Wetin Na di Oli Spirit?
Di Baybul in ansa
Di oli spirit na Gɔd in pawa we i de yuz fɔ du sɔntin. (Mayka 3:8; Lyuk 1:35) Gɔd de sɛn in spirit ɛnisay fɔ du wetin i want.—Sam 104:30, NWT; 139:7, NWT.
Insay di Baybul, dɛn translet di wɔd “spirit” frɔm di Ibru wɔd ruʹach ɛn di Grik wɔd pneuʹma. Bɔku tɛm dɛn wɔd dɛn de kin min Gɔd in pawa we i de yuz fɔ du sɔntin, ɔ oli spirit. (Jɛnɛsis 1:2) Bɔt di Baybul yuz dɛn wɔd dɛn de bak fɔ min ɔda tin dɛn:
Layf.—Abakɔk 2:19; Rɛvɛleshɔn 13:15.
Briz.—Jɛnɛsis 8:1; Jɔn 3:8.
Di layf we de insay mɔtalman ɛn animal.—Job 34:14, 15.
Di we aw pɔsin de tink ɔ biev.—Di Nɔmba Dɛm 14:24.
Spirit pɔsin, i kin bi Gɔd ɛn di enjɛl dɛn.—1 Kiŋ 22:21, NWT; Jɔn 4:24.
Ɔl dɛn minin dɛn ya de tɔk bɔt sɔntin we mɔtalman nɔ de si bɔt we gɛt gud rizɔlt pan di tin dɛn we wi de si. Semweso, Gɔd in spirit jɔs tan “lɛk di briz, we wi nɔ de si, wi nɔ ebul fɔ tɔch am ɛn i pawaful.”—An Expository Dictionary of New Testament Words, we W. E. Vayn rayt.
Di Baybul tɔk se Gɔd in oli spirit kin min bak in “an” ɔ “finga.” (Sam 8:3; 19:1; Lyuk 11:20; kɔmpia Matyu 12:28.) Jɔs lɛk aw pɔsin we de drɔ ɛn pent kin yuz in an ɛn finga dɛn fɔ du in wok, na so Gɔd bin yuz in spirit fɔ du dɛn wok dɛn ya:
Fɔ mek di wan ol wɔl.—Sam 33:6; Ayzaya 66:1, 2.
Fɔ rayt di Baybul.—2 Pita 1:20, 21.
Fɔ du di mirekul dɛn we in savant dɛn trade trade bin de pafɔm ɛn di zil we dɛn bin gɛt fɔ du di prichin wok.—Lyuk 4:18; Akt 1:8; 1 Kɔrintians 12:4-11.
Fɔ ɛp di wan dɛn we de obe am fɔ gɛt fayn kwaliti dɛn.—Galeshians 5:22, 23.
Di oli spirit nɔto pɔsin
We di Baybul kɔl Gɔd in oli spirit as in “an,” “finga,” ɔ “layf,” dat sho se di oli spirit nɔto pɔsin. (Ɛksodɔs 15:8, 10) Pɔsin we de drɔ ɛn pent nɔ de ebul fɔ yuz in an nɔmɔ fɔ wok if in bɔdi ɛn in maynd nɔ sɔpɔt am. Semweso, Gɔd in oli spirit de wok nɔmɔ we Gɔd dayrɛkt am. (Lyuk 11:13) Di Baybul kɔmpia bak Gɔd in spirit to wata ɛn jɔyn am wit wɔd dɛn lɛk fet ɛn fɔ no sɔntin. Ɔl dɛn tin dɛn ya we dɛn kɔmpia di oli spirit to de sho se nɔto pɔsin.—Ayzaya 44:3; Akt 6:5; 2 Kɔrintians 6:6.
Di Baybul sho se Gɔd in nem na Jiova ɛn in Pikin na Jizɔs Krays; bɔt no say nɔ de we i sho se di oli spirit gɛt nem. (Ayzaya 42:8; Lyuk 1:31) Di tɛm we Stivin bin de day we i si wan vishɔn na ɛvin, na tu pɔsin i bin si, nɔto tri. Di Baybul se: “Stivin bin gɛt oli spirit, so i luk ɔp na ɛvin ɛn si Gɔd in glori ɛn Jizɔs tinap na Gɔd in raytan.” (Akt 7:55) Di oli spirit na bin Gɔd in pawa we bin ɛp Stivin fɔ si di vishɔn.
Lay lay tin dɛn we pipul dɛn kin tɔk bɔt di oli spirit
Lay: Insay 1 Jɔn 5:7, 8 na di King James version dɛn rayt se, di “Oli Gost” ɔ oli spirit na pɔsin ɛn i de pat pan di Triniti.
Tru: Insay di King James version , na 1 Jɔn 5:7, 8 dɛn ad di wɔd dɛn “na ɛvin, di Papa, di Wɔd, ɛn di Oli Gost: ɛn dɛn ɔl tri na wan. Ɛn tri tin dɛn de we na witnɛs na di wɔl.” Bɔt di wan dɛn we de du risach dɔn kam fɔ no se di apɔsul Jɔn nɔ bin rayt dɛn wɔd dɛn de ɛn so dɛn nɔ de na di Baybul. Profɛsɔ Bruz M. Mɛtzga bin rayt se: “Dɛn wɔd dɛn de na mekɔp dɛn mekɔp dɛn ɛn dɛn nɔ gɛt rayt fɔ de insay di Nyu Tɛstamɛnt.”—A Textual Commentary on the Greek New Testament.
Lay: Di Baybul tɔk bɔt di oli spirit as pɔsin, ɛn dis sho se di oli spirit na pɔsin.
Tru: Sɔntɛnde di Baybul kin tɔk bɔt di oli spirit as pɔsin, bɔt dat nɔ min se di oli spirit na pɔsin. Di Baybul tɔk bak bɔt sɛns, day, ɛn sin as pɔsin. (Prɔvabs 1:20; Romans 5:17, 21) Fɔ ɛgzampul, di Baybul tɔk bɔt sɛns se i gɛt wok ɛn pikin dɛn, ɛn i tɔk se sin de ful, kil, ɛn milɛ.—Matyu 11:19; Lyuk 7:35; Romans 7:8, 11.
Semweso, we di apɔsul Jɔn bin de kot Jizɔs in wɔd, i tɔk bɔt di oli spirit lɛk se na pɔsin we go “ɛp” (paraclete) we go sho sayn, gayd, tɔk, yɛri, gi glori, ɛn tek. I yuz personal pronouns we dɛn kin yuz insay Inglish fɔ man, lɛk “he” ɔ “him” we i bin de tɔk bɔt di oli spirit we go “ɛp.” (Jɔn 16:7-15) Bɔt i bin du so bikɔs di Grik wɔd fɔ “ɛp” (pa·raʹkle·tos) na noun we dɛn kin yuz fɔ man, so dɛn fɔ yuz pronoun we dɛn kin yuz fɔ man we dɛn de tɔk bɔt am akɔdin to di Grik grama rul. We Jɔn bin de tɔk bɔt di oli spirit ɛn yuz di noun pneuʹma, i yuz di yuz di Inglish pronoun “it” fɔ sho se nɔto pɔsin.—Jɔn 14:16, 17.
Lay: Fɔ baptayz insay di oli spirit in nem sho se di oli spirit na pɔsin.
Tru: Sɔntɛnde we di Baybul kin yuz di wɔd “nem” i kin tinap fɔ pawa. (Dyutarɔnɔmi 18:5, 19-22, NWT; Ɛsta 8:10, NWT) Semweso, insay Inglish dɛn kin yuz di wɔd nem na sɛntɛns lɛk “in the name of the law,” bɔt dis nɔ min se di lɔ na pɔsin. We pɔsin de baptayz insay di oli spirit in “nem,” i sho se di pɔsin biliv di pawa we di oli spirit gɛt ɛn di yuz we Gɔd de yuz am fɔ du wetin i want.—Matyu 28:19.
Lay: Jizɔs in apɔsul dɛn ɛn ɔda disaypul dɛn trade bin biliv se di oli spirit na pɔsin.
Tru: Di Baybul ɛn ivin istri nɔ se dat. Di Encyclopædia Britannica tɔk se: “Dɛn bin kam ɔp wit di aydia fɔ se di Oli Spirit na pɔsin na di Council of Constantinople insay di ia 381.” I bin dɔn pas 250 ia afta di las apɔsul bin day.