Nɔ Westɛm fɔ Ɛp Pipul dɛn We Want fɔ Lan bɔt Gɔd

1. Wetin kin apin we pipul dɛn yɛri di gud nyuz? (Akt 13:​47, 48; 16:​14, 15)

INSAY di fɔstɛm Kristian dɛn tɛm, bɔku pipul dɛn bin gladi we dɛn prich to dɛn bɔt Jizɔs, ɛn dɛn bin want fɔ bi Kristian wantɛm wantɛm. (Rid Akt 13:​47, 48; 16:​14, 15.) Semweso, sɔm pipul dɛn tide kin gladi we dɛn yɛri di gud nyuz fɔ di fɔs tɛm. Ivin di wan dɛn we nɔ kin want fɔ yɛri di Kiŋdɔm mɛsej di fɔs tɛm we wi prich to dɛn, kin chenj leta ɛn bigin wɔship Gɔd. Wetin wi fɔ du we wi mit pipul dɛn “we rili sho se dɛn want” fɔ lan bɔt Gɔd ɛn di Baybul?

2. Aw wi prichin wok fiba di wok we fama de du?

² Lɛ wi tɔk bɔt wan ɛgzampul. Wi go kɔmpia wi prichin wok to di wok we fama de du. Sɔm pan di frut dɛn na di gadin kin rɛp bifo ɔda wan dɛn, so di fama kin nid fɔ avɛst dɛn wantɛm wantɛm. Bɔt i go stil nid fɔ kɔntinyu fɔ wata di ɔda wan dɛn ɛn ɛp dɛn fɔ gro. Semweso, we wi si pɔsin we rɛdi fɔ lisin to wi mɛsej, wi want fɔ ɛp am wantɛm wantɛm fɔ bi Krays in disaypul. Bɔt fɔ di wan dɛn we nɔ rɛdi yet, wi want fɔ kɔntinyu fɔ ɛp dɛn fɔ si wetin mek i fayn fɔ lan bɔt Gɔd ɛn di Baybul. (Jɔn 4:​35, 36) We wi no udat dɛn want fɔ lisin ɛn di wan dɛn we nɔ want fɔ lisin, dat go ɛp wi fɔ no aw fɔ ɛp dɛn. Insay dis atikul, wi go tɔk bɔt tin dɛn we go ɛp wi fɔ no wetin fɔ du di fɔs tɛm we wi tɔk to pɔsin we rɛdi fɔ lisin. Wi go tɔk bak bɔt aw wi go kɔntinyu fɔ ɛp dɛn fɔ go bifo.

AW WI GO ƐP PIPUL DƐN WE WANT FƆ LAN BƆT GƆD ƐN DI BAYBUL?

3. Wetin wi fɔ du we wi mit pipul dɛn we want fɔ no mɔ? (1 Kɔrintians 9:26)

³ We wi mit pipul dɛn we want fɔ no mɔ, wi want fɔ ɛp dɛn fɔ lan bɔt Jiova wantɛm wantɛm ɛn kam nia am. Na dat mek wi fɔ tɛl dɛn bɔt di arenjmɛnt we wi gɛt fɔ stɔdi pipul dɛn ɛn invayt dɛn na wi mitin dɛn di fɔs tɛm we wi tɔk to dɛn.—Rid 1 Kɔrintians 9:26.

4. Tɔk bɔt wan ɛkspiriɛns bɔt pɔsin we bin rɛdi fɔ stɔdi di Baybul wantɛm wantɛm.

⁴ Tɛl pipul dɛn bɔt di arenjmɛnt we wi gɛt fɔ stɔdi di Baybul. Sɔm pipul dɛn we wi kin tɔk to kin rɛdi fɔ stɔdi di Baybul wantɛm wantɛm. Fɔ ɛgzampul, wan Tɔsde, wan yɔŋuman na Kanada bin tek di Ɛnjɔy Layf Sote Go! brosho na di kat. Di sista we bin de na di kat ɛksplen to am se wi de yuz di brosho fɔ stɔdi pipul dɛn di Baybul fɔ fri. Di uman bin sho se i want fɔ no mɔ ɛn i bin gi di sista in fon nɔmba. Leta da sem de de, di uman bin sɛn mɛsej to di sista ɛn aks am bɔt di stɔdi. We di sista tɛl am se i go go to am insay di wikɛnd, di uman aks am se: “Yu nɔ go ebul kam tumara? A nɔ gɛt natin fɔ du.” Dɛn stɔdi da Frayde de. Di uman atɛnd in fɔs mitin da sem wikɛnd de ɛn i kɔntinyu fɔ go bifo pan in padi biznɛs wit Jiova.

5. Wetin wi fɔ du if wi si se di pɔsin nɔ rɛdi yet fɔ stɔdi di Baybul? (Luk bak di pikchɔ dɛn.)

⁵ As wi ɔl no, nɔto ɔlman we lisin to wi mɛsej go rɛdi fɔ stɔdi di Baybul wantɛm wantɛm lɛk da yɔŋuman de. Sɔm pipul dɛn go nid mɔ tɛm. Sɔntɛm wi go nid fɔ tɔk fɔs bɔt tɔpik we di pɔsin go want fɔ no mɔ bɔt. Bɔt stil, if wi kɔntinyu fɔ tink di rayt we bɔt di pɔsin ɛn sho se wi bisin bɔt am, sɔntɛm wi go ebul fɔ stat fɔ stɔdi wit am insay shɔt tɛm. Wetin wi go tɔk we wi de tɛl pɔsin bɔt di arenjmɛnt we wi gɛt fɔ stɔdi di Baybul? Dɛn bin aks sɔm brɔda ɛn sista dɛn we sabi aw fɔ stat Baybul stɔdi dis kwɛstyɔn.

6. Wetin wi go se fɔ ɛp pɔsin we want fɔ stɔdi di Baybul?

⁶ Di pɔblisha ɛn payɔnia dɛn we dɛn aks bɔt aw fɔ stat Baybul stɔdi bin tɔk se, na sɔm kɔntri dɛn i bɛtɛ fɔ avɔyd wɔd dɛn lɛk “stɔdi,” “Baybul stɔdi,” ɔ “tich yu,” we wi de tɛl pipul dɛn bɔt di arenjmɛnt we wi gɛt fɔ stɔdi di Baybul. Dɛn bin tɔk se i bɛtɛ fɔ yuz wɔd dɛn lɛk “tɔk bɔt” ɔ “no mɔ bɔt di Baybul.” Fɔ ɛp di pɔsin fɔ mek i go want fɔ tɔk to yu bak, yu kin tɔk sɔntin lɛk, “Yu go sɔprayz fɔ no se di Baybul ansa impɔtant kwɛstyɔn dɛn we wi kin gɛt” ɔ “Di Baybul nɔto jɔs buk we de tɔk bɔt Gɔd, i gɛt advays dɛn bak we de ɛp wi.” Yu kin tɔk bak se: “Insay 10 to 15 minit, yu go lan sɔntin we go rili ɛp yu.” Wi nɔ nid fɔ yuz wɔd dɛn lɛk “apɔyntmɛnt” ɔ “ɛni wik,” bikɔs i go mek di pɔsin fil se na sɔntin we i fɔ du paopa.

7. Ustɛm sɔm pipul dɛn kin no se wetin dɛn de lan na di Baybul na di tru tin dɛn? (1 Kɔrintians 14:​23-25)

⁷ Invayt dɛn na mitin. Insay apɔsul Pɔl in tɛm, sɔm pipul dɛn bin kam fɔ si se na di tru tin dɛn bin de lan we dɛn atɛnd mitin fɔ di fɔs tɛm. (Rid 1 Kɔrintians 14:​23-25.) Na di sem tin kin apin tide. Bɔku Baybul studɛnt dɛn kin go bifo pan dɛn padi biznɛs wit Jiova kwik kwik wan we dɛn bigin fɔ atɛnd di mitin dɛn. Ustɛm wi fɔ invayt dɛn? Lɛsin 10 na di Ɛnjɔy Layf Sote Go! buk gɛt say we de tɔk bɔt fɔ invayt Baybul studɛnt na mitin, bɔt wi nɔ nid fɔ wet te wi rich da lɛsin de bifo wi invayt dɛn. Yu kin invayt pɔsin fɔ atɛnd di wikɛnd mitin ivin di fɔs tɛm we yu tɔk to am. Sɔntɛm yu kin tɔk bɔt di pɔblik tɔk in taytul ɔ tɔk bɔt sɔntin we wi go lan insay di Wachtawa Stɔdi fɔ da wik de.

8. Wetin wi go tɛl pɔsin we wi de invayt am fɔ atɛnd mitin? (Ayzaya 54:13)

⁸ We wi de invayt pɔsin we want fɔ no mɔ, wi fɔ ɛksplen aw wi mitin dɛn difrɛn frɔm di we aw ɔda rilijɔn dɛn kin gɛt dɛn savis we i dɔn yus to. We wan Baybul studɛnt bin atɛnd mitin fɔ di fɔs tɛm ɛn si aw dɛn de kɔndɔkt di Wachtawa Stɔdi, i bin aks in Baybul ticha se: “Fɔ se di kɔndɔktɔ sabi ɔlman in nem?” Di sista tɛl am se wi ɔl de tray fɔ no ɔlman in nem na di kɔngrigeshɔn, jɔs lɛk aw wi sabi ɔlman in nem na wi famili. Di studɛnt bin si se dis rili difrɛn frɔm wetin de apin nain chɔch. Bɔku pipul dɛn nɔ no di rizin we mek wi kin atɛnd wi mitin dɛn. (Rid Ayzaya 54:13.) Wi kin go na mitin fɔ wɔship Jiova, fɔ lan bɔt am, ɛn fɔ ɛnkɔrej wisɛf. (Ibru. 2:12; 10:​24, 25) Na dat mek wi nɔ kin pafɔm sɛrimɔni na wi mitin dɛn. Wi mitin dɛn ɔganayz ɛn wi kin lan impɔtant tin dɛn we de ɛp wi. (1 Kɔr. 14:40) Dɔn bak, di Kiŋdɔm Ɔl dɛn simpul ɛn dɛn mek dɛn di kayn we we de mek i izi fɔ lɛ wi lan. Bikɔs wi nyutral, wi nɔ de tɔk bɔt pɔlitiks. Ɛn wi nɔ de agyu bɔt tin dɛn we de apin ɔ wetin ɔda pɔsin tink. Bifo di studɛnt atɛnd mitin, i go fayn fɔ sho am di vidio we gɛt di taytul, Wetin Kin Apin na Kiŋdɔm Ɔl? We yu du dat, yu go ɛp am fɔ no wetin i fɔ ɛkspɛkt we i atɛnd mitin.

9-10. We wi de invayt pɔsin fɔ atɛnd mitin, wetin wi go tɛl am we go mek i nɔ fred fɔ atɛnd? (Luk bak di pikchɔ.)

⁹ Sɔm pipul dɛn nɔ kin want fɔ atɛnd wi mitin bikɔs dɛn de fred se if dɛn atɛnd, wi go want mek dɛn bi “Jiova Witnɛs.” Ɛp di pɔsin fɔ no se wi kin lɛk we ɔda pipul dɛn kin atɛnd wi mitin dɛn ɛn wi nɔ kin fos dɛn fɔ jɔyn wi ɔ tek pat pan di program. Wi kin gladi we famili dɛn kin atɛnd wit dɛn pikin dɛn. Mama ɛn papa dɛn ɛn dɛn pikin dɛn kin sidɔm togɛda ɛn lan di sem tin na wi mitin dɛn. Bikɔs ɔf dat, mama ɛn papa dɛn kin no udat dɛn pikin dɛn de wit ɛn wetin dɛn de tich dɛn. (Dyu. 31:12) Wi nɔ de aks fɔ kɔlɛkshɔn ɔ gi ɛnvilɔp fɔ put mɔni. Bifo dat, wi de fala wetin Jizɔs bin tɛl wi we i se: “Una gɛt am fri, so una gi fri.” (Mat. 10:8) Yu kin tɛl di pɔsin bak se i nɔ nid fɔ wɛr dia klos fɔ atɛnd di mitin. Na di at Gɔd de wach, nɔto aw pɔsin drɛs.—1 Sam. 16:7.

¹⁰ If di pɔsin atɛnd wi mitin, du wetin yu ebul fɔ sho se yu gladi fɔ we i kam. Sho am to di ɛlda dɛn ɛn ɔda brɔda ɛn sista dɛn. If i si se una wɛlkɔm am fayn, sɔntɛm i go gladi fɔ kam ɔda tɛm. We di mitin de ɔn, yu kin mek una ɔl tu wach yu Baybul ɛn ɛp am fɔ ɔndastand di tɔk we dɛn de gi ɛn wetin wi de stɔdi.

WETIN YU GO DU WE YU STAT FƆ STƆDI DI BAYBUL WIT PƆSIN?

11. Aw yu go sho se yu rɛspɛkt di pɔsin in tɛm?

¹¹ Wetin na sɔm tin dɛn we wi fɔ mɛmba we wi de stɔdi di Baybul wit pɔsin? Rɛspɛkt di pɔsin in tɛm ɛn no se i gɛt ɔda tin dɛn fɔ du. Fɔ ɛgzampul, if una dɔn pik tɛm fɔ stɔdi, go da tɛm de, ilɛksɛf pipul dɛn na yu eria nɔ rɛspɛkt taym. Dɔn bak, i go fayn fɔ mek una nɔ yuz bɔku tɛm we una de stɔdi fɔ di fɔs tɛm. Sɔm pɔblisha dɛn we gɛt ɛkspiriɛns advays se i go fayn nɔ fɔ spɛn lɔng tɛm fɔ stɔdi di pɔsin, ilɛksɛf i want fɔ lan mɔ. Ɛn nɔ tɔk bɔku. Alaw di pɔsin fɔ tɔk bɔt aw i de fil ɛn tink.—Prɔv. 10:19.

12. Wetin fɔ bi wi gol we wi bigin fɔ stɔdi di Baybul wit pɔsin?

¹² We una bigin di stɔdi, yu gol fɔ bi fɔ ɛp di studɛnt fɔ no Jiova ɛn Jizɔs ɛn fɔ lɛk dɛn. Fɔ mek yu go ebul fɔ du dat, yu nid fɔ sho dɛn ɔltɛm wetin di Baybul se ɛn nɔ jɔs tɛl dɛn wetin yu tink. (Akt 10:​25, 26) Apɔsul Pɔl sɛt fayn ɛgzampul fɔ wi. Bɔku tɛm, we i bin de tich pipul dɛn, i bin de pe atɛnshɔn pan Jizɔs Krays we na di pɔsin we Jiova sɛn fɔ ɛp wi fɔ lan bɔt am ɛn lɛk Am. (1 Kɔr. 2:​1, 2) Pɔl bin mek wi no bak klia wan se i impɔtant fɔ ɛp brɔda ɛn sista dɛn we jɔs baptayz fɔ gɛt fayn kwaliti dɛn, we wi go kɔmpia to gold, silva, ɛn ston dɛn we gɛt valyu. (1 Kɔr. 3:​11-15) Dɛn kwaliti dɛn de na fet, sɛns, fɔ tink gud gud wan fɔ ɔndastand, ɛn fɔ fred Jiova. (Sam 19:​9, 10; Prɔv. 3:​13-15; 1 Pit. 1:7) Falamakata di we aw Pɔl bin de tich bay we yu de ɛp yu studɛnt dɛn fɔ gɛt strɔng fet ɛn tayt padi biznɛs wit dɛn Papa we lɛk dɛn we de na ɛvin.—2 Kɔr. 1:24.

13. We wi de tray fɔ ɛp wi studɛnt, aw wi go sho se wi na pɔsin we peshɛnt ɛn we de ɔndastand? (2 Kɔrintians 10:​4, 5) (Luk bak di pikchɔ.)

¹³ Falamakata di we aw Jizɔs bin de tich bay we yu bi pɔsin we peshɛnt ɛn we de ɔndastand. Avɔyd fɔ aks kwɛstyɔn dɛn we go mek di pɔsin shem. If i nɔ izi fɔ mek yu studɛnt ɔndastand wan patikyula pɔynt, una nɔ nid fɔ kɔntinyu fɔ tɔk bɔt da pɔynt de. Bifo dat, una kɔntinyu wit di stɔdi ɛn tɔk bɔt da pɔynt de leta. Bifo yu tray fɔ fos am fɔ biliv wan patikyula tin we di Baybul de tich we i nɔ rɛdi yet, alaw tɛm fɔ pas fɔ mek di tin dɛn we i de lan tɔch in at. (Jɔn 16:12; Kol. 2:​6, 7) Di Baybul se lay lay tichin dɛn tan lɛk “tin dɛn we rili rili strɔng” we wi nid fɔ “chenj.” (Rid 2 Kɔrintians 10:​4, 5) Sɔntɛm i nɔ go izi fɔ mek yu studɛnt lɛf fɔ biliv sɔntin we i bin dɔn biliv fɔ lɔng tɛm. So wi nid fɔ ɛp am fɔs fɔ abop pan Jiova. Da tɛm de i go izi fɔ mek di studɛnt lɛf fɔ biliv di tin dɛn we i bin biliv tranga wan.​—Sam 91:9.

AW WI GO ƐP NYU WAN DƐN WE DƐN BIGIN FƆ ATƐND MITIN?

14. Aw wi fɔ trit nyu wan dɛn we dɛn atɛnd wi mitin dɛn?

¹⁴ Jiova want wi fɔ trit ɔlman di sem we ilɛk usay dɛn kɔmɔt, dɛn kɔlchɔ, ɔ ilɛk dɛn jɛntri ɔ po. (Jems 2:​1-4, 9) So aw wi go ɛp nyu wan dɛn we dɛn atɛnd wi mitin dɛn?

15-16. Aw wi go ɛp nyu wan dɛn fɔ fil fayn we dɛn atɛnd wi mitin dɛn?

¹⁵ Sɔm pipul kin jɔs kam na wi mitin dɛn bikɔs dɛn want fɔ si wetin kin apin de ɔ sɔm kin kam bikɔs pɔsin we de ɔdasay invayt dɛn. So we yu si nyu pɔsin atɛnd wi mitin, na fɔ tɔk to am. Wɛlkɔm am fayn, bɔt nɔ mek i shem. Mek i sidɔm nia yu. Mek lɛ una ɔl tu yuz yu Baybul ɛn di pɔblikeshɔn we una de yuz fɔ di mitin, ɔ mek lɛ i gɛt in yon. Dɔn bak, tink bɔt ɔda tin dɛn we yu go du fɔ mek di pɔsin fil fayn. Wan man we bin kam na Kiŋdɔm Ɔl fɔ di fɔs tɛm bin tɛl di brɔda we wɛlkɔm am se i bin de shem bikɔs i nɔ drɛs di rayt we fɔ atɛnd mitin. Di brɔda bin tɔk fayn to am ɛn tɛl am se Jiova Witnɛs dɛn na jɔs nɔmal pipul dɛn. Leta di man bin baptayz, ɛn i nɔ ɛva fɔgɛt di we aw di brɔda bin trit am. Bɔt wi want fɔ tek tɛm we wi de tɔk to nyu wan dɛn we atɛnd wi mitin. Wi nɔ want fɔ aks kwɛstyɔn dɛn we go mek dɛn shem ɔ bɔt tin dɛn we nɔto wi biznɛs.—1 Pit. 4:15.

¹⁶ Ɔda we de bak we wi kin mek dɛn fil fayn. Fɔ ɛgzampul, we wi de tɔk, gi kɔmɛnt, ɔ du wi pat dɛn na mitin, wi fɔ sho se wi gɛt rɛspɛkt fɔ di wan dɛn we nɔto Jiova Witnɛs dɛn ɛn di tin dɛn we dɛn biliv. Avɔyd fɔ yuz wɔd dɛn we go ɔfɛn nyu wan dɛn ɔ mek dɛn nɔ want fɔ kam bak. (Tay. 2:8; 3:2) Fɔ ɛgzampul, wi fɔ sho se wi rɛspɛkt di tin dɛn we dɛn biliv bay di we aw wi de tɔk. (2 Kɔr. 6:3) Brɔda dɛn we de gi pɔblik tɔk rili nid fɔ tek tɛm we dɛn de tɔk bɔt wetin ɔda pipul dɛn biliv. Dɛn fɔ sho bak se dɛn de tink bɔt di wan dɛn we de lisin to dɛn we nɔto Jiova Witnɛs bay we dɛn de ɛksplen wɔd dɛn ɔ tin dɛn we nyu wan dɛn nɔ go ɔndastand.

17. Wetin fɔ bi wi gol we wi mit pipul dɛn we “rili sho se dɛn want fɔ gɛt layf we go de sote go”?

¹⁷ Ɛvride, wi prichin wok de ɔjɛnt mɔ ɛn mɔ, ɛn wi fɔ kɔntinyu fɔ luk fɔ pipul dɛn we “rili sho se dɛn want fɔ gɛt layf we go de sote go.” (Akt 13:48) We wi fɛn dɛn, wi nɔ fɔ westɛm fɔ tɛl dɛn bɔt di arenjmɛnt we wi gɛt fɔ stɔdi di Baybul ɔ fɔ invayt dɛn na wi mitin. We wi du dat, wi go ɛp dɛn fɔ du wan pan di fɔs tin dɛn we go mek dɛn de na “di rod we . . . go mek pɔsin ɛnd-ɔp fɔ gɛt layf.”—Mat. 7:14.