛt fet ɛn dɛn de bia, dat go mek wi want fɔ falamakata dɛn.—Jems 5:​10, 11.

10. Wetin yu go du fɔ mek yu bɛnifit frɔm Gɔd in Wɔd gud gud wan?

¹⁰ Wetin yu go du? Rid di Baybul ɛvride ɛn rayt vas dɛn we yu tink se go rili ɛp yu. Bɔku pipul dɛn dɔn si bak se we dɛn de rid di deli tɛks na mɔnin, dat na fayn we fɔ stat di de bikɔs dɛn kin gɛt sɔntin frɔm di Baybul we de ɛnkɔrej dɛn. Na dis bin ɛp wan sista we nem Maria we i bin de kia fɔ in mama ɛn papa. Dɛn ɔl tu bin gɛt kansa di sem tɛm, ɛn tɛm nɔ bin de fa igen fɔ mek dɛn day. I tɔk se: “Ɛni mɔnin, a bin de rid di deli tɛks ɛn tink gud gud wan bɔt wetin a dɔn lan. Dat bin de ɛp mi ɛvride fɔ tink bɔt Jiova ɛn ɔl di wɔndaful tin dɛn we i de tich wi insay in Wɔd, ɛn nɔ pe atɛnshɔn pan di prɔblɛm dɛn we a gɛt.”—Sam 61:2.

WI KƆMPIN KRISTIAN DƐN

11. Wetin mek i fayn fɔ no se nɔto wi wangren gɛt prɔblɛm we wi de bia wit?

¹¹ Jiova dɔn gi wi brɔda ɛn sista dɛn ɔlsay na di wɔl fɔ ɛp wi fɔ bia. We wi no se “di sem kayn tin dɛn we de mek [wi] de sɔfa na dɛn bak de mek [wi] brɔda dɛn ɔlsay na di wɔl de sɔfa,” dat de ɛp wi fɔ no se nɔto wi wangren de. (1 Pit. 5:9) Fɔ tru, ilɛk uskayn prɔblɛm wi gɛt, ɔda pipul dɛn dɔn gɛt dɛn sem kayn prɔblɛm dɛn de, ɛn dɛn bin ebul fɔ bia. Dat sho se wisɛf go ebul fɔ bia.—Akt 14:22.

12. Aw wi kɔmpin Kristian dɛn kin ɛp wi? Wetin wi kin du fɔ dɛn? (2 Kɔrintians 1:​3, 4)

¹² We wi de bia wit di prɔblɛm dɛn we de mit wi, wi kɔmpin Kristian dɛn kin ebul fɔ ɛnkɔrej wi. Apɔsul Pɔl bin kam fɔ si se dat na tru. Bɔku tɛm, i bin de sho tɛnki fɔ di wan dɛn we bin de ɛp am we in na bin prizina nain os, ɛn i bin de ivin kɔl dɛn nem dɛn. Dɛn bin de kɔrej Pɔl ɛn ɛp am wit di tin dɛn we i nid. (Fil. 2:​25, 29, 30; Kol. 4:​10, 11) Dis sem tin kin apin to wi. Wi brɔda ɛn sista dɛn kin de wit wi di tɛm we wi nid ɛp fɔ bia wit wi prɔblɛm dɛn, ɛn wisɛf kin de wit dɛn di tɛm we dɛn nid pɔsin fɔ sɔpɔt dɛn.—Rid 2 Kɔrintians 1:​3, 4.

13. Wetin bin ɛp wan sista we nem Maya fɔ bia wit in prɔblɛm?

¹³ Di brɔda ɛn sista dɛn bin rili ɛnkɔrej wan sista we nem Maya we de na Rɔshia. Polis dɛn bin sach in os insay di ia 2020, ɛn dɛn bin go wit am na kɔt bikɔs i de prich to ɔda pipul dɛn. Maya tɔk se: “Insay dɛn tɛm dɛn de, a bin taya, a bin de wɔri, ɛn mi at bin pwɛl. Bɔt di brɔda ɛn sista dɛn bin de kɔl mi, sɛn mɛsej dɛn, ɛn rayt lɛta dɛn fɔ sho se dɛn lɛk mi. A bin no se mi brɔda ɛn sista dɛn lɛk mi ɛn wi na wan big famili. Bɔt a bin si dat klia wan afta wetin apin to mi insay 2020.”

14. We wi gɛt prɔblɛm, wetin wi go du fɔ mek wi bɛnifit frɔm di sɔpɔt we wi brɔda ɛn sista dɛn de gi wi? (Luk bak di pikchɔ.)

¹⁴ Wetin yu go du? We yu de bia wit di prɔblɛm dɛn we de mit yu, kɔntinyu fɔ de nia yu brɔda ɛn sista dɛn. Nɔ fred fɔ aks di ɛlda dɛn fɔ ɛp yu. Dɛn kin bi “sef ples we big briz ɛn ren de kam.” (Ayz. 32:2) Mɛmba bak se, yu kɔmpin Kristian dɛnsɛf de bia wit dɛn yon prɔblɛm dɛn. So we yu du sɔntin fɔ ɛp pɔsin we nid ɛp, dat go mek yu gladi ɛn i go ɛp yu fɔ bia wit yu yon prɔblɛm.—Akt 20:35.

WI OP FƆ TUMARA BAMBAY

15. Aw op bin ɛp Jizɔs? Aw di op we wi gɛt fɔ tumara bambay de ɛp wi? (Ibruz 12:2)

¹⁵ Jiova dɔn gi wi op we de ɛp wi fɔ bia. (Rom. 15:13) Mɛmba se we Jizɔs bin de na di wɔl, di op we i bin gɛt fɔ di bambay bin ɛp am fɔ bia di de we bin at fɔ am pas ɔl. (Rid Ibruz 12:2.) Jizɔs bin no se we i kɔntinyu fɔ sav Jiova fetful wan, dat go ɛp fɔ pul di badnem we Setan dɔn put pan Jiova. Jizɔs bin de op bak fɔ go jɔyn in Papa na ɛvin ɛn fɔ rul as Kiŋ wit in anɔyntɛd brɔda dɛn. Semweso, di op we wi gɛt fɔ de sote go na Gɔd in nyu wɔl de ɛp wi fɔ bia ɛni prɔblɛm we de mit wi na Setan in wɔl.

16. Aw op bin ɛp wan sista fɔ bia? Wetin yu lan frɔm wetin i tɔk?

¹⁶ Lɛ wi tɔk bɔt aw di op fɔ tumara bambay bin ɛp wan sista na Rɔshia we nem Ana. Dɛn bin arɛst in man ɛn put am na prizin di tɛm we i bin de wet fɔ mek dɛn tɔk in kes na kɔt. We dis tin bin apin, Ana tɔk se: “We a bin de pre bɔt wi op fɔ tumara bambay ɛn tink gud gud wan bɔt am, dat bin mek mi at nɔ pwɛl pasmak. A ɔndastand se we ɔl dɛn prɔblɛm dɛn ya dɔn, gud tin dɛn go apin. Jiova go win, ɛn wisɛf go win.”

17. Aw wi go sho se wi gladi fɔ di op we Jiova dɔn gi wi? (Luk bak di pikchɔ.)

¹⁷ Wetin yu go du? Mek tɛm fɔ tink bɔt di wɔndaful tin dɛn we Jiova dɔn prɔmis fɔ du tumara bambay. Imajin yusɛf na Gɔd in nyu wɔl ɛn tink bɔt di blɛsin dɛn we wi go gɛt. We yu du dat, yu go si se ɛni prɔblɛm we de mit yu naw “na fɔ shɔt tɛm ɛn i smɔl.” (2 Kɔr. 4:17) Dɔn bak, du wetin yu ebul fɔ tɛl ɔda pipul dɛn wetin yu biliv. Tink bɔt aw layf tranga fɔ pipul dɛn we nɔ de sav Jiova. Dɛn gɛt bɔku prɔblɛm dɛn, bɔt dɛn nɔ no di wɔndaful tin dɛn we Gɔd dɔn prɔmis fɔ du. Yu go ebul mek dɛn want fɔ no bɔt di op fɔ tumara bambay ilɛk na jɔs smɔl tɛm yu yuz fɔ tɔk to dɛn.

18. Wetin mek wi fɔ abop pan Jiova in prɔmis dɛn?

¹⁸ Afta Job dɔn bia bɔku prɔblɛm dɛn, i bin tɛl Jiova se: “Naw a no se yu ebul fɔ du ɔltin. Ɛn natin nɔ de we yu de tink bɔt we yu nɔ ebul fɔ du.” (Job 42:2) Job bin kam fɔ no se natin nɔ de we go ebul stɔp Jiova fɔ mek i nɔ du wetin i want. We wi mɛmba se Jiova go du wetin i dɔn prɔmis ɛn pul wi prɔblɛm dɛn, dat de ɛp wi fɔ bia. Fɔ ɛgzampul, imajin wan sikuman we in at pwɛl bikɔs i dɔn go to bɔku dɔktɔ dɛn, bɔt dɛn nɔ ebul fɔ mɛn am. Bɔt we wan dɔktɔ we sabi du in wok ɛn we bɔku pipul dɛn trɔst tɛl am wetin na di prɔblɛm ɛn ɛksplen aw i go trit am, in at kol, pan ɔl we i no se i go tek sɔm tɛm bifo i wɛl. Naw i go ebul fɔ bia bikɔs i gɛt op se i go wɛl. Semweso, bikɔs wi gɛt kɔnfidɛns se dis wɔl go bi Paradays, dat de ɛp wi fɔ bia.

19. Wetin go ɛp wi fɔ bia?

¹⁹ Wi dɔn lan se Jiova de yuz dɛn tin dɛn ya fɔ ɛp wi fɔ bia: prea, in Wɔd di Baybul, wi kɔmpin Kristian dɛn, ɛn di op we wi gɛt. If wi du wi bɛst fɔ yuz dɛn tin dɛn ya gud gud wan, Jiova go ɛp wi fɔ bia ɔl di prɔblɛm dɛn we de mit wi te di tɛm we Setan in wikɛd wɔl nɔ go de igen.—Fil. 4:13.