Prɔblɛm dɛn we Gɛt fɔ Du wit Pɔlitiks we De Mek Baybul Prɔfɛsi Kam Tru
Tide, pipul dɛn nɔ gɛt wanwɔd we i kam pan pɔlitiks. Dɛn nɔ gɛt wanwɔd we i kam to di lɔ dɛn we gɛt fɔ du wit di tin dɛn we dɛn de du na dɛn layf ɛvride, ɛn dɛn kin agyu siriɔs wan we dɛn de tɔk bɔt wetin dɛn tink bɔt pɔlitiks. Na di gɔvmɛnt, di wan dɛn we de mek lɔ ɛn ɔda big wan dɛn kin gɛt difrɛn tin dɛn we dɛn tink, ɛn dɛn nɔ de gri fɔ lisin to dɛn kɔmpin dɛn. Dɛn difrɛn we dɛn de aw dɛn kin tink kin mek wanwɔd nɔ de we i kam to pɔlitiks, ɛn dat kin mek di gɔvmɛnt nɔ ebul fɔ du dɛn wok fayn.
Wan gud ɛgzampul na di wanwɔd we nɔ de pan pɔlitiks na Amɛrika ɛn Britin (we dɛn kin kɔl bak di United Kingdom). Wetin mek? Na bikɔs di Baybul bin dɔn tɔk se prɔblɛm go de na dɛn tu neshɔn dɛn ya, ɛn dat go apin di sem tɛm we di gɔvmɛnt we Gɔd mek na ɛvin go du sɔntin fɔ ɛp mɔtalman.
Prɔblɛm dɛn we gɛt fɔ du wit pɔlitiks insay “di las dez”
Di Baybul gɛt wan fayn prɔfɛsi we dɛn rayt na di buk we nem Daniɛl. Insay da prɔfɛsi de, Gɔd sho “wetin go apin insay di las dez.” Di tɛm we Daniɛl rayt dis prɔfɛsi, i bin de tɔk bɔt tumara bambay we impɔtant tin dɛn go apin na mɔtalman istri.—Daniɛl 2:28.
Gɔd yuz drim fɔ gi dis Baybul prɔfɛsi to di kiŋ na Babilɔn. Insay da drim de, di kiŋ si wan big big imej we dɛn mek wit difrɛn difrɛn mɛtal dɛn. Leta, Prɔfɛt Daniɛl ɛksplen se frɔm di imej in ed te to in fut, di imej tinap fɔ wɔl pawa dɛn we go kam ɛn go insay mɔtalman istri.a As tɛm de go, wan ston we tinap fɔ wan Kiŋdɔm ɔ gɔvmɛnt we Gɔd mek go dɔnawe wit di imej kpatakpata.—Daniɛl 2:36-45.
Akɔdin to di prɔfɛsi, Gɔd in Kiŋdɔm go tek ɔl mɔtalman gɔvmɛnt dɛn ples. Na dis sem Kiŋdɔm Jizɔs bin tich di wan dɛn we de fala am fɔ pre fɔ we i se: “Lɛ yu Kiŋdɔm kam.”—Matyu 6:10.
Bɔt us pat na di prɔfɛsi we di Baybul bin tɔk se prɔblɛm go de we i kam pan pɔlitiks? Mɛmba se di imej in ankul te to in to dɛn na bin “ayɛn we miks wit kle.” (Daniɛl 2:33) Di pat we dɛn miks wit ayɛn ɛn kle difrɛn frɔm di ɔda pat dɛn na di imej we dɛn yuz jɔs wan mɛtal fɔ mek, we sho se wan wɔl pawa go de we go difrɛn frɔm di ɔda wan dɛn. Aw? Daniɛl in prɔfɛsi ɛksplen se:
Akɔdin to di prɔfɛsi, di wɔl pawa we tinap fɔ di imej in ankul te to di to dɛn nɔ go gɛt wanwɔd we i kam pan pɔlitiks. Dis wɔl pawa nɔ go strɔng bɛtɛ we min se in yon pipul dɛn go mek i wik.
Daniɛl in prɔfɛsi dɔn kam tru insay dis wi yon tɛm
Di imej in ankul te to di to dɛn tinap fɔ di wɔl pawa we pawaful pas ɔl insay dis wi yon tɛm, dat na, di wanwɔd we de bitwin Amɛrika ɛn Britin. Aw di tin dɛn we de apin naw de sho se na so i bi?
Di imej in ankul te to di to dɛn na bin “ayɛn we miks wit kle,” ɛn na dat mek in wik. (Daniɛl 2:42) Tide, Amɛrika ɛn Britin nɔ strɔng bɛtɛ bikɔs dɛn yon pipul dɛn nɔ gɛt wanwɔd. Fɔ ɛgzampul, pipul dɛn na ɔl tu dɛn kɔntri dɛn de nɔ kin gɛt wanwɔd. Dɛn pipul dɛn kin fɛt fɔ dɛn rayt. Di wan dɛn we dɛn kin vot fɔ nɔ kin gri pan sɔm tin dɛn. Bikɔs dɛn pipul dɛn nɔ gɛt wanwɔd, ɔl tu di gɔvmɛnt dɛn nɔ kin ebul fɔ du wetin dɛn want fɔ du fayn fayn wan.
Daniɛl chapta 2 tɔk bɔt aw di gɔvmɛnt dɛn go de
Lɛ wi lan mɔ bɔt wetin sɔm pan di tin dɛn we Daniɛl tɔk bɔt nain prɔfɛsi min ɛn aw dɛn de apin tide:
Prɔfɛsi: “Di kiŋdɔm go sheb, bɔt sɔm pat go strɔng lɛk ayɛn.”—Daniɛl 2:41.
Minin: Pan ɔl we Amɛrika ɛn Britin nɔ gɛt wanwɔd na dɛn kɔntri dɛn we i kam pan pɔlitiks, dɛn tu kɔntri dɛn ya gɛt pawaful sojaman dɛn ɛn tin dɛn fɔ fɛt. Bikɔs ɔf dat, dɛn de du tin wit pawa we tan lɛk se dɛn strɔng lɛk ayɛn.
Aw di prɔfɛsi apin?
Insay 2023, we dɛn bin de chɛk ɔmɔs mɔni ich kɔntri spɛn pan wɔ ɛn sojaman dɛn, dɛn kam fɔ si se Amɛrika ɛn Britin spɛn mɔ mɔni pas di ɔda 12 kɔntri dɛn.—Stockholm International Peace Research Institute.
“Di we aw Amɛrika ɛn Britin de wok tranga wan fɔ protɛkt dɛn kɔntri dɛn . . . dɔn mek dɛn bi kɔntri dɛn we gɛt tayt padi biznɛs pas ɛni ɔda kɔntri, ɛn dɛn de yuz di letɛst tɛknɔlɔji ɛn aydia dɛn. . . . Wi de wok togɛda, wi de sɔpɔt wisɛf, ɛn wi de fɛt togɛda.”—Strategic Command, U.K. Ministry of Defence, April 2024.
Prɔfɛsi: “Jɔs lɛk aw di to dɛn na ayɛn ɛn kle, na so sɔm pat dɛn na di kiŋdɔm go strɔng ɛn sɔm pat go wik.”—Daniɛl 2:42.
Minin: Pan ɔl we Amɛrika ɛn Britin gɛt strɔng ami dɛn, dɛn nɔ ebul fɔ du ɔl wetin dɛn want bikɔs ɔf di we aw dɛn gɔvmɛnt de wok. If bɔku pan dɛn pipul dɛn nɔ gri wit wetin di gɔvmɛnt want fɔ du, i nɔ kin izi fɔ mek di gɔvmɛnt du wetin dɛn dɔn plan.
Aw di prɔfɛsi apin?
“Akɔdin to wetin sɔm pipul dɛn we de tɔk bɔt pɔlitiks se, di wanwɔd we nɔ de pan pɔlitiks na Amɛrika dɔn mek Amɛrika nɔ ebul fɔ du bɔku tin fɔ pipul dɛn we de na ɔda kɔntri dɛn we i kam to sikyɔriti te to biznɛs.”—“The Wall Street Journal.”
“Bikɔs Britin de gɛt bɔku prɔblɛm dɛn bikɔs ɔf pɔlitiks we dɛn nɔ bin de gɛt trade, dat dɔn mek gɔvmɛnt wokman dɛn nɔ ebul fɔ du tin dɛn fɔ ɛp dɛn sitizin dɛn.”—Institute for Government.
Prɔfɛsi: “Dɛn [di kiŋdɔm] go miks wit di kɔmɔn pipul dɛn, bɔt dɛn ɔl tu nɔ go fasin togɛda.”—Daniɛl 2:43, futnot.
Minin: Di ɔdinari pipul dɛn kin gɛt rayt fɔ tɔk wetin fɔ apin na dɛn gɔvmɛnt, bɔt di wokman dɛn ɔ di wan dɛn we kin vot nɔ kin rili gladi fɔ wetin di gɔvmɛnt kin disayd fɔ du.
Aw di prɔfɛsi apin?
“Tide, di pipul dɛn na Amɛrika nɔ de si pɔlitiks ɛn di wan dɛn we dɛn kin vot fɔ di rayt we.”—Pew Research Center.
“Di we aw di pipul dɛn nɔ trɔst di gɔvmɛnt dɛn ɛn pɔlitishian dɛn, ɛn di we aw dɛn de rul dɔn rili wɔs insay di pas fifti ia.”—“National Centre for Social Research.”
Aw Daniɛl in prɔfɛsi gɛt fɔ apin tumara bambay?
Akɔdin to Daniɛl in prɔfɛsi, Amɛrika ɛn Britin go bi di men wɔl pawa di tɛm we Gɔd in Kiŋdɔm go pul ɔl mɔtalman gɔvmɛnt ɛn nain yon Kiŋdɔm go de.—Daniɛl 2:44.
Dis sem kayn prɔfɛsi de na di Baybul buk we nem Rɛvɛleshɔn usay di Baybul sho se “di kiŋ dɛn na di wan ol wɔl” go gɛda agens Jiovab Gɔd fɔ Amagɛdɔn we na “di wɔ we go apin insay Gɔd di Ɔlmayti in big de.” (Rɛvɛleshɔn 16:14, 16; 19:19-21) Insay dis wɔ, Jiova go dɔnawe wit ɔl mɔtalman gɔvmɛnt we min se i go pul ɔl di wɔl pawa dɛn we tinap fɔ da imej na Daniɛl in prɔfɛsi.
Fɔ lan mɔ, rid di atikul we gɛt di taytul “What Is the Battle of Armageddon?”
Bɛnifit frɔm Daniɛl in prɔfɛsi we de tɔk bɔt di prɔblɛm dɛn we gɛt fɔ du wit pɔlitiks
Di Baybul bin dɔn tɛl wi klia wan bɔt di prɔblɛm dɛn we de apin na Amɛrika ɛn Britin ɛn we wi lan bɔt dat, i go mek wi tink difrɛn we bɔt di tin dɛn we de apin naw.
Yu go ɔndastand wetin mek Jizɔs bin want di wan dɛn we de fala am nɔ fɔ gɛt ɛnitin fɔ du wit pɔlitiks na dis wɔl. (Jɔn 17:16) Ɛn yu go ɔndastand bak wetin mek Jizɔs we na di wan we Gɔd dɔn pik fɔ rul nain Kiŋdɔm bin tɔk se: “Mi Kiŋdɔom nɔ de na dis wɔl.”—Jɔn 18:36.
Yu go gɛt kɔrej we yu no se di tɛm fɔ lɛ Gɔd in Kiŋdɔm du sɔntin dɔn kam nia, ɛn i go du ɔl wetin i dɔn prɔmis fɔ mɔtalman.—Rɛvɛleshɔn 21:3, 4.
Yu nɔ go wɔri bɔt tumara bambay, ɛn yu nɔ go wɔri igen se di prɔblɛm dɛn we kin apin bitwin kɔntri dɛn go pwɛl di wɔl.—Sam 37:11, 29.
Daniɛl in prɔfɛsi sho se Amɛrika ɛn Britin we tinap fɔ di imej in ankul te to di to dɛn go bi di las wɔl pawa we go rul mɔtalman. Afta da wɔl pawa de nɔ go de igen, Gɔd in Kiŋdɔm we na pafɛkt gɔvmɛnt go rul oba di wɔl frɔm ɛvin!
Fɔ no mɔ bɔt wetin Gɔd in Kiŋdɔm go du fɔ mɔtalman, wach di vidio we gɛt di taytul Wetin Na Gɔd in Kiŋdɔm?
a Rid di bɔks we gɛt di taytul “Us Wɔl Pawa dɛn Daniɛl in Prɔfɛsi Bin Tɔk Bɔt?”
b Jiova na Gɔd in nem. (Sam 83:18) Rid di atikul we gɛt di taytul “Who Is Jehovah?”