Yu De Alaw di Wan We Sabi Wok wit Kle Pas Ɔlman fɔ Shep Yu?

1, 2. Wetin mek Gɔd bin se Daniɛl na man we i “lɛk pasmak”? Aw wisɛf go falamakata Daniɛl?

WE DƐN bin kɛr di Ju pipul dɛn go na Babilɔn, dɛn bin ɛnta siti we ful-ɔp wit aydɔl ɛn wit pipul dɛn we de wɔship dɛn bad bad spirit dɛn. Pan ɔl dat, di Ju dɛn we bin fetful lɛk Daniɛl ɛn in tri padi dɛn nɔ bin gri fɔ du di tin dɛn we di pipul dɛn na Babilɔn bin de du. (Daniɛl 1:​6, 8, 12; 3:​16-18) Daniɛl ɛn in padi dɛn bin tek Jiova fɔ bi Pɔsin we de wok wit kle ɛn na Jiova nɔmɔ dɛn bin kɔntinyu fɔ de wɔship. Pan ɔl we Daniɛl bin de wit pipul dɛn we bin de du bad bad tin dɛn, Gɔd in enjɛl bin tɔk se Daniɛl na man we Gɔd “lɛk pasmak.”—Daniɛl 10:​11, 19.

² Di tɛm we dɛn bin de rayt di Baybul, pɔsin we de wok wit kle kin mol am fɔ lɛ i gɛt di shep we i want. Tide, pipul dɛn we de wɔship Jiova di rayt we no se na in de rul di wan ol wɔl ɛn i gɛt pawa fɔ shep di neshɔn dɛn aw i want. (Rid Jɛrimaya 18:​6.) Gɔd gɛt pawa bak fɔ shep ɛni wan pan wi. Pan ɔl dat, Jiova nɔ de fos ɛnibɔdi fɔ chenj. Bɔt i want lɛ wi alaw am fɔ shep wi. Insay dis atikul, wi go lan bɔt aw wi go kɔntinyu fɔ tan lɛk kle we izi fɔ shep na Gɔd in an. Wi go tɔk bɔt dɛn tri kwɛstyɔn dɛn ya: (1) Aw wi go avɔyd abit dɛn we de mek wi nɔ want fɔ du wetin Gɔd se ɛn wi tan lɛk kle we at fɔ shep? (2) Aw wi go ebul fɔ gɛt kwaliti dɛn we go ɛp wi fɔ kɔntinyu fɔ obe ɛn tan lɛk kle we izi fɔ shep? (3) Aw mama ɛn papa dɛn we na Kristian go wok wit Gɔd we dɛn de shep dɛn pikin dɛn?

AVƆYD ABIT DƐN WE GO MEK YU TRANGAYES

3. Us abit dɛn kin mek pɔsin trangayes? Gi ɛgzampul.

³ Prɔvabs 4:​23, (NW) tɔk se: “Pan ɔl di tin dɛn we wi fɔ tek tɛm wit, wi fɔ tek tɛm mɔ wit wi at bikɔs na de wi layf de.” Fɔ lɛ wi nɔ mek wi at tan lɛk kle we at fɔ shep, wi fɔ avɔyd bad abit dɛn lɛk fɔ prawd, fɔ de du tin dɛn we de mek wi sin, ɛn tin dɛn we go mek wi nɔ gɛt bɛtɛ fet igen. If wi nɔ tek tɛm, dɛn tin ya go mek wi trangayes ɛn nɔ de obe. (Daniɛl 5:​1, 20; Di Ibru Pipul Dɛn 3:​13, 18, 19) Na dat bin apin to wan kiŋ we bin de na Juda we nem Uzaya. (Rid Sɛkɛn Kronikul 26:​3-5, 16-21.) Fɔs, Uzaya bin de obe ɛn i bin gɛt tayt padi biznɛs wit Gɔd, so dat bin mek Gɔd bin de ɛp am. Bɔt “we Kiŋ Uzaya bi dɔn sidɔm na pawa gud gud wan, i bigin mek prawd.” I bin so prawd dat i bin want fɔ bɔn insɛns na di tɛmpul pan ɔl we na prist dɛn nɔmɔ fɔ du dat. We di prist dɛn tɛl am se wetin i de du nɔ rayt, Uzaya bin vɛks bad bad wan! Jiova bin mek di prawd kiŋ ɔmbul insɛf ɛn i bin gɛt lɛprɔsi te i day.—Prɔvabs 16:​18.

4, 5. If wi nɔ tek tɛm, wetin kin apin we wi prawd? Gi wan ɛgzampul.

⁴ If wi nɔ avɔyd fɔ de mek prawd, we go bigin fɔ de tink se wi bɛtɛ pas ɔda pipul dɛn ɛn wi nɔ go gri wit di advays dɛn we kɔmɔt na di Baybul. (Prɔvabs 29:​1; Lɛta Fɔ Rom 12:​3) Na dat bin apin to wan ɛlda we nem Jim. I nɔ bin gri wit di ɔda ɛlda dɛn na di kɔngrigeshɔn bɔt sɔntin. Jim bin tɔk se, “A bin tɛl di brɔda dɛn se dɛn nɔ gɛt lɔv, ɛn a bin lɛf di mitin we di ɛlda dɛn bin gɛt.” Afta we i bin tek lɛk siks mɔnt so, Jim muf go na wan ɔda kɔngrigeshɔn bɔt dɛn nɔ bin anawns am as ɛlda na da kɔngrigeshɔn de. I bin fil bad. I bin de tink se i gɛt rayt ɛn dat mek i lɛf fɔ sav Jiova ɛn i nɔ bin de go di mitin dɛn fɔ tɛn ia. Naw i tɔk se bikɔs i bin prawd, dat bin mek i bigin fɔ blem Jiova fɔ wetin bin dɔn apin. Fɔ lɔng tem, brɔda dɛn bin de go fɛn am ɛn tray fɔ ɛp am, bɔt Jim nɔ bin gri fɔ tek di ɛp we dɛn bin de gi am.

⁵ Jim bin tɔk se, “A nɔ jɔs ebul fɔ lɛf fɔ de tink bɔt aw di ɔda brɔda dɛn bin rɔng.” Jim in ɛgzampul sho wi se we pɔsin kin prawd, dat kin mek i tink se di tin we i de du nɔ bad. We dat apin, wi nɔ go ebul fɔ tan lɛk kle we izi fɔ shep. (Jɛrimaya 17:​9) Yu brɔda ɔ sista dɛn dɔn ɛva du yu sɔntin we mek yu vɛks? Yu dɔn ɛva fil bad bikɔs yu lɔs di wok we yu bin de du na di kɔngrigeshɔn? Wetin yu bin du? Yu bin mek prawd, ɔ yu bin kam fɔ no se fɔ mek pis wit yu brɔda ɛn fɔ kɔntinyu fɔ de biɛn Jiova, na tin we impɔtant pas ɔl?—Rid Sam 119:​165; Lɛta Fɔ Ɛfisɔs 4:​32.

6. Wetin go apin if pɔsin kɔntinyu fɔ de du bad bad tin dɛn?

⁶ We pɔsin de kɔntinyu fɔ du bad ɛn i ivin de ayd di bad we i de du, dat kin mek i at fɔ lɛ i tek di advays we Jiova de gi am. Dis kin mek i izi fɔ lɛ i du bad. Wan brɔda bin se, as tɛm de go in bad abit nɔ bin de mɔna am atɔl. (Ɛkliziastis 8:​11) Wan ɔda brɔda we fɔ sɔm tɛm bin gɛt di abit fɔ de wach rud rud pikchɔ dɛn, bin leta tɔk se, “A bin bigin fɔ de fɛn fɔlt pan di ɛlda dɛn.” Dis abit ya bin pwɛl in padi biznɛs wit Jiova. We dis in bad abit bin kɔmɔt na do, di ɛlda dɛn bin ɛp am. Na tru se wi ɔl nɔ pafɛkt. We wi du sɔntin we rɔng, wi fɔ beg Gɔd lɛ i fɔgiv wi ɛn ɛp wi, bɔt if wi bigin fɛn fɔlt pan di wan dɛn we de gi wi advays ɔ if wi nɔ want fɔ tek blem fɔ wetin wi du, i nɔ go izi fɔ lɛ Jiova shep wi.

7, 8. (a) Aw di Izrɛlayt dɛn we bin de trade bin sho se dɛn trangayes ɛn nɔ gɛt fɛt? (b) Us lɛsin we wi kin lan frɔm dis?

⁷ Afta we Jiova bin fri di Izrɛlayt dɛn kɔmɔt na Ijipt, dɛn bin si we Jiova de du bɔku wɔndaful tin dɛn. Pan ɔl dat, we dɛn go nia di land we Jiova bin dɔn prɔmis dɛn, dɛn bigin fɔ mek trangayes. Wetin mek? Na bikɔs dɛn nɔ bin gɛt fet pan Gɔd. Bifo dɛn biliv Jiova, dɛn bigin fɔ fred ɛn grɔmbul pan Mozis. Dɛn bin ivin want fɔ go bak na Ijipt usay dɛn bin de as slev! Jiova bin vɛks bad bad wan ɛn se: “Dɛn pipul ya jɛs de trit mi ɛniaw.” (Di Nɔmba Dɛm 14:​1-4, 11; Sam 78:​40, 41) Dɛn Izrɛlayt ya bin day na di ɛmti land usay nɔbɔdi nɔ go ebul fɔ de bikɔs dɛn bin trangayes ɛn dɛn nɔ bin gɛt fet.

⁸ Tide, i nɔ go te igen wi go de na di nyu wɔl, ɛn tin dɛn de we go tɛst wi fet. So wi nid fɔ chɛk wisɛf gud gud wan fɔ no uskayn fet wi gɛt. Aw wi go mek sho se wi gɛt strɔng fet? Wi kin stɔdi gud gud wan wetin Jizɔs bin tɔk na Matyu 6:​33. Aks yusɛf dɛn kwɛstyɔn dɛn ya: ‘Wetin a plan fɔ du ɛn di tin dɛn we a de disayd fɔ du de sho a rili biliv Jizɔs in wɔd dɛn? A go mis mitin ɔ nɔ go fil savis bikɔs a want mɔ mɔni? Wetin a go du if di wok we a de du de tek plɛnti pan mi tɛm ɛn di trɛnk we a gɛt? A go alaw dis wɔl fɔ shep mi ɛn ivin mek a lɛf fɔ sav Jiova?’

9. Wetin mek wi fɔ go de ‘jɔj wisɛf’ fɔ si if wi biliv Gɔd gud gud wan? Aw wi go ebul fɔ du dat?

⁹ If wi nɔ de fala wetin di Baybul se bɔt bad padi dɛn, pɔsin we disfɛloship, ɔ ɛnjɔymɛnt, wi go trangayes. Wetin yu fɔ du if dɛn tin ya bigin fɔ apin to yu? Wantɛm wantɛm yu fɔ chɛk yu fet gud gud wan! Di Baybul ɛnkɔrej wi fɔ kɔntinyu fɔ ‘jɔj wisɛf fɔ si if wi biliv Gɔd gud gud wan.’ (Sɛkɛn Lɛta Fɔ Kɔrint 13:​5) Mek shɔ se yu du dis ɛn yuz Gɔd in Wɔd ɔltɛm fɔ ɛp yu fɔ disayd fɔ du wetin rayt.

KƆNTINYU FƆ TAN LƐK KLE WE IZI FƆ SHEP

10. Wetin go ɛp wi fɔ tan lɛk kle we izi fɔ shep na Jiova in an?

¹⁰ Fɔ ɛp wi fɔ kɔntinyu fɔ tan lɛk kle we izi fɔ shep, Gɔd dɔn gi wi in Wɔd di Baybul, di kɔngrigeshɔn, ɛn di prichin wok. We wi rid di Baybul ɛn tink gud gud wan bɔt wetin de insay de ɛvride, i de ɛp fɔ lɛ wi tan lɛk kle we izi fɔ shep na Jiova in an ɛn alaw am fɔ shep wi. Jiova bin tɛl di kiŋ dɛn na Izrɛl fɔ kɔpi in Lɔ ɛn rid am ɛvride. (Ditarɔnɔmi 17:​18, 19) Di apɔsul dɛn bin no se fɔ rid di Skripchɔ dɛn ɛn tink gud wan bɔt dɛn bin rili impɔtant fɔ dɛn prichin wok. Dɛn bin de yuz sɔm pat dɛn na di Ibru Skripchɔ dɛn bɔku bɔku tɛm we dɛn de rayt, ɛn we dɛn bin de prich to pipul dɛn, dɛn bin de ɛnkɔrej dɛn fɔ lɛ dɛnsɛf yuz di Skripchɔ dɛn. (Di Apɔsul Dɛn Wok 17:​11) Semweso, wisɛf dɔn kam fɔ si se i impɔtant fɔ rid Gɔd in Wɔd ɛvride ɛn tink gud wan bɔt am. (Sɛkɛn Lɛta To Timoti 4:​15) Dis de ɛp wi fɔ kɔntinyu fɔ put wisɛf dɔŋ, ɛn Jiova go ebul fɔ shep wi.

11, 12. Aw Jiova de yuz di kɔngrigeshɔn fɔ shep wi wan bay wan lɛk aw wi de? Gi ɛgzampul.

¹¹ Jiova no wetin wi ɔl nid, ɛn i de yuz di kɔngrigeshɔn fɔ shep wi. Jim, we wi bin tɔk bɔt, bin bigin fɔ chenj in abit we wan ɛlda bin sho se i want fɔ ɛp am. Jim bin se: “Dis ɛlda nɔ bin ɛva blem mi fɔ wetin a du ɔ tray fɔ fɛn fɔlt pan mi. Bifo dat, i bin kɔntinyu fɔ tɔk fayn to mi ɛn sho se i rili want fɔ ɛp mi.” Afta we i dɔn pas lɛk tri mɔnt so, di ɛlda bin invayt Jim fɔ kam na mitin. Jim tɔk se di kɔngrigeshɔn bin gladi fɔ am ɛn dat bin ɛp am fɔ chenj di we aw i de tink. I bin bigin fɔ si se di we aw i de fil nɔto in nɔmɔ fɔ impɔtant to am. Di ɛlda dɛn we de na di kɔngrigeshɔn usay Jim de ɛn in wɛf bin ɛnkɔrej am, ɛn smɔl smɔl i bigin fɔ kam bak to Jiova. Jim bin bɛnifit bak we i bin de rid di atikul dɛn we se “Jehovah Is Not to Blame” ɛn “Serve Jehovah Loyally,” we de insay di Novɛmba 15, 1992 Wachtawa.

¹² As tɛm de go, Jim bin bi ɛlda bak. Afta dat, i dɔn ɛp ɔda brɔda dɛn fɔ sɔlv dɛn prɔblɛm dɛn ɛn ɛp dɛn fɔ gɛt strɔng fet. I tɔk se i bin de tink se i gɛt tayt padi biznɛs wit Jiova bɔt nɔto so i bi! I bin rigrɛt we i alaw di prawd we i bin prawd fɔ mek i fɛn fɔlt pan ɔda pipul dɛn ɛn nɔ pe atɛnshɔn pan di tin dɛn we impɔtant pas ɔl.—Fɔs Lɛta Fɔ Kɔrint 10:​12.

13. Us kwaliti dɛn di prichin wok kin ɛp wi fɔ gɛt? Us bɛnifit dɛn wi go gɛt?

¹³ Di prichin wok bak kin shep wi ɛn ɛp fɔ lɛ wi bi bɛtɛ pipul dɛn. Aw dat kin bi? Wɛl, we wi de prich di gud nyus, wi fɔ de sho kwaliti dɛn lɛk fɔ put wisɛf dɔŋ ɛn gɛt di kayn kwaliti dɛn we Gɔd in spirit de gi. (Lɛta Fɔ Galeshya 5:​22, 23) Tink bɔt di gud kwaliti dɛn we di prichin wok dɔn ɛp yu fɔ gɛt. We wi falamakata Krays, dat kin mek pipul dɛn want fɔ lisin to wi mɛsej ɛn dɛn kin chenj di we aw dɛn de biev to wi. Fɔ ɛgzampul, tu Witnɛs dɛn na Ɔstrelia bin tray fɔ prich to wan uman na in os, bɔt di uman bin vɛks ɛn i bin rud to dɛn. Bɔt di Witnɛs dɛn bin lisin to am wit rɛspɛkt. Afta sɔm tɛm, di uman bin rigrɛt aw i bin biev ɛn rayt wan lɛta to di branch ɔfis. Di uman bin beg fɔ di we we i bin biev. I se, “Mi na bin fulman fɔ tinap bifo tu pipul dɛn we kam tɔk bɔt Gɔd in Wɔd ɛn a mek dɛn go bak lɛk dat.” Frɔm dis tin we apin, wi dɔn si se i impɔtant fɔ lɛ wi nɔ de vɛks pan pipul dɛn we wi de prich. Di prichin wok de ɛp pipul dɛn, bɔt i kin ɛp wi bak wit di we aw wi de biev.

WOK WIT GƆD WE UNA DE SHEP UNA PIKIN DƐN

14. Wetin mama ɛn papa dɛn fɔ du if dɛn rili want fɔ shep dɛn pikin dɛn fayn?

¹⁴ Bɔku pikin dɛn kin put dɛnsɛf dɔŋ ɛn dɛn kin want fɔ lan. (Matyu 18:​1-4) So i mek sɛns fɔ lɛ mama ɛn papa dɛn ɛp dɛn pikin dɛn fɔ lan di trut ɛn fɔ lɛk am we dɛn pikin dɛn stil smɔl. (Sɛkɛn Lɛta To Timoti 3:​14, 15) Bɔt fɔ lɛ mama ɛn papa dɛn ebul fɔ du dis, dɛnsɛf nid fɔ lɛk di trut ɛn du wetin di Baybul se. We mama ɛn papa dɛn du dis, i go izi fɔ lɛ dɛn pikin dɛn lɛk di trut. Dɔn, di pikin dɛn go no se di trenin we dɛn mama ɛn papa dɛn de gi dɛn de sho se dɛn lɛk dɛn ɛn Jiova insɛf lɛk dɛn.

15, 16. Aw mama ɛn papa dɛn kin sho se dɛn abop pan Gɔd we dɛn pikin disfɛloship?

¹⁵ Pan ɔl we mama ɛn papa dɛn kin tich dɛn pikin dɛn di trut, sɔm pikin dɛn kin lɛf Jiova ɔ dɛn kin disfɛloship. If dis apin, di famili kin rili sɔfa. Wan sista na Sawt Afrika bin tɔk se: “We mi brɔda bin disfɛloship, i bin tan lɛk se i dɔn day. Mi at bin rili pwɛl!” Bɔt wetin dis sista ɛn in mama ɛn papa bin du? Dɛn bin fala di advays dɛn we de insay di Baybul. (Rid Fɔs Lɛta Fɔ Kɔrint 5:​11, 13.) Dɛn mama ɛn papa no se fɔ obe Gɔd in advays go bɛnifit ɔlman. Ɛn dɛn kam fɔ no se disfɛloship na fayn trenin we Jiova de gi to di wan dɛn we i lɛk. So di tɛm nɔmɔ we dɛn kin tɔk to dɛn pikin na we dɛn gɛt impɔtant tin fɔ tɔk bɔt na dɛn famili.

¹⁶ Aw di pikin bin fil? Leta i se, “A no se mi famili nɔ et mi, bɔt dɛn want fɔ obe wetin Jiova in ɔganayzeshɔn de se.” I bin tɔk bak se, “We yu nɔ gɛt nɔbɔdi fɔ ɛp yu pas yu beg Jiova fɔ ɛp ɛn fɔgiv yu, na da tɛm de yu go no se yu rili nid Jiova.” Imajin di kayn we aw di famili bin gladi we dɛn pikin bin kam bak to Jiova! Fɔ tru wi go gladi ɛn go bifo we wi de obe Gɔd ɔltɛm.—Prɔvabs 3:​5, 6; 28:​26.

17. Wetin mek wi fɔ de ɔnda Jiova ɛn du di tin dɛn we i want ɔltɛm? Aw dis go bɛnifit wi?

¹⁷ Di prɔfet Ayzaya bin tɔk se di Ju dɛn na Babilɔn go rigrɛt ɛn se: “Pan ɔl dat, PAPA GƆD, na yu na wi Papa; wi na di kle, ɛn na yu na di man we de wok wit kle; wi ɔl na yu wok we yu du wit yu an.” Dɛn go beg Jiova bak se: “Nɔ vɛks pasmak O PAPA GƆD, ɛn nɔ mɛmba sin sote go. Duya, tink gud, wi ɔl na yu pipul dɛm.” (Ayzaya 64:​8, 9) We wi put wisɛf dɔŋ ɛn obe Jiova ɔltɛm, wi go valyu na in yay jɔs lɛk Daniɛl. Jiova go kɔntinyu fɔ shep wi wit in Wɔd di Baybul, in spirit, ɛn in ɔganayzeshɔn so dat tumara bambay wi go bi “Gɔd in pikin dɛn” we pafɛkt.—Lɛta Fɔ Rom 8:​21.