Wetin Mek di We Aw Jiova Witnɛs dɛn De Du di Masta in Ivintɛm It Difrɛn Frɔm di We Aw Ɔda Rilijɔn dɛn De Du Am?

Wi de fala wetin di Baybul se bɔt aw fɔ mek di Masta in Ivintɛm It, we dɛn kin kɔl bak di Las Sɔpa, ɛn di Mɛmorial fɔ Jizɔs in day. (1 Kɔrintians 11:​20) Bɔt di tin we bɔku ɔda Kristian dɛn biliv ɛn di we aw dɛn de du di Las Sɔpa difrɛn frɔm wetin di Baybul se.

Wetin mek wi de du am?

Di rizin we mek wi de du di Masta in Ivintɛm It na fɔ mɛmba Jizɔs ɛn sho se wi gladi fɔ we i bin day fɔ wi. (Matyu 20:​28; 1 Kɔrintians 11:​24) Dis nɔto rilijɔs sɛrimoni we de mek Gɔd sɔri fɔ pɔsin ɔ fɔgiv in sin. Di Baybul tich se di wangren tin we de mek Gɔd fɔgiv pɔsin in sin, na we di pɔsin biliv Jizɔs.​—Romans 3:​25; 1 Jɔn 2:​1, 2.

Ɔmɔs tɛm wi de du am insay di ia?

Jizɔs bin tɛl in disaypul dɛn fɔ du di Masta in Ivintɛm It, bɔt i nɔ bin tɛl dɛn ɔmɔs tɛm fɔ du am. (Lyuk 22:​19) Sɔm pipul dɛn fil se dɛn fɔ du am ɛni mɔnt, ɔda wan dɛn fil se dɛn fɔ du am ɛni wik, ɛnide, bɔku tɛm insay di de, ɔ ɔmɔs tɛm pɔsin fil fɔ du am.a Bɔt lɛ wi tɔk bɔt sɔm tin dɛn we wi fɔ tink bɔt.

Jizɔs bin stat di Masta in Ivintɛm It di de fɔ di Ju dɛn Pasova, ɛn i bin day leta da sem de de. (Matyu 26:​1, 2) Dis nɔto bin jɔs mit-ɔpin. Di Skripchɔ dɛn kɔmpia Jizɔs in day to di Pasova ship. (1 Kɔrintians 5:​7, 8) Dɛn bin de sɛlibret di Pasova wan tɛm ɛni ia. (Ɛksodɔs 12:​1-6; Lɛvitikɔs 23:​5) Semweso, Jizɔs in day sɛf na wan tɛm pan ia di fɔstɛm Kristian dɛn bin de sɛlibret am,b ɛn na da sem patan de na di Baybul Jiova Witnɛs dɛn de fala.

Det ɛn tɛm

Di patan we Jizɔs bin yuz fɔ mek di Mɛmorial nɔ jɔs ɛp wi fɔ no ɔmɔs tɛm fɔ du am, bɔt i ɛp wi bak fɔ no di det ɛn tɛm. I bin stat di ivintɛm it afta di san dɔn go dɔŋ Naysan 14, insay di ia 33, akɔdin to Baybul kalɛnda. (Matyu 26:​18-​20, 26) Wi de kɔntinyu fɔ du di Mɛmorial dis sem det ɛni ia, ɛn wi de fala di we aw di fɔstɛm Kristian dɛn bin de du am.c

Pan ɔl we Naysan 14, insay di ia 33 na bin Frayde, da de de kin chenj ɛni ia. Wi de yuz di sem we aw pipul dɛn bin de kalkyulet det insay Jizɔs in tɛm fɔ no ustɛm Naysan 14 fɔ bi ɛni ia, wi nɔ de yuz di Ju kalɛnda we de naw.d

Bred ɛn wayn

We Jizɔs bin want fɔ stat di ivintɛm it, i bin yuz bred we nɔ gɛt yist ɛn rɛd wayn we bin lɛf frɔm di Pasova it. (Matyu 26:​26-​28) Wi de fala Jizɔs in ɛgzampul, bay we wisɛf de yuz bred we nɔ gɛt yist ɔ ɛni ɔda tin insay ɛn plen rɛd wayn, nɔto grep jus ɔ wayn we gɛt shuga, spays, ɔ we dɛn ad ɔda tin pan.

Sɔm Kristian dɛn kin yuz bred we gɛt yist, bɔt we di Baybul kin tɔk bɔt yist bɔku tɛm i kin min sin ɛn kɔrɔpshɔn. (Lyuk 12:​1; 1 Kɔrintians 5:​6-8; Galeshians 5:​7-9) So bred we nɔ gɛt yist ɛn ɛni ɔda tin na di bɛst tin we fit fɔ tinap fɔ Krays in bɔdi we nɔ gɛt sin. (1 Pita 2:​22) Wan ɔda tin we sɔm Kristian dɛn kin du we di Baybul nɔ sɔpɔt na we dɛn de yuz grep jus we nɔ famɛnt as wayn. Sɔm chɔch dɛn kin du dis bikɔs dɛn de tich se di Baybul se wi nɔ fɔ drink rɔm.​—1 Timoti 5:​23.

Di bred wayn nɔto rial flɛsh ɛn blɔd

Di bred we nɔ gɛt yist ɛn di rɛd wayn we dɛn kin pas na di Mɛmorial tinap fɔ sɔntin. Dɛn tinap fɔ Jizɔs in flɛsh ɛn blɔd. Dɛn nɔ de chenj to Jizɔs in rial flɛsh ɛn blɔd ɔ miks wit in rial flɛsh ɛn blɔd lɛk aw sɔm pipul dɛn fil. Lɛ wi tɔk bɔt sɔm tin dɛn na di Baybul we mek wi ɔndastand am so.

• If Jizɔs bin kɔmand in disaypul dɛn fɔ drink in blɔd, dat min se i bin de tɛl dɛn fɔ pwɛl Gɔd in lɔ we se wi nɔ fɔ it blɔd. (Jɛnɛsis 9:​4; Akt 15:​28, 29) Bɔt nɔto so i bi bikɔs Jizɔs nɔ go ɛva tɛl ɔda pipul dɛn fɔ pwɛl Gɔd in lɔ we se blɔd na sɔntin we oli.​—Jɔn 8:​28, 29.

• If di apɔsul dɛn bin gɛt fɔ drink Jizɔs in rial blɔd, i nɔ fɔ bin dɔn tɛl dɛn se i “gɛt fɔ gi” in blɔd, we min se i nɔ sakrifays in layf yet.​—Matyu 26:​28.

• Jizɔs bin sakrifays in layf “wan tɛm nɔmɔ.” (Ibruz 9:​25, 26) Bɔt if di bred ɛn wayn bin de chenj to Jizɔs in flɛsh ɛn blɔd di tɛm we dɛn bin de it di Masta in Ivintɛm It, dat min se di wan dɛn we de it am, go de ripit di sakrifays.

• Jizɔs bin se: “Una go de du dis fɔ mɛmba mi,” nɔto “fɔ sakrifays mi.”​—1 Kɔrintians 11:​24.

Di wan dɛn we biliv transubstantiation, dat na fɔ se di bred ɛn wayn de tɔn to Jizɔs in rial flɛsh ɛn blɔd, kin tɔk dis bikɔs ɔf aw dɛn translet sɔm Baybul vas dɛn. Fɔ ɛgzampul, insay bɔku Baybul transleshɔn dɛn, dɛn rayt se we Jizɔs bin de tɔk bɔt di wayn, i bin se: “Dis na mi blɔd.” (Matyu 26:​28) Bɔt ɔda we fɔ translet wetin Jizɔs bin tɔk kin bi: “Dis min mi blɔd, ” ɔ “Dis tinap fɔ mi blɔd.” Jizɔs kin de yuz metaphor we i de tich, ɛn na di sem tin i bin de du na ya.​—Matyu 13:​34, 35.

Udat dɛn de it di bred ɛn drink di wayn?

We Jiova Witnɛs dɛn kin du di Masta in Ivintɛm It, di wan dɛn we kin it di bred ɛn drink di wayn nɔ bɔku. Wetin mek?

Jizɔs in blɔd bin stat “wan nyu agrimɛnt” we bin pul di agrimɛnt we bin de bitwin Jiova Gɔd ɛn di Izrɛlayt dɛn. (Ibruz 8:​10-​13) Di wan dɛn we de pat ɔf di nyu agrimɛnt na dɛn de it di bred ɛn drink di wayn di tɛm fɔ di Mɛmorial. Dis min se nɔto ɔl Kristian dɛn de it ɛn drink am, bɔt na “di wan dɛn we Gɔd dɔn kɔl” spɛshal we na dɛn de it di bred ɛn drink di wayn. (Ibruz 9:​15; Lyuk 22:​20) Na dɛn wan dɛn ya go rul wit Krays na ɛvin, ɛn di Baybul se na jɔs 144,000 pipul dɛn go gɛt da ɔnɔ de.​—Lyuk 22:​28-​30; Rɛvɛleshɔn 5:​9, 10; 14:​1, 3.

Di “ship dɛn we nɔ bɔku” na dɛn go rul wit Krays, bɔt di “bɔku bɔku pipul dɛn we nɔbɔdi nɔ ebul kɔnt” go gɛt layf we go de sote go na dis wɔl. (Lyuk 12:​32; Rɛvɛleshɔn 7:​9, 10) Pan ɔl we wi we gɛt di op fɔ de na dis wɔl nɔ de it di bred ɛn drink di wayn di tɛm fɔ di Mɛmorial, wi de jɔyn di wan dɛn we de it di bred ɛn drink di wayn fɔ tɛl tɛnki fɔ di sakrifays we Jizɔs mek fɔ wi.​—1 Jɔn 2:​2.