Wetin di Baybul Se bɔt Pwɛl-Bɛlɛ?
Di Baybul in ansa
Di Baybul nɔ yuz di wɔd “pwɛl-bɛlɛ” fɔ min we pɔsin de kil pikin we de na bɛlɛ bay wilful. Bɔt bɔku Baybul vas dɛn sho aw Gɔd de si mɔtalman layf ivin pikin we dɛn nɔ bɔn yet in layf.
Layf na gift frɔm Gɔd. (Jɛnɛsis 9:6; Sam 36:9) I valyu ɔlman in layf, i ivin valyu pikin we dɛn nɔ bɔn yet in layf. So if pɔsin kil pikin we dɛn nɔ bɔn yet bay wilful, na di sem as we pɔsin de kil ɔda pɔsin.
DI Lɔ we Gɔd bin gi di Izrɛlayt dɛn bin se: “If man dɛn de fɛt dɔn dɛn jam bɛlɛ-uman ɛn damej am, dɔn di uman bɔn bifo in tɛm, bɔt di uman ɔ di pikin nɔ day, di pɔsin we gilti fɔ pe fɔ di damej we di uman in man tɛl am fɔ pe; ɛn i fɔ pe akɔdin to wetin di jɔj dɛn disayd. Bɔt if di uman ɔ di pikin day, i fɔ pe layf fɔ layf.”—Ɛksodɔs 21:22, 23, NWT.a
Ustɛm mɔtalman in layf de bigin?
Frɔm di tɛm we dɛn gɛt pikin in bɛlɛ, Gɔd de si am as pɔsin we de alayv. Gɔd kin tɔk ɔltɛm insay in Wɔd, di Baybul se pikin we dɛn nɔ bɔn yet na rial pɔsin. Lɛ wi tɔk bɔt sɔm ɛgzampul dɛn we de sho se Gɔd de si pikin we dɛn nɔ bɔn yet di sem we aw i de si pikin we dɛn dɔn ɔlrɛdi bɔn.
Kiŋ Devid bin rayt bɔt Gɔd se: “Yu bin dɔn si mi bifo a bɔn.” (Sam 139:16) Gɔd bin de si Devid as pɔsin ivin bifo dɛn bɔn am.
Dɔn bak, Gɔd bin no se i go gɛt spɛshal wok fɔ di prɔfɛt Jɛrimaya bifo dɛn bɔn am. Gɔd bin tɛl am se: “Bifo a mek yu na yu mami in bɛlɛ, a bin dɔn no yu, ɛn bifo yu bɔn, a bin dɔn kɔnsikret yu fɔ mi wok. A pik yu fɔ bi prɔfɛt to ɔl di neshɔn dɛn.”—Jɛrimaya 1:5.
Lyuk we na wan pan di man dɛn we rayt di Baybul ɛn we na dɔktɔ bin yuz di sem Grik wɔd fɔ tɔk bɔt pikin we dɛn nɔ bɔn yet ɛn pikin we dɛn jɔs bɔn.—Lyuk 1:41; 2:12, 16.
Gɔd go fɔgiv pɔsin we bin dɔn pwɛl bɛlɛ?
Gɔd go fɔgiv di wan dɛn we bin dɔn pwɛl-bɛlɛ trade. Dɛn nɔ nid fɔ fil gilti pasmak if dɛn de si layf di we aw Gɔd de si am naw. Di Baybul se: “PAPA GƆD [“Jiova,” NWT] gɛt sɔri-at bad,. . . lɛkɛ aw Ist de fa frɔm Wɛst, na so PAPA GƆD dɔn push wi sin fa frɔm wi.”b (Sam 103:8-12) Jiova go fɔgiv ɔl di wan dɛn we rili sɔri ɛn we dɔn ripɛnt frɔm di sin dɛn we dɛn bin dɔn kɔmit trade, ivin di wan dɛn we bin dɔn pwɛl bɛlɛ.—Sam 86:5.
I bad fɔ pwɛl-bɛlɛ if di mama ɔ di pikin in layf de pan denja?
We wi luk wetin di Baybul se bɔt pikin we dɛn nɔ bɔn yet in layf, pɔsin nɔ go gɛt rayt fɔ pwɛl bɛlɛ jɔs bikɔs dat go kɔz wɛlbɔdi prɔblɛm fɔ di mama ɔ di pikin.
Wetin fɔ du if di tɛm we dɛn de bɔn di pikin imajɛnsi de fɔ pik udat fɔ sev bitwin di mama ɛn di pikin? If da kayn tin apin, di wan dɛn we gɛt rayt fɔ disayd fɔ disayd fɔ dɛnsɛf udat in layf dɛn go sev.
a Sɔm transleshɔn dɛn kin mek i tan lɛk se insay dis lɔ di tin we impɔtant na wetin apin to di mama, nɔto wetin apin to di pikin we de insay in bɛlɛ. Bɔt di Ibru wɔd dɛn tɔk bɔt sɔntin we apin to di mama ɔ di pikin.
b Jiova na Gɔd in nem insay di Baybul.—Sam 83:18, NWT.