YƆŊ PIPUL DƐN KIN AKS
Aw di Baybul Kin Ɛp Mi?—Pat 1: Tray fɔ No Yu Baybul
“A bin tray fɔ rid di Baybul, bɔt a kin fred bikɔs i tu lɔng!”—Briana, 15.
Na so yu de fil? Dis atikul go ɛp yu!
Wetin mek a fɔ rid di Baybul?
We yu de tink bɔt fɔ rid di Baybul, yu kin fil se yu nɔ go ɛnjɔy am? If na so i bi, wi kin ɔndastand. Sɔntɛm, yu go tink se di Baybul na buk we gɛt bɔku bɔku pej dɛn wit smɔl raytin dɛn ɛn no pikchɔ. Dis min se yu kin ɛnjɔy fɔ wach tɛlivishɔn ɛn vidio dɛn mɔ.
Bɔt tink bɔt dis: If yu fɛn wan ol big bɔks we gɛt valyu tin dɛn, yu nɔ go want fɔ no wetin de insay?
Di Baybul tan lɛk dis bɔks we gɛt valyu tin dɛn. I gɛt bɔku valyu tin dɛn we de mek yu gɛt sɛns we go ɛp yu fɔ
Disayd fɔ du di rayt tin
Bi padi to yu mama ɛn papa.
Fɛn tru tru padi dɛn
Bia wit tin dɛn we de strɛs yu
Aw ol ol buk go ɛp wi tide? Na bikɔs “na Gɔd dayrɛkt di wan dɛn we rayt ɔl di Skripchɔ dɛn.” (2 Timoti 3:16) Dat min se di advays dɛn we de na di Baybul kɔmɔt frɔm di bɛst pɔsin.
Di Baybul tan lɛk bɔks usay sɛns we fiba lɛk valyu tin dɛn de.
Aw a fɔ rid di Baybul?
Wan we fɔ du am na fɔ rid di Baybul frɔm Gɛnɛsis to Rɛvɛleshɔn. Dat go mek yu no bɔt ɔl wetin di Baybul de tɔk bɔt. Bɔku we dɛn de fɔ rid di Baybul. Lɛ wi si tu ɛgzampul dɛn:
Yu kin rid di 66 buk dɛn na di Baybul frɔm Gɛnɛsis to Rɛvɛleshɔn, lɛk aw dɛn rayt dɛn.
Yu kin rid di Baybul bay ɔda dat na, di we aw wan tin gɛt fɔ du wit ɔda tin dɛn we apin.
Tin we de ɛp: Apɛndiks A7 na di New World Translation gɛt wan list we de bay ɔda we de sho di men tin dɛn we bin apin na Jizɔs in layf we i bin de na dis wɔl.
Di sɛkɔn we fɔ rid di Baybul na fɔ pik wan akawnt we gɛt sɔntin fɔ du wit wetin de mɔna yu. Fɔ ɛgzampul:
Yu go lɛk fɔ fɛn padi dɛn we yu kin abop pan? Rid di stori bɔt Jonɛtan ɛn Devid. (Fɔs Samiɛl, chapta 18-20) Dɔn yuz di wokshit we in taytul na “How to Find Loyal Friends” fɔ lan fayn lɛsin dɛn frɔm di akawnt.
Yu go lɛk fɔ gɛt mɔ trɛnk fɔ tinap tranga wan we sɔntin tɛmt yu? Rid di stori bɔt aw Josɛf bin tinap tranga wan we sɔntin tɛmt am. (Jɛnɛsis, chapta 39) Dɔn yuz di wokshit dɛn we dɛn taytul na “How to Resist Temptation . . . Joseph—Pat 1” ɛn “Falsely Accused! Joseph—Pat 2” fɔ lan fayn lɛsin dɛn frɔm di akawnt.
Yu go lɛk fɔ lan aw prea kin ɛp yu? Rid Nɛimaya in stori. (Nɛimaya, chapta 2) Dɔn yuz di wokshit we gɛt di taytul “God Answered His Prayer” fɔ lan fayn lɛsin dɛn frɔm di akawnt.
Tin we de ɛp: We yu de rid yu Baybul, mek shɔ se di ples we yu de kwayɛt so dat yu go ebul fɔ pe atɛnshɔn.
Di tɔd we fɔ rid di Baybul na fɔ pik wan akawnt ɔ sam, dɔn yu rid am ɛn tink bɔt aw yu kin aplay am. We yu dɔn fɔ rid, aks yusɛf dɛn kwɛstyɔn dɛn ya:
Wetin mek Jiova put dis na di Baybul?
Wetin dis tɛl mi bɔt uskayn pɔsin Jiova bi ɔ di we aw i de du tin?
Aw a kin aplay wetin a dɔn lan na mi layf?
Tin we de ɛp: Yuz di New World Translation (Study Bible) fɔ fɛn vidio dɛn, map dɛn, ɛn ɔda tin dɛn we go ɛp yu fɔ rili ɛnjɔy yu Baybul ridin.