“Kɔl di Ɛlda Dɛn”

1. Aw Jiova dɔn sho se i rili valyu in ship dɛn?

JIOVA rili valyu in ship dɛn. I yuz Jizɔs in blɔd fɔ bay dɛn, ɛn i dɔn pik ɛlda dɛn na di kɔngrigeshɔn fɔ kia fɔ In ship dɛn. (Akt 20:28) Gɔd want mek di ɛlda dɛn trit in ship dɛn fayn. Di ɛlda dɛn de fala Jizɔs in dayrɛkshɔn bay we dɛn de ɛnkɔrej di ship dɛn ɛn protɛkt dɛn frɔm ɛnitin we go pwɛl dɛn padi biznɛs wit Jiova.​—Ayz. 32:​1, 2.

2. Udat dɛn mɔ Jiova bisin bɔt? (Izikɛl 34:​15, 16)

² Jiova lɛk ɔl in ship dɛn, bɔt i bisin mɔ bɔt di wan dɛn we nɔ gɛt tayt padi biznɛs wit am igen. I de yuz di ɛlda dɛn fɔ ɛp dɛn kayn pipul dɛn de. (Rid Izikɛl 34:​15, 16.) Bɔt Jiova want mek wi go to am ɛnitɛm wi nid ɛp. I nɔ jɔs want mek wi pre to am fɔ ɛp wi, bɔt i want mek wi tɔk to di “shɛpad ɛn ticha dɛn” bak na di kɔngrigeshɔn fɔ ɛp wi.​—Ɛfi. 4:​11, 12.

3. Aw wi ɔl go bɛnifit we wi no di wok we di ɛlda dɛn de du?

³ Insay dis atikul, wi go lan mɔ bɔt aw Jiova de yuz di ɛlda dɛn fɔ ɛp di wan dɛn we nɔ gɛt tayt padi biznɛs wit am igen. Wi go ansa dɛn kwɛstyɔn dɛn ya: Ustɛm wi fɔ tɔk to di ɛlda dɛn fɔ ɛp wi? Wetin mek wi fɔ du dat? Ɛn aw dɛn de ɛp wi? Sɔntɛm rayt naw wi gɛt tayt padi biznɛs wit Jiova. Bɔt stil, dis atikul go ɛp wi fɔ gladi mɔ fɔ di we aw Jiova de yuz di ɛlda dɛn, ɛn i go ɛp wi fɔ no wetin fɔ du we wi nid di ɛlda dɛn fɔ ɛp wi.

USTƐM WI FƆ “KƆL DI ƐLDA DƐN”?

4. Aw wi no se Jems 5:​14-16, 19, 20 de tɔk bɔt pɔsin we nɔ gɛt tayt padi biznɛs wit Jiova igen? (Luk bak di pikchɔ dɛn.)

⁴ Jems we na bin Jizɔs in disaypul ɛksplen aw Jiova de yuz di ɛlda dɛn fɔ ɛp wi. I bin rayt se: “Ɛnibɔdi de pan una we sik? Mek i kɔl di ɛlda dɛn na di kɔngrigeshɔn.” (Rid Jems 5:​14-16, 19, 20.) Di ɔda vas dɛn sho se we Jems bin de tɔk bɔt pɔsin we sik, i bin min pɔsin we nɔ gɛt tayt padi biznɛs wit Jiova igen. Wetin mek wi se so? Na bikɔs Jems tɔk se pɔsin we sik fɔ kɔl di ɛlda dɛn, i nɔ se i fɔ kɔl dɔktɔ. Dɔn bak, Jems ɛksplen se di pɔsin go wɛl we Gɔd fɔgiv in sin dɛn. Wi go kɔmpia di tin dɛn we pɔsin nid fɔ du fɔ mek i gɛt tayt padi biznɛs wit Jiova bak to wetin pɔsin go du we i nɔ wɛl. We wi nɔ wɛl, wi kin go to dɔktɔ, tɛl am aw wi de fil, ɛn du wetin i tɛl wi. Semweso, we wi padi biznɛs wit Jiova nɔ tayt igen, wi fɔ go to di ɛlda dɛn, tɛl dɛn bɔt wi prɔblɛm, ɛn fala di advays we dɛn de gi wi frɔm di Baybul.

5. Aw wi go no se wi nɔ gɛt tayt padi biznɛs wit Jiova igen?

⁵ Insay Jems chapta 5, Jems ɛnkɔrej wi fɔ tɔk to di ɛlda dɛn ɛnitɛm we wi bigin notis se wi padi biznɛs wit Jiova nɔ tayt igen lɛk aw i bin de. So i rili mek sɛns fɔ lɛ wi tray fɔ gɛt di ɛp we wi nid bifo wi du sɔntin we go pwɛl wi padi biznɛs wit Jiova! Wi nid fɔ ɔnɛs wit wisɛf. Di Baybul wɔn wi se if wi nɔ tek tɛm, wi go ful wisɛf bay we wi de tink se wi padi biznɛs wit Jiova stil de lɛk aw i bin de trade. (Jems 1:22) Na so sɔm Kristian dɛn we bin de na Sadis bin de tink. Bɔt Jizɔs bin tɛl dɛn se dɛn nɔ de du tin dɛn we de mek Jiova gladi. (Rɛv. 3:​1, 2) Wan we aw wi go no if wi padi biznɛs wit Jiova stil tayt, na we wi kɔmpia di zil we wi gɛt naw to di zil we wi bin gɛt trade. (Rɛv. 2:​4, 5) I go fayn fɔ mek wi aks wisɛf dɛn kwɛstyɔn dɛn ya: ‘A stil de ɛnjɔy fɔ rid di Baybul ɛn tink gud gud wan bɔt am lɛk trade? A kin pripia fɔ di mitin dɛn ɔltɛm? A kin atɛnd ɔl di mitin dɛn? A stil de prich wit zil? A de tink di rayt we bɔt mɔni ɛn ɛnjɔymɛnt?’ If wi ansa to ɛniwan pan dɛn kwɛstyɔn dɛn ya na nɔ, dat min se wi padi biznɛs wit Jiova nɔ tayt igen lɛk aw i fɔ de. Ɛn if wi nɔ du natin bɔt am, i pɔsibul se wi padi biznɛs wit Jiova go pwɛl. If wi nɔ ebul mek wi padi biznɛs wit Jiova tayt bak, ɔ if wi dɔn ɔlrɛdi du sɔntin we Jiova nɔ lɛk, wi fɔ tɔk to di ɛlda dɛn fɔ ɛp wi.

6. Wetin di wan dɛn we dɔn kɔmit siriɔs sin fɔ du?

⁶ Sɔm pipul dɛn kin kɔmit siriɔs sin we kin mek dɛn pul dɛn kɔmɔt na di kɔngrigeshɔn if dɛn nɔ ripɛnt. If na da kayn sin de wi dɔn kɔmit, wi nid fɔ tɔk to wan pan di ɛlda dɛn. (1 Kɔr. 5:​11-13) Pɔsin we dɔn kɔmit siriɔs sin go nid fɔ mek dɛn ɛp am fɔ gɛt tayt padi biznɛs wit Jiova bak. Fɔ mek Jiova go yuz Jizɔs in day fɔ fɔgiv wi, wi fɔ du “tin dɛn we de sho se [wi] dɔn ripɛnt.” (Akt 26:20) Wan pan dɛn tin dɛn de na we wi go to di ɛlda dɛn we wi kɔmit siriɔs sin.

7. Udat bak go nid ɛp frɔm di ɛlda dɛn?

⁷ Di ɛlda dɛn nɔ jɔs de ɛp di wan dɛn we dɔn kɔmit siriɔs sin, bɔt dɛn de ɛp bak di wan dɛn we fil se i nɔ izi fɔ mek dɛn nɔ du di bad tin dɛn we dɛn kin fil fɔ du. (Akt 20:35) Sɔntɛm i nɔ go rili izi fɔ mek yu avɔyd fɔ du bad tin dɛn if i bi se bifo yu bi Kristian, yu bin dɔn yus fɔ tek drɔgs, wach rud rud pikchɔ ɛn fim dɛn, ɔ du mami ɛn dadi biznɛs di we aw Gɔd nɔ want. Nɔ fred fɔ tɔk to di ɛlda dɛn fɔ ɛp yu. Yu kin tɔk to ɛlda we yu no se go tek tɛm lisin to yu, gi yu fayn advays, ɛn ɛp yu fɔ biliv se yu go ebul mek Jiova gladi bay we yu nɔ du di bad tin we yu kin fil fɔ du. (Ɛkli. 4:12) If yu at pwɛl bikɔs yu kin fil fɔ du bad, di ɛlda dɛn go ɛp yu fɔ no se di we aw yu de fil de sho se yu valyu yu padi biznɛs wit Jiova ɛn yu nɔ de mek ovakɔnfidɛns.​—1 Kɔr. 10:12.

8. Fɔ se wi nid fɔ tɔk to di ɛlda dɛn bɔt ɔl di mistek dɛn we wi de mek? Ɛksplen.

⁸ Wi nɔ nid fɔ tɔk to di ɛlda dɛn bɔt ɔl di mistek dɛn we wi de mek. Fɔ ɛgzampul, lɛ wi se yu tɔk sɔntin we mek yu brɔda ɔ sista fil bad, sɔntɛm yu ivin vɛks pan am. If da kayn tin de apin, bifo yu go tɔk to di ɛlda dɛn, i go fayn fɔ mek yu fala Jizɔs in advays ɛn tray fɔ mek pis wit yu brɔda ɔ sista. (Mat. 5:​23, 24) Yu kin du risach bak bɔt tɔpik dɛn lɛk, fɔ tek tɛm du tin, fɔ peshɛnt, ɛn fɔ kɔntrol yusɛf, so dat yu go tray fɔ gɛt dɛn kwaliti dɛn de. Bɔt if yu stil nɔ ebul sɔlv yu prɔblɛm, yu kin tɔk to wan ɛlda fɔ ɛp yu. Insay di lɛta we apɔsul Pɔl bin rayt to di Kristian dɛn na Filipay, i bin tɛl wan brɔda fɔ ɛp Yuodia ɛn Sintiki fɔ sɔlv dɛn prɔblɛm. Ɛn i pɔsibul fɔ mek ɛlda na yu kɔngrigeshɔn ɛp yu bak fɔ du di sem tin.​—Fil. 4:​2, 3.

WETIN MEK WI FƆ KƆL DI ƐLDA DƐN?

9. Wetin mek wi nɔ fɔ alaw shem fɔ mek wi nɔ kɔl di ɛlda dɛn? (Prɔvabs 28:13)

⁹ We wi dɔn kɔmit siriɔs sin ɔ we wi fil se wi nɔ go ebul avɔyd di bad tin we wi kin fil fɔ du, wi go nid fɔ gɛt fet ɛn maynd fɔ mek wi tɔk to di ɛlda dɛn fɔ ɛp wi. Wi nɔ fɔ alaw shem fɔ mek wi nɔ kɔl di ɛlda dɛn. Wetin mek? Na bikɔs Jiova dɔn gi wi di ɛlda dɛn fɔ ɛp wi fɔ gɛt tayt padi biznɛs wit am. So we wi de tɔk to dɛn, wi de sho se wi trɔst Jiova ɛn de obe am. Wi no se wi nid in ɛp fɔ mek wi go kɔntinyu fɔ du di rayt tin. (Sam 94:18) Ɛn if wi dɔn sin, Gɔd go sɔri fɔ wi if wi kɔnfɛs wi sin ɛn lɛf fɔ du bad.​—Rid Prɔvabs 28:13.

10. Wetin go apin if wi tray fɔ ayd wi sin?

¹⁰ We wi tɛl di ɛlda dɛn bɔt di sin we wi dɔn kɔmit, Jiova go fɔgiv wi, ɛn wi go gɛt tayt padi biznɛs wit am bak. Bɔt if wi tray fɔ ayd wi sin, wi prɔblɛm go wɔs. We Kiŋ Devid bin tray fɔ ayd in sin, in at bin pwɛl pasmak ɛn i bin de ivin fil sik bikɔs i no se Jiova nɔ gladi fɔ am. (Sam 32:​3-5) Jɔs lɛk aw pɔsin in sik ɔ wund go wɔs if i nɔ trit am, na so wi padi biznɛs wit Jiova go kɔntinyu fɔ pwɛl if wi nɔ tɔk to di ɛlda dɛn we wi kɔmit siriɔs sin. Jiova nɔ want dat fɔ apin, na dat mek i de tɛl wi fɔ tɔk to di ɛlda dɛn we i de yuz fɔ ɛp wi so dat wi go bi in padi bak.​—Ayz. 1:​5, 6, 18.

11. If wi ayd siriɔs sin, aw dat go afɛkt ɔda pipul dɛn?

¹¹ If wi disayd fɔ ayd di siriɔs sin we wi dɔn kɔmit, wi go ambɔg ɔda pipul dɛn. Wi go mek Jiova in spirit nɔ de na di kɔngrigeshɔn lɛk aw i fɔ de, ɛn wi go ambɔg di pis we de bitwin wi brɔda ɛn sista dɛn. (Ɛfi. 4:30) Dɔn bak, if wi no se pɔsin na di kɔngrigeshɔn dɔn kɔmit siriɔs sin, wi fɔ ɛnkɔrej am fɔ tɔk to di ɛlda dɛn bɔt wetin i du.a If wi ɛp am fɔ ayd in sin, dat min se wisɛf de sin agens Jiova. (Liv. 5:1) Bikɔs wi lɛk Jiova, wi go tɛl di ɛlda dɛn di tru. We wi du dat, wi de protɛkt wi brɔda ɛn sista dɛn na di kɔngrigeshɔn, ɛn ɛp di pɔsin we dɔn sin fɔ gɛt tayt padi biznɛs wit Jiova bak.

AW DI ƐLDA DƐN DE ƐP WI?

12. Aw di ɛlda dɛn de ɛp di wan dɛn we nɔ gɛt tayt padi biznɛs wit Jiova igen?

¹² Di Baybul tɛl ɛlda dɛn fɔ ɛp di wan dɛn we nid fɔ gɛt tayt padi biznɛs wit Jiova bak. (1 Tɛs. 5:14) If yu dɔn du sɔntin we dɔn ambɔg yu padi biznɛs wit Jiova, di ɛlda dɛn go aks yu kwɛstyɔn dɛn fɔ mek dɛn go ɔndastand aw yu de tink ɛn fil. (Prɔv. 20:5) Sɔntɛm i nɔ go izi fɔ mek yu tɔk to di ɛlda dɛn. I go bi se i nɔ izi fɔ yu bikɔs ɔf yu kɔlchɔ, yu na pɔsin we de shem, ɔ yu de shem fɔ tɔk bɔt wetin dɔn apin. Bɔt yu go ebul fɔ ɛp di ɛlda dɛn if yu tɛl dɛn di prɔblɛm we yu gɛt. Nɔ fred se di tin dɛn we yu go tɔk go tan lɛk “fulish tɔk.” (Job 6:3) Di ɛlda dɛn nɔ go jɔj yu kwik kwik wan. Bifo dat, dɛn go tek tɛm lisin to yu so dat dɛn go no di tru bɔt ɔltin bifo dɛn gi yu advays frɔm di Baybul. (Prɔv. 18:13) Di ɛlda dɛn no se i kin tek tɛm fɔ gi pɔsin di ɛp we i nid, so dɛn nɔ de tink se na wan tɛm nɔmɔ dɛn go tɔk wit pɔsin fɔ gi am da ɛp de.

13. We di ɛlda dɛn pre fɔ wi ɛn gi wi advays frɔm di Baybul, aw dat kin ɛp wi? (Luk bak di pikchɔ dɛn.)

¹³ We yu de tɔk to di ɛlda dɛn, dɛn go tray tranga wan fɔ mek yu nɔ fil bad pasmak bɔt di bad tin we yu du. Bifo dat, dɛn go pre fɔ yu. Jiova go lisin to dɛn prea we “rili gɛt pawa.” Dɛn prea go kɔrej yu ɛn ɛp yu fɔ gɛt trɛnk pas aw yu de imajin. Dɛn go ɛp yu bak bay we dɛn go “rɔb ɔyl pan [yu] akɔdin to wetin Jiova want.” (Jems 5:​14-16) Dis “ɔyl” tinap fɔ di tru we de na Gɔd in Wɔd. So di ɛlda dɛn go yuz di rayt skripchɔ dɛn fɔ kɔrej yu ɛn ɛp yu fɔ gɛt tayt padi biznɛs wit Jiova bak. (Ayz. 57:18) Di advays we dɛn go gi yu frɔm di Baybul go mek yu gɛt di trɛnk we yu nid fɔ kɔntinyu fɔ du wetin rayt. Di ɛlda dɛn go ɛp yu fɔ yɛri Jiova in vɔys we i de se: “Dis na di rod. . . . Waka de.”—Ayz. 30:21.

14. Akɔdin to Galeshians 6:​1, aw di ɛlda dɛn de ɛp ɛnibɔdi we dɔn go “di rɔng say”? (Luk bak di pikchɔ dɛn.)

¹⁴ Rid Galeshians 6:1. We di Baybul se Kristian de go “di rɔng say,” i min se i nɔ de du wetin Jiova want am fɔ du. Sɔntɛm i disayd fɔ du di rɔng tin ɔ i kɔmit siriɔs sin. Bikɔs di ɛlda dɛn lɛk dɛn brɔda ɛn sista dɛn, dɛn kin “tek tɛm tray fɔ ajɔst da kayn pɔsin de.” Dɛn bin de yuz di Grik wɔd we dɛn translet as “ajɔst” fɔ tɔk bɔt wetin dɔktɔ kin du we pɔsin in bon shift ɔ brok. Di dɔktɔ kin tray fɔ put di bon na di rayt ples so dat i go wɛl fayn. Gud dɔktɔ kin tek tɛm we i de tray fɔ du am so dat di pɔsin nɔ go fil pen tumɔs. Semweso, we di ɛlda dɛn de tray fɔ kɔrɛkt pɔsin we dɔn go di rɔng say, dɛn nɔ want fɔ mek di pɔsin fil mɔ pen. Bifo dat, dɛn de du dɛn bɛst fɔ kɔrɛkt am di kayn we we de sho se dɛn lɛk am. Di Baybul tɛl di ɛlda dɛn bak fɔ “wach [dɛnsɛf].” We di ɛlda dɛn de ɛp pɔsin fɔ aplay Baybul prinsipul, dɛn de mɛmba se dɛnsɛf nɔ pafɛkt ɛn dɛn kin mek mistek. So dɛn de rili tek tɛm fɔ mek dɛn nɔ tink se dɛn de du wetin rayt pas di pɔsin we dɛn de tray fɔ ɛp. Bifo dat, dɛn de put dɛnsɛf dɔŋ, sho se dɛn gɛt sɔri-at, ɛn dɛn nɔ de jɔj di pɔsin.​—1 Pit. 3:8.

15. Wetin wi go du if wi gɛt prɔblɛm?

¹⁵ Wi kin trɔst di ɛlda dɛn na di kɔngrigeshɔn. Jiova dɔn tren dɛn fɔ mek dɛn nɔ tɛl ɔda pipul dɛn di tin dɛn we wi de tɛl dɛn. Dɛn dɔn lan se dɛn nɔ fɔ tɛl wi wetin dɛn tink se rayt, bɔt dɛn fɔ gi wi advays frɔm di Baybul. Ɛn dɛn nid fɔ kɔntinyu fɔ ɛp wi fɔ bia di prɔblɛm dɛn we wi gɛt. (Prɔv. 11:13; Gal. 6:2) Di ɛlda dɛn gɛt difrɛn kwaliti dɛn, ɛn sɔm pan dɛn dɔn bi ɛlda fɔ lɔng tɛm pas ɔda wan dɛn. Bɔt stil, wi fɔ fil fri fɔ tɔk to ɛniwan pan dɛn bɔt wi prɔblɛm. I impɔtant fɔ lɛ wi mɛmba se wi nɔ fɔ de go to difrɛn difrɛn ɛlda dɛn fɔ aks fɔ advays ɛn abop se wan pan dɛn go tɛl wi wetin wi want fɔ yɛri. If wi du dat, wi go tan lɛk pɔsin we want fɔ mek dɛn “tiklis [in] yes” ɛn we nɔ want fɔ lan “di tichin we gud” we de na Gɔd in Wɔd. (2 Tim. 4:3) We wi tɔk to wan ɛlda bɔt wi prɔblɛm, sɔntɛm i go aks wi if wi dɔn tɔk to ɔda ɛlda dɛn bɔt am ɛn us advays dɛn bin gi wi. Ɛn fɔ sho se i de put insɛf dɔŋ, sɔntɛm i go aks ɔda ɛlda fɔ advays.​—Prɔv. 13:10.

DI TIN WE WI FƆ DU FƆ WISƐF

16. Wetin wi nid fɔ du fɔ wisɛf?

¹⁶ Pan ɔl we na di ɛlda dɛn gɛt di wok fɔ kia fɔ wi, dɛn nɔ de tɛl wi wetin wi fɔ du. Wi ɔl nid fɔ sho Jiova se wi lɛk am ɛn wi want fɔ mek i gladi bay di tin dɛn we wi de tɔk ɛn du ɛvride. (Rom. 14:12) Ɛn Jiova go ɛp wi fɔ du di rayt tin dɛn ɛn kɔntinyu fɔ fetful to am. Na dat mek di ɛlda dɛn nɔ go tɛl wi wetin fɔ du. Bifo dat, dɛn go yuz di Baybul fɔ ɛp wi fɔ ɔndastand aw Jiova de tink bɔt sɔntin ɛn alaw wi fɔ disayd fɔ wisɛf. We wi fala di advays we dɛn gi wi frɔm di Baybul, wi go ebul fɔ tren wi “maynd” fɔ tink lɛk aw Jiova de tink ɛn disayd fɔ du di rayt tin dɛn.​—Ibru. 5:14.

17. Wetin wi fɔ mek-ɔp wi maynd fɔ du?

¹⁷ Na big big ɔnɔ wi gɛt fɔ mek Jiova kia fɔ wi lɛk aw gud shɛpad de kia fɔ in ship dɛn! Jiova bin sɛn “di gud shɛpad,” we na Jizɔs, fɔ day fɔ wi so dat wi go gɛt layf we go de sote go. (Jɔn 10:11) Jiova de yuz di ɛlda dɛn bak fɔ kia fɔ wi na di kɔngrigeshɔn, jɔs lɛk aw i prɔmis se: “A go gi una shɛpad dɛn we go du tin akɔdin to wetin a want, ɛn dɛn go mek una no sɔntin ɛn tink gud wan fɔ ɔndastand.” (Jɛr. 3:15) So if wi fil se wi nɔ gɛt bɛtɛ fet igen ɔ wi padi biznɛs wit Jiova nɔ tayt igen, wi nɔ fɔ fred fɔ tɔk to di ɛlda dɛn fɔ ɛp wi. Lɛ wi mek-ɔp wi maynd fɔ bɛnifit gud gud wan frɔm di ɛp we Jiova de yuz di ɛlda dɛn fɔ ɛp wi.