Yu Tink se Dɛn Dɔn Chenj di Baybul?
Nɔ-o. We dɛn bin kɔmpia sɔm fɔs fɔstɛm pepa dɛn we dɛn bin rayt di Baybul pan, dɛn dɔn kam fɔ si se di Baybul nɔ chenj pan ɔl we dɛn bin de kɔpi am na difrɛn difrɛn say dɛn fɔ lɔng lɔng tɛm.
Fɔ se dat min se di wan dɛn we bin de kɔpi am nɔ ɛva mek mistek?
Dɛn dɔn fɛn plɛnti pan di fɔs fɔstɛm pepa dɛn we dɛn bin rayt di Baybul pan. Sɔm ɔf di tin dɛn we dɛn rayt pan dɛn fɔs fɔstɛm pepa dɛn ya bin difrɛn, we sho se mistek dɛn bin de we dɛn bin de kɔpi am. Plɛnti pan di mistek dɛn, nɔto big wan dɛn, ɛn dɛn nɔ chenj di minin we de insay di Baybul. Bɔt tu-tri mistek dɛn de we siriɔs, ɛn i tan lɛk se sɔm pan di wan dɛn we kɔpi di Baybul trade trade bin du dɛn tin dɛn de bay wilful fɔ chenj di Baybul in mɛsej. Lɛ wi tɔk bɔt tu ɛgzampul dɛn:
Sɔm ol ol Baybul transleshɔn dɛn bin translet 1 Jɔn 5:7 as: “na ɛvin, di Papa, di Wɔd, ɛn di Oli Gost, dɛn ɔl tri na wan.” Bɔt sɔm ɔda pepa dɛn we pipul dɛn trɔst dɔn sho se dɛn wɔd dɛn ya nɔ bin de na di orijinal Baybul. Na leta dɛn bin ad dɛn wɔd dɛn de.a So, sɔm Baybul dɛn we de tide we dɛn dɔn translet nɔ yuz dɛn wɔd dɛn de.
Gɔd in nem de plɛnti say dɛn na di fɔs fɔstɛm pepa dɛn we dɛn bin rayt di Baybul pan. Bɔt, bɔku Baybul transleshɔn dɛn dɔn chenj am ɛn yuz taytul dɛn lɛk “Lɔd” ɔ “Gɔd.”
Aw wi shɔ se bɔku ɔda mistek dɛn nɔ de igen?
Rayt naw, di fɔs fɔstɛm pepa dɛn we dɛn dɔn fɛn so bɔku dat na naw i izi fɔ si mistek dɛn pas ɛni ɔda tɛm.b We dɛn kɔmpia dɛn pepa dɛn ya, wetin dɛn dɔn kam fɔ no we i kam to di Baybul in kɔrɛkt wan tide?
We wan masta sabi bukman we nem Wiliam H. Grin bin de tɔk bɔt di Ibru Skripchɔ Dɛn (we dɛn kin kɔl di “Ol Tɛstamɛnt”), i bin se: “I rayt fɔ se no ɔda wok nɔ de we dɛn kip we stil gɛt kɔrɛkt tin dɛn.”
Wan masta sabi bukman we stɔdi di Baybul we nem F. F. Brus bin rayt bɔt di Kristian Grik Skripchɔ Dɛn ɔ di “Nyu Tɛstamɛnt” se: “Wi gɛt bɔku ɛvidɛns dɛn fɔ sho se di Nyu Tɛstamɛnt kɔrɛkt pas bɔku ɔda buk dɛn we dɛn bin rayt trade trade, bɔt pipul dɛn nɔ de ɛva dawt if dɛn buk dɛn de kɔrɛkt.”
Sa Frɛdrik Kenyɔn we na masta sabi bukman we stɔdi bɔt dɛn fɔs fɔstɛm pepa dɛn we dɛn bin rayt di Baybul pan, bin se pɔsin “kin ol di wan ol Baybul na in an ɛn nɔ fred fɔ tɔk se fɔ tru na Gɔd in Wɔd i ol. Ɛn frɔm trade trade te tide, no impɔtant tin nɔ lɔs.”
Us ɔda rizin dɛn de we mek wi gɛt kɔnfidɛns se di tin dɛn we dɛn kɔpi na di Baybul kɔrɛkt?
Di Ju pipul dɛn ɛn di Kristian dɛn we bin kɔpi di Baybul nɔ bin pul di pat dɛn we sho di siriɔs mistek dɛn we Gɔd in pipul dɛn bin mek.c (Di Nɔmba Dɛm 20:12; Sɛkɛn Samiɛl 11:2-4; Galeshians 2:11-14) Dɔn bak, dɛn nɔ bin pul di pat dɛn we sho se di Ju pipul dɛn as neshɔn nɔ bin de obe Jiova, ɛn di pat dɛn we tɔk bɔt di lɔ dɛn we mɔtalman bin de mek fɔ dɛnsɛf. (Ozie 4:2; Malakay 2:8, 9; Matyu 23:8, 9; 1 Jɔn 5:21) We dɛn pipul dɛn ya kɔpi dɛn pat dɛn ya na di Baybul kɔrɛkt wan, dɛn sho se dɛn na pipul dɛn we wi kin trɔst, ɛn dɛn gɛt dip rɛspɛkt fɔ Gɔd in oli Wɔd.
Yu nɔ tink se Gɔd we dayrɛkt pipul dɛn fɔ rayt di Baybul, go mek ɔl wetin dɛn rayt stil de kɔrɛkt wan?d (Ayzaya 40:8; 1 Pita 1:24, 25) Pantap dat, i nɔ jɔs want di Baybul fɔ bɛnifit pipul dɛn we bin de trade trade, i want fɔ mek i bɛnifit wisɛf tide. (1 Kɔrintians 10:11) Infakt, “ɔl di tin dɛn we dɛn bin dɔn rayt trade na fɔ tich wi, so dat di bia we wi de bia ɛn di kɔrej we di Skripchɔ dɛn de kɔrej wi go mek wi gɛt op.”—Romans 15:4.
Jizɔs ɛn in disaypul dɛn bin kot frɔm di Ibru Skripchɔ Dɛn we ɔda pipul dɛn bin dɔn kɔpi trade trade, ɛn dɛn nɔ ɛva tɔk se dɛn skripchɔ dɛn de nɔ kɔrɛkt.—Lyuk 4:16-21; Akt 17:1-3.
a Dɛn wɔd dɛn ya nɔ de na di Kodɛks Saynetikɔs, di Kodɛks Alɛksandrinɔs, di Vatikan Manyuskript 1209, di orijinal Latin Vulgate, di Filosinian-Aklian Siriak Vashɔn, ɔ di Siriak Peshitta.
b Fɔ ɛgzampul, dɛn dɔn fɛn pas 5,000 pepa dɛn we dɛn rayt insay Grik we gɛt fɔ du wit di Nyu Tɛstamɛnt, ɔ di Kristian Grik Skripchɔ Dɛn.
c Di Baybul nɔ ɛva se di pipul dɛn we Gɔd de yuz nɔ de ɛva mek mistek. Infakt, na dat mek di Baybul se: “Nɔbɔdi nɔ de we nɔ de kɔmit sin.”—Fɔs Kiŋ 8:46.
d Di Baybul se pan ɔl we Gɔd nɔ bin tɛl di man dɛn we rayt di Baybul ɔl di wɔd dɛn we dɛn fɔ rayt, i bin gayd di we aw dɛn bin de tink.—2 Timoti 3:16, 17; 2 Pita 1:21.