Wetin Mek Pipul dɛn Nɔ Ebul Mek Pis De?​—⁠Wetin di Baybul Se?

Di lida dɛn na di wɔl ɛn intanashɔnal ɔganayzeshɔn dɛn nɔ ebul fɔ mek pis de. Frɔm we Wɔl Wɔ Tu dɔn, bɔku fɛt-fɛt de naw na di wɔl pas ɛni ɔda tɛm afta di wɔ. Na lɛk tu bilyɔn pipul dɛn de na eria dɛn usay dɛn kayn fɛt-fɛt ya kin apin. Dat min se we yu sheb di pipul dɛn na di wɔl to 4 pat, wan pat pan dɛn de na say dɛn usay fɛt-fɛt kin apin.

Wetin mek mɔtalman nɔ ebul mek pis de? Wetin di Baybul se?

Tri rizin dɛn we mek mɔtalman nɔ ebul kam wit pis

1. 1. Di we aw pipul dɛn de biev de mek dɛn nɔ de ivin tray fɔ mek pis. Di Baybul bin dɔn tɔk se insay wi tɛm, “pipul dɛn go lɛk dɛnsɛf, dɛn go lɛk mɔni, dɛn go de bost, dɛn go de tink se dɛn bɛtɛ pas ɔda pipul dɛn, . . . dɛn go de kɔmɔt biɛn dɛn kɔmpin, . . . dɛn nɔ go de agri wit ɔda pipul dɛn, . . . dɛn nɔ go ebul kɔntrol dɛnsɛf, dɛn go wayl, . . . dɛn go trangayes, dɛn go prawd.”​—2 Timoti 3:​2-4.

2. 2. Mɔtalman nɔ ebul sɔlv prɔblɛm dɛn we de mit dɛn, ilɛk dɛn want fɔ du am as grup ɔ na wangren pɔsin want fɔ du am. Dɛn nid fɔ abop pan di Wan we mek dɛn, we na Jiovaa Gɔd. Di Baybul tɔk se “[mɔtalman] nɔ no aw fɔ dayrɛkt di we aw i de waka.”​—Jɛrimaya 10:​23.

3. 3. Na wan pawaful ɛn wikɛd rula de kɔntrol di wɔl, we na Setan di Dɛbul, ɛn i “de ful di wan ol wɔl.” (Rɛvɛleshɔn 12:​9) Wans “di wan ol wɔl de na di wikɛd wan in an,” wɔ ɛn fɛt-fɛt go kɔntinyu fɔ de.​—1 Jɔn 5:​19.

Udat go ebul mek pis de?

Di Baybul tɛl wi se na Gɔd go mek pis de, nɔto mɔtalman.

• “Jiova se, ‘A no gud gud wan di tin dɛn we a de tink bɔt una. A want fɔ lɛ una gɛt pis ɛn nɔto trɔbul. A want fɔ lɛ tin fayn fɔ una tumara bambay ɛn fɔ lɛ una gɛt op.’”​—Jɛrimaya 29:​11.

Aw Gɔd go mek dis prɔmis kam tru? “Di Gɔd we de gi pis go nyamanyama Setan.” (Romans 16:​20) Gɔd go yuz di gɔvmɛnt na ɛvin we di Baybul kɔl “Gɔd in Kiŋdɔm,” fɔ mek pis de ɔlsay na di wɔl. (Lyuk 4:​43) We di Kiŋ fɔ da Kiŋdɔm de, we na Jizɔs Krays, de rul di wɔl, i go tich pipul dɛn aw fɔ gɛt pis.​—Ayzaya 9:​6, 7.

• Fɔ lan mɔ, rid di atikul we gɛt di taytul “What Will God’s Kingdom Accomplish?”