Una Kin Avɔyd Pipul dɛn we Nɔ De na Una Rilijɔn Igen?

Wi nɔ kin avɔyd di wan dɛn we bin dɔn baptayz as wan pan Jiova Witnɛs dɛn bɔt we dɔn lɛf fɔ prich to ɔda pipul dɛn, ɔ di wan dɛn we jɔs lɛf fɔ miks wit dɛn kɔmpin Kristian dɛn. Infakt, wi kin tray fɔ ɛp dɛn so dat dɛn go mek dɛn padi biznɛs wit Gɔd tayt bak.

Nɔto wantɛm wantɛm wi kin disfɛloship pɔsin if i du bad bad tin. Bɔt if pɔsin we baptayz mek am abit fɔ de pwɛl Gɔd in lɔ we de insay di Baybul ɛn i nɔ ripɛnt, wi kin avɔyd ɔ disfɛloship di pɔsin. Di Baybul se fɔ: “Pul di pɔsin we nɔ gud kɔmɔt to una.”—Fɔs Lɛta Fɔ Kɔrint 5:13.

Wetin kin apin if di man we disfɛloship in wɛf ɛn in pikin dɛn stil na Jiova Witnɛs? Di pɔsin we disfɛloship nɔ go jɔyn di famili we dɛn de wɔship Gɔd, bɔt dat nɔ min se in biznɛs wit in fambul dɛn dɔn dɔn. Di maredman ɛn in wɛf go stil de lɛk aw mared pipul dɛn fɔ de ɛn dɛn fambul biznɛs kin stil kɔntinyu.

Di wan dɛn we disfɛloship kin atɛnd wi mitin ɔ program dɛn we wi kin gɛt. If dɛn want, di ɛlda dɛn we de na di kɔngrigeshɔn kin ɛp dɛn. Di men rizin we mek dɛn de du dat na fɔ ɛp di pɔsin fɔ mek i go bi Jiova Witnɛs bak. Di wan dɛn we disfɛloship we dɔn lɛf di bad tin dɛn we dɛn bin de du ɛn sho se dɛn rili want fɔ liv dɛn layf di we aw di Baybul se wi kin wɛlkɔm dɛn wan dɛn ya bak na di kɔngrigeshɔn.