Yɔŋ Wan dɛn, Aw Una Go Rɛdi fɔ Baptayz?

1, 2. (a) Ɛksplen wetin mek fɔ baptayz na siriɔs tin. (b) Wetin pɔsin fɔ shɔ bɔt bifo i baptayz? Wetin mek?

YU NA yɔŋ pɔsin we go lɛk fɔ baptayz? If yu na wan, dis na big big ɔnɔ we yu go ɛva gɛt. Jɔs lɛk aw wi bin tɔk na di las atikul, fɔ baptayz na siriɔs tin. I de sho ɔda pipul dɛn se yu dɔn gi yu layf to Jiova, dis min se yu dɔn prɔmis Jiova se yu go sav am sote go ɛn fɔ du wetin i want na in impɔtant pas ɔltin na yu layf. Bikɔs dis na siriɔs prɔmis we yu de mek to Gɔd, yu fɔ baptayz we yu rili machɔ, we yusɛf sɛf want fɔ du am, ɛn we yu ɔndastand wetin i min fɔ gi yu layf to Gɔd.

² Bɔt sɔntɛm yu go fil se yu nɔ rɛdi yet fɔ baptayz. Ɔ sɔntɛm yu go fil se yu dɔn rɛdi bɔt yu mama ɛn papa tink se yu fɔ wet fɔs te yu big ɛn no mɔ tin dɛn na layf. Wetin yu go du? Nɔ fil bad. Bifo dat, yuz dis tɛm fɔ go bifo pan Gɔd biznɛs so dat yu go rɛdi fɔ baptayz kwik kwik wan. Fɔ lɛ yu go ebul fɔ du dis, i go fayn fɔ mek yu tink bɔt dɛn tri tin ya: (1) di tin dɛn we yu biliv, (2) di tin dɛn we yu de du, ɛn (3) aw yu go sho se yu gladi.

DI TIN DƐN WE YU BILIV

3, 4. Us lɛsin we yɔŋ wan dɛn kin lan frɔm Timoti in ɛgzampul?

³ Tink bɔt aw yu go ansa dɛn kwɛstyɔn dɛn ya: Wetin mek a biliv se Gɔd de? Wetin mek a shɔ se na frɔm Gɔd di Baybul kɔmɔt? Wetin mek a nɔ de falamakata di we aw pipul dɛn de liv dɛn layf na di wɔl bɔt a de obe Gɔd in lɔ dɛn? Dɛn kwɛstyɔn dɛn ya go ɛp yu fɔ fala di apɔsul Pɔl in advays, we i se: “Pruv to unasɛf wetin Gɔd want; dat na: wetin gud, wetin Gɔd gri wit, ɛn wetin pafɛkt.” (Lɛta Fɔ Rom 12:​2, NW) Wetin mek yu fɔ du dis?

⁴ Timoti in ɛgzampul go ɛp yu. I bin sabi di Skripchɔ dɛn gud gud wan bikɔs in mama ɛn in grani bin dɔn tich am wetin de na di Skripchɔ dɛn. Bɔt Pɔl bin tɛl Timoti se: “Yu nɔ fɔ lɛf fɔ biliv di tru tin dɛn we yu dɔn lan ɛn we yu biliv gud wan.” (Sɛkɛn Lɛta To Timoti 3:​14, 15) So Timoti bin biliv se di tin dɛn we de na di Skripchɔ dɛn na tru. I nɔ bin biliv bikɔs in mama ɛn in grani bin tɛl am fɔ biliv, bɔt i bin biliv bikɔs i bin tink gud wan bɔt wetin i dɔn lan.—Rid Fɔs Lɛta Fɔ Tɛsalonayka 5:​21.

5, 6. Wetin mek i impɔtant fɔ lɛ yu lan fɔ “tink gud wan” we yu stil yɔŋ?

⁵ Sɔntɛm yu dɔn no di trut fɔ lɔng tɛm naw. If na so i bi, mekɔp yu maynd fɔ tink gud wan bɔt di rizin dɛn we mek yu biliv. Dat go ɛp yu fɔ gɛt mɔ fet ɛn i go ɛp yu fɔ avɔyd fɔ du di rɔng tin. I go mek yu nɔ fala yu kɔmpin dɛn, di we aw di pipul dɛn na di wɔl de tink, ɛn ivin di we aw yu de fil.

⁶ If yu lan fɔ tink gud wan we yu stil yɔŋ, yu go ebul fɔ ansa kwɛstyɔn dɛn we yu kɔmpin dɛn go aks yu lɛk: ‘Wetin mek yu shɔ se Gɔd de? If Gɔd lɛk wi, wetin mek i de alaw bad tin fɔ apin? Aw i pɔsibul se Gɔd bin dɔn de frɔm tɛm?’ We yu pripia, dɛn kwɛstyɔn ya nɔ go mek yu bigin dawt, bɔt dɛn go mek yu stɔdi di Baybul mɔ ɛn mɔ.

7-9. Sɔm atikul dɛn de na di Intanɛt we nem “What Does the Bible Really Teach?” Aw dɛn atikul ya go ɛp yu fɔ biliv mɔ ɛn mɔ?

⁷ We yu tek tɛm stɔdi, dat go ɛp yu fɔ ansa di kwɛstyɔn dɛn, i go ɛp yu fɔ klia ɛni dawt we de na yu maynd, ɛn i go mek yu biliv mɔ wetin yu bin dɔn biliv. (Di Apɔsul Dɛn Wok [Akt] 17:​11) Wi gɛt bɔku buk dɛn we go ɛp yu fɔ du dat. Bɔku pipul dɛn dɔn stɔdi dɛn tu buk ya we nem The Origin of Life—Five Questions Worth Asking ɛn Is There a Creator Who Cares About You? Dɛn buk ya dɔn rili ɛp dɛn. Ɛn bɔku yɔŋ wan dɛn dɔn ɛnjɔy ɛn bɛnifit frɔm di atikul dɛn we nem “What Does the Bible Really Teach?” na jw.org. Yu go fɛn am ɔnda BIBLE TEACHINGS. Ɛni wan pan dɛn atikul ya we yu stɔdi, go ɛp yu fɔ biliv difrɛn difrɛn tɔpik dɛn na di Baybul.

⁸ Bikɔs yu na pɔsin we de stɔdi di Baybul, yu go dɔn ɔlrɛdi no di ansa to sɔm kwɛstyɔn dɛn we yu go si na di atikul dɛn na jw.org. Bɔt yu biliv di ansa dɛn we yu de gi? Dɛn atikul ya go ɛp yu fɔ tink gud wan bɔt difrɛn skripchɔ dɛn ɛn ɛnkɔrej yu fɔ rayt di rizin dɛn we mek yu biliv. Dat go ɛp yu fɔ no aw yu go ɛksplen wetin yu biliv to ɔda pipul dɛn. If yu gɛt we fɔ go na di Intanɛt fɔ rid di atikul dɛn we nem “What Does the Bible Really Teach?,” yu kin yuz am we yu wan de stɔdi, dat go ɛp yu fɔ biliv tranga wan.

⁹ Yu fɔ pruv to yusɛf se dis na di trut. Dis go ɛp yu fɔ rɛdi fɔ baptayz. Wan yɔŋ sista bin tɔk se: “Bifo a bin disayd fɔ baptayz, a bin stɔdi di Baybul ɛn si se dis na di tru rilijɔn. Ɛn ɛvride na mi layf, a de biliv mɔ ɛn mɔ.”

DI TIN DƐN WE YU DE DU

10. Wetin mek wi biliv se Kristian we baptayz go du tin dɛn we de sho se i gɛt fet?

¹⁰ Di Baybul tɛl wi se: “If [pɔsin] jɛs tɔk nɔmɔ se in biliv Gɔd, bɔt i nɔ du ɛnitin fɔ sho se in biliv Gɔd, di biliv we da pɔsin de se in biliv Gɔd, nɔ min natin!” (Jems 2:​17) If yu biliv tranga wan, yu go sho am bay di tin dɛn we yu de du. Yu go “de waka wit Gɔd” ɛn ‘du tin dɛn we go mek pipul dɛn no se yu na Gɔd pɔsin.’—Rid Pita In Sɛkɛn Lɛta 3:​11.

11. Ɛksplen wetin i min fɔ “waka wit Gɔd.”

¹¹ Wetin i min fɔ “waka wit Gɔd”? If yu de waka wit Gɔd, dat min se yu de liv klin layf. Fɔ ɛgzampul, tink bɔt di las siks mɔnt we dɔn pas. We dɛn bin tɛmt yu fɔ du sɔntin we nɔ fayn, yu bin tek tɛm tink bɔt wetin rayt ɔ wetin rɔng? (Di Ibru Pipul Dɛn 5:​14) Yu mɛmba di tɛm we yu kɔmpin dɛn bin want fɔ lɛ yu du tin we nɔ fayn bɔt yu nɔ bin du am? We yu de na skul, yu na gud ɛgzampul to ɔda pipul dɛn? Yu fetful to Jiova ɔ yu de tray fɔ bi lɛk yu klasmet dɛn so dat dɛn nɔ go provok yu? (Pita In Fɔs Lɛta 4:​3, 4) Na tru se nɔbɔdi nɔ pafɛkt. Sɔm tɛm dɛn de, ivin di wan dɛn we dɔn sav Jiova fɔ lɔng tɛm kin shem ɛn i nɔ kin izi fɔ lɛ dɛn prich to ɔda pipul dɛn. Bɔt sɔmbɔdi we dɔn gi in layf to Gɔd nɔ de shem fɔ sho se in na Jiova Witnɛs, ɛn i go sho dis bay we i de liv klin layf.

12. Wetin na sɔm tin dɛn we yu go du ‘we go mek pipul dɛn no se yu na Gɔd pɔsin’? Aw yu fɔ si dɛn tin ya?

¹² Wetin na sɔm tin dɛn we yu go du ‘we go mek pipul dɛn no se yu na Gɔd pɔsin’? Sɔm pan dɛn tin ya na tin dɛn we yu de du na di kɔngrigeshɔn, lɛk fɔ go mitin ɛn fɔ go prich. Bɔt sɔm na tin dɛn we yu de du we ɔda pipul dɛn nɔ de si, lɛk we yu wangren de pre to Jiova ɛn we yu wan de stɔdi. Sɔmbɔdi we dɔn gi in layf to Jiova nɔ de tink se dɛn tin ya tranga fɔ du. Bɔt i de fil di sem we lɛk aw Kiŋ Devid bin fil, we i tɔk se: “A de ɛnjɔy fɔ du wetin yu want a de kip yu lɔ na mi at so a go obe am.”—Sam 40:​8.

13, 14. Wetin go ɛp yu fɔ ‘du tin dɛn we go mek pipul dɛn no se yu na Gɔd pɔsin’? Aw sɔm yɔŋ wan dɛn dɔn bɛnifit frɔm dis tin ya?

¹³ Fɔ ɛp yu fɔ plan wetin yu go want fɔ du, na fɔ rid di Questions Young People Ask—Answers That Work, Vɔlyum 2, pej 308 ɛn 309. I gɛt kwɛstyɔn dɛn ɛn say fɔ rayt di ansa. Insay dɛn pej ya, yu kin rayt di ansa to kwɛstyɔn dɛn lɛk: “We yu de pre, yu gɛt sɔm patikyula tin dɛn we yu kin pre bɔt? Aw di tin dɛn we yu kin pre bɔt de sho se yu lɛk Jiova?” “Wetin na di tin dɛn we yu kin yuz we yu wan de stɔdi?” “Yu kin go prich ivin if yu mama ɛn papa nɔ go?” Dɛn pej ya gɛt say we yu kin rayt wetin yu dɔn plan fɔ du, lɛk fɔ pre, fɔ stɔdi yu wan, ɛn fɔ go prich.

¹⁴ Bɔku yɔŋ wan dɛn we want fɔ baptayz dɔn si se dɛn kwɛstyɔn ya dɔn rili ɛp dɛn. Wan yɔŋ sista we nem Tilda bin tɔk se: “A bin yuz pej 308 ɛn 309 na di Questions Young People Ask—Answers That Work, Vɔlyum 2, fɔ plan wetin a go want fɔ du. Wan bay wan, a ebul fɔ du ɔl wetin a bin dɔn plan fɔ du ɛn a bin rɛdi fɔ baptayz lɛk wan ia so leta.” Wan yɔŋ brɔda we nem Patrik, insɛf bin du di sem tin ɛn i bin tɔk se: “A bin dɔn ɔlrɛdi no wetin a plan fɔ du, bɔt we a rayt dɛn, dat ɛp mi fɔ tray tranga wan fɔ du dɛn.”

15. Ɛksplen wetin mek na yusɛf sɛf fɔ disayd fɔ gi yu layf to Gɔd.

¹⁵ Wan pan di kwɛstyɔn dɛn we yu go si na pej 308 ɛn 309 se: “Yu go sav Jiova ivin if yu mama, papa, ɛn padi dɛn lɛf fɔ sav am?” We yu gi yu layf to Jiova ɛn baptayz, yu go gɛt yu yon padi biznɛs wit Jiova. So, nɔto yu mama, papa, ɔ ɛnibɔdi fɔ mek yu du sɔntin fɔ Jiova. We yu “de waka wit Gɔd” ɛn ‘du tin dɛn we go mek pipul dɛn no se yu na Gɔd pɔsin,’ dat go sho se yu biliv se yu dɔn fɛn di trut ɛn yu want fɔ fala Gɔd in advays dɛn. I nɔ go te, yu go rɛdi fɔ baptayz.

AW YU GO SHO SE YU GLADI?

16, 17. (a) Wetin fɔ mek pɔsin bi Kristian? (b) Us ɛgzampul yu go gi fɔ sho aw pɔsin go sho se i gladi fɔ di day we Jizɔs day fɔ wi?

¹⁶ Wan de, wan man we bin rili no di lɔ we Gɔd bin gi Mozis bin aks Jizɔs se: “Us lɔ pas ɔl di ɔda lɔ dɛn?” Jizɔs bin ansa am se: “Yu fɔ lɛk di Masta we na yu Gɔd wit ɔl yu at, wit ɔl yu layf ɛn wit ɔl yu maynd.” (Matyu 22:​35-37) Jizɔs bin ɛksplen se di rizin we mek pɔsin fɔ baptayz ɛn bi Kristian na bikɔs i lɛk Jiova. Wan pan di bɛst tin dɛn we go mek yu lɛk Jiova mɔ ɛn mɔ na we yu tek tɛm tink bɔt di day we Jiova mek Jizɔs kam day fɔ wi, we na di bɛst gift we Gɔd gi to mɔtalman. (Rid Sɛkɛn Lɛta Fɔ Kɔrint 5:​14, 15; Jɔn In Fɔs Lɛta 4:​9, 19.) We yu du dat, yu go want fɔ sho se yu gladi fɔ da wɔndaful gift de.

¹⁷ Lɛ wi se wi ɛksplen di we aw yu gladi fɔ di day we Jizɔs kam day fɔ wi dis we: Imajin se yu bin de drawn na wata, dɔn pɔsin kam sev yu, yu go jɔs go na os ɛn wep yu bɔdi ɛn fɔgɛt bɔt wetin da pɔsin de du fɔ yu? Nɔ, yu nɔ go du so! Yu go gladi ɔltɛm fɔ wetin da pɔsin de du fɔ yu we i sev yu layf! Semweso, wi fɔ sho se wi rili gladi ɛn tɛl Jiova ɛn Jizɔs tɛnki fɔ dis tin we dɛn du fɔ wi. Na dɛn gɛt wi layf! Dɛn dɔn sev wi frɔm sin ɛn day. Bikɔs dɛn lɛk wi, wi dɔn gɛt di op fɔ gɛt layf we go de sote go insay Paradays na dis wɔl!

18, 19. (a) Wetin mek yu nɔ fɔ fred fɔ gi yu layf to Jiova? (b) Aw yu layf go bɛtɛ we yu de sav Jiova?

¹⁸ Yu gladi fɔ wetin Jiova dɔn du fɔ yu? If na so i bi, yu fɔ gi yu layf to Jiova ɛn baptayz. Dat na di rayt tin fɔ du. We yu gi yu layf to Jiova, yu dɔn prɔmis am se yu go du wetin i want sote go. Yu tink se yu fɔ fred fɔ mek da kayn prɔmis de? Nɔ-o. Jiova want wetin gud fɔ yu, ɛn i go blɛs ɔl di wan dɛn we de du wetin i want. (Di Ibru Pipul Dɛn 11:​6) We yu gi yu layf to Gɔd ɛn baptayz, yu layf nɔ go wɔs, bifo dat, i go bɛtɛ! Wan 24 ia ol brɔda we bin baptayz bifo i ol 13 ia bin tɔk se: “A fɔ dɔn ɔndastand mɔ if a bin dɔn big, bɔt we a bin disayd fɔ gi mi layf to Jiova, i mek a nɔ rɔnata di tin dɛn na di wɔl.”

¹⁹ Jiova want wetin gud fɔ yu. Bɔt Setan de tink bɔt insɛf nɔmɔ ɛn i nɔ bisin bɔt yu. I nɔ go gi yu ɛni gud tin if yu fala am. Aw i go gi yu sɔntin we i nɔ gɛt? I nɔ gɛt gud nyus ɛn i nɔ gɛt ɛni op. Na bad tin nɔmɔ i go mek apin to yu tumara bambay, bikɔs na da sem tin de gɛt fɔ apin to am!—Rɛvɛleshɔn 20:​10.

20. Wetin yɔŋ pɔsin fɔ du so dat i go gi in layf to Jiova ɛn baptayz? (Luk di bɔks we se “Tin dɛn we Go Ɛp Yu fɔ Go Bifo.”)

²⁰ Fɔ gi yu layf to Jiova na di bɛst tin we yu go ɛva disayd fɔ du. Yu rɛdi fɔ du dat? If yu dɔn rɛdi, nɔ fred fɔ mek da prɔmis de. Bɔt if yu fil se yu nɔ rɛdi yet, i go fayn fɔ mek yu fala di advays dɛn we dis atikul dɔn gi fɔ mek yu kɔntinyu fɔ go bifo. Pɔl bin tɛl di brɔda dɛn we de na Filipay fɔ kɔntinyu fɔ go bifo. (Lɛta Fɔ Filipay 3:​16) If yu fala da advays de, i nɔ go te igen, yu go want fɔ gi yu layf to Jiova ɛn baptayz.