Anton Petrus/Moment via Getty Images
UNA GO DE WACH!
Yu Tink se Wɔl Wɔ Go Apin Jisnɔ?—Wetin di Baybul Se?
Insay di las 30 ia we dɔn pas, bɔku pipul dɛn bin fil se di padi biznɛs we de bitwin difrɛn difrɛn kɔntri dɛn de go fayn ɛn bin ivin de go bifo. Bɔt di tin dɛn we dɔn de apin dis biɛn tɛm de sho se dat nɔto tru.
“Pipul dɛn de wɔri se di wɔ we de apin bitwin Izrɛl ɛn Gaza go afɛkt ɔda kɔntri dɛn we de na da eria de, mɔ so we Izrɛl stat fɔ fɛt wit Ɛzbola na di Libanɔn bɔda.”—Reuters, Janwari 6, 2024.
“Grup dɛn we Iran de kɔntrol de atak difrɛn eria dɛn, ɛn kwik kwik wan Iran dɔn stat fɔ mek nyuklia wɛpɔn dɛn bak. Pantap dat, Rɔshia, Chayna, ɛn Iran na padi dɛn naw. Ɛn dis de mek Iran dɔn bigin chalenj di kɔntri dɛn we de na di wɛst.”—The New York Times, Janwari 7, 2024.
“Di kɔntinyu we Rɔshia dɔn kɔntinyu fɔ atak Yukren dɔn kɔz big big damej de.”—UN Nyuz, Janwari 11, 2024.
“Chayna dɔn de gɛt bɔku mɔni ɛn strɔng ami. Di pipul dɛn na Taywan de mek prawd fɔ dɛn neshɔn bikɔs ɔf dis, ɛn Chayna ɛn Amɛrika nɔto padi. Ɔl dis dɔn mek i izi fɔ lɛ fɛt-fɛt stat.”—The Japan Times, Janwari 9, 2024.
Di Baybul dɔn tɔk ɛnitin bɔt wetin mek wi de si dɛn kayn tin dɛn ya na di wɔl tide? Fɔ se dis go mek wɔl wɔ apin?
Di Baybul bin dɔn tɔk bɔt di tin dɛn we de apin naw
Di Baybul nɔ tɔk bɔt ɛni patikyula wɔ we wi de si tide. Bɔt i bin dɔn tɔk se dɛn go gɛt wɔ na bɔku say dɛn na di wɔl ɛn na dat de apin insay wi tɛm. Dis de mek “pis kɔmɔt na di wɔl.”—Rɛvɛleshɔn 6:4.
Di buk we nem Daniɛl bin dɔn tɔk se “dyurin di ɛnd,” neshɔn dɛn we na wɔl pawa go de “push dɛnsɛf,” ɔ fɛt fɔ udat go de bifo. We dɛn go de push dɛnsɛf, dɛn go de sho udat gɛt strɔng ami pas in kɔmpin, ɛn udat gɛt “valyu tin dɛn,” ɔ mɔni pas in kɔmpin.—Daniɛl 11:40, 42, 43.
Wan wɔ we de kam
Di Baybul bin dɔn tɔk se di tin dɛn we de apin na di wɔl gɛt fɔ wɔs bifo i go bɛtɛ. Jizɔs bin dɔn tɔk se, “da tɛm de big big trɔbul we nɔ wande apin frɔm we Gɔd mek di wɔl te naw go apin.” (Matyu 24:21) Da “big big trɔbul” de go ɛnd wit wan wɔ we dɛn kɔl Amagɛdɔn, ɛn na “di wɔ we go apin insay Gɔd di Ɔlmayti in big de.”—Rɛvɛleshɔn 16:14, 16.
Bɔt Amagɛdɔn na wɔ we go sev mɔtalman, nɔto wɔ we go dɔnawe wit dɛn. Gɔd go yuz dis wɔ fɔ pul ɔl mɔtalman gɔvmɛnt we dɔn mek bɔku bad bad wɔ dɛn de apin. Fɔ no mɔ bɔt aw Amagɛdɔn go mek mɔtalman gɛt pis we go de sote go, rid dɛn atikul dɛn ya: