Yu Bin No?

Wetin mek Jizɔs bin kɔl di biznɛsman dɛn we bin de sɛl animal dɛn na di tɛmpul we bin de na Jerusɛlɛm “tifman” dɛn?

INSAY di buk we Matyu rayt wi rid se: “Jizɔs go insay Gɔd in Os, ɛn drɛb ɔl dɛn pipul we bin de bay ɛn sɛl de. I kapsay di tebul dɛn we di pipul dɛn bin de chenj mɔni pan, ɛn di bɛnch dɛn we dɛn wan we bin de sɛl pijin kin sidɔm pan. I tɛl dɛn se, ‘Dɛn rayt na Gɔd in Buk se, Gɔd se, “Pipul fɔ kɔl mi Os ples fɔ pre,” bɔt una dɔn tɔn am to ples we tifman de ayd.’”—Matyu 21:​12, 13.

Istri dɔn sho se biznɛsman dɛn we bin de sɛl na di tɛmpul, bin de trit dɛn kɔstɔma dɛn bad bay we dɛn bin de chaj dɛn bɔku mɔni. Fɔ ɛgzampul, pijin ɔ dɔv nɔto animal we dɛn bin de sɛl dia wan, so ivin pɔsin we po go ebul fɔ bay am. Bɔt wan fɔstɛm buk we Ju di pipul dɛn bin rayt insay di apɔsul dɛn tɛm se, if pɔsin want fɔ bay tu pijin, i go nid fɔ pe wan gold dina [ɔ dinayriɔs]. Pɔsin go nid fɔ wok fɔ 25 dez bifo i go gɛt da kayn mɔni de. Pijin dɛn bin dɔn so dia dat pɔsin we po nɔ bin ebul fɔ bay dɛn. (Lɛvitikɔs 1:​14; 5:​7; 12:​6-8) Wan Ju lɔ ticha we dɛn kin kɔl rabay we nem Simiɔn bɛn Gameliɛl bin vɛks we pipul dɛn bin de du dis kayn tin, so i ridyuz di sakrifays dɛn we di lɔ se di Ju dɛn fɔ de mek. Wantɛm wantɛm, di prayz fɔ tu pijin ɔ dɔv go dɔn; we yu sheb wan gold dina to ɔndrɛd pat, na wan pat yu go yuz fɔ bay tu pijin.

As wi dɔn si, di biznɛsman dɛn na di tɛmpul bin want ɔltin fɔ dɛnsɛf ɛn dɛn bin de tek advantej pan dɛn kɔstɔma dɛn. Na dat mek Jizɔs bin gɛt rayt fɔ kɔl dɛn “tifman” dɛn.