Gɔd in Lɔv Go De Sote Go

1-2. Aw bɔku Kristian dɛn kin fil we dɛn gɛt prɔblɛm?

IMAJIN se wan bot de midul di si ɛn big big briz de blo. Dɔn big big swɛlin de mek di bot de go ɔp ɛn dɔŋ. If pɔsin we de insay di bot nɔ put di ankɔ dɔŋ, da bot de go go ɛnisay we di swɛlin kɛr am go. Di ankɔ go mek di bot stɛdi ɛn mek big briz nɔ go wit am.

² We yu gɛt prɔblɛm we nɔ rili izi, sɔntɛm yu go fil se yu tan lɛk da bot de. Di we aw yu de fil kin chenj kwik kwik wan. Tɛm go de we yu go gɛt kɔnfidɛns se Jiova lɛk yu ɛn i de sɔpɔt yu; dɔn ɔda tɛm yu go de wɔnda if Jiova de si wetin de apin to yu. (Sam 10:1; 13:1) Sɔntɛm yu padi go tɔk sɔntin we go ɛnkɔrej yu ɛn mek yu fil fayn fɔ sɔm tɛm. (Prɔv. 17:17; 25:11) Bɔt afta sɔm tɛm, yu kin bigin fɔ dawt bak. Sɔntɛm yu go ivin tink se Jiova nɔ lɛk yu. We yu gɛt prɔblɛm, wetin yu go du we go mek i tan lɛk se yu dɔn put yu ankɔ dɔŋ? Ɔ wetin go ɛp yu fɔ gɛt kɔnfidɛns ɛn kɔntinyu fɔ gɛt kɔnfidɛns se Jiova lɛk yu ɛn i de sɔpɔt yu?

3. Akɔdin to Sam 31:7 ɛn 136:​1, wetin di wɔd dɛn “lɔv we nɔ de chenj” min? Wetin mek wi go se na Jiova sɛt di bɛst ɛgzampul fɔ sho lɔv we nɔ de chenj? (Luk bak di pikchɔ.)

³ We wi gɛt prɔblɛm, wan tin we wi go du we go mek i tan lɛk se wi dɔn put wi ankɔ dɔŋ, na we wi mɛmba Jiova in lɔv we nɔ de chenj. (Rid Sam 31:7; 136:1.) Di wɔd dɛn “lɔv we nɔ de chenj” min di kayn lɔv we yu go gɛt fɔ ɔda pɔsin we de dip insay yu at ɛn we go de sote go. Na Jiova sɛt di bɛst ɛgzampul fɔ sho lɔv we nɔ de chenj. Infakt, di Baybul tɔk se Jiova “rili gɛt lɔv we nɔ de chenj.” (Ɛks. 34:​6, 7) Di Baybul tɔk bak bɔt Jiova se: “Yu de rili sho lɔv we nɔ de chenj to ɔl di wan dɛn we de kɔl yu.” (Sam 86:5) Tink bɔt wetin dat min: Jiova nɔ de ɛva lɛf in fetful savant dɛn! We yu mɛmba se Jiova nɔ de ɛva kɔmɔt biɛn in savant dɛn, dat go ɛp yu fɔ tinap tranga wan we yu gɛt prɔblɛm.—Sam 23:4.

MƐMBA SE JIOVA IN LƆV NA WAN PAN DI MEN TIN DƐN WE DI BAYBUL DE TICH

4. Gi ɛgzampul dɛn bɔt di men tin dɛn we di Baybul de tich. Ɛksplen wetin mek i nɔ go izi fɔ lɛ pɔsin mek wi stɔp fɔ biliv dɛn tin dɛn de.

⁴ We wi gɛt prɔblɛm, wan ɔda tin we wi go du we go mek i tan lɛk se wi dɔn put wi ankɔ dɔŋ, na we wi mɛmba se Jiova in lɔv na wan pan di men tin dɛn we di Baybul de tich. Wetin yu kin tink bɔt we yu yɛri di wɔd dɛn “di men tin dɛn we di Baybul de tich?” Sɔntɛm yu go tink bɔt di tru tin dɛn we yu dɔn lan na Gɔd in Wɔd. Fɔ ɛgzampul, yu dɔn lan se Gɔd in nem na Jiova, Jizɔs na Gɔd in wangren Bɔypikin we insɛf sɛf mek, di wan dɛn we dɔn day nɔ no natin, ɛn di wɔl go bi Paradays usay mɔtalman dɛn go de sote go. (Sam 83:18; Ɛkli. 9:5; Jɔn 3:16; Rɛv. 21:​3, 4) Afta yu dɔn biliv se dɛn tin dɛn ya na tru, i nɔ go izi fɔ mek pɔsin mek yu stɔp fɔ biliv dɛn tin dɛn de. Wetin mek? Na bikɔs yu bin ɔndastand se tin dɛn de we de pruv se wetin yu lan na tru. We yu mɛmba se Jiova in lɔv na wan pan di men tin dɛn we di Baybul de tich, lɛ wi si aw dat go ɛp yu fɔ lɛf fɔ dawt se Jiova bisin bɔt yu ɛn i de si wetin de apin to yu.

5. Ɛksplen aw pɔsin kin stɔp fɔ biliv lay lay tin dɛn.

⁵ We yu bigin fɔ stɔdi di Baybul, wetin bin ɛp yu fɔ stɔp fɔ biliv di lay lay tin dɛn we yu bin biliv? I go bi se na bikɔs yu bin kɔmpia di tin dɛn we dɛn bin dɔn tich yu wit di tin dɛn we di Baybul de tich. Lɛ wi tɔk bɔt wan ɛgzampul: Lɛ wi se yu bin biliv se Jizɔs na Ɔlmayti Gɔd. Bɔt as yu de stɔdi di Baybul, yu aks yusɛf se, ‘Fɔ se dis tin we a biliv na tru?’ Afta yu dɔn stɔdi wetin di Baybul de tich bɔt dis tɔpik, yu bin kam fɔ no se Jizɔs nɔto Ɔlmayti Gɔd. Dɔn, bifo yu kɔntinyu fɔ biliv da lay lay tichin de, yu bin biliv di tru tin we di Baybul de tich we se: Na Jizɔs “fɔs Gɔd mek bifo ɛni ɔda tin,” in na di “wangren Pikin . . . we Gɔd insɛf sɛf mek.” (Kol. 1:15; Jɔn 3:18) As wi ɔl no, lay lay tichin dɛn tan lɛk “tin dɛn we rili rili strɔng” ɛn dɛn kin at fɔ chenj. (2 Kɔr. 10:​4, 5) Bɔt afta yu lan di trut, yu nɔ bin kɔntinyu fɔ biliv dɛn lay lay tin dɛn de igen.—Fil. 3:13.

6. Wetin mek yu fɔ biliv se Jiova “in lɔv we nɔ de chenj go de sote go”?

⁶ Yu kin du di sem tin we i kam to wetin di Baybul de tich bɔt Jiova in lɔv. We yu gɛt prɔblɛm, if yu bigin fɔ dawt se Jiova lɛk yu, aks yusɛf dis kwɛstyɔn, ‘Fɔ se di we aw a de tink kɔrɛkt?’ Kɔmpia di dawt we yu de dawt se Jiova lɛk yu wit di wɔd dɛn we de na Sam 136:​1, we na di tim skripchɔ fɔ dis atikul. Wetin mek Jiova tɔk se in lɔv “nɔ de chenj”? Wetin mek dɛn ripit di wɔd dɛn we se “in lɔv we nɔ de chenj go de sote go” 26 tɛm insay da sam de? Di ripit we dɛn ripit dɛn wɔd dɛn ya de sho se Jiova in lɔv we nɔ de chenj we i gɛt fɔ in pipul dɛn na wan pan di men tin dɛn we di Baybul de tich, jɔs lɛk di ɔda men tichin dɛn we yu dɔn biliv. If yu fil se Jiova nɔ valyu yu ɔ lɛk yu, dat na lay. Nɔ biliv da lay de jɔs lɛk aw yu nɔ go biliv ɛni ɔda lay lay tichin!

7. Tɔk bɔt sɔm skripchɔ dɛn we de ɛp wi fɔ biliv se Jiova lɛk wi.

⁷ Di Baybul tɔk bɔt bɔku ɔda tin dɛn we de sho se Jiova lɛk wi. Fɔ ɛgzampul, Jizɔs bin tɛl in disaypul dɛn se: “Una valyu pas bɔku sparo bɔd dɛn.” (Mat. 10:31) Jiova insɛf bin tɛl in pipul dɛn se: “A go gi yu trɛnk, fɔ tru, a go ɛp yu, a go rili ol yu wit mi raytan we de du wetin rayt.” (Ayz. 41:10) Notis se dɛn tɔk dɛn wɔd dɛn ya wit kɔnfidɛns. Jizɔs nɔ se, ‘Sɔntɛm una valyu pas bɔku sparo bɔd dɛn,’ ɛn Jiova nɔ tɔk se, ‘Sɔntɛm a go ɛp yu.’ Bifo dat, dɛn se “Una valyu pas bɔku sparo bɔd dɛn” ɛn “A go ɛp yu.” If yu ɛva gɛt prɔblɛm ɛn yu de dawt se Jiova lɛk yu, skripchɔ dɛn lɛk dɛn wan dɛn ya nɔ go jɔs mek yu fil se Jiova lɛk yu, bɔt dɛn go ɛp yu fɔ rili biliv se i lɛk yu. Di tin dɛn we dɛn skripchɔ dɛn ya tɔk na tru. We wi pre ɛn tink gud gud wan bɔt dat, i go ɛp wi fɔ tɔk di wɔd dɛn we de na 1 Jɔn 4:16 we se: “Wi dɔn no ɛn biliv se Gɔd lɛk wi.”a

8. Wetin yu go du if yu stil nɔ biliv se Jiova lɛk yu?

⁸ Bɔt wetin yu go du if yu stil nɔ biliv se Jiova lɛk yu? Na fɔ kɔmpia di we aw yu de fil wit wetin yu no bɔt Jiova. Mɛmba se di we aw yu de fil kin chenj, bɔt di tru tin dɛn we di Baybul tɔk bɔt Jiova in lɔv nɔ de chenj. If wi nɔ biliv se Jiova lɛk wi, dat min se wi nɔ biliv se di men kwaliti we i gɛt na lɔv.—1 Jɔn 4:8.

TINK GUD WAN BƆT AW JIOVA “RILI LƐK” YU

9-10. Wetin Jizɔs bin min we i tɔk na Jɔn 16:​26, 27 se “Di Papa [insɛf] rili lɛk una”? (Luk bak di pikchɔ.)

⁹ Wi go lan mɔ bɔt Jiova in lɔv we wi tink bɔt wetin Jizɔs bin tɛl in disaypul dɛn. I bin se: “Di Papa [insɛf] rili lɛk una.” (Rid Jɔn 16:​26, 27.) Jizɔs nɔ bin jɔs tɔk dɛn wɔd dɛn ya fɔ mek in disaypul dɛn gladi. Infakt, di vas dɛn we de bifo dis wan mek wi no se Jizɔs nɔ bin de tɔk bɔt aw in disaypul dɛn bin de fil. Na difrɛn tɔpik i bin de tɔk bɔt, we na prea.

¹⁰ Jizɔs bin jɔs dɔn tɛl in disaypul dɛn se dɛn fɔ yuz in nem fɔ pre, bɔt dɛn nɔ fɔ pre to am. (Jɔn 16:​23, 24) I bin impɔtant fɔ mek dɛn no dat. I go bi se afta Jizɔs gɛt layf bak, in disaypul dɛn go dɔn fil se dɛn fɔ pre to am. Sɔntɛm dɛn go want fɔ du dat bikɔs Jizɔs na dɛn padi. Dɛn go dɔn tink se bikɔs i rili lɛk dɛn, dat go mek i want fɔ lisin to dɛn prea ɛn beg in Papa fɔ ɛp dɛn. Bɔt Jizɔs bin tɛl dɛn se dɛn nɔ fɔ tink da we de. Wetin mek? Na bikɔs i bin tɛl dɛn se: “Di Papa [insɛf] rili lɛk una.” Fɔ tru bikɔs Jiova rili lɛk wi, na dat mek na insɛf sɛf de lisin to wi prea dɛn. Dis na wan pan di men tin dɛn we di Baybul de tich bɔt prea. Tink bɔt wetin dat min fɔ yu: Di stɔdi we yu de stɔdi di Baybul dɔn mek yu sabi Jizɔs ɛn lɛk am. (Jɔn 14:21) Jɔs lɛk dɛn disaypul dɛn de, yusɛf kin pre to Gɔd ɛn gɛt kɔnfidɛns se “[insɛf] rili lɛk” yu. Ɛnitɛm yu pre to Jiova, yu de sho se yu biliv dɛn wɔd dɛn de.—1 Jɔn 5:14.

NO DI RIZIN DƐN WE KIN MEK YU DAWT

11. Wetin mek Setan go gladi if wi dawt se Jiova lɛk wi?

¹¹ Wetin kin mek wi dawt se Jiova lɛk wi? Sɔntɛm yu go tɔk se na Setan, ɛn na tru bikɔs in na wan pɔsin we kin mek wi dawt. Setan tan lɛk layɔn we “de fɛn pɔsin fɔ swɛla,” ɛn i go gladi if wi de dawt se Jiova lɛk wi. (1 Pit. 5:8) Afta ɔl, na bikɔs Jiova lɛk wi na dat mek i sɛn in Pikin fɔ day fɔ wi, bɔt Setan want mek wi fil se wi nɔ fit fɔ mek Jizɔs day fɔ wi. (Ibru. 2:9) Udat go gladi if wi de dawt se Jiova lɛk wi? Na Setan. Ɛn i go gladi bak if wi stɔp fɔ sav Jiova bikɔs wi gɛt prɔblɛm. Setan want mek wi tink se Jiova nɔ lɛk wi. Bɔt dat nɔto tru bikɔs nain Jiova nɔ lɛk. Wan pan di “kɔni kɔni trik dɛn” we i de yuz ɔltɛm na fɔ mek wi fil se na wi Jiova nɔ lɛk, ɛn i nɔ want fɔ gɛt ɛnitin fɔ du wit wi. (Ɛfi. 6:11) We wi no wetin wi ɛnimi de tray fɔ du, dat go mek wi mek-ɔp wi maynd mɔ fɔ “de agens” am.—Jems 4:7.

12-13. Aw di pafɛkt we wi nɔ pafɛkt kin mek wi dawt se Jiova lɛk wi?

¹² Wan ɔda tin we kin mek wi dawt se Jiova lɛk wi na di sin we wi gɛt bikɔs wi nɔ pafɛkt. (Sam 51:5; Rom. 5:12) Sin dɔn pwɛl di padi biznɛs we mɔtalman gɛt wit Gɔd. Dɔn bak, i dɔn ambɔg wi wɛlbɔdi, di we aw wi de tink, ɛn di we aw wi de fil.

¹³ Bikɔs sin de ambɔg di we aw wi de fil, dat de mek wi wɔri, shem, fil bad we wi du sɔntin, ɛn mek wi nɔ fil sef. Wi kin fil dɛn we dɛn de we wi kɔmit sin. Bɔt wi kin fil dɛn we dɛn de bak bikɔs wi de mɛmba ɔltɛm se wi nɔ pafɛkt ɛn Gɔd bin mek mɔtalman fɔ de pafɛkt wan. (Rom. 8:​20, 21) Jɔs lɛk aw motoka we in taya dɔn go dɔŋ nɔ kin ebul fɔ wok fayn lɛk aw i fɔ wok, na so mɔtalman we nɔ pafɛkt nɔ go ebul du di tin dɛn we pafɛkt pɔsin fɔ du. So na dat mek wi nɔ sɔprayz we sɔntɛnde wi kin dawt se Jiova lɛk wi. If dat apin, wi fɔ mɛmba se Jiova na “di Gɔd we gret, we fit fɔ lɛ pipul dɛn fred ɛn rɛspɛkt, ɛn we . . . in lɔv nɔ de chenj fɔ di wan dɛn we lɛk am ɛn we de obe in kɔmandmɛnt dɛn.”—Nɛi. 1:5.

14. We wi tink bɔt di day we Jizɔs day fɔ wi, aw dat go ɛp wi fɔ lɛ wi nɔ dawt se Jiova go ɛva lɛk wi? (Romans 5:8) (Luk bak di bɔks we gɛt di taytul “Protɛkt Yusɛf Frɔm ‘di Pawa we Sin Gɛt fɔ Ful Pɔsin.’”)

¹⁴ Na tru se tɛm dɛn kin de we wi kin fil se wi nɔ fit fɔ mek Jiova lɛk wi. Ɛn fɔ tɔk tru, wi nɔ rili fit fɔ mek Jiova lɛk wi, ɛn na dat mek in lɔv spɛshal. Natin nɔ de we wi go du fɔ mek Jiova lɛk wi. Bɔt stil, bikɔs Jiova lɛk wi, i sɛn in Pikin fɔ kam day fɔ wi so dat i go fɔgiv wi sin dɛn. (1 Jɔn 4:10) Mɛmba bak se, Jizɔs kam fɔ sev sina dɛn, nɔto pipul dɛn we pafɛkt. (Rid Romans 5:8.) Nɔbɔdi nɔ ebul du tin pafɛkt wan, ɛn Jiova nɔ de ɛkspɛkt wi fɔ du dat. We wi mɛmba se di pafɛkt we wi nɔ pafɛkt kin mek wi dawt se Jiova lɛk wi, dat fɔ mek wi mek-ɔp wi maynd nɔ fɔ alaw wisɛf fɔ dawt se Jiova lɛk wi.—Rom. 7:​24, 25.

MEK-ƆP YU MAYND FƆ KƆNTINYU FƆ DE BIƐN JIOVA

15-16. Wetin wi shɔ se go apin if wi kɔntinyu fɔ de biɛn Jiova? Wetin mek? (2 Samiɛl 22:26)

¹⁵ Jiova want mek wi disayd fɔ du di rayt tin bay we wi “kɔntinyu fɔ de biɛn am.” (Dyu. 30:​19, 20) If wi du dat, wan dawt nɔ de se insɛf go kɔntinyu fɔ de biɛn wi. (Rid 2 Samiɛl 22:26.) If wi kɔntinyu fɔ de biɛn Jiova, wi shɔ se i go ɛp wi fɔ bia ɛni prɔblɛm we go mit wi.

¹⁶ Jɔs lɛk aw wi dɔn tɔk, we wi gɛt prɔblɛm, wi gɛt bɔku rizin dɛn we fɔ mek wi kɔntinyu fɔ du tin dɛn we go mek i tan lɛk se wi dɔn put wi ankɔ dɔŋ. Wi no se Jiova lɛk wi ɛn i go sɔpɔt wi. Na dat di Baybul se. If wi ɛva dawt se Jiova lɛk wi, wi fɔ tink bɔt wetin wi no bɔt Jiova in lɔv bifo wi jɔs tink bɔt aw wi de fil. Lɛ wi kɔntinyu fɔ biliv di tru tin dɛn we wi dɔn lan na di Baybul fɔ se Jiova in lɔv we nɔ de chenj go de sote go.