1925​—Wan Ɔndrɛd Ia we Dɔn Pas

WE PƆSIN DE ƐKSPƐKT SƆNTIN ƐN NƆ GƐT AM

Insay 1925, bɔku Baybul Studɛnt dɛn bin de ɛkspɛkt se di wɔl go bi Paradays. Wetin mek? Brɔda Albat Shroda, we bin leta bi mɛmba na di Gɔvnin Bɔdi, tɔk se: “Wi bin tink se Krays in anɔyntɛd disaypul dɛn we bin dɔn lɛf na di wɔl go go na ɛvin ɛn de pat pan di Kiŋdɔm, ɛn fetful man dɛn we bin de trade trade lɛk Ebraam, Devid, ɛn ɔda wan dɛn go gɛt layf bak fɔ bi prins dɛn we go rul oba di wɔl as pat pan Gɔd in Kiŋdɔm.” So we dat nɔ bin apin, sɔm brɔda ɛn sista dɛn at bin pwɛl.—Prɔv. 13:12.

Pan ɔl we di tin dɛn we dɛn bin de ɛkspɛkt nɔ apin, bɔku Baybul Studɛnt dɛn bin kɔntinyu fɔ du di prichin wok ɛn dɛn bin kam fɔ ɔndastand di wok we dɛn gɛt as Jiova in Witnɛs dɛn gud gud wan. Fɔ ɛgzampul, lɛ wi tɔk bɔt aw dɛn bin yuz redio fɔ prich to bɔku pipul dɛn.

DƐN BIL BƆKU REDIO STESHƆN DƐN

Insay 1924, bɔku pipul dɛn bin de lisin to di WBBR redio steshɔn. So insay 1925, di Baybul Studɛnt dɛn bin bil ɔda pawaful redio steshɔn nia Chikago, na Ilinɔy. Di nem we dɛn bin gi di nyu redio steshɔn na WORD. Wan redio injinia we nem Ralf Lɛfla, we bin ɛp fɔ bil di steshɔn bin tɔk se: “Dɛn ivintɛm dɛn we ples kin kol, pipul dɛn na difrɛn say dɛn bin de lisin to dis redio steshɔn.” Fɔ ɛgzampul, wan famili we bin de lɛk 5,000 kilomita (3,000 mayl) frɔm usay di redio steshɔn bin de, na wan siti we dɛn kɔl Paylɔt Steshɔn, we de na Alaska, bin lisin to di fɔs redio program. Afta di famili lisin to di program, dɛn bin rayt lɛta to di wan dɛn we de wok na di steshɔn fɔ tɛl dɛn tɛnki fɔ di spirichwal program we dɛn mek we dɔn ɛnkɔrej dɛn.

We di Disɛmba 1, 1925 Wach Tawa bin de ɛksplen wetin mek bɔku pipul dɛn bin ebul fɔ yɛri di program, i tɔk se: “WORD na bin wan pan di pawaful redio steshɔn dɛn na Amɛrika. Pipul dɛn we bin de ɔlsay na Amɛrika, Kyuba, ɛn na di say we fa pas ɔl na di nɔt pat na Alaska bin de yɛri di program. Bɔku pipul dɛn we nɔ bin ɛva yɛri di trut bin want fɔ lan mɔ bikɔs dɛn bin de lisin to dis redio steshɔn.”

Insay da sem tɛm de, di Baybul Studɛnt dɛn bin want fɔ yuz redio fɔ prich na Kanada. So insay 1924, dɛn bin bil wan redio steshɔn we dɛn kɔl CHUC na Saskatun, insay Saskachiwan. Na bin di fɔs rilijɔs redio steshɔn we bin de na Kanada. Bɔt insay 1925, dɛn bin nid fɔ transfa di redio steshɔn na ɔda ples bikɔs di say we dɛn bin de bin smɔl. So di Watch Tower Society bin muv di studio dɛn na di Rijɛnt Bildin, we na wan ol bildin na Saskatun, we dɛn bin bay ɛn rɛnovet fɔ mek am redio steshɔn.

Bikɔs ɔf dis redio steshɔn, bɔku pipul dɛn we bin de na smɔl tɔŋ ɛn vilej dɛn na Saskachiwan bin yɛri di gud nyuz fɔ di fɔs tɛm. Fɔ ɛgzampul, wan uman we nem Misis Gream we bin de na wan tɔŋ we de fa frɔm ɔda tɔŋ dɛn, bin rayt lɛta ɛn aks fɔ pɔblikeshɔn dɛn afta i lisin to wan redio program. Brɔda Jɔj Nesh bin tɔk se: “Di lɛta we di uman bin rayt fɔ aks wi fɔ tich am bin luk ɔjɛnt, so wi bin sɛn ɔl di Studies in the Scriptures fɔ am.” I nɔ te, Misis Gream bin bigin fɔ tɛl ɔda pipul dɛn di Kiŋdɔm mɛsej ivin fa fa say dɛn.

WI BIN LAN WAN IMPƆTANT TRUT

Di Mach 1, 1925, Wach Tawa bin gɛt wan impɔtant atikul we gɛt di taytul “Birth of the Nation.” Wetin mek dis atikul bin rili impɔtant? Fɔ sɔm tɛm, di Baybul Studɛnt dɛn bin no se Setan gɛt ɔganayzeshɔn, ɛn di wan dɛn we de pat pan dis ɔganayzeshɔn na di dimɔn dɛn we bin de na ɛvin, di lay lay rilijɔn dɛn, gɔvmɛnt dɛn, ɛn biznɛs ɔganayzeshɔn dɛn na dis wɔl. Bɔt “di slev we fetful ɛn gɛt sɛns” bin yuz dis atikul fɔ ɛp di brɔda ɛn sista dɛn fɔ ɔndastand se Jiova sɛf gɛt ɔganayzeshɔn, ɛn in ɔganayzeshɔn difrɛn fa fawe frɔm Setan in yon, ɛn i de agens Setan in ɔganayzeshɔn. (Mat. 24:45) Di slev we fetful ɛn gɛt sɛns bin ɛksplen bak se Gɔd in Kiŋdɔm bin dɔn bigin fɔ rul insay 1914, ɛn insay da ia de, bikɔs ɔf di “wɔ [we] fɔdɔm na ɛvin,” dɛn bin pul Setan ɛn in dimɔn dɛn kɔmɔt na ɛvin, ɛn naw dɛn de na dis wɔl.—Rɛv. 12:​7-9.

I nɔ bin izi fɔ mek sɔm Baybul Studɛnt dɛn gri wit dis nyu ɔndastandin. So bikɔs ɔf dat, di atikul bin tɔk se: “If sɔm pan di wan dɛn we de rid di Wach Tawa nɔ gri wit dis nyu ɔndastandin, wi de advays dɛn fɔ peshɛnt, abop pan Jiova, ɛn kɔntinyu fɔ sav am fetful wan.”

Bɔt wan kɔlpɔtɔ (we wi de kɔl naw payɔnia) we nem Tɔm Eya, we de na Briten, bin tɛl wi aw bɔku pan di Baybul Studɛnt dɛn bin fil bɔt da atikul de. I tɔk se: “Di brɔda dɛn bin rili gladi fɔ di we aw dɛn ɛksplen Rɛvɛleshɔn chapta 12. We wi no se di Kiŋdɔm dɔn bigin fɔ rul na ɛvin, wi bin rili gladi fɔ tɛl pipul dɛn dis gud nyuz. I bin mek wi gɛt mɔ zil fɔ prich ɛn mek wi no se Jiova go du wɔndaful tin dɛn tumara bambay.”

DƐN BIN LAN SE DƐN FƆ PRICH BƆT JIOVA

Tide, Jiova Witnɛs dɛn no di wɔd dɛn we de na Ayzaya 43:10 gud gud wan, we se: “Jiova se, ‘Una na mi witnɛs dɛn, fɔ tru, mi savant we a dɔn pik.’” Bɔt bifo 1925, wi nɔ bin de yuz dis skripchɔ so nɔmɔ na wi pɔblikeshɔn dɛn. Dat bin gɛt fɔ chenj. Insay 1925, Di Wach Tawa bin tɔk bɔt Ayzaya 43:10 ɛn 12 insay 11 difrɛn magazin dɛn!

Bifo Ɔgɔst dɔn insay 1925, di Baybul Studɛnt dɛn bin gɛt wan kɔnvɛnshɔn na Indianapolis, insay Indiana. Brɔda Josɛf F. Rutafɔd bin rayt mɛsej fɔ wɛlkɔm di pipul dɛn. Dis mɛsej bin de na di kɔnvɛnshɔn program we dɛn print. I bin rayt se: “Wi kam na dis kɔnvɛnshɔn fɔ gɛt . . . trɛnk frɔm di Masta ɛn go bak wit zil fɔ prich bɔt am.” Insay di et-dez kɔnvɛnshɔn, dɛn bin ɛnkɔrej di wan dɛn we atɛnd fɔ prich bɔt Jiova ɛnitɛm dɛn gɛt chans.

Satide, Ɔgɔst 29, Brɔda Rutafɔd bin gi wan tɔk we gɛt di tim: “A Call to Action.” Insay in tɔk, i bin tɔk mɔ bɔt wetin mek i impɔtant fɔ prich. I bin se: “Jiova tɛl in pipul dɛn se . . . : ‘Una na mi witnɛs dɛn . . . ɛn mi na Gɔd.’ Dɔn i gi dɛn dis klia kɔmand: ‘Es wan sayn fɔ di pipul dɛn.’ No ɔda pipul dɛn nɔ de na di wɔl we go es dis sayn, pas [in yon pipul dɛn], dat na di wan dɛn we gɛt di Masta in spirit, ɛn we na in witnɛs dɛn.”—Ayz. 43:12; 62:10.

Afta Brɔda Rutafɔd dɔn fɔ gi in tɔk, i bin rid wan dɔkyumɛnt we dɛn kɔl “Message of Hope,” ɛn ɔlman we bin de de bin gri wit wetin i rid. Di dɔkyumɛnt bin sho se na Gɔd in Kiŋdɔm nɔmɔ go mek “bɛtɛ fala mɔtalman, mek dɛn gɛt pis, wɛlbɔdi, fridɔm, wit layf ɛn gladi-at we go de sote go.” Leta, dɛn bin translet dis dɔkyumɛnt insay difrɛn langwej dɛn ɛn print am fɔ mek dɛn yuz am fɔ prich. Na lɛk 40 milyɔn kɔpi dɛn, dɛn bin sheb sheb.

Sɔm ia bin pas fɔs bifo di Baybul Studɛnt dɛn chenj dɛn nem to Jiova Witnɛs. Bɔt dɛn bin dɔn bigin fɔ ɔndastand se i rili impɔtant fɔ mek dɛn prich bɔt Jiova.

DƐN BIGIN FƆ GO FƐN DI WAN DƐN WE SHO SE DƐN WANT FƆ NO MƆ

As di Baybul Studɛnt dɛn de bɔku ɔlsay na di wɔl, di ɔganayzeshɔn bin ɛnkɔrej dɛn fɔ go fɛn di wan dɛn we bin sho se dɛn want fɔ no mɔ bɔt di gud nyuz. Afta dɛn du di kampen fɔ sheb sheb di Message of Hope trakt, di Bulɛtina bin tɔk se: “Una arenj fɔ go bak na os dɛn usay una bin lɛf di Message of Hope trakt.”

Di Janwari 1925 Bulɛtin bin tɔk bɔt wetin wan Baybul Studɛnt we de na Plano, Tɛksas bin tɔk. I bin se: “We wi bin go bak na say dɛn we wi bin dɔn ɔlrɛdi prich, wi bin sɔprayz fɔ si se bɔku pipul dɛn bin want fɔ lan mɔ pas di nyu eria dɛn we wi go prich. Insay tɛn ia, wi bin go bak fayv tɛm fɔ prich na wan tɔŋ na wi tɛritri. . . . Dis biɛn tɛm, Sista Ɛndriks ɛn mi mama bin go prich de bak ɛn dɛn bin sheb sheb bɔku buk dɛn pas ɛni ɔda tɛm.”

Na wan kɔntri we dɛn kɔl Panama, wan kɔlpɔtɔ bin tɔk se: “Bɔku pipul dɛn we bin drɛb mi kɔmɔt na dɛn os di fɔs tɛm we a go de, bin leta chenj we a go de bak di sɛkɔn ɔ tɔd tɛm. Dis ia we dɔn pas, a bin spɛn bɔku pan mi tɛm fɔ go fɛn pipul dɛn we a bin dɔn prich to, ɛn a bin gɛt bɔku fayn ɛkspiriɛns dɛn.”

WETIN WI DE OP FƆ DU INSAY DI IA WE DE KAM?

We di ia 1925 de dɔn, Brɔda Rutafɔd bin rayt lɛta to di kɔlpɔtɔ dɛn ɛn tɔk bɔt aw dɛn du di prichin wok insay da ia de, ɛn i tɔk bɔt di wok we dɛn fɔ du insay di ia we de kam stat. I bin se: “Insay dis ia we de kam dɔn, una bin gɛt di ɔnɔ fɔ kɔrej bɔku pipul dɛn we bin gɛt pwɛlat. Dis wok dɔn mek una gladi . . . Di ia we de kam stat go gi una chans fɔ prich bɔt Gɔd ɛn in kiŋdɔm, ɛn fɔ es in sayn fɔ di pipul dɛn . . . . So lɛ wi ɔl yuz wi vɔys dɛn fɔ prez wi Gɔd ɛn wi Kiŋ.”

As di ia 1925 de dɔn, di brɔda dɛn bin de mek plan fɔ mek di Bɛtɛl we de na Bruklin big pas aw i bin de. Insay 1926, dɛn bin bigin wan big kɔnstrɔkshɔn wok we di ɔganayzeshɔn nɔ bin dɔn ɛva du yet.