Soshal Midia De Ambɔg Yu Pikin?—⁠Aw di Baybul Kin Ɛp Mama ɛn Papa Dɛn?

“Yɔŋ pipul dɛn we gɛt ed prɔblɛm dɔn de bɔku ɔlsay, ɛn wi dɔn kam fɔ no se wan pan di tin dɛn we kin kɔz dat na soshal midia.”—Dr. Vivek Murthy, U.S. surgeon general, New York Times, Jun 17, 2024.

Aw mama ɛn papa dɛn go protɛkt dɛn pikin dɛn frɔm di bad bad tin dɛn we kin apin na soshal midia? Di Baybul gɛt fayn advays we go ɛp wi.

Wetin mama ɛn papa dɛn kin du?

Tink bɔt dɛn Baybul prinsipul dɛn ya.

“Di wan we gɛt sɛns de tink bifo i mas.”​—Prɔvabs 14:​15.

We yu tink bɔt di bad bad tin dɛn we kin apin na soshal midia, i nɔ min se dɛn fɔ fos yu fɔ alaw yu pikin fɔ yuz am. Bifo yu alaw yu pikin fɔ yuz soshal midia, mek shɔ se i rili machɔ fɔ no ɔmɔs tɛm i fɔ spɛn na soshal midia, if i go ebul fɔ kip gud padi dɛn, ɛn if i go ebul fɔ avɔyd tin dɛn we nɔ fayn fɔ wach.

• Fɔ lan mɔ, rid dɛn atikul dɛn ya “Should My Child Use Social Media?” ɛn “Teaching Your Teenager Social Media Safety.”

“Una yuz una tɛm di bɛst we.”—Ɛfishians 5:​16.

If yu gri fɔ lɛ yu pikin yuz soshal midia, mek lɔ dɛn bɔt aw fɔ yuz am, ɛn ɛksplen aw dɛn lɔ dɛn ya go ɛp am fɔ lɛ i nɔ gɛt wan prɔblɛm. Yu fɔ wach yu pikin fɔ si if di we aw i de biev dɔn chenj, bikɔs dis de sho se yu nid fɔ ridyus ɔmɔs tɛm i de spɛn na soshal midia ɛn stɔp sɔm pan di say dɛn we i de go na soshal midia.

• Yuz di katun fim we gɛt di taytul Tek Tɛm we Yu De Yuz Soshial Nɛtwɔk fɔ ɛp yu pikin fɔ ɔndastand wetin mek i fɔ ridyus di tɛm we i de spɛn na soshal midia ɛn fɔ stɔp fɔ go sɔm say dɛn we i de yuz am.

Lan mɔ

Di Baybul tɔk se wi de liv insay tɛm we “tin go tranga ɛn bad.” (2 Timoti 3:​1-5) Bɔt, i de gi wi bak fayn advays dɛn we go ɛp wi fɔ bia. Wi gɛt pas 20 atikul ɛn vidio dɛn we kɔmɔt frɔm di Baybul, fɔ mama ɛn papa wit dɛn pikin dɛn insay dis atikul we de tɔk bɔt tineja dɛn we gɛt ed prɔblɛm.